མཚོ་བྱང་ཁུལ་རྟོག་ཞིབ་ཚོགས་ཆུང་པེ་ཅིང་ཧྲོའུ་ཀང་གླིང་དང་ཐེན་ཅིན་ཝུའུ་ཏ་ཏའོ་རུ་སློབ་སྦྱོང་དང་རྟོག་ཞིབ་བྱེད་པར་ཕྱིན།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་ཁུལ་མི་དམངས་སྲིད་གཞུང་དྲ་བ། བཤེར་འབེབས། རིན་ཆེན་ཚེ་རིང་།

ཁུལ་ཨུ་དང་ཁུལ་སྲིད་གཞུང་གི་ལས་དོན་བཀོད་སྒྲིག་ལྟར། ཉེ་ཆར། ཁུལ་སྲིད་གཞུང་གི་ཁུལ་དཔོན་གཞོན་པ་ཧན་ཧྲིས་རུ་ཁག་ཁྲིད་དེ་པེ་ཅིང་ཧྲོའུ་ཀང་གླིང་དང་ཐེན་ཅིན་ཝུའུ་ཏ་ཏའོ་རུ་སློབ་སྦྱོང་རྟོག་ཞིབ་བྱེད་པར་ཕྱིན་ཞིང་། གླིང་ཁུལ་གྱི་འཆར་འགོད་དང་། ཕྱོགས་བསྒྱུར་འཕེལ་རྒྱས། བཟོ་ལས་ཤུལ་བཞག་དང་སྒྱུར་བཀོད་བེད་སྤྱོད་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་པ་དང་། གྲོང་ཁྱེར་འཆར་འགོད་འཛུགས་སྐྲུན་དང་། ལོ་རྒྱུས་རིག་གནས་སྲང་ཁུལ་གཉེར་སྐྱོང་དོ་དམ། རིག་དངོས་བེད་སྤྱོད། རིག་གནས་ཚོང་ལས་གནས་སྐོར་མཉམ་འདྲེས་སོགས་ཀྱི་ཐད་ལ་དམིགས་ནས་བགྲོ་གླེང་དང་དཔྱད་བསྡུར་གཏིང་ཟབ་བྱས། 

རྟོག་ཞིབ་ཚོགས་ཆུང་གིས་ཡུལ་དངོས་རྟོག་ཞིབ་དང་ཡུལ་དངོས་བགྲོ་གླེང་སོགས་ཀྱི་བྱ་ཐབས་བརྒྱུད་དེ། གོམ་སྟབས་རྗེས་མའི་འཕེལ་རྒྱས་ཀྱི་བསམ་ཕྱོགས་སྔར་བས་གསལ་པོ་བཟོས་ཡོད་དེ། གཅིག་ནི་འཆར་འགོད་ཇུས་འགོད་འཐུས་ཚང་དུ་བཏང་ནས་སྲུང་སྐྱོང་ཞིག་གསོ་བྱེད་རིང་དངོས་ཐོག་དོན་གཉེར་དང་ཞིབ་ཚགས་ཀྱི་ལས་ལ་འབད་དགོས། སྔོན་ཐོན་ས་ཁུལ་གྱི་ཉམས་མྱོང་དང་བྱེད་སྟངས་ལ་སློབ་སྦྱོང་བྱས་ཏེ། ཚན་རིག་དང་འཐུས་ཚང་གི་ལམ་ལུགས་སྒྲིག་སྲོལ་ལ་བརྟེན་ནས་ཉམས་གསོ་སྲུང་སྐྱོང་གི་རྩ་དོན་ཁ་ཕྱོགས་ཁ་གསལ་བཟོས་ཏེ།    རྟེན་གཞི221གི་གནས་རྙིང་དང་ནུབ་མཚོ་གྲོང་རྡལ་གྱི་གྲོང་ཁྱེར་དང་གྲོང་རྡལ་གྱི་རྣམ་པ་དང་ནུས་པ་སོགས་གསལ་པོར་བྱ་དགོས་ལ། ད་ཡོད་ཀྱི་གསར་བརྗེའི་རིག་གནས་ཐོན་ཁུངས་སྣ་ཚོགས་སྦྲེལ་མཐུད་དང་བསྡུ་སྒྲིལ་བྱས་ཏེ། རྟེན་གཞི221གི་གནས་རྙིང་ཉམས་གསོ་སྲུང་སྐྱོང་དང་རྣམ་པ་བསྒྱུར་བཀོད་ལ་གཅིག་གྱུར་གྱིས་སྐུལ་འདེད་གཏོང་དགོས་ཤིང་། “ལོ་གཅིག་ལ་ལས་པ་དང་། ལོ་གསུམ་ལ་ལྟ་བ། ལོ་བཅུ་ལ་འཚོལ་ཞིབ”བཅས་བྱ་དགོས། གཉིས་ནི་རིག་གནས་ཀྱི་ནང་དོན་སྔོག་འདོན་བྱས་ནས་རྒྱུན་འཛིན་བྱེད་པའི་ཁྲོད་གསོན་ཤུགས་རྒྱས་པར་བྱ་དགོས། དེ་སྔའི་ཁོར་ཡུག་གི་གྲུབ་ཆ་དང་ལོ་རྒྱུས་ཀྱི་དཔང་རྟགས་ལ་བརྩི་འཇོག་གང་ལེགས་བྱས་ཏེ་བརྡ་རྟགས་དང་མཚོན་བྱང་གཅིག་གྱུར་འཆར་འགོད་དང་། སྤྱི་པའི་སྒྲིག་ཆས་ཇུས་འགོད་ཡག་པོ་བྱས་ཏེ། གནའ་བོའི་ཁྲོམ་གཞུང་གི་སྤྱིའི་གཟུགས་བརྙན་དང་གསར་བརྗེའི་ལོ་རྒྱུས་ཕྱིར་མངོན་པར་བྱ་དགོས་ལ། སྤྱི་ཚོགས་ཀྱི་སྟོབས་ཤུགས་ལོ་རྒྱུས་ཀྱི་རྣམ་པ་འཛུགས་སྐྲུན་སྲུང་སྐྱོང་ཁྱབ་ཁོངས་སུ་ཞུགས་རྒྱུར་ཁྲིད་སྟོན་ཧུར་ཐག་བྱས་ཏེ། གྲོང་ཁྱེར་དང་གྲོང་རྡལ་གྱི་འཛུགས་སྐྲུན་ལ་“ནང་རྫོངས”ཡོད་ལ་“ཕྱི་ཚུལ”ཡག་ཏུ་འཇུག་དགོས། གསུམ་ནི་ལས་རིགས་ཀྱི་བར་སྟོང་རྒྱ་སྐྱེད་བཏང་ནས་བེད་སྤྱོད་ཁྲོད་གསར་གཏོད་བྱ་དགོས། ཐོན་ལས་གསར་པ་དང་། ལས་རིགས་གསར་པ། རྣམ་པ་གསར་པ་བཅས་ལ་བརྟེན་ནས་འཛད་སྤྱོད་ཀྱི་རྣམ་པ་གསར་པ་བཏོད་དེ་སྣ་མང་ཅན་དང་རང་གཤིས་ཅན་གྱི་འཛད་སྤྱོད་དགོས་མཁོ་རྒྱུན་ཆད་མེད་པར་བསྐང་དགོས་ལ། རྟེན་གཞི221གི་གནས་རྙིང་གིས་མི་འགུག་ཐུབ་པར་བྱས་ཏེ། གྲོང་ཁྱེར་དང་གྲོང་གསེབ་འཛུགས་སྐྲུན་གསར་སྒྱུར་ཁྲོད་ལོ་རྒྱུས་ཀྱི་ཤུལ་བཞག་སྲུང་སྐྱོང་དང་།    རིག་གནས་ཀྱི་རྩ་བ་རྒྱུན་མཐུད། གང་ལེགས་བེད་སྤྱོད་བཅས་ལ་སྐུལ་འདེད་གཏོང་བ་དང་།    འཕེལ་རྒྱས་ཀྱི་སྒུལ་ཤུགས་ཡོད་པ་བཅས་བྱ་དགོས། 

ཁུལ་སྡོད་ཁང་འཛུགས་སྐྲུན་དང་། རིག་གནས་གནས་སྐོར་དང་། གནས་རྙིང་གཞུང་དོན་ཁང་། པེ་ཅིང་དུ་བཅའ་སྡོད་བྱས་པའི་འབྲེལ་གཏུག་ཁྲུའུ་སོགས་སྡེ་ཚན་གྱི་འགན་འཁུར་བློ་མཐུན་ཞུགས།