ཨ་དབྱིས་དྲག་རྒོལ་བྱས་པའི་ནང་དབྱི་རན་གྱི་མི500ལྷག་གྲོངས་པ།

རྩོམ་སྒྲིག ཀླུ་མོ་མཚོ།  ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།  བཤེར་འབེབས། རིན་ཆེན་ཚེ་རིང་།

 ཨ་རི་དང་དབྱི་སི་རལ་གྱིས་དྲག་རྒོལ་བྱས་པའི་ནང་དབྱི་རན་གྱི་མི500ལྷག་གྲོངས་ཡོད། དབྱི་རན་གྱི་ཟླ་གསར་དམར་པོ་ཚོགས་པས་བསྡོམས་རྩིས་བརྒྱབ་པར་གཞིགས་ན། ཨ་རི་དང་དབྱི་སི་རལ་གྱིས་དབྱི་རན་ལ་དྲག་རྒོལ་བྱས་པའི་ནང་མི555གྲོངས་ཡོད། དབྱི་རན་གྱི་ཆེས་མཐོའི་རྒྱལ་ཁབ་བདེ་འཇགས་ཨུ་ཡོན་ལྷན་ཁང་གི་དྲུང་ཡིག་ལ་ལི་ཅ་ཉི་ཡིས་ཚེས2ཉིན་ཨ་རིའི་བར་དབྱེན་འབྱེད་གྲོས་མོལ་བྱེད་མི་སྲིད། དབྱི་རན་གྱིས་ཡུན་རིང་དམག་འཐབ་བྱ་རྒྱུའི་གྲ་སྒྲིག་བྱས་ཟིན་ཞེས་བརྗོད་འདུག ཨ་རིའི་ཀྲུང་དབྱང་དམག་སྤྱི་པུ་ཡིས་སྤེལ་བའི་གསལ་བསྒྲགས་ནང་། མིག་སྔར་ཨ་རིའི་དམག་མི6དབྱི་རན་ལ་བྱ་སྤྱོད་སྤེལ་སྐབས་གྲོངས་ཡོད་ཅེས་བརྗོད་འདུག  

 གཞན་ཡང་། ས་གནས་དེ་གའི་དུས་ཚོད་ཟླ3ཚེས2ཉིན། ཨ་རིའི་ཀྲུང་དབྱང་དམག་སྤྱི་པུ་ཡིས་གསལ་བསྒྲགས་སྤེལ་བའི་ནང་། ཨ་རིའི F15Eརྟགས་ཅན་གྱི་དམག་འཐབ་གནམ་གྲུ་གསུམ་གྱིས་ཁུ་ཝེ་ཐེར་བྱ་སྤྱོད་སྤེལ་སྐབས་ཕལ་ཆེར་འཕེན་ནོར་ཤོར་ནས་ལྷུངས་ཡོད་མོད། ཡིན་ནའང་འཕུར་སྐྱོད་པ་བདེ་འཇགས་ངང་གནས་ཡོད་ཅེས་དང་། གསལ་བསྒྲགས་ནང་། དོན་རྐྱེན་དེའི་འབྱུང་རྐྱེན་ལ་བརྟག་དཔྱད་བྱེད་མུས་ཡིན་ཞེས་བརྗོད་འདུག 

 ཉིན་དེའི་སྔ་དྲོར། དབྱི་རན་གྱི་ཧ་དཱ་མུའུ•ཨན་པི་ཡ་ཀྲུང་དབྱང་དམག་སྤྱི་པུ་ཡིས་གནས་འཕྲིན་སྤེལ་བའི་ནང་། ཨ་རིའི་དམག་གི་དམག་འཐབ་གནམ་གྲུ་གསུམ་དབྱི་རན་གྱི་མཁའ་ཟོན་མ་ལག་གིས་གཏོར་ལྷུང་བཏང་ཡོད་ཅེས་བརྗོད་འདུག