ཀྲང་ཧྲིང་ཡོན་གྱིས“དུས་ཆེན་གཉིས”ལ་འཚམས་འདྲིའི་བྱེད་སྒོ་སྤེལ་བ།

རྩོམ་སྒྲིག ཀླུ་མོ་མཚོ།  ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར།  བཤེར་འབེབས། རིན་ཆེན་ཚེ་རིང་།

དཔྱིད་གསར་དུས་ཆེན་ལ་སླེབས་ལ་ཉེ་བའི་སྐབས་ཏེ། ཟླ1པོའི་ཚེས21ཉིན། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་གྱིས་སྣེ་ཁྲིད་དེ“དུས་ཆེན་གཉིས”ལ་འཚམས་འདྲིའི་བྱེད་སྒོ་སྤེལ་བ་དང་། སྔ་རྗེས་སུ་དྲག་ཆས་ཉེན་རྟོག་མཚོ་བྱང་ཡན་ལག་རུ་ཁག་དང་ཆོས་ལུགས་དགོན་སྡེར་ཕྱིན་ཏེ་དྲག་ཆས་ཉེན་རྟོག་དཔོན་དམག་དང་ཆོས་ལུགས་ལས་རིགས་ཀྱི་མི་སྣ། ཏང་ཕྱིའི་མི་སྣའི་འཐུས་མི། དབང་པོ་སྐྱོན་ཅན་མང་ཚོགས། ཕུལ་བྱུང་ཏང་ཡོན། གཟིགས་སྐྱོང་བྱ་ཡུལ་བཅས་ལ་འཚམས་འདྲི་གནང་ནས་ཁོ་ཚོར་དུས་ཆེན་གྱི་འཚམས་འདྲི་དང་ལོ་སར་གྱི་སྨོན་འདུན་ཞུས་ཤིང་། ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་ལས་རིགས་སོ་སོའི་ལས་བྱེད་མང་ཚོགས་ལ་ཕུལ། ཁུལ་ཨུའི་རྒྱུན་ཨུའམ་འཐབ་ཕྱོགས་གཅིག་གྱུར་པུའི་པུ་ཀྲང་སངས་རྒྱས་ཞུགས།

དྲག་ཆས་ཉེན་རྟོག་མཚོ་བྱང་ཡན་ལག་རུ་ཁག་ཏུ་ཀྲང་ཧྲིང་ཡོན་གྱིས་དཔུང་སྡེའི་སྦྱོང་བརྡར་དང་རྒྱབ་ཕྱོགས་མཁོ་སྒྲུབ་འགན་ལེན། དཔོན་དམག་གི་བྱ་བ་དང་འཚོ་བའི་གནས་ཚུལ་བཅས་ལ་རྒྱུས་ལོན་ཞིབ་ཕྲ་གནང་ནས་ཡན་ལག་རུ་ཁག་གི་དཔོན་དམག་གིས་དུས་ཡུན་རིང་བོར་ས་གནས་ཀྱི་སྤྱི་ཚོགས་བརྟན་ལྷིང་སྲུང་སྐྱོང་དང་། མཁོ་བསྟུན་ཐག་གཅོད། ཉེན་སེལ་གུད་སྐྱོབ་སོགས་ཀྱི་བྱ་བའི་ཁྲོད་ལེགས་སྐྱེས་འབུར་ཐོན་ཕུལ་བར་སྙིང་ཐག་པ་ནས་ཐུགས་རྗེ་ཆེ་ཞུས། ཁོས་བཤད་རྒྱུར། ཁུལ་ཨུ་དང་ཁུལ་སྲིད་གཞུང་གིས་ཐོག་མཐའ་བར་གསུམ་དུ་དམག་དཔུང་ལ་བརྩི་བཀུར་དང་ཁྱིམ་མིར་གཟིགས་སྐྱོང་བྱེད་པ་རྒྱུན་འཁྱོངས་བྱེད་པ་དང་། རྒྱུན་མཐུད་སྒོས་དམག་དཔུང་དང་ས་གནས་ཀྱི་མཉམ་འདྲེས་འཕེལ་རྒྱས་གཏིང་ཟབ་ཏུ་བཏང་ནས་དཔུང་སྡེའི་ཞབས་ཞུ་འགན་སྲུང་བྱ་བར་ནུས་ཤུགས་ཡོད་རྒུས་ལེགས་པར་བསྒྲུབ་ནས་དཔོན་དམག་ཚོའི་རྒྱབ་རྟེན་བརྟན་པོ་ཡག་པོ་བྱེད་དགོས་ལ། དཔོན་དམག་ཡོངས་ཀྱིས་མུ་མཐུད་དུ་སྤྱོད་ཚུལ་བཟང་པོ་དར་སྤེལ་གཏོང་བ་དང་། ཉམས་སད་ཐེག་པའི་འཇོན་ཐང་ཧུར་ཐག་སྦྱོང་བརྡར་བྱས་ཏེ་མཚོ་བྱང་ཁུལ་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་དང་སྤྱི་ཚོགས་ཁྱོན་ཡོངས་ཀྱི་འཆམ་མཐུན་བརྟན་ལྷིང་ལ་ཡང་བསྐྱར་བྱས་རྗེས་གསར་བ་འཇོག་རྒྱུའི་རེ་བ་ཡོད་ཟེར།

དེའི་རྗེས་སུ། ཀྲང་ཧྲིང་ཡོན་ལ་མོ་སྒར་ཐོག་ཀུན་བདེ་གླིང་དུ་ཕྱིན་ནས་ཆོས་ལུགས་ལས་རིགས་མི་སྣ་དང་བརྗེ་རེས་གཏིང་ཟབ་བྱས་ཤིང་། དགོན་པའི་རྒྱུན་གཏན་དོ་དམ་དང་ཆོས་ལུགས་བྱེད་སྒོ་སྤེལ་ཚུལ། གྲྭ་བཙུན་མང་ཚོགས་ཀྱི་འཚོ་བའི་འགན་སྲུང་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་། ཁོས་ནན་གྱིས་བསྟན་དོན། ཏང་གི་ཆོས་ལུགས་བྱ་བའི་གཞི་རྩའི་བྱེད་ཕྱོགས་ཁྱོན་ཡོངས་ནས་ལག་བསྟར་བྱེད་དགོས་པ་དང་། ཐོག་མཐའ་བར་གསུམ་དུ་རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས་བྱེད་པ། རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་བོ་དར་སྤེལ་ཤུགས་ཆེན་བཏང་སྟེ། ཆོས་ལུགས་ལས་རིགས་ཀྱི་མི་སྣ་དང་ཆོས་དད་མང་ཚོགས་ཀྱིས་ཏང་གི་བཀའ་དྲིན་ཚོར་བ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲངས་པར་ཁྲིད་སྟོན་བྱས་ཏེ་བཅའ་ཁྲིམས་དང་སྒྲིག་སྲོལ་ལྟར་ཆོས་ལུགས་བྱ་བར་དོ་དམ་བྱེད་ཤུགས་ཆེ་རུ་བཏང་ནས་ཆོས་ལུགས་འཚམ་མཐུན་དང་སྤྱི་ཚོགས་འཆམ་མཐུན། མི་རིགས་མཐུན་སྒྲིལ་ཡོང་བར་འགན་ལེན་བྱེད་དགོས། ཆོས་ལུགས་ལས་རིགས་ཀྱི་མི་སྣས་རྒྱལ་ཁབ་ཀྱི་སྒྲིག་ཁྲིམས་བརྩི་སྲུང་ནན་མོ་བྱེད་པ་དང་། ཕྱོགས་ཡོངས་ནས་ཁྲིམས་ལྟར་ཆོས་ལུགས་བཅོས་སྐྱོང་ནན་མོ་བྱེད་པ། གྲྭ་བཙུན་གྱི་སློབ་སྦྱོང་དང་རྒྱུན་ལྡན་དོ་དམ་ལ་ཤུགས་སྣོན་ཏན་ཏིག་རྒྱག་པ། ཆོས་དད་ལྡན་མང་ཚོགས་ལ་ཁྲིད་སྟོན་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་ཕན་ཚུན་འཚམ་པར་སྐུལ་འདེད་གཏོང་བའི་ཁྲོད་ཀྱི་དགེ་མཚན་ལྡན་པའི་ནུས་པ་འདོན་སྤེལ་ཡག་པོ་བྱས་ནས་ས་གནས་འཕེལ་རྒྱས་ལ་ཆོས་ལུགས་ལས་རིགས་ཀྱི་བློ་གྲོས་དང་སྟོབས་ཤུགས་ལེགས་སྐྱེས་སུ་དབུལ་དགོས་ཟེར།

ཁུལ་བོད་སྨན་ཁང་དུ་ཀྲང་ཧྲིང་ཡོན་གྱིས་ཏང་ཕྱིའི་མི་སྣའི་འཐུས་མིར་འཚམས་འདྲི་གནང་ནས་བོད་སྨན་ཁྱབ་ཁོངས་གཏིང་ཟབ་ཞུགས་ནས་རྒྱུན་འཛིན་གསར་གཏོད་དང་མང་ཚོགས་ཀྱི་བདེ་ཐང་འགན་ལེན་བྱེད་པའི་ཐད་བླངས་པའི་ཕན་འབྲས་ལ་ཁས་ལེན་གང་ལེགས་གནང་། ཁོས་བསྟན་དོན། ཏང་ཕྱིའི་མི་སྣ་ནི་ས་གནས་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཡིན་པས་ཆེད་ལས་ཀྱི་ལེགས་ཆ་མུ་མཐུད་འདོན་སྤེལ་གང་ལེགས་བྱས་ཏེ། ཚོགས་པའི་སྣེ་ཁྲིད་ནས་བོད་སྨན་བྱ་གཞག་སྟོབས་ཆེར་གཏོང་བ་དང་ཆབས་ཅིག་ཧུར་ཐག་སྒོས་ཐབས་འདོན་ཇུས་འབུལ་དང་རང་འགན་གཙང་སྒྲུབ་བྱས་ཏེ་ཁུལ་ཡོངས་ཀྱི་བོད་སྨན་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་འདོན་རྒྱུའི་རེ་བ་ཡོད་ཅིང་། ཁུལ་ཨུ་དང་ཁུལ་སྲིད་གཞུང་གིས་མུ་མཐུད་དུ་ཞབས་ཞུའི་འགན་ལེན་ཇེ་ལེགས་སུ་བཏང་ནས་ཏང་ཕྱིའི་མི་སྣས་ལས་སྒྲུབ་ལས་གཏོད་བྱ་རྒྱུར་སྔར་ལས་རྒྱ་ཆེ་བའི་ལས་སྟེགས་འཛུགས་རྒྱུ་ཡིན་ཟེར།

ཕུལ་བྱུང་ཏང་ཡོན་ནམ་ནུབ་མཚོ་བྱིས་སྙོར་ཁང་གི་ཏང་ཀྲི་པུའི་ཧྲུའུ་ཅིར་འཚམས་འདྲི་གནང་སྐབས། ཀྲང་ཧྲིང་ཡོན་གྱིས་སློབ་གསོའི་བྱ་གཞག་ཐད་སྨྲ་བ་མེད་པར་ལེགས་སྐྱེས་ཕུལ་བའི་འགན་འཁུར་སྙིང་སྟོབས་ལ་བསྔགས་བརྗོད་གནང་ལ། གདོང་ལེན་དཔེ་བཟང་གི་ནུས་པ་མུ་མཐུད་འདོན་སྤེལ་བྱས་ཏེ་སློབ་གྲྭ་ཡོངས་ཀྱི་དགེ་རྒན་དང་ལས་བཟོ་བའི་སྣེ་ཁྲིད་དེ་ལས་རིགས་གཙོ་བོ་འགན་ལེན་དང་ཉམས་སད་ཐེག་ཐུབ་པའི་དགེ་རྒན་གྱི་ཀུན་སྤྱོད་སྦྱོང་བརྡར་བྱས་ནས། གཞི་རིམ་གྱི་སློབ་སྔོན་སློབ་གསོའི་སྤུས་ཚད་དང་ཕན་འབྲས་མཐོ་རུ་གཏོང་རྒྱུར་རྒྱུན་མཐུད་ངང་སྐུལ་འདེད་གཏོང་རྒྱུའི་རེ་བ་ཡོད་ཅིང་། དེ་དང་ཆབས་ཅིག་རིམ་པ་སོ་སོའི་ཏང་རྩ་འཛུགས་ཀྱིས་གཞི་རིམ་གྱི་ཏང་ཡོན་ལས་བྱེད་པར་ཐུགས་ཁུར་དང་གཅེས་སྐྱོང་ཏན་ཏིག་བྱས་ཏེ། སློབ་གསོ་སོགས་བྱ་གཞག་སོ་སོ་སྤུས་ཚད་མཐོ་བའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་པའི་བླང་བྱ་བཏོན།

འཚམས་འདྲི་བྱེད་སྐབས། ཀྲང་ཧྲིང་ཡོན་ཆེད་དུ་དབང་བོ་སྐྱོན་ཅན་མང་ཚོགས་ཀྱི་ཁྱིམ་དུ་ཕྱིན་ནས་ནང་མི་དང་ཁ་བརྡ་སེམས་གཏམ་བཤད་དེ་ཁྱིམ་ཚང་གི་ཡོང་འབབ་ཡོང་ཁུངས་དང་སྨན་བཅོས་འགན་ལེན་དོན་འཁྱོལ། དེ་བཞིན་འཚོ་བའི་ཁྲོད་ལྷག་པའི་དཀའ་ངལ་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་ཞིང་ཁོ་ཚོར་སྤྲོ་སྣང་གི་བསམ་པ་རྒྱུན་འཁྱོངས་དང་འཚོ་བར་ཁ་གཏད་ཧུར་ཐག་གཅོག་དགོས་པའི་སྐུལ་ལྕག་གནང་ནས་ནང་མིར་གཅེས་སྐྱོང་བྱེད་དགོས་པའི་མངགས་བཅོལ་གནང་། ཁོས་བླང་བྱ་བཏོན་དོན། དམངས་སྲིད་དང་འཕྲོད་བསྟེན། དབང་བོ་སྐྱོན་ཅན་མཉམ་འབྲེལ་ལྷན་ཚོགས་སོགས་སྡེ་ཁག་གིས་རོགས་སྐྱོབ་སྲིད་ཇུས་སོ་སོ་གནད་ལ་འཁེལ་བའི་སྒོ་ནས་དོན་འཁྱོལ་བྱས་ཏེ། དབང་བོ་སྐྱོན་ཅན་མང་ཚོགས་ཀྱི་བྲེལ་དཀའ་སྡུག་སྨོན་གྱི་གནད་དོན་ལ་དམིགས་ནས་རོགས་སྐྱོབ་བྱ་ཐབས་ཞིབ་ཚགས་སུ་གཏོང་བ་དང་འགན་སྲུང་གི་ཞན་ཆ་གསབ་སྟེ། དབང་བོ་སྐྱོན་ཅན་མང་ཚོགས་ལ་ཏང་དང་སྲིད་གཞུང་གི་ཐུགས་ཁུར་དང་དྲོ་སྐྱིད་དངོས་ཚོར་ཐུབ་པར་བྱེད་དགོས་ཟེར།

གཟིགས་སྐྱོང་བྱ་ཡུལ་གྱི་ཁྱིམ་དུ། ཀྲང་ཧྲིང་ཡོན་གྱིས་ཁོའི་གཟུགས་པོའི་གནས་ཚུལ་དང་ཁྱིམ་ཚང་གི་འཚོ་བ། དེ་བཞིན་གཟིགས་སྐྱོང་སྲིད་ཇུས་སོ་སོ་དོན་འཁྱོལ་བྱས་ཚུལ་ལ་རྒྱུས་ལོན་ཞིབ་ཕྲ་གནང་བ་དང་རྒན་རྒོན་ཚོས་རྒྱལ་ཁབ་དང་སྤྱི་ཚོགས་ཀྱི་ཆེད་དུ་ལེགས་སྐྱེས་ཕུལ་བར་བརྩེ་སེམས་ཟབ་མོས་ཐུགས་རྗེ་ཆེ་ཞུས་ལ། རྒན་རྒོན་ཚོར་གཟུགས་པོར་བདག་སྐྱོང་དང་ཚེ་མཇུག་སྐྱིད་པོ་ཞིག་རོལ་དགོས་པའི་མངགས་བཅོལ་ཡང་ཡང་གནང་བར་མ་ཟད། དམག་ཁོངས་ནས་ཕྱིར་ལོག་པའི་དམག་མིའི་ལས་དོན་ཅུས་སོགས་སྡེ་ཁག་ལ་གཟིགས་སྐྱོང་སྲིད་ཇུས་སོ་སོ་དོན་འཁྱོལ་ནན་མོ་བྱས་ཏེ། ཞིབ་ཚགས་ཅན་གྱིས་ཞབས་ཞུ་འགན་ལེན་གྱི་བྱ་བ་ཡག་པོར་བསྒྲུབ་ནས་འཐབ་འཛིང་པ་རྒན་གྲས་ལ་གོང་བཀུར་དང་གཅེས་སྐྱོང་ཏན་ཏིག་བྱེད་པ་དང་ཁོ་ཚོར་འཕེལ་རྒྱས་ཀྱི་གྲུབ་འབྲས་མཉམ་སྤྱོད་དང་རྩ་འཛུགས་ཀྱི་དྲོ་སྐྱིད་ཚོར་ཐུབ་པར་བྱེད་དགོས་ཟེར།

སོ་སོར་ཁུལ་ཨུའི་འཐབ་ཕྱོགས་གཅིག་གྱུར་པུ་དང་ཁུལ་སློབ་གསོ་ཅུ། ཁུལ་རུ་འཁྱུར་དམག་མིའི་ལས་དོན་ཅུ། ཁུལ་དབང་བོ་སྐྱོན་ཅན་མཉམ་འབྲེལ་ལྷན་ཚོགས། དེ་བཞིན་མདའ་བཞི་རྫོང་སྲིད་གཞུང་གི་འགན་འཁུར་བློ་མཐུན་གཙོ་བོ་བཅས་ཞུགས།