ཤ་བོ་སྐྱབས་དང་ཀྲང་ཧྲིང་ཡོན་གྱིས་གཏེར་རི་བཅོས་སྒྲིག་ལས་དོན་ལ་བརྟག་ཞིབ་གནང་སྐབས་ཚད་གཞི་མཐོན་པོ་དང་བླང་བྱ་ནན་མོས་སྐྱེ་ཁམས་ཁོར་ཡུག་བཅོས་སྒྲིག་གི་འགག་སྒྲོལ་དམག་འཐབ་ལ་རྒྱལ་ཁ་ལེན་དགོས་པ་ནན་བཤད་གནང་།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཉེ་ཆར། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཁུལ་ཨུའི་ཧྲུའུ་ཅི་གཞོན་པ་དང་ཁུལ་དཔོན་ཀྲང་ཧྲིང་ཡོན་གྱིས་རྐང་ཚ་རྫོང་ཚེ་ཐར་གཏེར་ཁ་དང་ཚེ་ཐར་གདོང་ལེན་གཏེར་ཁར་སྐྱེ་ཁམས་བཅོས་སྐྱོང་དང་བདེ་འཇགས་ཐོན་སྐྱེད་ལས་དོན་ལ་བརྟག་ཞིབ་དང་ལྟ་སྐུལ་མཛུབ་ཁྲིད་གནང་སྐབས། སེམས་ཤུགས་གཅིག་སྒྲིལ་དང་ཐུན་མོང་འགག་སྒྲོལ་བྱས་ཏེ་ཚད་གཞི་མཐོན་པོ་དང་བླང་བྱ་ནན་མོས་སྐྱེ་ཁམས་ཁོར་ཡུག་བཅོས་སྒྲིག་གི་འགག་སྒྲོལ་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་དགོས་པ་ནན་བཤད་གནང་།

ཚེ་ཐར་གཏེར་ཁ་དང་ཚེ་ཐར་གདོང་ལེན་གཏེར་ཁའི་སྐྱེ་ཁམས་ཁོར་ཡུག་ཕྱོགས་བསྡུས་བཅོས་སྒྲིག་བྱ་ཡུལ་དུ་ཤ་བོ་སྐྱབས་དང་ཀྲང་ཧྲིང་ཡོན་གྱིས་གཏེར་དོང་བསྐྱར་སྐོང་དང་སྙིགས་རོ་བཅོས་སྒྲིག་སོགས་ཀྱི་གནས་ཚུལ་ལ་ས་གནས་ས་ཐོག་ཏུ་གཟིགས་ཞིབ་གནང་བ་དང་། ཁུལ་དང་རྫོང་རིམ་པ་གཉིས་ཀྱི་ལས་དོན་ཆེད་དོན་འཛིན་གྲྭ་དང་འབྲེལ་ཡོད་སྡེ་ཚན་གྱི་ལས་དོན་སྙན་ཞུར་གསན་ཞིང་། མིག་སྔར་ཚེ་ཐར་གཏེར་ཁ་དང་ཚེ་ཐར་གདོང་ལེན་གཏེར་ཁའི་སྐྱེ་ཁམས་ཁོར་ཡུག་ཕྱོགས་བསྡུས་བཅོས་སྒྲིག་ལས་དོན་ལ་དུས་མཚམས་རང་བཞིན་གྱི་ཕན་འབྲས་ཐོན་ཡོད་མོད། འོན་ཀྱང་དཀའ་གནད་ཁག་ཅིག་ཀྱང་གནས་ཡོད། འབྲེལ་ཡོད་ས་ཁུལ་དང་སྡེ་ཚན་གྱིས་ཆབ་སྲིད་ཀྱི་རང་རྟོགས་ཐོག་ནས་གནད་དོན་ལ་ཁ་གཏད་འཇལ་བ་དང་། ཆབ་སྲིད་ཀྱི་འགན་འཁྲི་འཁུར་སེམས་ཆེན་པོ་བཅངས་ནས་དཀའ་གནད་སེལ་བ་དང་། ལོ་འཁོར་གྱི་དམིགས་ཚད་ལས་འགན་སྤུས་ཚད་མཐོན་པོའི་སྒོ་ནས་ལེགས་འགྲུབ་ཡོང་བའི་འགན་ལེན་བྱེད་དགོས་ཞེས་བསྟན།

ཤ་བོ་སྐྱབས་ཀྱིས་ནན་གྱིས་བསྟན་དོན། གཅིག་ནས་ཆབ་སྲིད་ཀྱི་ལངས་གནས་མཐོ་རུ་བཏང་ནས་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་ལེན་ནན་ཏན་བསྟར་བ་དང་། ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཀྱི་དཔེ་མཚོན་གྱོད་དཔེ་དག་ཐེར་བྱ་རྒྱུ་དེ་ཆབ་སྲིད་དང་སྐྱེ་ཁམས་ཀྱི་རྒྱུགས་གལ་ཆེན་དུ་བརྩི་རྒྱུ་མཐའ་འཁྱོངས་བྱས་ཏེ་བཅོས་སྒྲིག་གི་བླང་བྱ་ཁག་ཇི་མ་ཇི་བཞིན་དོན་འཁྱོལ་བྱེད་དགོས། གཉིས་ནས་གནད་དོན་གྱི་ཞན་ཆར་དོ་སྣང་བྱེད་དགོས་ཏེ། རྐང་ཚ་རྫོང་གིས་ཁོངས་གཏོགས་ས་ཆའི་འགན་འཁྲི་དོན་འཁྱོལ་ནན་པོ་བྱས་ཏེ་ཁེ་ལས་ཀྱིས་སྐྱེ་ཁམས་ཁོར་ཡུག་བཅོས་སྐྱོང་ལས་དོན་ལ་ནུས་ཤུགས་ཡོད་རྒུས་སྐུལ་འདེད་གཏོང་རྒྱུར་ལྟ་སྐུལ་བྱེད་པ་དང་ཆབས་ཅིག་བཅོས་སྐྱོང་རྣམ་གྲངས་ཀྱི་མ་འཇོག་དེ་གཏན་འཇགས་རྒྱུ་ནོར་དུ་འགྱུར་བའི་ལས་དོན་གནད་སྨིན་ངང་ཡག་པོ་སྒྲུབ་དགོས། ཁུལ་དང་རྫོང་གི་རང་བྱུང་ཐོན་ཁུངས་དང་། སྐྱེ་ཁམས་ཁོར་ཡུག ནགས་ལས་དང་རྩྭ་ཐང་། འཕྲལ་བསྟུན་དོ་དམ་སོགས་སྡེ་ཁག་གིས་ལས་རིགས་ཀྱི་ལྟ་སྐུལ་དོ་དམ་འགན་འཁྲི་ཇེ་དྲག་ཏུ་གཏོང་བ་དང་། ལྷག་པར་དུ་འཕྲལ་བསྟུན་དོ་དམ་སྡེ་ཁག་གིས་བདེ་འཇགས་ཀྱི་མངོན་མེད་རྐྱེན་ངན་བཅོས་སྐྱོང་ལས་གྲྭའི་མཛུབ་སྟོན་བྱ་བར་ཤུགས་སྣོན་བྱས་ཏེ། ལས་གྲྭ་ཡོངས་ལ་ཞིབ་བཤེར་རྩིས་ལེན་བྱེད་པར་རྨང་གཞི་བརྟན་པོ་འདིང་དགོས། གསུམ་ནས་མཉམ་ལས་གཞོགས་འདེགས་ལ་ཤུགས་སྣོན་རྒྱག་དགོས་ཏེ། མཚོ་སྔོན་སྐྱེལ་འདྲེན་ཚོགས་པས་གཞུང་ཁོངས་ཁེ་ལས་ཀྱི་འགན་འཁྲི་འཁུར་སེམས་འདོན་སྤེལ་ཏན་ཏིག་བྱེད་པ་དང་། སྐྱེ་ཁམས་སླར་གསོའི་བྱེད་པོའི་འགན་འཁྲི་རང་འགུལ་ངང་འཁུར་བ། རྐང་དབང་སྒྱུར་བཅོས་ལས་དོན་ལ་སྐུལ་འདེད་མགྱོགས་སུ་གཏོང་བ། བཅོས་སྐྱོང་མ་དངུལ་གྲབས་གསོག་ཧུར་ཐག་བཅས་བྱེད་དགོས། ཁུལ་འཕེལ་སྒྱུར་དང་བཟོ་ལས་ཡིད་རྟོན་གྱིས་ནུས་ཤུགས་ཡོད་རྒུས་གཞོགས་འདེགས་དང་རྒྱབ་སྐྱོར་བྱས་ཏེ་ལས་གྲྭ་དུས་ཐོག་ཏུ་སྤུས་ཚད་མཐོན་པོའི་ངང་ལེགས་གྲུབ་ཐུབ་པའི་འགན་ལེན་བྱེད་དགོས། ཁེ་ལས་ཀྱིས་འཕྲལ་བསྟུན་སྡེ་ཚན་དང་འབྲེལ་མཐུད་ཧུར་ཐག་བྱས་ཏེ་བཅོས་སྒྲིག་བྱས་རྗེས་ལས་མགོ་བསྐྱར་འཛུགས་ཀྱི་འགྲོ་ལུགས་གཉེར་བའི་ལས་དོན་སྔ་སྣུར་དུ་འཆར་འགོད་དང་བཅོས་སྒྲིག་བྱེད་མགོ་བརྩམ་དགོས་པ་དང་། འཕྲལ་བསྟུན་དོ་དམ་སྡེ་ཚན་གྱིས་ཞབས་ཞུ་འགན་ལེན་ལས་དོན་ཡག་པོ་སྒྲུབ་དགོས།

ཀྲང་ཧྲིང་ཡོན་གྱིས་ནན་གྱིས་བསྟན་དོན། གཅིག་ནས་གཏན་འཁེལ་བྱས་པའི་མཚམས་ཚིགས་ཀྱི་དམིགས་ཚད་ལ་དམ་པོར་དམིགས་ཏེ་ཨར་སྐྲུན་བཀོད་སྒྲིག་ལ་སྤྱི་འདོམས་སྐུལ་འདེད་བཏང་ནས་ལས་གྲྭའི་ལས་འགན་ཁག་དུས་ཐོག་དང་སྤུས་འབོར་གཉིས་ལྡན་ངང་ལེགས་གྲུབ་ཡོང་བའི་འགན་ལེན་བྱེད་དགོས། གཉིས་ནས་ཁེ་ལས་ཀྱི་བྱེད་པོའི་འགན་འཁྲི་ནན་དུ་གཏོང་བ་དང་། མ་དངུལ་གྲབས་གསོག་གི་ཐབས་ལམ་རྒྱ་ཆེར་ཧུར་ཐག་བཏང་སྟེ་ཉམས་གསོ་བཅོས་སྒྲིག་གི་མ་དངུལ་དུས་ཐོག་ཏུ་ཁ་ཚང་དོན་འཁྱོལ་ཐུབ་པའི་འགན་ལེན་དང་། མ་དངུལ་གྱི་འབྲེལ་ཐག་མི་ཆད་པ་བྱེད་དགོས། གསུམ་ནས་བཅོས་སྐྱོང་ཁུལ་གྱི་དུས་མཇུག་གི་ཕུགས་ཕན་དོ་དམ་སྲུང་སྐྱོང་ཏན་ཏིག་བྱས་ཏེ་ཕྱི་ལོའི་སྔོ་ལྗང་སླར་གསོའི་ལས་དོན་སྔ་སྣུར་དུ་འཆར་འགོད་བྱེད་པ་དང་། རྩྭ་འདེབས་སྔོ་ལྗང་སླར་གསོའི་འབྲེལ་ཡོད་དངོས་ཟོག་དུས་ཐོག་ཏུ་གྲ་སྒྲིག་བྱེད་དགོས། བཞི་ནས་དཔྱད་གཞི་ཁག་ལེགས་སྒྲིག་དང་ཡིག་ཚགས་སུ་འཇུག་པའི་ལས་དོན་ཚད་ལྡན་དང་ཡག་པོ་བསྒྲུབ་སྟེ་ཞིབ་བཤེར་རྩིས་ལེན་གྱི་དཔྱད་གཞི་ཆ་ཚང་ཡོང་བའི་འགན་ལེན་བྱེད་དགོས། ལྔ་ནས་ས་གནས་ས་ཐོག་གི་ཨར་ལས་བདེ་འཇགས་དོ་དམ་ལ་ཤུགས་སྣོན་བརྒྱབ་སྟེ་རྒྱུན་རྣམ་ཅན་གྱི་བདེ་འཇགས་ཀྱི་མངོན་མེད་རྐྱེན་ངན་གྲལ་བཤེར་བཅོས་སྒྲིག་བྱེད་པ་དང་། འཕྲལ་བསྟུན་སྡེ་ཚན་གྱིས་ལྟ་སྐུལ་མཛུབ་ཁྲིད་དང་ལག་རྩལ་རྒྱབ་སྐྱོར་ལ་སྔར་བས་ཤུགས་སྣོན་བརྒྱབ་ནས་བདེ་འཇགས་ལས་འཛོལ་ཐོན་རྒྱུ་ནན་འགོག་བྱེད་དགོས།

དེའི་རིང་ཤ་བོ་སྐྱབས་དང་ཀྲང་ཧྲིང་ཡོན་ཆུ་ཁོལ་མངགས་གཏོང་ཁང་དང་དཔལ་དགེ་གྲོང་རྡལ་གྱི་ལྟེ་བའི་འཕྲོད་བསྟེན་ཁང་ཆུ་ཁོལ་ཡན་ལག་ཁང་དུ་སོང་སྟེ་གཞི་རིམ་གྱི་མི་དམངས་ཉེན་རྟོག་པ་དང་སྨན་དོན་མི་སྣར་འཚམ་འདྲི་བྱས་པ་དང་། བདེ་འཇགས་དོ་དམ་དང་སྨན་བཅོས་འཕྲོད་བསྟེན་འགན་ལེན་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་། ཐོག་མཐའ་བར་གསུམ་དུ་མི་དམངས་ཀྱི་ཆེད་དུ་བྱ་བ་སྒྲུབ་པའི་ཐོག་མའི་ཀུན་སློང་བརྟན་སྲུང་དང་། ཉེན་བརྡ་གསུམ་མཉམ་འདྲེས་གཏིང་ཟབ་བྱེད་པ། མཉམ་འགུལ་ཁྲིམས་འཛིན་ལ་ཤུགས་སྣོན་རྒྱག་པ། འགྲོ་ལམ་འགྲིམ་འགྲུལ་ལས་འཛོལ་སྔོན་འགོག་གི“ཉིན་བརྒྱའི་བྱ་སྤྱོད”ཏན་ཏིག་སྤེལ་བ། ཁྱབ་ཁོངས་ཁག་གི་བདེ་འཇགས་འགོག་སྲུང་འཛིང་རགས་བརྟན་དུ་གཏོང་བ་བཅས་བྱས་ནས་མང་ཚོགས་ཀྱི་ཕྱིར་སྐྱོད་བདེ་འཇགས་དང་སྤྱི་ཚོགས་སྤྱི་ཡོངས་རྒྱུན་མཐུད་བརྟན་ལྷིང་ཡོང་བའི་འགན་ལེན་ཏན་ཏིག་བྱེད་དགོས་པ་དང་། མང་ཚོགས་ཀྱི་སྨན་བཅོས་ཁོར་ཡུག་རྒྱུན་མཐུད་ངང་ལེགས་སུ་གཏོང་བ་དང་། སྨན་བཅོས་སྤུས་ཚད་དང་སྨན་བཅོས་མྱོང་ཚོར་མཐོ་རུ་གཏོང་བ། སྨན་བཅོས་ཆུ་ཚད་རྒྱུན་མཐུད་ངང་མཐོ་རུ་གཏོང་བ་བཅས་བྱས་ཏེ་བྱ་སྤྱོད་དངོས་ཀྱི་ཐོག་ནས་མི་དམངས་མང་ཚོགས་ཀྱི་བདེ་ཐང་སྲུང་སྐྱོང་བྱེད་དགོས་པ་ནན་གྱིས་བསྟན།

ཁུལ་གྱི་མགོ་ཁྲིད་ཚོ་ཅི་ཆང་དང་མ་རུའུ་ཞང་གིས་བརྟག་ཞིབ་གནང་བར་ཕེབས་རོགས་བྱས།