མཚོ་བྱང་ཁུལ་ཨུའི་རྒྱུན་ལས་ཨུ་ལྷན་གྱི（རྒྱས་འཛོམས）ཚོགས་འདུ་འཚོགས་ཤིང་། ཀྲང་ཧྥེང་གིས་གཙོ་སྐྱོང་བྱས་ཏེ་གཏམ་བཤད་གནང་བ།

རྩོམ་སྒྲིག ཀླུ་མོ་མཚོ།  ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར།  བཤེར་འབེབས། རིན་ཆེན་ཚེ་རིང་།

ཟླ1པོའི་ཚེས23ཉིན། ཁུལ་ཨུའི་ཧྲུའུ་ཅི་ཀྲང་ཧྥེང་གིས་གཙོ་སྐྱོང་གནང་ནས་ཁུལ་ཨུའི་སྐབས་བཅུ་གསུམ་པའི་རྒྱུན་ལས་ཨུ་ལྷན་གྱི（རྒྱས་འཛོམས）ཚོགས་འདུ་ཐེངས113པ་འཚོགས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཉེ་དུས་ཀྱི་གསུང་བཤད་གལ་ཆེན་གྱི་དགོངས་དོན་དང་ཀྲུང་དབྱང་དང་། ཞིང་ཆེན་ཏང་ཨུའི་འབྲེལ་ཡོད་ཚོགས་འདུའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས་ལ། འབྲེལ་ཡོད་ཡིག་ཆར་གྲོས་ཞིབ་བྱས་པ་དང་བྱ་བར་བཀོད་སྒྲིག་གནང་།

ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྐང་ཚར་རྟོག་ཞིབ་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ཕྱིར་རྟོག་བྱས་ཤིང་། ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་ཟབ་མོ་ཡིད་ལ་བརྟན་པོར་བཅངས་པ་དང་། "མཚོ་སྔོན་གྱི་རིན་ཐང་ཆེ་ཤོས་དེ་སྐྱེ་ཁམས་དང་འགན་འཁྲི་ཆེ་ཤོས་དེ་སྐྱེ་ཁམས། གབ་ཤུགས་ཆེ་ཤོས་དེའང་སྐྱེས་ཁམས་ཡིན་པ"ཐོག་མཐའ་བར་གསུམ་དུ་ཡིད་ལ་བརྟན་པོར་བཅངས་ནས། མདོ་ལ་རིང་མོ་དང་མཚོ་སྔོན་པོའི་སྐྱེ་ཁམས་ཁོར་ཡུག་སྲུང་སྐྱོབ་ཡག་པོ་བྱེད་པ་དང་སྐྱེ་ཁམས་བདེ་འཇགས་སྲུང་ཡོལ་བརྟན་དུ་གཏོང་རྒྱུ་དེ"རྒྱལ་ཁབ་དོན་གྱི་ཆེ་ཕྱོགས"སུ་བརྩིས་ནས་ཕྲག་ཏུ་འཁུར་བ་དང་། ཁྱད་ལྡན་ཐོན་ལས་འཕེལ་རྒྱས་གཏོང་བ་དང་དམངས་འཚོའི་བདེ་སྐྱིད་ཆེ་རུ་གཏོང་རྒྱུ་དེ་འབད་འཐབ་དམིགས་ཚད་དུ་བརྩིས་ནས་དམ་འཛིན་བྱེད་པ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བསྐྱེད་པ་དེ་ལས་འགན་གལ་ཆེན་དུ་བརྩིས་ནས་དོན་འཁྱོལ་བྱེད་པ། དངོས་སྒྲུབ་ཀྱི་གྲུབ་འབྲས་ལ་བརྟེན་ནས་མཐོ་སྒང་གི་རི་ཆུ་རྩི་ཤིང་སྲུང་སྐྱོབ་ཡག་པོ་བྱས་ཏེ། མཚོ་བྱང་གི་སྤུས་ཚད་མཐོ་བའི་འཕེལ་རྒྱས་བརྟན་པོའི་ངང་རྒྱང་དུ་བསྐྱོད་རྒྱུར་སྐུལ་འདེད་གཏོང་དགོས་ཟེར།

ཚོགས་འདུའི་ཐོག་ཟླ12པའི་ཚེས25ཉིན་འཚོགས་པའི་ཀྲུང་དབྱང་ཆབ་སྲིད་ཅུའི་ཚོགས་འདུ་དང་སྐབས་ཉི་ཤུ་པའི་ཀྲུང་དབྱང་སྒྲིག་ཨུའི་ཚང་འཛོམས་གྲོས་ཚོགས་ཐེངས་ལྔ་པའི་དགོངས་དོན་བརྒྱུད་སྒྲོག་དང་སློབ་སྦྱོང་བྱས་ཤིང་། ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི"ཕྱོགས་ཡོངས་ནས་ཏང་ནན་གྱིས་སྐྱོང་རྒྱུ་ནམ་ཡང་ལམ་དུ་ཡོད་པ་དང་ཏང་གི་རང་ངོས་གསར་བརྗེ་ནམ་ཡང་ལམ་དུ་ཡོད་པའི"སྐོར་གྱི་འབྲེལ་ཡོད་རྒྱས་བཤད་གལ་ཆེན་ལ་གོ་བ་གཏིང་ཟབ་ལེན་པ་དང་། ཏང་ཨུའི(ཏང་ཙུའུ)ཧྲུའུ་ཅིས་འགན་འཁུར་བ་དང་པོའི་འགན་འཁྲི་འཁུར་བ་དང་ཚན་ཁག་གི་ཁོངས་མིས"ལས་གནས་གཅིག་ལ་འགན་འཁྲི་གཉིས"དོན་འཁྱོལ་བྱས་ཏེ། ཏང་སྲོལ་སྲིད་གཙང་འཛུགས་སྐྱོང་དེ་བྱ་གཞག་འཕེལ་རྒྱས་ཀྱི་བརྒྱུད་རིམ་ཧྲིལ་པོའི་ནང་མཉམ་འདྲེས་ཐུབ་རྒྱུར་སྐུལ་འདེད་གཏོང་དགོས། སྒྲིག་ཁྲིམས་ཞིབ་བཤེར་ཨུ་ལྷན་གྱིས་རིམ་པ་སོ་སོའི་ལྟ་སྐུལ་ཨུ་ཡོན་ལྷན་ཁང་གིས་ལྟ་སྐུལ་སྣ་ཚོགས་འབྲེལ་མཐུད་དང་མཉམ་འདྲེས་བྱེད་ཤུགས་ཆེ་རུ་གཏོང་བ། ཡོ་བསྲང་དོན་འཁྱོལ་ཁྲོད་ཀྱི་གནད་དོན་གནད་ལ་འཁེལ་བར་ཡོ་བསྲང་བྱེད་པ། གཞི་གདངས་ནན་མོར་བརྟེན་ནས་སྤྱོད་གཙང་སྒྲིག་ནན་གྱིས་རུལ་སུངས་ལ་ངོ་རྒོལ་བྱས་ཏེ། མཚོ་བྱང་གི་སྤུས་ཚད་མཐོ་བའི་འཕེལ་རྒྱས་ལ་གཞོགས་འདེགས་བྱེད་དགོས་ཟེར།

ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཆབ་སྲིད་ཅུའི་དམངས་གཙོའི་འཚོ་བའི་ཚོགས་འདུའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་བྱས་པ་དང་འབྲེལ་གཅིག་སྡུད་ཐོག་སེམས་གཏམ་བརྗོད་རེས་དང་གླེང་མོལ་བྱས་ཤིང་། ནན་གྱིས་བསྟན་དོན། ཀྲུང་དབྱང་གི་གཏན་འབེབས་དོན་ཚན་བརྒྱད་དེ་འགྱུར་མེད་ཀྱི་སྒྲིག་ལམ་དང་འགྱུར་མེད་ཀྱི་འདེགས་ཤིང་དུ་བརྩིས་ནས་ཡང་དག་པའི་སྲིད་སྐྱོང་བྱས་རྗེས་ཀྱི་ལྟ་བ་བརྟན་པོ་འཛུགས་པ་དང་ལག་བསྟར་བྱེད་པ། ཁུལ་ཨུའི་རྒྱུན་ལས་ཨུ་ལྷན་ཚན་ཁག་གི་ཁོངས་མིས་དད་སེམས་དང་དངོས་སྒྲུབ། འགན་འཁུར། རང་གཅུན་བཅས་ཀྱི་ཐད་དཔེ་སྟོན་ཡག་པོ་བྱེད་དགོས། ཀྲུང་དབྱང་ཆབ་སྲིད་ཅུའི་དམངས་གཙོ་འཚོ་བའི་ཚོགས་འདུ་འཚོགས་པར་ནན་ཏན་གྱིས་དམིགས་ནས། རིམ་པ་སོ་སོའི་དམངས་གཙོའི་འཚོ་བའི་ཚོགས་འདུ་གྲ་སྒྲིག་ཞིབ་ཚགས་བྱས་ཏེ། ཚོགས་འདུ་སྤུས་ཚད་མཐོན་པོའི་སྒོ་ནས་འཚོག་པར་འགན་ལེན་ཏན་ཏིག་བྱེད་དགོས་ཟེར། 

ཚོགས་འདུའི་ཐོག་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས"ཞིང་གསུམ"བྱ་བ་ཡག་པོ་བསྒྲུབ་རྒྱུའི་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཀྲུང་དབྱང་གི་གྲོང་གསེབ་བྱ་བའི་ཚོགས་འདུའི་དགོངས་དོན་དང་ཞིང་ཆེན་ཏང་ཨུའི་གྲོང་གསེབ་དང་འབྲོག་ཁུལ་བྱ་བའི་ཚོགས་འདུའི་བཀོད་སྒྲིག་ཁྱོན་ཡོངས་ནས་དོན་འཁྱོལ་བྱས་ཏེ། མཚོ་བྱང་གི་ཞིང་ཕྱུགས་ལས་ཐོན་ཁུངས་ཀྱི་ལེགས་ཆར་བརྟེན་ནས་ཚན་རྩལ་འདེགས་སྐྱོར་དང་ཆས་རྟགས་བསྐྲུན་པ། ཐོན་ལས་མཉམ་ལས། འདེབས་འཛུགས་ཐོན་ལས་སྲུང་སྐྱོབ་སོགས་ཀྱི་ཐད་མུ་མཐུད་མཐོར་འདེགས་སུ་བཏང་ནས་ལྟེ་བའི་འགྲན་རྩོད་ནུས་པ་སྟོབས་ལྡན་དུ་གཏོང་དགོས། ཞིང་ལས་དང་འབྲེལ་བ་ཡོད་པའི་སྲིད་ཇུས་མ་དངུལ་གྱི་རྒྱབ་སྐྱོར་བརྩོན་ལེན་ཧུར་ཐག་བྱས་ཏེ། བེད་མེད་དུ་ལུས་པའི་རྒྱུ་ནོར་གསོན་སྒྱུར་ནུས་ལྡན་བྱེད་པ་དང་ཞིང་ཕྱུགས་ལས་ཀྱི་རྨང་གཞིའི་སྒྲིག་བཀོད་ཆ་ཚང་གི་ཞན་ཆ་གསབ་ནས་སློབ་གླིང་དང་ས་གནས་མཉམ་ལས་གཏིང་ཟབ་ཏུ་བཏང་སྟེ། ས་གནས་ཀྱི་ཞིང་ཕྱུགས་ཤེས་ལྡན་མི་སྣ་གསོ་སྐྱོང་བྱས་ཏེ། ཆེད་ལས་ནུས་པར་བརྟེན་ནས་ཞིང་ཕྱུགས་ལས་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་དགོས་ཟེར།

ཚོགས་འདུའི་ཐོག་ནན་གྱིས་བསྟན་དོན། ཀྲུང་དབྱང་ཆབ་སྲིད་ཅུའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་ནན་ཏན་བྱེད་པ་དང་། ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་དང་ཁུལ་སྲིད་གཞུང་། ཁུལ་སྲིད་གྲོས། ཁུལ་མི་དམངས་ཁྲིམས་ཁང་། ཁུལ་མི་དམངས་ཞིབ་དཔྱོད་ཁང་བཅས་ཀྱི་ཏང་ཙུའུ་ཡིས<<ཀྲུང་གོ་གུང་ཁྲན་ཏང་གི་ཏང་ཙུའུ་ཡི་བྱ་བའི་སྲོལ་ཡིག>>ནང་གཏན་འབེབས་བྱས་པའི་འགན་འཁྲི་སྒྲུབ་ཚུལ་གསལ་ཞུ་བྱེད་པར་དམིགས་ནས་རང་འགན་གཙང་སྒྲུབ་ཀྱི་ཆབ་སྲིད་རང་བཞིན་དང་ཕན་ནུས་རང་བཞིན་ཆེ་རུ་གཏོང་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནར་མ་སོན་པའི་མིའི་བསམ་བློ་ཀུན་སྤྱོད་འཛུགས་སྐྱོང་ཐད་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ནར་མ་སོན་པའི་མིའི་བསམ་བློ་ཀུན་སྤྱོད་འཛུགས་སྐྱོང་ལ་དམ་འཛིན་ཏན་ཏིག་བྱས་ཏེ་སློབ་གྲྭ་དང་ཁྱིམ་ཚང་། སྤྱི་ཚོགས་ཀྱིས་མཉམ་དུ་མི་གསོ་སྐྱོང་བྱེད་པའི་མ་ལག་བཙུགས་ཏེ། སློབ་གྲྭ་ཆུང་འབྲིང་གི་སྲིད་དོན་བསམ་བློའི་སློབ་གསོར་གཞི་གཅིག་ཏུ་སྐུལ་འདེད་གཏོང་བ་དང་ཐུགས་ཁུར་དང་གཅེས་སྐྱོང་གི་བྱ་བ་སོ་སོ་ཏན་ཏིག་ངང་ཡག་པོ་བསྒྲུབས་ནས། ནར་མ་སོན་པའི་མི་སྐྱོན་བྲལ་ངང་འཚར་ལོངས་དང་ཕྱོགས་ཡོངས་ནས་འཕེལ་རྒྱས་འགྲོ་རྒྱུར་ཐུན་མོང་ཐོག་སྐུལ་འདེད་གཏོང་དགོས།  སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཁེ་ལས་ཀྱི་བྱ་བར་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་གོ་བ་གཏིང་ཟབ་ལེན་དགོས་པ་དང་། ཏང་གི་མགོ་ཁྲིད་དེ་རྒྱལ་ཁོངས་རྒྱུ་ནོར་དང་རྒྱལ་ཁོངས་ཁེ་ལས་བཅོས་སྒྱུར་བྱེད་པའི་ཕྱོགས་གང་ཅིའི་ཐད་ཀྱི་བརྒྱུད་རིམ་ཧྲིལ་པོར་ཁྱབ་པ་རྒྱུན་འཁྱོངས་བྱས་ཏེ། རྒྱལ་ཁོངས་ཁེ་ལས་སྟོབས་ཆེ་རུ་གཏོང་བར་ནུས་ཤུགས་ཡོད་རྒུས་རྒྱབ་སྐྱོར་བྱེད་པ་དང་། དེང་རབས་ཅན་གྱི་ཁེ་ལས་ལམ་ལུགས་དང་ཚོང་ར་ཅན་གྱི་གཉེར་སྐྱོང་རྐྱེན་སྲོལ་འཐུས་ཚང་དུ་གཏོང་བ། ཚོང་རའི་འགྱུར་ལྡོག་དང་བསྟུན་ཏེ་རྒྱལ་ཁོངས་ཁེ་ལས་ཀྱི་རིན་ཐང་བརྟན་སྲུང་དང་འཕར་སྣོན་ཡོང་བའི་སྲོག་རྩ་བརྟན་སྲུང་བྱེད་པ། ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། ཉེན་ཁ་སྣ་ཚོགས་སྔོན་འགོག་དང་སེལ་ཐབས་ནུས་ལྡན་བཅས་བྱས་ནས། རྒྱལ་ཁོངས་ཁེ་ལས་སྐྱོན་བྲལ་ངང་གོང་དུ་འཕེལ་བར་སྐུལ་འདེད་གཏོང་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་པུ་རིམ་པའི་མགོ་ཁྲིད་ལས་བྱེད་པ་གཙོ་བོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བྱེད་པའི་ཆེད་དོན་ཞིབ་འཇུག་བགྲོ་གླེང་འཛིན་གྲྭའི་མགོ་རྩོམ་མཛད་སྒོའི་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་གཏིང་ཟབ་བྱེད་དགོས་པ་དང་། "ཕན་པ་བཞི"དང"རྒྱུན་འཁྱོངས་ལྔ"ཁོང་དུ་ཆུད་པར་བྱེད་པ། སྐྱེ་ཁམས་ཀྱི་ལྷན་ནུས་ལ་གཞིགས་ནས་སྤུས་ཀ་གསར་པའི་ཐོན་སྐྱེད་ནུས་ཤུགས་གསོ་སྐྱོང་བྱེད་པ། འགན་འཁྲི་གནད་ལ་འཁེལ་བར་སྒྲུབ་པ་བཅས་བྱས་ཏེ། ཀྲུང་དབྱང་གི་ཐབས་ཇུས་བཀོད་སྒྲིག་དང་ཞིང་ཆེན་ཏང་ཨུའི་བྱ་བའི་བླང་བྱ་དང་མཐུན་པར་འགན་ལེན་ཏན་ཏིག་བྱེད་དགོས་ཟེར།

ཚོགས་འདུའི་ཐོག་བླང་བྱ་བཏོན་དོན། ཁུལ་ཡོངས་ཀྱི་རིམ་པ་སོ་སོའི་ཏང་ཨུ(ཏང་ཙུའུ)དང་ཏང་ཡོན་མགོ་ཁྲིད་ལས་བྱེད་པས་ཆབ་སྲིད་ཀྱི་ནུས་པ་མཐོ་རུ་གཏོང་བའི་ཐད་རྒྱུན་མཐུད་ཤུགས་སྣོན་པ་དང་རང་རྟོགས་ངང་ཆབ་སྲིད་ལ་མཐོང་ཆེན་བྱ་རྒྱུ་དེ་བྱ་བའི་བརྒྱུད་རིམ་ཧྲིལ་པོ་དང་ཕྱོགས་སོ་སོའི་ནང་ཁྱབ་པར་བྱས་ཏེ། ཞིང་ཆེན་ཏང་ཨུའི་ཧྲུའུ་ཅི་ཝུའུ་ཞའོ་ཅུན་གྱིས་བཏོན་པའི"ནུས་པ་དྲུག"ཆེ་རུ་ཏན་ཏིག་བཏང་སྟེ། བྱ་སྤྱོད་དངོས་ཀྱི་ཐོག་ནས"གཏན་འཁེལ་གཉིས"བློ་བརྟན་འགྱུར་མེད་ངང་བརྩི་སྲུང་དང་། "སྲུང་སྐྱོང་གཉིས"མཐའ་གཅིག་ཏུ་སྒྲུབ་ཐུབ་པ་བྱེད་དགོས། འགན་འཁྲི་དོན་འཁྱོལ་བྱེད་པའི་ཐད་རྒྱུན་མཐུད་ཤུགས་བསྣན་ནས་ཁུལ་ཨུས་གཏན་འཁེལ་བྱས་པའི་བྱ་བའི་བསམ་ཕྱོགས་དང་གཙོ་གནད་ལས་འགན་གཞིར་བཟུང་ཐོག་མཐའ་བར་གསུམ་དུ་དོན་འཁྱོལ་ལ་དམ་འཛིན་ཡག་པོ་བྱེད་དགོས། བདེན་འཚོལ་དངོས་སྒྲུབ་ཐད་རྒྱུན་མཐུད་ཤུགས་སྣོན་པ་དང་། ཕྱི་ཚུལ་རིང་ལུགས་བཅོས་སྐྱོང་བྱས་ནས་གཞི་རིམ་གྱི་ཁུར་པོ་ཇེ་ཡང་དུ་གཏོང་བའི་བྱེད་ཐབས་སོ་སོ་དོན་འཁྱོལ་གཏིང་ཟབ་བྱེད་པ། རྨང་གཞི་འདིང་བ་དང་། ཡུན་རིང་ལ་ཕན་པ། དམངས་འཚོར་ཕན་པ་བཅས་ཀྱི་དོན་དངོས་མང་ཙམ་སྒྲུབ་པ། དུས་ཚོད་དང་སེམས་ཤུགས་སྔར་ལས་མང་བ་དོན་འཁྱོལ་དམ་འཛིན་དང་དོན་དངོས་སྒྲུབ་པ། འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་ཐད་སྤྱོད་དགོས། བྱ་བའི་མཉམ་ཤུགས་གཅིག་ཏུ་སྒྲིལ་བའི་ཐད་རྒྱུན་མཐུད་ངང་ཤུགས་སྣོན་པ་དང་མིག་མངས་འགྲིག་སྐོར་གཅིག་གི་བསམ་བློ་བརྟན་པོ་བཙུགས་ཏེ། གོང་འོག་མཉམ་འགུལ་དང་དངོས་སྒྲུབ་སྔོན་བརྩོན་བྱས་ནས། ཁུལ་ཡོངས་ཀྱི་གོང་འོག་མཐུན་སྒྲིལ་ལས་སྒྲུབ་ཀྱི་གསོན་ཉམས་ལྡན་པའི་རྣམ་པ་རྒྱུན་ཆད་མེད་པར་སྲ་བརྟན་དུ་གཏོང་དགོས། ཏང་ནན་སྐྱོང་བྱེད་པའི་ཐད་རྒྱུན་མཐུད་ཤུགས་སྣོན་པ་དང་། ཏང་གི་སྒྲིག་ཡིག་དང་ཏང་གི་སྒྲིག་སྲོལ། ཏང་གི་སྒྲིག་ཁྲིམས་བཅས་བརྩི་སྲུང་ནན་མོ་བྱེད་པ། ཀྲུང་དབྱང་གི་གཏན་འབེབས་དོན་ཚན་བརྒྱད་དང་དེའི་ལག་བསྟར་ཞིབ་སྲོལ་གྱི་དགོངས་དོན་དོན་འཁྱོལ་གཏིང་ཟབ་བྱེད་པ། ཐོག་མཐའ་བར་གསུམ་དུ་དྭངས་གཙང་གི་བློ་མཐུན་བར་གྱི་འབྲེལ་བ་དང་། དྭངས་གཙང་གི་སྲིད་ཚོང་བར་གྱི་འབྲེལ་བ། དྭངས་གཙང་གི་འགན་དབང་འབྲེལ་བ་བཅས་རྒྱུན་འཁྱོངས་བྱས་ཏེ། ནན་མོའི་གཞི་གདངས་གཙོ་བོ་ཡུན་རིང་རྒྱུན་འཁྱོངས་བྱེད་དགོས་ཟེར།