ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། ཀླུ་མོ་མཚོ།    ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས།    བཤེར་འབེབས། རིན་ཆེན་ཚེ་རིང་།

གསར་འགྱུར་གལ་ཆེན།

• ཟླ5ཚེས22ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སུའུ་ལིན་ལ་གློག་འཕྲིན་བཏང་ནས། ཁོང་གིས་ཝེ་ཐེ་ནམ་སྤྱི་ཚོགས་རིང་ལུགས་སྤྱི་མཐུན་རྒྱལ་ཁབ་ཀྱི་ཀྲུའུ་ཞིའི་འགན་བཞེས་པར་རྟེན་འབྲེལ་ཞུས།

• ཟླ5ཚེས22ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་སྐབས14པའི་ཀྲུང་ཨའི་གནས་སྐོར་མཐོ་རིམ་དབར་གྲོས་གླེང་བྱེད་མགོ་བརྩམས་པར་འཕྲིན་ཡིག་སྤྲིངས།

• ནོར་སྲིད་པུ་དང་ཞིང་ལས་གྲོང་གསེབ་པུ། དངུལ་རྩ་རྟོག་དམ་སྤྱི་ཁྱབ་ཅུ་བཅས་ཀྱིས་བརྡ་ཐོ་བཏང་ནས། 2024ལོ་ནས་བཟུང་། རྒྱལ་ཡོངས་སུ་འབྲས་དང་གྲོ། མ་རྨོས་ལོ་ཏོག་བཅས་འབྲུ་རིགས་སྐྱེ་དངོས་ཆེན་པོ་གསུམ་གྱི་མ་གནས་གུན་སྐྱོབ་དང་འདེབས་འཛུགས་ཡོང་འབབ་གུན་སྐྱོབ་སྲིད་ཇུས་ཕྱོགས་ཡོངས་ནས་ལག་བསྟར་བྱ་རྒྱུ་རེད། 

• སྐྱེ་ཁམས་ཁོར་ཡུག་པུས་གནས་ཚུལ་སྤེལ་བར་གཞིགས་ན། རང་རྒྱལ་གྱིས《ཀྲུང་གོའི་སྐྱེ་དངོས་སྣ་མང་རང་བཞིན་སྲུང་སྐྱོང་འཐབ་ཇུས་དང་བྱ་སྤྱོད་འཆར་གཞི（2023ལོ་ནས་2030ལོ་བར）》གསར་སྒྱུར་ཁྱབ་སྒྲོག་བྱས་པ་དང་། 《སྐྱེ་དངོས་སྣ་མང་རང་བཞིན་སྲུང་སྐྱོང་གི་འདུ་འགོད་གལ་ཆེན་ལག་བསྟར་ཇུས་གཞི》བཟོ་བཞིན་ཡོད། 

• རྒྱལ་ཁབ་འཕེལ་སྒྱུར་ཨུ་ལྷན་གྱིས་གནས་ཚུལ་སྤེལ་བར་གཞིགས་ན། ད་ལོ་ནས་བཟུང་རྒྱལ་སྤྱིའི་སྦྲག་སྐྱེལ་གྲུ་གཟིངས21རང་རྒྱལ་གྱི་མངའ་ཁོངས་ཀྱི་གྲུ་ཁར་གཉེར་སྐྱོང་བྱེད་མགོ་བརྩམས་ཡོད། 

• ད་ལོའི་ཟླ་དང་པོ་ནས་བཞི་པའི་བར། རྒྱལ་ཡོངས་ལྕགས་ལམ་གྱིས་གཏན་འཇགས་རྒྱུ་ནོར་ལ་མ་འཇོག་སྒོར་དུང་ཕྱུར1849བཏང་བ་དེ་དུས་མཚུངས་ལས10.5%འཕར་ཡོད། 

  
  

• ཚེས21ཉིན་བར། ཀྲུང་གོ་དང་ལོ་སིའི་ལྕགས་ལམ་གྱིས་རིམ་རྩིས་བྱས་ན་འགྲུལ་སྐྱེལ་མེ་འཁོར་ཐེངས50187བཏང་ཞིང་། འགྲུལ་པ་མི་ཐེངས་ཁྲི3405སྐྱེལ་འདྲེན་བྱས་ཡོད། 

• ཕྱི་འབྲེལ་པུས་ཁྱབ་སྒྲོག་བྱས་པ་ལྟར་ན། ཨ་རིའི་དམག་དོན་བཟོ་ལས་ཀྱི་ཁེ་ལས12དང་མཐོ་རིམ་དོ་དམ་པ10ལ་ལྡོག་གཅུན་བྱེད་ཐབས་སྤྱད་ཡོད། 

• ཚེས22ཉིན། ནོར་ཝེ་དང་སི་ཕེན། ཨིར་ལན་བཅས་ཀྱིས་ཕ་ལེ་སི་ཐན་རྒྱལ་ཁབ་ཁས་ལེན་བྱ་རྒྱུའི་ཁྱབ་སྒྲོག་བྱས་པ་རེད། 

  སྤྱི་ཚོགས།

• ཀྲུང་དབྱང་གནམ་གཤིས་ལས་ཁུངས་ཀྱིས་སྨུག་པ་སེར་པོའི་ཉེན་བརྡ་བཏང་བ་དང་། དེ་རིང་ཧོང་ཧའེ་བྱང་ཤར་རྒྱུད་དང་དབུས་རྒྱུད་མཚོ་ཁོངས། ཧྲན་ཏུང་ཕྱེད་གླིང་གི་ཤར་རྒྱུད་དང་ལྷོ་རྒྱུད་ངོགས་ཀྱི་མཚོ་ཁོངས་སུ་མཐོང་ཚད་སྤྱི་ལེ་གཅིག་ཀྱང་ཟིན་མེད་པའི་སྨུག་པ་ཆེན་པོ་ཡོད་པ་རེད། 

• ད་ལོའི་ཟླ་དང་པོ་ནས་བཞི་པའི་བར། པེ་ཅིང་དང་ཐེན་ཅིན། ཧོ་པེ་བཅས་ས་ཁུལ་གྱི་ཕྱི་ཕྱོགས་ཉོ་ཚོང་གི་ཕྱིར་གཏོང་ནང་འདྲེན་གྱི་རིན་ཐང་སྡོམ་འབོར་སྒོར་དུང་ཕྱུར་ཁྲི1.69ཡིན་ཞིང་། གཞི་ཁྱོན་ལོ་རྒྱུས་དུས་མཚུངས་ཀྱི་ཟིན་ཐོ་གསར་པ་བཏོད་པ་དེ་དུས་མཚུངས་ལས་5.2%འཕར་ཡོད། 

• ཚེས22ཉིན། ཀྲུང་གོའི་བྱ་སྒྲོའི་སྤོ་ལོའི་མཐུན་ཚོགས་ཀྱིས་ཀྲུང་གོའི་བྱ་སྒྲོའི་སྤོ་ལོའི་རུ་ཁག་ཕ་རི་སིའི་ཨོ་རྩལ་འགྲན་ཚོགས་ནང་ཞུགས་པའི་ལུས་རྩལ་པའི་མིང་ཐོ་ཡོངས་བསྒྲགས་བྱས་པ་རེད། 

  
  

• ཚེས22ཉིན། 2023-2024ལོའི་འགྲན་དུས་སུ་ཀྲུང་གོའི་སྐྱེས་པའི་ལན་ཆིའུ་སྤོ་ལོའི་ལས་རིགས་མཉམ་འབྲེལ་འགྲན་སྡུར་གྱི་རྟིང་བསྡུར་མཇུག་སྒྲིལ་བ་དང་། ལེའོ་ཉིང་རུ་ཁག་གིས་སྡུར་གྲངས་ཆེན་པོ4-0ཡི་ཐོག་ནས་ཤིན་ཅང་རུ་ཁག་ལས་རྣམ་པར་རྒྱལ་ཏེ་ཨང་དང་པོ་ཐོབ་ནས། “བསྟུད་མར་ཐེངས་གསུམ”ལ་ཨང་དང་པོ་ཐོབ་པ་རེད། 

• ཧའེ་ནན་ཞིང་ཆེན་དམངས་ཆེན་རྒྱུན་ལས་ཨུ་ལྷན་གྱི་ཏང་ཙུའུ་ཧྲུའུ་ཅི་གཞོན་པ་དང་ཀྲུའུ་རེན་གཞོན་པ་ལིའུ་ཞིན་ཐའེ་ལ་སྒྲིག་འགལ་ཁྲིམས་འགལ་ཚབས་ཆེན་གྱི་དོགས་གཞི་ཡོད་པ་དང་། མིག་སྔར་ཀྲུང་དབྱང་སྒྲིག་ཨུ་དང་རྒྱལ་ཁབ་ལྟ་ཞིབ་ཨུ་ལྷན་གྱི་སྒྲིག་ཁྲིམས་ཞིབ་བཤེར་དང་ལྟ་ཞིབ་བརྟག་དཔྱད་དང་ལེན་བྱེད་བཞིན་ཡོད། 

• ཐེན་ཅིན་ཞིབ་དཔྱོད་ལས་ཁུངས་ཀྱིས་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་གསུམ་པའི་ནོར་སྲིད་དཔལ་འབྱོར་ཨུ་ཡོན་ལྷན་ཁང་གི་དེ་སྔའི་ཀྲུའུ་རེན་ཨུ་ཡོན་གཞོན་པ་དང་། ཀུའེ་ཀྲོའུ་ཞིང་ཆེན་ཏང་ཨུའི་དེ་སྔའི་ཧྲུའུ་ཅི་སུན་ཀྲི་ཀང་གིས་ལྐོག་རྔན་བླངས་པའི་དོགས་ཡོད་གྱོད་གཞིར་ཁྲིམས་ལྟར་གཞུང་གཏུག་བྱས་ཡོད། 

• གཙང་གསུམ་ཆུ་མགོའི་རྒྱལ་ཁབ་སྤྱི་གླིང་གི་འབྲི་ཆུའི་ཆུ་མགོའི་ཁུལ་དུ་སྤྱི་བསྒྲགས་སྤེལ་བ་ལྟར་ན། གནས་སྐོར་དང་མྱུལ་དཔྱད། བརྒལ་བ་སོགས་ཀྱི་བྱེད་སྒོ་སྤེལ་མི་ཆོག་པ་དང་། རྩ་འཛུགས་སམ་མི་སྒེར་གང་རུང་ཆོག་མཆན་མ་ཐོབ་པར་རང་དགར་འཛུལ་མི་ཆོག

• ཀོང་ཞི་ལུང་ཨན་སློབ་གསོ་ཅུས་བརྡ་ཁྱབ་བཏང་བ་ལྟར་ན། སློབ་འབྲིང་སློབ་མ་ཀྲའོ་ཆེ་གེ་མོ་དང་མེང་ཆེ་གེ་མོ་སོགས་མི་བརྒྱད་ཀྱིས་སློབ་གྲོགས་ཀྲང་ལགས་ལ་ཉེས་རྡུང་གཏོང་བ་དང་ཆུས་སྲེག་པ་སོགས་ཀྱི་བྱེད་ཐབས་སྤྱད་དེ་བརྙས་བཅོས་བྱས་པས། མི་གཉིས་ཉེས་དོན་བཀག་ཉར་བྱས་པ་དང་། མི6སྲིད་འཛིན་བཀག་ཉར་བྱས། 

• པེ་ཅིང་མཁའ་འགྲུལ་འཇིག་རྟེན་འཕུར་སྐྱོད་སློབ་ཆེན་གྱི་ཚན་ཞིབ་ཚོགས་པ་དུས་ཡུན་ལོ15ཡི་རིང་སྒུལ་ཤུགས་ཆུང་བའི་ལག་རྩལ་ལ་ཚད་བརྒལ་གསར་པ་བྱུང་བ་དང་། འདྲ་བཟོའི་སྐྱེ་དངོས་ཀྱི་འཕྲུལ་མི་ཞིབ་འཇུག་གསར་སྤེལ་བྱས་ཏེ། ལི་སྨི2ཀྱི་རིང་ཐུང་ཐིག་ཕུད་ནས་གོག་བགྲོད་ཚོད་འཛིན་ཐུབ་པ་བྱུང་ཡོད། 

  སྲིད་ཇུས།

• ཁྲོམ་ར་རྟོག་དམ་སྤྱི་ཁྱབ་ཅུས་ཇུས་གཞི་ཁྱབ་སྒྲོག་བྱས་ནས། རྒྱལ་ཡོངས་ཀྱི་དམིགས་བསལ་སྒྲིག་ཆས་ཀྱི་བརྟག་བཤེར་ཞིབ་དཔྱད་སྒྲིག་གཞིར་བརྟག་བཤེར་ཞིབ་དཔྱད་མི་སྣའི་ཐོབ་ཐང་དང་ཆ་རྐྱེན་ལ་རང་བཤེར་བྱེད་དགོས་པའི་བླང་བྱ་བཏོན་ཡོད། 

• ཧོ་ནན་གྱིས་གྲོང་མིའི་ཐོབ་ཐང་ལག་ཁྱེར་གཉེར་བའི་དུས་ཚད་དེ་རང་བྱུང་ཉིན25བར་ཐུང་དུ་གཏོང་རྒྱུ་ཡིན་པ་ཁ་གསལ་བཏོན་ཡོད། 

• ཀན་སུའུ་ཡིས་བརྡ་ཐོ་བཏང་ནས་ཞིང་ཆེན་རིམ་པའི་ངལ་ནུས་སྤུས་རྟགས་གཏོད་འགན་འཁུར་མཁན་ཚན་པར་ཐེངས་གཅིག་རང་བཞིན་གྱི་ཁ་གསབ་སྒོར་ཁྲི་0སྤྲོད་རྒྱུ་རེད། 

  དེ་རིང་གི་གནམ་གཤིས།

• ཅི་ལིན་གྱི་དབུས་ཤར་རྒྱུད་དང་ལིའོ་ཉིང་གི་བྱང་རྒྱུད། ཞིན་ཅང་དབྱི་ལི་ལུང་ཤུར། ཡུན་ནན་ལྷོ་རྒྱུད། ཀོང་ཏུང་གི་དབུས་ཤར་རྒྱུད། ཧྥུ་ཅན་གྱི་ས་ཆ་མང་ཆེ་བ། ཅང་ཞིའི་ལྷོ་རྒྱུད། ཧའེ་ནན་གླིང་ཕྲན་གྱི་བྱང་རྒྱུད་སོགས་ས་ཁུལ་ཁ་ཤས་སུ་ཆར་པ་འབྲིང་བ་ནས་ཆེ་བ་འབབ་པ་དང་། དེའི་ནང་ཀོང་ཏུང་གི་བྱང་ཤར་རྒྱུད་དང་། ཧྥུ་ཅན་གྱི་ལྷོ་ནུབ་རྒྱུད། ཧའེ་ནན་གླིང་ཕྲན་གྱི་དབུས་ཤར་རྒྱུད་སོགས་ས་ཁུལ་ཁ་ཤས་སུ་དྲག་ཆར་འབབ་རྒྱུ་རེད།