ཞིང་ཆེན་ཡོངས་ཀྱི་སྡེ་ཆེན་རྩེད་རའི་ལ་གཞས་འགྲན་སྡུར་སྐབས་བརྒྱད་པའི་ཡུལ་དངོས་ཀྱི་རྣམ་པ།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་བྱང་ཁུལ་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། རིན་ཆེན་ཚེ་རིང་།

ཁ་ལ་གཞས་ལེན་ན་ལ་གཞས་ལེན།།
ཁ་ལ་གཞས་ཕར་ལ་ལེན་དུས་ན།།
ནངས་སྔ་མོའི་ཉི་རྩེ་རྒྱག་རྒྱག་བྱེད།།
ཁོས་ཕྱིར་ར་ལོན་པ་སློག་དུས་ན།།
དགོང་ཕྱི་དྲོའི་གྲིབ་ཆེན་གོན་གོན་བྱོས།།

མ་ཁྱོད་ཚོ་སེར་ཆེན་མེ་ཏོག་རེད།།
ཕོ་ངེད་ཚོ་རྩྭ་རྒྱས་མོན་དཀར་ཡིན།།
ང་མོན་དཀར་སྤང་ལ་འཁྲུངས་རག་ལ།།
ཁྱོད་མེ་ཏོག་བད་ཀྱིས་མ་ཁྱེར་ན།།
ཁྱོད་མེ་ཏོག་སེར་ཆེན་བློ་ཡོད་རེད།།

 
བྱ་ཁུ་ལོ་སྙིང་ལ་རྗེ་བོ།།
ང་རྒྱ་གར་ཡུལ་ལ་འཕུར་དུས།།
ཕྱིར་འཁོར་ནས་རྫ་ལ་ལྟ་དུས།།
ནགས་ཙན་དན་ཡིད་ལ་དྲན་གི།

མཚོ་སྔོན་མོ་མར་ཁུ་འཁྱིལ་འདྲ་རེད།།
ཉ་གསེར་མིག་བྱི་རུའི་པ་ཏྲ་རེད།།
མཚོ་རྒས་ནས་ཐིག་ལེ་གཏོང་རག་ལ།།
ཉ་གསེར་མིག་མ་བརྗེད་ཡིད་ལ་ཟུངས།།

དགུང་གི་སྐར་ཆེན་ཁྲ་མོ།།
ཁྱོད་འཆར་ལ་སྔ་འཕྱི་ཨེ་ཡོད།།
ཁྱོད་འཆར་ལ་སྔ་འཕྱི་མེད་ན།།
དགུང་སྐར་ཆེན་ཁྱུ་ནས་ཁྱོད་གསལ།།
ནང་སྐར་ཕྲན་མང་བོར་ང་འགལ།།
འགལ་སོང་རུང་འགྱོད་པ་ང་མེད།།

སྟག་ཤ་ར་མི་འདུག་འགྲོ་ནོ་རེད།།
སྨན་བུ་མོ་མི་འགྲོ་འདུག་ནོ་རེད།།
ང་འགྲོ་བའི་འགྲོ་ལམ་འཚམས་པོ་བྱེད།།
ཁྱོད་འདུག་གི་སྐུ་ལུས་བདེ་མོ་བྱོས།།