གནའ་མཁར་སྟོང་འཁོར་རྒྱལ་ཁབ་རིམ་པའི་མཚན་མོའི་རིག་གནས་གནས་སྐོར་གྱི་འཛད་སྤྱོད་འདུ་འཛི་ཁུལ་དུ་བདམས།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་སྔོན་ཞིང་ཆེན་མི་དམངས་སྲིད་གཞུང་བོད་ཡིག་དྲ་བ། བཤེར་འབེབས། རིན་ཆེན་ཚེ་རིང་།

ཉེ་སྔོན། གསར་འགོད་པས་མཚོ་སྔོན་ཞིང་ཆེན་ཟི་ལིང་གྲོང་ཁྱེར་སྟོང་སྐོར་རྫོང་ཏང་ཨུའི་དྲིལ་སྒྲོག་པུ་ནས་ཤེས་གསལ་ལྟར་ནས། སྟོང་སྐོར་རྫོང་གི་གནའ་མཁར་སྟོང་འཁོར་དེ་རྒྱལ་ཁབ་ཀྱི་མཚན་མོའི་རིག་གནས་གནས་སྐོར་གྱི་འཛད་སྤྱོད་འདུ་འཛི་ཁུལ་སྐོར་ཁག་གསུམ་པར་བདམས།

གནའ་མཁར་སྟོང་འཁོར་ནི་ཐང་ལམ637ཚོང་ལས་སྣ་འཛོམས་ཁྲོམ་ར་དང་། ལེ་མེང་ཚོང་ལས་རྐང་བགྲོད་སྲང་ལམ་གཉིས་ཀྱི་རྗེས་སུ་རྒྱལ་ཁབ་རིམ་པའི་མཚན་མོའི་རིག་གནས་གནས་སྐོར་གྱི་འཛད་སྤྱོད་འདུ་འཛི་ཁུལ་གྲས་སུ་བདམས་པའི་མཚོ་སྔོན་ཞིང་ཆེན་གྱི་ལྗོངས་ཁུལ་གསུམ་པ་རེད།  སྟོང་སྐོར་རྫོང་གིས་ཤར་ནུབ་མཉམ་འབྲེལ་མཉམ་ལས་ཀྱི་གོ་སྐབས་དམ་འཛིན་གང་ལེགས་བྱས་ཏེ།  ནན་ཅིང་རིག་གནས་གནས་སྐོར་སྡེ་ཤོག་དང་འབྲེལ་སྦྱོར་ཐོག་མ་དངུལ་ལེགས་སྒྲིག་བྱས་ཤིང་། ཅང་སུའུ་ཡི་མི་ཁྲི་ཚོ་མཚོ་སྔོན་དུ་གནས་སྐོར་དུ་འགྲོ་བ་དང་དམངས་ཕན་འཛད་སྤྱོད་འཛིན་བྱང་སྤྲོད་པ་ལ་སོགས་ཀྱི་བྱེད་སྒོ་སྤེལ།    སྤུས་རྟགས་ཅན་གྱི་ཚོང་ཁང་གི་ཚོང་འགུགས་ལ་ཤུགས་བསྣན་ཏེ།  ཁྱད་ལྡན་ཟས་རིགས་དང་། ཨར་ཁང་དམངས་ཤག  སྤྲོ་གསེང་རོལ་རྩེད་རིགས་ཀྱི་གཉེར་སྐྱོང་རྣམ་པ་ནང་འདྲེན་བྱས་པ་དང་། “ཟས་སྡོད་འགྲོ་གསུམ་དང་གནས་སྐོར་ཉོ་སྒྲུབ་རོལ་རྩེད་གསུམ”གྱི་ལེ་ལག་འཐུས་ཚང་དུ་བཏང་ནས་གནས་སྐོར་བའི་མྱོང་རོལ་ཇེ་ཆེར་བཏང་།  “དྲ་གྲགས་ཚོང་ཁང”བཏོད་པ་དམིགས་འབེན་བྱས་ཏེ།  ཞིང་ཆེན་ཕྱི་ནང་གི་དྲ་གྲགས་བར་རང་འགུལ་གྱིས་འབྲེལ་བ་བྱས་ནས་ཚོང་ཁང་འོས་སྦྱོར་བྱས།       

ལོ་རྒྱུས་གནའ་ཤུལ་སྔོག་འདོན་དང་། ལེགས་སྒྲིག  འགྲེལ་བརྗོད་བྱ་བ་ལེགས་པར་བསྒྲུབ་ཏེ།  གཤེན་རྗེ་ལྷ་ཁང་གི་ལྡེབས་རིས་ཞིག་གསོ་བྱེད་པའི་བྱ་བར་མགྱོགས་མྱུར་སྐུལ་འདེད་བྱས་ཤིང་། སྲང་ལམ་གྱི་ལོ་རྒྱུས་རིང་བོའི་ཁང་པ་དང་། མི་སྣ་གྲགས་ཅན་གྱི་གཞིས་ཁྱིམ། སྲོལ་རྒྱུས་ཚོང་རྟགས་སོགས་ཞིག་གསོ་བྱས་པ་དང་། གནའ་མཁར་གྱི་རིག་གནས་ལ་ཕྱོགས་ཡོངས་གསོན་ཉམས་ཤར།   ཤར་ནུབ་སློབ་ཆེན་བར་གྱི་མཉམ་ལས་ལ་བརྟེན་ནས་སྟོང་སྐོར་རྫོང་དངོས་མང་བཤམས་སྟོན་ཁང་གི་ཡིག་ཚགས་ཇེ་རྒྱས་སུ་བཏང་ཞིང་།  རིག་རྫས་རྙིང་བ་འགྲེམ་སྟོན་གྱི་སྤྱི་ཁོག་ཡང་བསྐྱར་གསར་དུ་བསྒྲིགས་ཏེ་ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་འགྲེམ་སྟོན་ཚོམས་ཆེན་དང་ཀྲུང་ཧྭ་མི་རིགས་ཀྱི་སྣང་བརྙན་སྟེ་སྟོང་འཁོར་གྱི་མ་དཔེ་བསྐྲུན། 

“དུས་ཚིགས་རེ་རེར་བརྗོད་དོན་རེ་དང་།  ཟླ་བ་རེ་རེར་བྱེད་སྒོ་རེ”ཡི་རིགས་ལམ་ལྟར་དུ།   གནའ་མཁར་རིག་གནས་འཁྲབ་སྟོན་མུ་མཐུད་དུ་ཇུས་འགོད་བྱས་ཏེ།  མཚོ་སྔོན་ཞིང་ཆེན་འཁྲབ་སྟོན་སྡེ་ཤོག་དང་ཟི་ལིང་སྒྱུ་རྩལ་ཟློས་གར་ཁང་བར་མཉམ་འབྲེལ་བྱས་ནས་སྟོང་འཁོར་གནའ་མཁར་གྱི་ཡུལ་དུས་རིག་གནས་གནས་སྐོར་སྒྱུ་རྩལ་འཁྲབ་སྟོན་གྱི་ཇུས་གཞི་བཟོས་པ་དང་།  ཐང་བོད་གནའ་ལམ་གྱི་འོད་སྟོང་འབར་པའི་སྣང་ཚུལ་ཡར་བསྐྱར་མངོན་ནས་སྟོང་སྐོར་གྱི་རིག་གནས་གནས་སྐོར་གོང་སྤེལ་ལ་ནུས་ཤུགས་གསར་པ་བསྩལ།