ཟླ་མཚན་ཟད་པ་སྔ་ན། ལྒང་བུའི་འབྲས་སྐྲན་འབྱུང་བའི་ཉེན་ཁ་ཆེ།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།  བཤེར་འབེབས།  རིན་ཆེན་ཚེ་རིང་།

ཟླ་མཚན་གྱིས་སྐྱེས་མ་ཚོའི་བདེ་ཐང་གི་ཐད་དུ་བྱེད་ནུས་གལ་ཆེན་འདོན་བཞིན་ཡོད།  དེ་བས་ཟླ་མཚན་ཟད་པའི་སྔ་འཕྱི་ཡིས་སྐྱེས་མའི་ལུས་ཁམས་ཀྱི་གནས་སྟངས་ལ་ཤུགས་རྐྱེན་མངོན་གསལ་ཐེབས་པ་ཡིན། ཉེ་ལམ། འཇར་པན་རྒྱལ་བཙུགས་འབྲས་སྐྲན་ཞིབ་འཇུག་ལྟེ་གནས་ཀྱི་སྤྱོད་སྒོ་མང་བའི་རུ་སྒྲིག་ཞིབ་འཇུག་ཅིག་ལྟར་ན། ཟླ་མཚན་ཟད་པ་སྔ་བའི་སྐྱེས་མར་ལྒང་བུའི་འབྲས་སྐྲན་དང་གཅིན་ལམ་ཕྱི་སྐྱིའི་འབྲས་སྐྲན་ཕོག་པའི་ཉེན་ཁ་ཇེ་ཆེར་འགྲོ་བ་རེད།

ཞིབ་འཇུག་རུ་ཁག་གིས་ལོ45ནས74བར་གྱི་སྐྱེས་མ55882ཞིབ་འཇུག་བྱ་ཡུལ་དུ་བཟུང་ནས། ཞིབ་འཇུག་མགོ་རྩོམ་དུས་དང་ལོ5ཡི་རྗེས། ལོ10ཡི་རྗེས་བཅས་དུས་སྐབས་མི་འདྲ་བ་གསུམ་རིང་གི་སྐྱེས་མའི་སྐྱེ་འཕེལ་དང་འབྲེལ་བའི་གནས་ཚུལ་འཚོལ་སྡུད་བྱས། དཔྱད་འབྲས་ལས་མངོན་པ་ལྟར་ན། ལོ49ནས51གི་བར་དུ་ཟླ་མཚན་ཟད་པའི་སྐྱེས་མ་དང་བསྡུར་ན། ལོ44ལ་མ་སོན་གོང་དུ་ཟླ་མཚན་ཟད་པའི་སྐྱེས་མ་དག་ལ་ལྒང་བུའི་འབྲས་སྐྲན་དང་གཅིན་ལམ་ཕྱི་སྐྱིའི་འབྲས་སྐྲན་འབྱུང་བའི་ཉེན་ཁ་སོ་སོ་སྔ་མ་ལས་ལྡབ1.94དང་ལྡབ1.74ཡིས་མཐོ་ལ། གཤགས་བཅོས་སོགས་རྒྱུ་རྐྱེན་གཞན་གྱི་ཤུགས་རྐྱེན་ཕུད་རྗེས། ལོ44ལ་མ་སོན་གོང་དུ་ཟླ་མཚན་ཟད་པའི་སྐྱེས་མར་ལྒང་བུའི་འབྲས་སྐྲན་དང་གཅིན་ལམ་ཕྱི་སྐྱིའི་འབྲས་སྐྲན་འབྱུང་བའི་ཉེན་ཁ་ནི་ལོ49ནས51བར་ལ་ཟླ་མཚན་ཟད་མཁན་དག་ལས་ལྡབ2.09ནས་ལྡབ1.78ཀྱིས་མཐོ་བ་རེད། 

ཞིབ་འཇུག་མི་སྣས་རིགས་འདེད་བྱ་རྒྱུར། ཟླ་མཚན་ཟད་པ་ཅུང་སྔ་བ་ཡིས་སྐྱེས་མ་རྣམས་ཀྱི་མོ་སྐུལ་རྒྱུ་ལོ་ཅུང་གཞོན་པའི་དུས་ནས་བཟུང་ཇེ་ཉུང་དུ་སོང་བ་མཚོན་ལ། དེ་ལྟར་བྱས་ཚེ་མོ་སྐུལ་རྒྱུ་ཡིས་གཅིན་ལམ་ཕྱི་སྐྱིར་ཚོད་འཛིན་བྱེད་ནུས་ཇེ་དམའ་རུ་གྱུར་པ་དང་། དེའི་ཐོག་ལ་ཟླ་མཚན་ཟད་པ་ཡིས་གཅིན་ལམ་རེད་པའི་ཉེན་ཁ་ཇེ་ཆེར་བཏང་བ་སོགས་ལ་རྐྱེན་བྱས་ཏེ། གཅིན་ལམ་དུ་དུས་ཡུན་རིང་བོར་དལ་གཤིས་གཉན་ཚད་བྱུང་ནས་འབྲེལ་ཡོད་འབྲས་སྐྲན་སྣ་ཚོགས་བསྐྱེད་པ་རེད།