ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག【ཁག33པ།】

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་། བཤེར་འབེབས། རིན་ཆེན་ཚེ་རིང་།

དོན་ཚན་བརྒྱ་དང་ང་གསུམ་པ། སྤྱི་ཚོགས་ཀྱི་སྤྱི་པའི་སྒྲིག་ལམ་སྲོལ་བཟང་དང་རྒྱབ་འགལ་གྱིས་མི་མང་འདུ་འཛོམས་བྱ་ཡུལ་དང་དྲ་རྒྱའི་བར་སྟོང་ལ་ཚུལ་མིན་གྱི་གཏམ་སྤྱོད་སྤེལ་ནས་ཤུགས་རྐྱེན་ངན་པ་བཟོས་རིགས་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་ཙམ་ཡིན་རིགས་ལ་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་བརྒྱ་དང་ང་བཞི་པ། སྤྱི་ཚོགས་ཀྱི་སྤྱི་པའི་ཀུན་སྤྱོད་དམ་ཁྱིམ་ཚང་གི་སྤྱོད་བཟང་དང་འགལ་ཚབས་ཆེ་བའི་བྱ་སྤྱོད་གཞན་དག་ཡོད་རིགས་ལ། བྱེ་བྲག་གི་གནས་ཚུལ་ལ་གཞིགས་ཏེ་ཐ་ཚིག་སྒྲོག་པ་ནས་ཏང་གི་སྐྱིད་སྡུག་ནས་འབུད་པའི་བར་གྱི་ཆད་པ་གཅོད་རྒྱུ།

ལེ་ཚན་གསུམ་པ། ཞར་བྱུང་དོན་ཚན།

དོན་ཚན་བརྒྱ་དང་ང་ལྔ་པ། ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་ཁག་གི་ཏང་ཨུས་སྲོལ་ཡིག་འདི་གཞིར་བཟུང་རང་སོ་སོའི་ལས་ཀའི་དངོས་ཡོད་གནས་ཚུལ་དང་ཟུང་འབྲེལ་གྱིས་ལག་བསྟར་གཏན་འབེབས་རྐྱང་པ་བཟོས་ཆོག

དོན་ཚན་བརྒྱ་དང་ང་དྲུག་པ། ཀྲུང་དབྱང་དམག་དོན་ཨུ་ཡོན་ལྷན་ཁང་གིས་སྲོལ་ཡིག་འདི་གཞིར་བཟུང་ཀྲུང་གོའི་མི་དམངས་བཅིངས་འགྲོལ་དམག་དང་ཀྲུང་གོའི་མི་དམངས་ཉེན་རྟོག་དྲག་དཔུང་གི་གནས་ཚུལ་དངོས་དང་ཟུང་འབྲེལ་གྱིས་ཁ་གསབ་གཏན་འབེབས་སམ་ཡང་ན་གཏན་འབེབས་རྐྱང་པ་བཟོས་ཆོག

དོན་ཚན་བརྒྱ་དང་ང་བདུན་པ། སྲོལ་ཡིག་འདིར་ཀྲུང་དབྱང་སྒྲིག་ཨུས་གསལ་འགྲེལ་རྒྱག་འགན་འཁུར་རྒྱུ།

དོན་ཚན་བརྒྱ་དང་ང་བརྒྱད་པ། སྲོལ་ཡིག་འདི2024ལོའི་ཟླ1ཚེས1ཉིན་ནས་བཟུང་ལག་ལེན་དུ་བསྟར་རྒྱུ།

སྲོལ་ཡིག་འདི་ལག་བསྟར་མ་བྱས་གོང་ལ་གྱོད་ཐག་བཅད་ཟིན་པའི་གྱོད་གཞིར་གལ་ཏེ་བསྐྱར་བཤེར་བསྐྱར་གྲོས་བྱེད་དགོས་ན། སྐབས་དེ་དུས་ཀྱི་གཏན་འབེབས་སམ་ཡང་ན་སྲིད་ཇུས་སྤྱད་འཐུས། གྱོད་ཐག་མ་བཅད་པའི་གྱོད་གཞིར། གལ་ཏེ་བྱ་སྤྱོད་བྱུང་སྐབས་ཀྱི་གཏན་འབེབས་སམ་ཡང་ན་སྲིད་ཇུས་ཀྱིས་སྒྲིག་འགལ་ཡིན་པའི་ངོས་འཛིན་བྱས་མེད་ཀྱང་སྲོལ་ཡིག་འདིའི་ནང་སྒྲིག་འགལ་ཡིན་པ་ངོས་འཛིན་བྱས་ཡོད་ན། སྐབས་དེ་དུས་ཀྱི་གཏན་འབེབས་སམ་ཡང་ན་སྲིད་ཇུས་གཞིར་བཟུང་ཐག་གཅོད་བྱ་རྒྱུ། གལ་ཏེ་བྱ་སྤྱོད་བྱུང་སྐབས་ཀྱི་གཏན་འབེབས་སམ་ཡང་ན་སྲིད་ཇུས་ཀྱིས་སྒྲིག་འགལ་ཡིན་པར་ངོས་འཛིན་བྱས་ན། སྐབས་དེ་དུས་ཀྱི་གཏན་འབེབས་སམ་ཡང་ན་སྲིད་ཇུས་གཞིར་བཟུང་ཐག་གཅོད་བྱ་རྒྱུ། ཡིན་ཡང་སྲོལ་ཡིག་འདིས་སྒྲིག་འགལ་ཡིན་པ་ངོས་འཛིན་མ་བྱས་པའམ་ཡང་ན་ཐག་གཅོད་ཡང་ཙམ་བྱེད་དགོས་རིགས་ཡིན་ན། སྲོལ་ཡིག་འདིའི་གཏན་འབེབས་གཞིར་བཟུང་ཐག་གཅོད་བྱ་རྒྱུ།