སྒོར་ཐིག་ལས་གནའ་དཔེ་བརྟག་ཐབས་སྐོར།

2024-08-21 14:38:54 | 301

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་པོ་དྲ་བ། བཤེར་འབེབས། རིན་ཆེན་ཚེ་རིང་།

ཐོག་མར་བྲིས་མ་དང་དཔར་མའི་དབྱེ་བ་དེ་ནི་སྒོར་ཐིག་ལས་འཆད་ན་དོན་གོ་ཆེ་བ་ཞིག་ལགས། གནའ་དཔེའི་ལྡེབ་གྲངས་ཀྱི་ཉིན་སྲིབ་ཏུ་སྒོར་ཐིག་བྲིས་ཡོད་པ་དེ་དག་ནི་སྤྱིར་བཏང་བྲིས་མ་དང་སྒོར་ཐིག་མེད་པ་དེ་ནི་སྤྱིར་བཏང་བརྒྱ་ཆ་བདུན་ཅུ་ཡན་དཔར་མ་ཡིན་པ་ཐག་བཅད་ཆོག གང་ཡིན་ཟེར་ན། ཉེ་དུས་སྙེ་མོར་གནའ་དཔེ་བརྟག་དཔྱད་ལ་འགྲོ་སྐབས་སྤྱི་ལོ1407ལོར་སི་ཏུ་ཆོས་ཀྱི་རིན་ཆེན་གྱི་དགོངས་རྫོགས་ལ་དམིགས་ཏེ་སྲས་ལྷ་བཙན་སྐྱབས་ཀྱིས་ལ་སྟོད་ཤེལ་དཀར་རྫོང་དུ་དཔར་བཏབ་པའི་མངོན་རྟོགས་རྒྱན་གྱི་འགྲེལ་ཆེན་དྲི་མེད་འོད་དཔར་མ་ཞིག་མཇལ་བྱུང་བ་དེའི་སྟེང་དུ་སྔོན་གྱི་བྲིས་མ་ཇི་བཞིན་སྒོར་ཐིག་གསལ་བའི་རྐྱེན་གྱིས་གོང་ལྟར་འཆད་པ་ལགས།

图片13.png

དུས་རབས12པའི་གསེར་བྲིས་མ།

དུས་རབས13-14ནང་བོད་ཀྱི་ཡུལ་དེར་དཔར་གྱི་རིག་པ་དེ་ས་ཁྱབ་རྡོ་ཁྱབ་ཏུ་སོང་བའི་རྗེས་སུ་གནའ་དཔེ་ཁག་གི་མཛད་འཕྲིན་རྒྱ་ཆེར་སྤེལ་བའི་སླད་དཔར་གྱི་རིག་པར་བརྟེན་ནས་གནའ་དཔེ་བཞེངས་དགོས་བྱུང་ཡོད། དུས་རབས13-14པའི་མཚམས་སུ་སླེབས་དུས་གནའ་དཔེའི་སྟེང་གི་སྒོར་ཐིག་གི་བྱེད་ནུས་དེའང་ཡོངས་སུ་ཤོར་ཏེ་མེད་པར་འགྱུར་ཟིན་པའི་རྐྱེན་གྱིས་དཔར་ཤིང་གི་སྟེང་དུའང་གསལ་མེད། དེར་བརྟེན་གནའ་དཔེ་བྲིས་དཔར་གྱི་དབྱེ་བ་དེ་སྒོར་ཐིག་ལ་ཚད་འཛིན་ཏེ་བཤད་པ་ཡིན། དེ་ཡང་བྲིས་མའི་སྒོར་ཐིག་གི་ཁྱད་ཆོས་ལས་འཆད་ན་སྔོན་དུ་ཞུས་པ་བཞིན་སྤྱི་ལོའི་དུས་རབས13སྔོན་གྱི་བྲིས་མར་ལྡེབ་གྲངས་ཀྱི་ཉིན་སྲིབ་ངོས་སུ་སྒོར་ཐིག་བྲིས་ཡོད།

图片14.png

མིང་རྒྱལ་རབས་དུས་ཀྱི་བྲིས་མ།

དུས་རབས8པའི་ཡར་སྔོན་གྱི་གནའ་དཔེ་བྲིས་མ་ཞིག་ཡིན་ཕྱིན་བྲིས་མ་དེ་དག་གི་ལྡེབ་གྲངས་ངོས་སུ་སྒོར་ཐིག་གཉིས་རེ་ཡོད་པ་མ་ཟད། སྒོར་ཐིག་དེར་མིག་བུ་ཕུག་སྟེ་དེ་དག་གི་ནང་དུ་རྒྱུན་བུའམ་འགྲེང་པོ་བརྒྱུས་ཡོད་པ་སྟེ། ཏུན་ཧོང་ནས་ཐོན་པའི་ཤེར་ཕྱིན་རྒྱལ་ཁབ་དཔེ་མཛོད་ཁང་དུ་བཞུགས་པ་དེ་ནི་གསུང་རབ་སྨྲ་བའི་དབང་པོ་རྣམས་ཀྱིས་ཡིག་གཟུགས་དང་སྣག་ཤོག་ལ་ཚན་རིག་གྱི་ཐབས་ལམ་ལས་བརྟག་དཔྱད་བྱས་པ་བརྒྱུད། གནའ་དཔེ་དེ་ནི་དུས་རབས8པའི་ནང་གི་གནའ་དཔེ་བྲིས་མ་ཞིག་ཡིན་པ་ཐག་གཅོད་གནང་འདུག གནའ་དཔེ་དེའི་སྟེང་དུ་སྒོར་ཐིག་གཉིས་གསལ་ཡོད་པ་མ་ཟད། དེའི་མིག་ཕུའི་ནང་དུ་འགྲེང་བུ་བརྒྱུས་ཡོད་གཤིས་དུས་རབས8པའི་ཡར་སྔོན་གྱི་གནའ་དཔེ་ཡིན་པ་ཐག་བཅད་ཆོག

图片15.png

དུས་རབས8-9སྒོར་ཐིག་ཏུ་མིག་ཕུ་ཕུག་པའི་གནའ་དཔེ།

དེ་རྗེས་དུས་རབས9-11པའི་གནའ་དཔེ་ཡིན་ན། གནའ་དཔེ་དེ་དག་གི་སྟེང་དུ་སྔར་བཞིན་སྒོར་ཐིག་གཉིས་རེ་གསལ་ལ་མིག་ཕུ་ཡང་ཕུག་ནས་སྣང་། འོན་ཏེ་མིག་བུ་དེ་གཉིས་ཀྱི་ནང་དུ་སྔོན་གྱི་ལམ་སྲོལ་བཞིན་འགྲེང་བུ་དང་རྒྱུན་བུ་བརྒྱུས་མེད་པ་སྟེ། བོད་རྒྱལ་ཁྲི་ལྡེ་སྲོང་བཙན་ཁྲི་རལ་པ་ཅན་གྱི་བླ་འབུམ་དུ་གྲགས་པ་དཔལ་ལྡན་འབྲས་སྤུངས་དགོན་དང་གྲོ་མཁར་ཆོས་སྡེ། ཆབ་མདོ་ཁུལ་དུ་བཞུགས་པའི་གནའ་དཔེ་བྲིས་མ་དུས་རབས9-10པར་བྲིས་པ་དེ་དག་གི་སྟེང་དུ་སྒོར་ཐིག་ལ་མིག་ཕུ་ཕུག་ཡོད་ཀྱང་དེ་དག་གི་ནང་དུ་རྒྱུན་བུ་སོགས་བརྒྱུས་མེད།

图片16.png

དུས་རབས12པའི་གསེར་བྲིས་མ།

དུས་རབས14-15ནང་དུ་བྲིས་བཞེངས་གནང་བའི་གནའ་དཔེ་ཡིན་ན། གནའ་དཔེ་དེ་དག་གི་ལྡེབ་གྲངས་ངོས་སུ་སྒོར་ཐིག་གཉིས་རེ་སྔར་བཞིན་གསལ་རུང་། མིག་ཕུ་མ་ཕུག་པར་དེའི་རྣམ་པ་མཚོན་ཆེད་ཙམ་དུ་མཚལ་གྱི་སྒོར་ཐིག་དེ་བྲིས་ནས་ཡོད་པ་ལྷོ་ཁའི་འོན་ཀེ་རུ་ལྷ་ཁང་དང་མངའ་རིས་འཁོར་ཆགས་དགོན། དུང་དཀར་ཕྱི་དབང་། གོང་དཀར་ཆོས་སྡེ་སོགས་སུ་ཉར་ཚགས་གནང་བའི་དཔེ་རྙིང་དེ་དག་ཡིན།

图片17.png

དུས་རབས12-14བར་གྱི་བྲིས་མ།

དེ་རྗེས་དུས་རབས15པའི་རྗེས་ཀྱི་གནའ་དཔེར་མཚལ་གི་སྒོར་ཐིག་དེ་དག་གསལ་རུང་སྒོར་ཐིག་དེ་སྟོང་པར་བཞག་ན། མིག་ལ་མཛེས་ཆ་མི་ལྡན་པ་དང་ཕན་མེད་དུ་ལུས་པ་ལྟ་བུའི་ཚོར་སྣང་ཞིག་རང་བཞིན་གྱིས་སྐྱེས་སྟབས། བོད་ཀྱི་མཛེས་ཆོས་དང་བསྟུན་ཏེ་སྒོར་ཐིག་དེའི་ནང་དུ་གཞུང་དེ་དང་འབྲེལ་བའི་སྐུ་བརྙན་བྲིས་པའི་གནའ་དཔེ་གཡའ་མ་རི་དགོན་གྱི་ཤེར་ཕྱིན་དང་མངའ་རིས་དགའ་ལྡན་བཤག་འཕེལ་གླིང་གི་མདོ་སྐལ་བཟང་སོགས་དང་། སྒོར་ཐིག་ཏུ་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན་བྲིས་པ་མངའ་རིས་ས་ཁུལ་དུ་བཞུགས་པའི་ཤེར་ཕྱིན་ཡུམ། དུས་རབས17པར་མི་དབང་སངས་རྒྱས་རྒྱ་མཚོས་བཞེངས་པའི་རྒྱལ་བའི་བཀའ་འགྱུར་མཐིང་ཤོག་གསེར་བྲིས་མའི་སྒོར་ཐིག་ཏུ་མུ་ཏིག་གིས་ཕྲ་བརྒྱན་བཏབ་པ་ནོར་གླིང་དུ་བཞུགས་པ་བཅས་སོ། །

图片18.png

དུས་རབས17པའི་སྒོར་ཐིག་ཏུ་མུ་ཏིག་གིས་ཕྲ་བརྒྱན་བཏབ་པའི་གནའ་དཔེ།

图片19.png

ཆིང་ཅཱ་ཆིང་ཁྲི་ལོ་བཅུ་གཉིས་དུས་ཀྱི་གསེར་བྲིས།

ལྷག་དོན་དུ་སྒོར་ཐིག་གིས་གནའ་དཔེ་དེ་བྲིས་བཞེངས་གནང་སྐབས་རྩ་འཛུགས་གང་ཞིག་གིས་འབྲི་བཞེངས་བགྱིས་པ་སྟེ། གནའ་དཔེའི་སྒོར་ཐིག་དེ་ལྡེབ་གྲངས་ཀྱི་ངོས་སུ་ནག་ནོག་གིས་མ་འགོས་པར་ངོས་གཙང་ཞིང་། སྒོར་ཐིག་གི་མཚམས་དེར་སླེབས་སྐབས་གཞུང་གི་རྗོད་བྱེད་ཀྱི་ཚིག་དོན་ལ་མ་ལྟོས་པར་སྔོན་འཇུག་དང་རྗེས་འཇུག་ཡ་ཕྲལ་ནས་བྲིས་པ་ལྟ་བུ་ཞིག་ཡིན་ན། གཞུང་ས་ཁག་གིས་ཆེད་མངགས་གནའ་དཔེ་འབྲི་བཤུ་མཁན་སྒྲིག་འཛུགས་བྱས་ནས་འབྲི་བཤུས་གནང་བ་མཚོན་པ་དང་། གལ་ཏེ་འབྲི་ཤོག་གི་སྟེང་དུ་སྒོར་ཐིག་གཉིས་གསལ་རུང་། སྔོན་གྱི་གོམས་སྲོལ་ཇི་བཞིན་མེད་པར་སྒོར་ཐིག་གི་ནང་དུ་སྐབས་འབབ་ཀྱི་བརྗོད་དོན་དང་འབྲེལ་ཏེ་སྒོར་ཐིག་གིས་ཟིན་པའི་ས་དེ་སྟོང་པར་མ་བཞག་པར་བརྗོད་དོན་དཀྱུས་གཅིག་ཏུ་བྲིས་ཡོད་ན། གནའ་དཔེ་དེ་ནི་གཞུང་སའི་འབྲི་བཤུ་ནས་མ་ཡིན་པར་མི་སྒེར་གྱིས་རང་རང་གི་སློབ་གཉེར་ལ་མཁོ་བའི་གནའ་དཔེ་འབྲི་བཤུ་བྱས་པ་དེ་ཤེས། དེས་ན་སྒོར་ཐིག་ལས་གནའ་དཔེ་དེ་དུས་རབས་དང་བྲིས་མ་དང་དཔར་མ་གང་ཞིག་ཡིན་མིན་བརྟག་ཐུབ་བོ། །

སྐབས་སྔོན་མ། འདེམས་སྒྲུག་བྱས་པའི་གླིང་སྒྲུང་མི་སྣའི་ཞལ་འབག

སྐབས་རྗེས་མ། རྒྱ་ནག་ཏུ་ཡོད་པའི་རི་བོ་ཆེན་པོ་བཞི།