《བདེན་འཚོལ》དུས་དེབ་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྩོམ་ཡིག་གལ་ཆེན《ཏང་གི་རང་ངོས་གསར་བརྗེར་སྐུལ་འདེད་གཏོང་བར“སྔར་བས་དོན་ཐོག་ཏུ་འཁྱོལ་བ་ལྔ”ཐུབ་པ་བྱེད་དགོས》ཞེས་པ་བཀོད་པ།

སྒྲིག་སྒྱུར།    སངས་དོན།     ཡོང་ཁུངས།   ཞིན་ཧྭ་དྲ་བ།    བཤེར་འབེབས།   རིན་ཆེན་ཚེ་རིང་།

ཞིན་ཧྭ་གསར་འགྱུར་ཁང་པེ་ཅིང་ནས་ཟླ11པའི་ཚེས30ཉིན་གྱི་གློག་འཕྲིན། ཟླ12པའི་ཚེས1ཉིན་པར་སྐྲུན་བྱེད་པའི《བདེན་འཚོལ》དུས་དེབ་ཐེངས23པའི་ཐོག་ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གི་རྩོམ་ཡིག་གལ་ཆེན《ཏང་གི་རང་ངོས་གསར་བརྗེར་སྐུལ་འདེད་གཏོང་བར་“སྔར་བས་དོན་ཐོག་ཏུ་འཁྱོལ་བ་ལྔ”བྱེད་ཐུབ་པ་བྱ་དགོས》ཞེས་པ་བཀོད་ཡོད།

རྩོམ་ཡིག་ནང་ནན་གྱིས་བསྟན་དོན། རང་ངོས་གསར་བརྗེ་ནི་རང་རེའི་ཏང་དེ་ཟིང་ཆ་དང་དར་རྒུད་ཀྱི་ལོ་རྒྱུས་དུས་འཁོར་ལས་སྒྲོལ་བའི་དྲིས་ལན་གཉིས་པ་ཡིན། སྤྱོད་ཚུལ་དམ་འཛིན་བྱེད་པ་ནས་མགོ་བཙུགས་ཏེ་ཕྱོགས་ཡོངས་ནས་ཏང་ནན་སྐྱོང་ལ་སྐུལ་འདེད་གཏོང་རྒྱུ་ནི་དུས་རབས་གསར་པའི་ཏང་གི་རང་ངོས་གསར་བརྗེའི་ཉམས་མྱོང་གལ་ཆེན་ཞིག་ཡིན་པས། ཏང་གི་རང་ངོས་གསར་བརྗེར་དམིགས་ནས་བསམ་ཕྱོགས་དང་བླང་བྱ་གསལ་པོ་བྱེད་པ་དང་། གནད་འགག་ནི་དོན་འཁྱོལ་དམ་འཛིན་དེ་དོན་ཐོག་ཏུ་འཁྱོལ་བར་བྱ་རྒྱུར་ཐུག་ཡོད། 

རྩོམ་ཡིག་ནང་བསྟན་དོན། ཏང་གི་རང་ངོས་གསར་བརྗེའི་ངོས་འཛིན་སྔར་བས་གནད་ལ་འཁེལ་བ་བྱེད་དགོས། ད་ལྟ། ང་ཚོའི་ཏང་གིས་ཕྲག་ཏུ་འཁུར་བའི་ཀྲུང་གོའི་རྣམ་པའི་དེང་རབས་ཅན་དུ་འགྱུར་བའི་འཛུགས་སྐྲུན་གྱི་ལས་འགན་ཧ་ཅང་ལྗིད་རྫོབ་ཆེ་བ་དང་། མདུན་དུ་ལྷགས་པའི་སྲིད་སྐྱོང་ཁོར་ཡུག་ཧ་ཅང་རྙོག་འཛིང་ཆེ་བས་རང་ངོས་གསར་བརྗེའི་རྒྱུད་སྐུད་འདི་ངེས་པར་དུ་སྔར་བས་དམ་པོར་འཛིན་དགོས། ང་ཚོའི་ཏང་གིས་རང་ངོས་གསར་བརྗེ་བྱེད་སྐབས་གྲི་ཁ་ནང་ལ་ཕྱོགས་པ་དང་། བཟང་བསྟོད་ངན་སྨད་བྱེད་པ། རུས་འབྲད་དུག་སེལ་བྱེད་པ་ཡིན་མོད། ཏང་གི་སྣང་བརྙན་དང་སྙན་གྲགས་ལ་ཤུགས་རྐྱེན་ཐེབས་མི་སྲིད་པ་མ་ཟད། དེ་ལས་ལྡོག་སྟེ་ཏང་གི་སྣང་བརྙན་དང་སྙན་གྲགས་མཐོ་རུ་གཏོང་ཐུབ་པ་དང་། ཏང་ཡོན་ལས་བྱེད་པའི་ཧུར་སེམས་གཅོག་མི་སྲིད་པ་མ་ཟད། དེ་ལས་ལྡོག་སྟེ་ཏང་ཡོན་ལས་བྱེད་པའི་ཧུར་སེམས་སྔར་བས་རྒྱ་ཁྱབ་དང་སྔར་ལས་ལེགས་པར་སྐུལ་སློང་བྱེད་ཐུབ། དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཤུགས་རྐྱེན་ཐེབས་མི་སྲིད་པ་མ་ཟད། དེ་ལས་ལྡོག་སྟེ་སྤུས་ཚད་མཐོ་བའི་འཕེལ་རྒྱས་ལ་ཆབ་སྲིད་ཀྱི་འགན་ལེན་བརྟན་པོ་མཁོ་འདོན་བྱེད་ཐུབ་པ་ཡིན། 

རྩོམ་ཡིག་ནང་བསྟན་དོན། ཏང་ཡོན་ལས་བྱེད་པས་ཏང་གཤིས་ཆེ་རུ་གཏོང་རྒྱུ་སྔར་བས་དོན་ཐོག་ཏུ་འཁྱོལ་བ་བྱེད་དགོས། རང་ངོས་གསར་བརྗེར་སྐུལ་འདེད་གཏོང་བར་ངེས་པར་དུ་རྩ་བ་བརྟན་གཏོང་དང་ཏང་གཤིས་ཆེ་རུ་གཏོང་དགོས། གཙོ་གནད་ནི་ཕུགས་བསམ་དང་དད་སེམས་བརྟན་དུ་གཏོང་བ་དང་། ཏང་ལ་བློ་དཀར་སེམས་དཀར་བྱེད་པ། དམངས་ལ་བརྩེ་སེམས་ཟབ་མོ་འཆང་བ། ཀུན་སྤྱོད་ཚུལ་ལྡན་བྱེད་པ།  སྤྱོད་གཙང་གཞུང་དྲང་རྒྱུན་འཁྱོངས་བཅས་བྱ་དགོས། རིགས་པའི་གཞུང་ལུགས་ཀྱིས་དྲག་ཆས་སྤྲས་རྒྱུར་ཤུགས་སྣོན་བརྒྱབ་ནས་གུང་ཁྲན་ཏང་མིའི་བསམ་པའི་དོན་གཉེར་བརྟན་སྲུང་བྱེད་དགོས། ཧུར་ཐག་གིས་ཀྲུང་གོའི་རྣམ་པའི་དེང་རབས་ཅན་འཛུགས་སྐྲུན་གྱི་ལག་ལེན་ནང་ཞུགས་ནས་ལས་སྒྲུབ་ལས་གཏོད་ཁྲོད་མི་ཚེར་སྦྱོང་བརྡར་བྱེད་པ་དང་མི་དམངས་ལ་བདེ་སྐྱིད་སྐྲུན་པའི་ཁྲོད་ཀུན་སྤྱོད་ཀྱི་གོ་རྟོགས་མཐོ་རུ་གཏོང་དགོས། ཧུར་ཐག་གིས་ཏང་ནང་གི་ཆབ་སྲིད་འཚོ་བར་ཞུགས་ནས་ཏང་རྩ་འཛུགས་ཀྱི་སློབ་གསོ་དང་ཕྱོགས་གང་ཅིའི་ལྟ་སྐུལ་དང་ལེན་བྱེད་དགོས། དྲང་ཕྱོགས་དང་ལྡོག་ཕྱོགས་ཀྱི་དཔེ་མཚོན་དང་བསྡུར་ནས་རང་ཉིད་ལ་ཞིབ་བཤེར་བྱེད་པ་དང་། ནང་དུ་སྟོང་སེམས་མེད་པ་ཡིས་ཕྱི་རུ་ལོག་སྤྱོད་མེད་པ་ཁག་ཐེག་བྱེད་དགོས། མི་འདེམས་སྤྱོད་བྱེད་པར་ཏང་གཤིས་དབྱེ་འབྱེད་བྱེད་ཤུགས་ཆེ་རུ་གཏོང་བ་དང་། ལས་བྱེད་པའི་བསམ་བློའི་གནས་སྟངས་དང་བློ་དཀར་སྤྱོད་གཙང་ཚད་ལ་རྟོག་ཞིབ་བྱེད་པར་དོ་སྣང་བྱ་དགོས།

རྩོམ་ཡིག་ནང་བསྟན་དོན། དབང་ཆ་ཚད་ལྡན་ངང་འཁོར་སྐྱོད་བྱ་རྒྱུ་སྔར་བས་དོན་ཐོག་ཏུ་འཁྱོལ་བ་བྱེད་དགོས། “སྤྱོད་ཚུལ་བཞི”ཡི་གནད་དོན་མང་ཆེ་བ་ཁྱད་དབང་བསམ་བློ་ལས་བྱུང་བ་དང་། རུལ་སུངས་ཀྱི་མངོན་གསལ་དོད་པའི་མཚོན་ཚུལ་ནི་དབང་ཆར་བརྟེན་ནས་སྒེར་ཕན་གཉེར་བ་དེ་རེད། ཏང་གི་རང་ངོས་གསར་བརྗེའི་གཙོ་གནད་ནི་དབང་ཆ་བཅོས་སྐྱོང་བྱ་རྒྱུ་དེ་ཡིན། རྒྱུན་མཐུད་འབད་བརྩོན་བྱས་པ་བརྒྱུད་དབང་ཆ་དེ་ལམ་ལུགས་ཀྱི་གཟེབ་ནང་དུ་བཅུག་ནས།“ནོར་རྡང་དུ་བྱི་ལ་འདོགས་པ”དང་“ཤོག་བུའི་གཟེབ་དུ་སྟག་འཇུག་པའི”སྣང་ཚུལ་སྔོན་འགོག་ནུས་ལྡན་བྱས་ཏེ། དབང་ཆར་བརྟེན་ནས་ཁེ་ཕན་འཚོལ་བའི་བར་སྟོང་ཆུང་དུ་གཏོང་གང་ཐུབ་བྱ་དགོས། ང་ཚོའི་དབང་ཆ་ཡོད་ཚད་མི་དམངས་ཀྱིས་སྤྲད་པ་ཡིན་པས། ངེས་པར་དུ་ཡང་དག་པར་སྤྱོད་པ་དང་མི་དམངས་ལ་འགན་འཁུར་དགོས་པ་ལས། ཏང་ནང་དུ་ཁྱད་དབང་གི་བསམ་བློ་དང་ཁྱད་དབང་གི་སྣང་ཚུལ་ཡོད་མི་ཆོག་ལ། ཁེ་ཕན་ཚོགས་པ་དང་དབང་ཤུགས་ཚོགས་པ། ཁྱད་དབང་རིམ་གྲས་བཅས་དེ་བས་ཀྱང་འབྱུང་མི་ཆོག་པ་དེ་ཏང་ཡོན་ལས་བྱེད་པས་དུས་དང་རྣམ་པ་ཀུན་ཏུ་སེམས་ལ་བརྟན་པོར་ངེས་དགོས། ཏང་ནང་ཞུགས་པ་དང་ལས་བྱེད་པ་བྱེད་པའི་ཉིན་དེ་ནས་བཟུང་མི་དམངས་ལ་གུས་ཤིང་བཀུར་བ་དང་། རྩ་འཛུགས་ལ་གུས་ཤིང་བཀུར་བ། སྒྲིག་ཁྲིམས་ལ་གུས་ཤིང་བཀུར་བ་བཅས་བྱ་དགོས།

རྩོམ་ཡིག་ནང་བསྟན་དོན། ལྟ་སྐུལ་སྒྲིག་བསྟར་ནན་པོ་བྱེད་པ་སྔར་བས་དོན་ཐོག་ཏུ་འཁྱོལ་བ་བྱེད་དགོས། ལྟ་སྐུལ་དང་སྒྲིག་བསྟར་ནན་པོ་བྱ་རྒྱུ་ནི་ཏང་གི་རང་ངོས་གསར་བརྗེའི་མཚོན་ཆ་རྣོན་པོ་ཞིག་ཡིན། ཁྲིམས་འགལ་སྒྲིག་འགལ་གྱི་གནད་དོན་ངེས་པར་དུ་ཐག་གཅོད་མཐའ་གཅིག་ཏུ་བྱ་དགོས་ལ། གནམ་ལྕགས་ལྟབུའི་བྱེད་ཐབས་གཏན་ནས་ཉུང་མི་རུང་། ལྟ་སྐུལ་ནན་པོ་བྱེད་པའི་ཐད་ཏང་ནང་ཁུལ་གྱི་ལྟ་སྐུལ་དང་མི་དམངས་ཀྱི་ལྟ་སྐུལ་ཟུང་འབྲེལ་བྱས་ཏེ། ལྟ་སྐུལ་སྣ་ཚོགས་འབྲེལ་མཐུད་དང་མཐུན་སྦྱོར་ཡོང་བར་སྐུལ་འདེད་གཏོང་དགོས། སྒྲིག་བསྟར་ནན་པོ་བྱེད་པའི་ཐད་ཚད་གཞི་ནན་པོ་བཟོས་ནས་ཏང་སྲོལ་དང་ཏང་གི་སྒྲིག་ཁྲིམས་ཀྱི་བླང་བྱ་དེ་བྱེད་ཐབས་འགྱུར་མེད་ཅིག་ཏུ་སྒྱུར་བ་དང་། ངར་ལྕགས་ལྟབུའི་སྒྲིག་ལམ་ལ་གྲི་སོ་སྤྲད་ནས་ཚུལ་མིན་སྤྱོད་ཚུལ་དང་རུལ་སུངས་སྣང་ཚུལ་ཐོན་མ་ཐག་རྡུང་རྡེག་དང་ཞིབ་བཤེར་ཐག་གཅོད་ནན་པོ་བཅས་བྱས་ཏེ། ཏང་ཡོངས་ལ་ནན་པོ་མཐར་ཕྱིན་པ་དང་གོམ་པ་གང་ཡང་ཕྱི་བཤོལ་མི་བྱེད་པའི་བརྡ་རྟགས་བཏང་ནས་ཟིལ་གནོན་གྱི་ནུས་པ་ཆགས་པར་བྱེད་དགོས། 

རྩོམ་ཡིག་ནང་བསྟན་དོན། ཏང་དོ་དམ་དང་ཏང་བཅོས་སྐྱོང་གི་འགན་འཁྲི་དོན་འཁྱོལ་སྔར་བས་གནད་ལ་འཁེལ་བ་བྱེད་དགོས། ཏང་འཛུགས་སྐྱོང་དམ་འཛིན་ཡག་པོ་བྱ་རྒྱུ་ནི་རང་འཁྲིའི་ལས་འགན་ཡིན་པ་དང་། ཏང་འཛུགས་སྐྱོང་དམ་འཛིན་མ་བྱས་ན་འགན་འཛོལ་ཡིན། ཏང་འཛུགས་སྐྱོང་དམ་འཛིན་ཡག་པོ་མ་བྱས་ན་ལས་གོ་མི་འཕེར་བ་ཞིག་རེད། ཏང་དོ་དམ་དང་ཏང་བཅོས་སྐྱོང་གི་འགན་འཁྲི་ལ་བྱེད་པོའི་འགན་འཁྲི་དང་། ལྟ་སྐུལ་གྱི་འགན་འཁྲི། འགན་འཁྲི་འཁུར་མཁན་དང་པོའི་འགན་འཁྲི།“ལས་གནས་གཅིག་ལ་འགན་འཁྲི་གཉིས”སོགས་ཡོད་པ་དེ་དག་གིས་འགན་འཁྲིའི་འབྲེལ་ཐག་ཆ་ཚང་ཞིག་གྲུབ་ཡོད། འགན་འཁྲི་ཚང་མ་ཧ་ཅང་གལ་ཆེན་ཡིན་པས་ཚང་མ་དོན་འཁྱོལ་ནན་པོ་བྱེད་དགོས། རིམ་པ་ཁག་གི་མགོ་ཁྲིད་ལས་བྱེད་པས་ཏང་དོ་དམ་དང་ཏང་སྐྱོང་བའི་འགན་འཁྲི་མཐའ་གཅིག་ཏུ་འཁུར་བ་དང་། རིམ་པ་བཞིན་གནོན་ཤུགས་བརྒྱུད་སྤྲོད་བྱས་ཏེ། གཟབ་ནན་གྱི་རྣམ་པ་ཏན་ཏིག་གིས་བསྐྲུན་པ་དང་དར་སྲོལ་བཟང་པོ་འཛུགས་དགོས།