ཁྲིམས་ཀྱི་བྱུང་བ་ཇི་ལྟར་ཡིན།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། བོད་ཀྱི་རིག་གནས་རྒྱུན་ཤེས། བཤེར་འབེབས། རིན་ཆེན་ཚེ་རིང་། 

 སྤྱིར་ཁྲིམས་ཞེས་པ་ནི་འགྲོ་བ་མིའི་རིགས་འདི་འཇིག་རྟེན་དུ་བྱུང་མ་ཐག་ནས་ཡོད་པ་ཞིག་མིན་པར། དེ་ནི་སྒེར་འཛིན་གྱི་ལམ་ལུགས་དང་གྲལ་རིམ་བྱུང་བ་དང་སྦྲགས་ནས་བྱུང་བ་ཞིག་ཡིན་ཞིང་། ཡ་ཐོག་གི་གདོད་མའི་སྤྱི་ཚོགས་སུ་ཁྲིམས་མེད་ཀྱང་། སྐབས་དེའི་མི་རྣམས་ཀྱི་སྤྱོད་པའི་སྒྲིག་སྲོལ་ནི་ཡུན་རིང་དུ་བརྒྱུད་པའི་སྤྱི་ཚོགས་ཀྱི་འཚོ་བའི་ཁྲོད་ནས་རང་ཤུགས་སུ་བྱུང་བའི་རུས་ཚོའི་མི་སྣ་ཀུན་གྱི་འདུན་པ་དང་ཁེ་ཕན་ལ་རག་ལས་པའི་གོམས་གཤིས་ཤིག་ཡིན་པ་དང་། དེ་ནས་སྤྱི་ཚོགས་ཀྱི་ཐོན་སྐྱེད་ནུས་ཤུགས་དར་སྤེལ་བྱུང་བ་དང་བསྟུན་གདོད་མའི་སྤྱི་ཚོགས་ཐོར་ནས་བྲན་གཡོག་ཅན་གྱི་སྤྱི་ཚོགས་རིམ་གྱིས་གྲུབ། ཐོན་སྐྱེད་ཀྱི་རྒྱུ་ཆ་སྒེར་ལ་དབང་བའི་ལམ་ལུགས་བྱུང་ནས་བྲན་གཡོག་དང་བྲན་བདག་ཅེས་འགལ་ཟླར་གྲུབ་པའི་གྲལ་རིམ་དང་གྲལ་རིམ་ཅན་གྱི་སྤྱི་ཚོགས་བྱུང་བ་དང་། ཆབ་སྲིད་དང་དཔལ་འབྱོར་ཐད་ནས་དབང་སྒྱུར་མཁན་གྱི་གོ་གནས་ཟིན་པའི་བྲན་བདག་རྣམས་ཀྱིས་རང་ཉིད་ཀྱི་རྩ་བའི་ཁེ་ཕན་དག་འགན་སྲུང་བྱེད་རྒྱུའི་ཆེད་དུ། ཐུན་མོང་མ་ཡིན་པའི་སྤྱོད་པའི་སྒྲིག་སྲོལ་ཞིག་བཙུགས་ནས་དབང་སྒྱུར་གྱི་ཡུལ་དུ་གྱུར་པའི་བྲན་གཡོག་རྣམས་ལ་བཀག་སྡོམ་དང་བཙན་གནོན་བྱས། འདི་ལྟ་བུའི་ཐུན་མོང་མི་ཡིན་པར་སྤྱོད་པའི་སྒྲིག་སྲོལ་ལ་ཁྲིམས་ཞེས་པའི་མཚན་སྦྱར། ཁྲིམས་ཀྱིས་དབང་སྒྱུར་གྲལ་རིམ་གྱི་འདུན་པ་དང་ཁེ་ཕན་མཚོན་ལ། ཁྲིམས་ནི་དབང་སྒྱུར་གྲལ་རིམ་གྱི་སྲིད་དབང་སྒེར་འཛིན་བྱེད་སྤྱད་ཀྱི་ཡོ་བྱད་ཀྱང་ཡིན། ཁྲིམས་ཞེས་པ་ནི་གོ་རིམ་མང་ཞིང་དུས་ཡུན་རིང་བ་ཞིག་བརྒྱུད་ནས་གྲུབ་པ་ཡིན་ལ། དང་ཐོག་ཡིག་གེར་ཕབ་མེད་པའི་གོམས་སྲོལ་གྱི་ཁྲིམས་ནས་རྗེས་སུ་བྱུང་བའི་ཡིག་ཐོག་གི་ཁྲིམས་དང་།  དེ་ནས་ཅུང་ཙམ་འཐུས་སྒོ་ཚང་དུ་སོང་བའི་ཡིག་ཐོག་གི་ཁྲིམས་ལུགས་བཅས་རིམ་བཞིན་ཇེ་བཟང་ཇེ་རྒྱས་སུ་སོང་བ་ཡིན། ཡིན་ན་ཡང་བཤུ་གཞོག་གྲལ་རིམ་གྱི་བསམ་བློ་པ་ཁ་ཤས་ཀྱིས་ནུས་ཤུགས་གང་ཡོད་ཀྱིས་ཁྲིམས་ཀྱི་གྲུབ་ཚུལ་ལ་འཁྱོག་བཤད་གང་མང་བྱས་ཡོད།  དཔེར་ན་ཁྲིམས་ཞེས་པ་ནི་ལྷ་ཞིག་གིས་གསར་བཟོ་བྱས་པ་ཡིན་པ་དང་། ཡང་ན་སྤྱི་ཚོགས་ཀྱི་ཆིངས་ཡིག་ལས་བྱུང་བ་ཡིན་པ། ཡང་ན་མི་རིགས་ཤིག་གི་བསམ་བློའི་སྙིང་སྟོབས་མཚོན་པ། ཡང་ན་སེམས་ཁམས་ཀྱི་འགྱུར་ཁུགས་ཁ་ཤས་ལས་རང་བྱུང་གིས་གྲུབ་པ་སོགས་ལྟ་བ་སྣ་ཚོགས་པ་ཞིག་བཤད་དེ། ཁྲིམས་ཞེས་པས་གྲལ་རིམ་གྱི་ངོ་བོའམ་རང་བཞིན་ངོ་མ་མཚོན་ཡོད་པ་དེ་འགེབས་རྩིས་བྱས་ཡོད།