༄༅། །ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། ལྷ་ས་གྲོང་ཁྱེར་བོད་སྐད་ཨུ་ལྷན་གཞུང་ལས་ཁང་།  བཤེར་འབེབས། རིན་ཆེན་ཚེ་རིང་།

ལེའུ་ལྔ་པ། གཏན་འབེབས་གཞན་དག་གི་སྐོར།

དོན་ཚན་སོ་དྲུག་པ། གྲ་སྒྲིག་ཏང་ཡོན་གྱིས་ཏང་གི་སྒྲིག་ཁྲིམས་དང་འགལ་ཞིང་ཉེས་ཚབས་ཆུང་ཙམ་ཡིན་པའི་དབང་གིས་གྲ་སྒྲིག་ཏང་ཡོན་གྱི་ཐོབ་ཐང་སོར་འཇོག་བྱེད་ཆོག་གི་ཡོད་ན། ཏང་རྩ་འཛུགས་ཀྱིས་དེར་སྐྱོན་བརྗོད་སློབ་གསོ་གཏོང་བའམ་དེའི་གྲ་སྒྲིག་དུས་ཡུན་རིང་དུ་གཏོང་དགོས། ཉེས་ཚབས་ཆེ་ཙམ་ཡིན་པར་དེའི་གྲ་སྒྲིག་ཏང་ཡོན་གྱི་ཐོབ་ཐང་ཕྱིར་འཐེན་བྱེད་དགོས།

དོན་ཚན་སོ་བདུན་པ། སྒྲིག་འགལ་བྱས་རྗེས་གར་སོང་ཆ་མེད་དུ་གྱུར་པའི་ཏང་ཡོན་ལ་གནས་ཚུལ་མི་འདྲ་བར་གཞིགས་ནས་ཐག་གཅོད་བྱེད་དགོས་པ་སྟེ།

(གཅིག) སྒྲིག་འགལ་གྱི་བྱ་སྤྱོད་ཚབས་ཆེན་ཡོད་པས། ཏང་གི་སྐྱིད་སྡུག་ནས་འབུད་པའི་ཆད་པ་གཅོད་དགོས་ན། ཏང་རྩ་འཛུགས་ཀྱིས་ཏང་གི་སྐྱིད་སྡུག་ནས་འབུད་རྒྱུའི་ཐག་གཅོད་བྱེད་དགོས།

(གཉིས) གོང་འཁོད་ནང་གསེས་དོན་ཚན་ནང་གཏན་འབེབས་བྱས་པའི་གནས་ཚུལ་ཕུད། གར་སོང་ཆ་མེད་དུ་གྱུར་ནས་དུས་ཡུན་ཟླ་དྲུག་ལས་ཡོལ་བ་ཡིན་ན། ཏང་རྩ་འཛུགས་ཀྱིས་ཏང་གི་སྒྲིག་ཡིག་གི་གཏན་འབེབས་གཞིར་བཟུང་ནས་དེ་ཉིད་མིང་ཁོངས་ནས་འབུད་དགོས།

དོན་ཚན་སོ་བརྒྱད་པ། སྒྲིག་འགལ་ཏང་ཡོན་ལ་ཏང་རྩ་འཛུགས་ཀྱིས་ཆད་པ་གཅོད་རྒྱུའི་ཐག་གཅོད་མ་བྱས་གོང་ཤི་བ་དང་། ཡང་ན་ཤི་བའི་རྗེས་སུ་དེར་སྒྲིག་ཁྲིམས་ལས་འགལ་བའི་བྱ་སྤྱོད་ཚབས་ཆེན་ཡོད་མྱོང་བ་ཤེས་རྟོགས་བྱུང་ཞིང་། ཏང་གི་སྐྱིད་སྡུག་ནས་འབུད་པའི་ཆད་པ་གཅོད་དགོས་རིགས། ཏང་གི་སྐྱིད་སྡུག་ནས་འབུད་རྒྱུ། ཏང་ནང་བཞག་ནས་ལྟ་ཞིབ་བྱ་རྒྱུ་མན་གྱི་ཆད་པ་གཅོད་དགོས་རིགས་ལ་ཏང་གི་སྒྲིག་ཁྲིམས་དང་འགལ་བའི་ཡིག་ཐོག་གི་སྡོམ་ཚིག་དང་བབ་མཚུངས་ཀྱི་ཐག་གཅོད་བྱ་རྒྱུ།

དོན་ཚན་སོ་དགུ་པ། སྒྲིག་འགལ་བྱ་སྤྱོད་ཀྱི་འབྲེལ་ཡོད་འགན་འཁྲིའི་མི་སྣའི་དབྱེ་བ་ནི།

(གཅིག) ཐད་ཀའི་འགན་འཁྲི་ཡོད་མཁན་ཞེས་པ་ནི་དེའི་འགན་འཁྲིའི་ཁྱབ་ཁོངས་ནང་རང་ཉིད་ཀྱི་འགན་འཁྲི་མ་བསྒྲུབས་པའམ་འགན་འཁྲི་ཡང་དག་མ་བསྒྲུབས་པ་ལས་བྱུང་བའི་གྱོང་གུན་ནམ་མཇུག་འབྲས་ལ་ཐག་གཅོད་རང་བཞིན་གྱི་ནུས་པ་ཐོན་པའི་ཏང་ཡོན་ནམ་ཏང་ཡོན་མགོ་ཁྲིད་ལས་བྱེད་པར་གོ་དགོས།

(གཉིས) མགོ་ཁྲིད་ཀྱི་འགན་འཁྲི་ཡོད་མཁན་གཙོ་བོ་ཞེས་པ་ནི་དེའི་འགན་འཁྲིའི་ཁྱབ་ཁོངས་ནང་གཙོ་སྐྱོང་བྱེད་པའི་ལས་ཀའི་འགན་འཁྲི་མ་བསྒྲུབས་པའམ་འགན་འཁྲི་ཡང་དག་མ་བསྒྲུབས་པ་ལས་བྱུང་བའི་གྱོང་གུན་ནམ་མཇུག་འབྲས་ལ་ཐད་ཀའི་མགོ་ཁྲིད་ཀྱི་འགན་འཁྲི་ཡོད་པའི་ཏང་ཡོན་མགོ་ཁྲིད་ལས་བྱེད་པར་གོ་དགོས།

(གསུམ) མགོ་ཁྲིད་ཀྱི་འགན་འཁྲི་ཡོད་མཁན་གལ་ཆེན་ཞེས་པ་ནི་དེའི་འགན་འཁྲིའི་ཁྱབ་ཁོངས་ནང་དོ་དམ་བྱེད་དགོས་པའི་ལས་ཀའམ་ཐེ་ཞུགས་ཀྱིས་ཐག་གཅོད་དགོས་པའི་ལས་ཀའི་འགན་འཁྲི་མ་བསྒྲུབས་པའམ་འགན་འཁྲི་ཡང་དག་མ་བསྒྲུབས་པ་ལས་བྱུང་བའི་གྱོང་གུན་ནམ་མཇུག་འབྲས་ལ་འགོ་ཁྲིད་ཀྱི་འགན་འཁྲི་ཕལ་བ་ཡོད་མཁན་ཏང་ཡོན་མགོ་ཁྲིད་ལས་བྱེད་པར་གོ་དགོས། 

སྲོལ་ཡིག་འདིའི་ནང་མགོ་ཁྲིད་ཀྱི་འགན་འཁྲི་ཡོད་མཁན་ཞེས་པའི་ཁོངས་སུ་མགོ་ཁྲིད་ཀྱི་འགན་འཁྲི་ཡོད་མཁན་གཙོ་བོ་དང་མགོ་ཁྲིད་ཀྱི་འགན་འཁྲི་ཡོད་མཁན་གལ་ཆེན་ཚུད་ཡོད། 

དོན་ཚན་བཞི་བཅུ་པ། སྲོལ་ཡིག་འདིའི་ནང་བརྗོད་པའི་རང་འགུལ་གྱིས་ངོས་ལེན་ཞུ་བ་ཞེས་པ་ནི་སྒྲིག་འགལ་གྱི་དོགས་གཞི་ཡོད་པའི་ཏང་ཡོན་གྱིས་རྩ་འཛུགས་ནས་ཁ་བརྡ་དང་ཡིག་ཐོག་འདྲི་རྩད། ཐོག་མའི་དཔྱད་ཞིབ་བཅས་མ་བྱས་གོང་འབྲེལ་ཡོད་རྩ་འཛུགས་ལ་རང་ཉིད་ཀྱི་གནད་དོན་ངོས་ལེན་ཞུ་བ་དང་། ཡང་ན་ཁ་བརྡ་དང་ཡིག་ཐོག་འདྲི་རྩད། ཐོག་མའི་དཔྱད་ཞིབ། གྱོད་ཁོངས་སུ་བཅུག་ནས་ཞིབ་བཤེར་བཅས་བྱེད་རིང་རྩ་འཛུགས་ཀྱིས་ཤེས་མེད་པའི་གནད་དོན་ངོས་ལེན་ཞུ་བར་ཟེར།

དོན་ཚན་ཞེ་གཅིག་པ། འགན་རིམ་དང་། གོ་གནས་ཁེར་རྐྱང་གི་རིམ་སྟར་རིམ་པའི་འགན་འཁུར་བའི་ཏང་ཡོན་ལས་བྱེད་པ་ཏང་གི་སྒྲིག་ཁྲིམས་ལས་འགལ་ནས་ཆད་པ་ཕོག་པ་དང་། དེའི་འགན་རིམ་དང་གོ་གནས་ཁེར་རྐྱང་གི་རིམ་སྟར་རིམ་པར་ལེགས་སྒྲིག་བྱེད་དགོས་རིགས། སྲོལ་ཡིག་འདིའི་ཏང་ཕྱིའི་གོ་གནས་སྐོར་གྱི་གཏན་འབེབས་གཞིར་བཟུང་ནས་ལག་བསྟར་བྱ་རྒྱུ།

དོན་ཚན་ཞེ་གཉིས་པ། དཔལ་འབྱོར་གྱི་གྱོང་གུན་རྩིས་རྒྱག་སྐབས་གྱོད་དོན་ཐོ་འགོད་བྱེད་སྐབས་དོན་དངོས་ཐོག་བཟོས་པའི་རྒྱུ་ནོར་གྱི་གྱོང་གུན་ཚང་མ་རྩིས་རྒྱག་དགོས། དེའི་ནང་སྒྲིག་འགལ་བྱ་སྤྱོད་ཀྱིས་བཟོས་པའི་གྱོང་གུན་སེལ་ཆེད་གཏོང་སྤྲོད་བྱས་པའི་འགྲོ་སོང་དང་འགྲོ་གྲོན་སྣ་ཚོགས་ཚུད་ཡོད། གྱོད་དོན་ཐོ་འགོད་བྱས་རྗེས་ནས་ཐག་གཅོད་མ་བྱས་གོང་རྒྱུན་མཐུད་ངང་བྱུང་བའི་དཔལ་འབྱོར་གྱི་གྱོང་གུན་ནི་དེའི་ནང་མཉམ་དུ་བརྩི་དགོས། 

དོན་ཚན་ཞེ་གསུམ་པ། སྒྲིག་འགལ་བྱ་སྤྱོད་ལས་ཐོབ་པའི་དཔལ་འབྱོར་གྱི་ཁེ་ཕན་ནི་རྩིས་ལེན་བྱེད་པའམ་ཡང་ན་དེར་ཕྱིར་སློག་སྐྱིན་ཚབ་སྤྲོད་འགན་དཀྲི་དགོས། རང་འགུལ་ངང་གོང་འབུལ་བྱས་པའི་སྒྲིག་འགལ་ཐོབ་ཆ་དང་དཔལ་འབྱོར་གྱོང་གུན་སྐྱིན་ཚབ་འཇལ་བ་དང་ལེན་བྱེད་དགོས་པ་མ་ཟད། གཏན་འབེབས་ལྟར་རྩིས་ལེན་བྱེད་པའམ་ཡང་ན་འབྲེལ་ཡོད་སྡེ་ཚན་དང་མི་སྒེར་ལ་ཕྱིར་སློག་བྱེད་དགོས། 

སྒྲིག་འགལ་བྱ་སྤྱོད་ལས་ཐོབ་པའི་གོ་གནས་དང་། གོ་རིམ། གོ་མིང་། བསླབ་རིམ། བསླབ་གནས། བྱ་དགའ། ཐོབ་ཐང་སོགས་ཀྱི་ཁེ་ཕན་གཞན་དག་ནི་གྱོད་དོན་སྒྲུབ་འགན་འཁུར་བའི་སྒྲིག་ཁྲིམས་ཞིབ་བཤེར་ལས་ཁུངས་སམ་དེའི་གོང་རིམ་སྒྲིག་ཁྲིམས་ཞིབ་བཤེར་ལས་ཁུངས་ཀྱིས་འབྲེལ་ཡོད་རྩ་འཛུགས་དང་། སྡེ་ཁག །ཚན་པ་བཅས་ལ་གཏན་འབེབས་ལྟར་ཡོ་བསྲང་བྱ་རྒྱུའི་གྲོས་འགོ་འདོན་དགོས།སྲོལ་ཡིག་འདིའི་དོན་ཚན་སོ་བདུན་པ་དང་དོན་ཚན་སོ་བརྒྱད་པའི་གཏན་འབེབས་ལྟར་ཐག་གཅོད་བྱས་པའི་ཏང་ཡོན་ཡིན་ན། བརྟག་དཔྱད་བྱས་པ་བརྒྱུད་དེའི་དངོས་འབྲེལ་གྱི་སྒྲིག་འགལ་བྱ་སྤྱོད་སྤེལ་བ་ལས་ཐོབ་པའི་ཁེ་ཕན་རྣམས་དོན་ཚན་འདིའི་གཏན་འབེབས་གཞིར་བཟུང་ནས་ཐག་གཅོད་བྱ་རྒྱུ།

དོན་ཚན་ཞེ་བཞི་པ། ཏང་གི་སྒྲིག་ཁྲིམས་ཀྱི་ཆད་པ་གཅོད་རྒྱུའི་ཆོད་དོན་བཞག་རྗེས། ཟླ་བ་གཅིག་གི་ནང་ཚུན་དུ་ཆད་པ་ཕོག་མཁན་ཏང་ཡོན་གནས་སའི་ཏང་གི་གཞི་རིམ་རྩ་འཛུགས་ནང་གི་ཏང་ཡོན་ཡོངས་རྫོགས་དང་དེ་ཉིད་ལ་ཁྱབ་བསྒྲགས་བྱེད་དགོས་པ་དང་། མགོ་ཁྲིད་ཚན་ཁག་གི་ཁོངས་མི་ཡིན་ན་ད་དུང་གནས་སའི་ཏང་རྩ་འཛུགས་ཀྱི་མགོ་ཁྲིད་ཚན་ཁག་ཏུ་ཁྱབ་བསྒྲགས་བྱེད་དགོས་པ་མ་ཟད། ལས་བྱེད་པའི་དོ་དམ་དབང་ཚད་དང་རྩ་འཛུགས་ཀྱི་འབྲེལ་བར་གཞིགས་ནས་ཆད་གཅོད་ཆོད་དོན་གྱི་དཔྱད་ཡིག་དེ་ཆད་པ་ཕོག་མཁན་གྱི་ཡིག་ཚགས་ནང་དུ་འཇུག་དགོས། ཏང་ནང་གི་གོ་གནས་མེད་པ་བཟོ་བ་ཡན་གྱི་ཆད་པ་ཕོག་རིགས་ལ་ད་དུང་ཟླ་བ་གཅིག་གི་ནང་ཚུན་དུ་གོ་གནས་དང་། གླ་ཕོགས། ལས་ཀ །དེ་བཞིན་འབྲེལ་ཡོད་ཐོབ་ཐང་གཞན་དག་སོགས་བབ་མཚུངས་ཀྱི་འགྱུར་ལྡོག་གཏོང་རྒྱུའི་འགྲོ་ལུགས་སྒྲུབ་དགོས། ཏང་ཕྱིའི་གོ་གནས་ཕྱིར་འཐེན་བྱེད་པའམ་ལེགས་སྒྲིག་བྱ་རྒྱུ་དང་འབྲེལ་བ་ཡོད་ན། ཏང་ཕྱིའི་རྩ་འཛུགས་ལ་དུས་ཐོག་ཏུ་དེའི་ཏང་ཕྱིའི་གོ་གནས་ཕྱིར་འཐེན་བྱེད་པའམ་ལེགས་སྒྲིག་བྱ་རྒྱུའི་གྲོས་འགོ་འདོན་དགོས། དམིགས་བསལ་གྱི་གནས་ཚུལ་འོག་ཆད་གཅོད་ཀྱི་ཆོད་དོན་བཞག་པའམ་ཆོག་མཆན་འགོད་མཁན་རྩ་འཛུགས་ཀྱི་ཆོག་མཆན་ཐོབ་ན། འགྲོ་ལུགས་སྒྲུབ་ཡུན་འོས་འཚམ་གྱིས་རིང་དུ་བཏང་ཆོག །འགྲོ་ལུགས་སྒྲུབ་ཡུན་རིང་ཤོས་ཟླ་བ་དྲུག་ལས་བརྒལ་མི་ཆོག

དོན་ཚན་ཞེ་ལྔ་པ། ཏང་གི་སྒྲིག་ཁྲིམས་ཀྱི་ཆད་གཅོད་ཆོད་དོན་ལག་བསྟར་བྱེད་མཁན་ལས་ཁུངས་སམ་ཆད་པ་ཕོག་མཁན་ཏང་ཡོན་གནས་སའི་སྡེ་ཁག་གིས་ཟླ་དྲུག་གི་ནང་ཚུན་དུ་ཆད་གཅོད་ཆོད་དོན་ལག་བསྟར་བྱས་ཚུལ་ཆད་གཅོད་ཆོད་དོན་འཇོག་མཁན་ནམ་ཆོག་མཆན་འགོད་མཁན་ལས་ཁུངས་ལ་སྙན་སེང་ཞུ་དགོས།ཏང་གི་སྒྲིག་ཁྲིམས་ཀྱི་ཆད་པ་བཅད་པ་ཏང་ཡོན་གྱི་བློར་མ་བབས་ན། ཏང་གི་སྒྲིག་ཡིག་དང་འབྲེལ་ཡོད་གཏན་འབེབས་ལ་གཞིགས་ནས་རྒྱུ་མཚན་ཞུ་འབུལ་བྱེད་ཆོག

དོན་ཚན་ཞེ་དྲུག་པ། ཏང་ཡོན་ལ་ཏང་གི་སྒྲིག་ཁྲིམས་ལས་འགལ་བའི་དབང་གིས་ཆད་པ་ཕོག་པ་དང་། ཤུགས་རྐྱེན་ཐེབས་ཡུན་ཐིམ་རྗེས། ཏང་རྩ་འཛུགས་ཀྱིས་དེའི་ཆད་པ་མེད་པ་བཟོ་མི་དགོས།

དོན་ཚན་ཞེ་བདུན་པ། སྲོལ་ཡིག་འདིའི་ནང་བརྗོད་པའི་ཡན་དང་མན་ཞེས་པ་ནི་དམིགས་བསལ་ཐོག་གསལ་འགོད་བྱས་པ་ཕུད་དེ་བྱིངས་ཚང་མར་རིམ་པ་དེ་ག་དང་དངོས་བསྟན་གྲངས་ཀ་དེ་ཉིད་ཚུད་ཡོད།

དོན་ཚན་ཞེ་བརྒྱད་པ། སྲོལ་ཡིག་འདིའི་སྤྱིའི་དོན་ཚན་ནི་ཏང་གི་སྒྲིག་ཁྲིམས་ཀྱི་ཆད་གཅོད་གཏན་འབེབས་ཡོད་པའི་ཏང་ནང་གི་ཁྲིམས་སྲོལ་གཞན་དག་ལ་སྤྱད་ན་འཐུས།  འོན་ཀྱང་ཀྲུང་གུང་ཀྲུང་དབྱང་ནས་ཁྱབ་བསྒྲགས་བྱས་པའམ་ཡང་ན་ཁྱབ་བསྒྲགས་བྱ་རྒྱུའི་ཆོག་མཆན་བཀོད་པའི་ཏང་ནང་གི་ཁྲིམས་སྲོལ་གཞན་དག་ནང་དམིགས་བསལ་གཏན་འབེབས་ཡོད་པ་ཕུད།