གླུ་རྩེད་མགོ་རྩེད་དཔོན་ངག་ནས་བླངས། །རོགས་མཐུན་རབས་ཁྲོམ་ཆེན་དཀྱིལ་ནས་བཤད། །

རྩོམ་སྒྲིག  ཀླུ་མཁར་རྒྱལ།   ཡོང་ཁུངས།  མཚོ་བྱང་ཁུལ་མི་རིགས་སྐད་ཡིག་ལས་དོན་ལྟེ་གནས།  བཤེར་འབེབས།  རིན་ཆེན་ཚེ་རིང་།

རྐང་ཚའི་གླུ་བ་ཚེ་བརྟན་རྒྱལ།

འབྲོང་རུ་དམར་བྲེ་དམར་གཉིས་ཀ །
རྫ་གཅིག་གི་ནང་ལུང་ཡིན་དུས། ། 
འབྲོང་འུ་གཉིས་སྐྱིད་ཅིག་མེད་དྲ། །
སྐབས་དེ་དུས་སྐྱིད་ཀི་མ་འདོད། །
སྐྱིད་རྟག་བྱ་མེད་ནོ་མ་ཤེས།  །
རྫ་བོའུ་ཆི་བསྐོར་རེ་བྲོས་ནས། །
ཕར་བུད་ནས་ཕྱིར་ལ་བལྟས་ན།  །
མགོ་བེའུ་རྭ་ལྡེམ་མེ་སྐྱེས་སོ།  །
རྫ་གན་ན་མ་ཆགས་འདོད་ན།  །
ཨ་ཤུ་རེ་ཁོ་ཡང་འདོད་ཀི  །
རྫ་བྱང་ལམ་ཁངས་ཀིས་བཅད་ན།   །
ཞེན་ཆགས་ས་མེད་ནོ་ཤེས་ཀི  །
སྐྱིད་དབྱར་གསུམ་ཟླ་ངོ་གསུམ་པོར།   །
རྩྭ་འཇག་རིམ་སྐྱེས་རྒྱ་མཐོ་དུས།   །
དེའི་ཁམ་གང་མ་ཟས་འདོད་ན།   །
སེམས་དེ་ཕྱོགས་ས་ལ་ཆགས་ཀི  །

རོགས་འདང་ཆེན་རྩིས་ཆེན་འུ་གཉིས།  །
སྡེ་གཅིག་གི་ནང་ལུང་ཡིན་དུས།   །
རོགས་འུ་གཉིས་སྐྱིད་ཅིག་མེད་དྲ།   །
སྐབས་དེ་དུས་སྐྱིད་ཀི་མ་འདོད།   །
སྐྱིད་རྟག་བྱ་མེད་ནོ་མ་ཤེས།   །
ལས་སྔོན་གི་སྨོན་ལམ་མེད་ན།   །
ཕར་བུད་ནས་ཕྱིར་ལ་བལྟས་ན།   །
ལུས་ལྷུ་དྲུག་ལང་ཚོ་དར་སོ།  །
སྡེ་གན་ན་མ་བྱིན་འདོད་ན།   །
ཨ་ཤུ་རེ་ཁོ་ཡང་འདོད་ཀི  །
གླིང་མྱི་ཁ་བསྐོར་ནས་བྲོས་ན།  །
ཞེ་ཆགས་ས་མེད་ནོ་ཤེས་ཀི  །
ལོ་བཅོ་ལྔ་ཉི་ཤུ་ཡིན་དུས།  །
ཞེ་རང་མཐུན་ན་ཟླའི་རོགས་ལ།   །
རྩེ་བགད་ནས་མ་སོང་འདོད་ན།  །
སེམས་ཁྱོད་ཕྱོགས་ས་ལ་ཆགས་ཀི  །

མཚོ་ལྷོའི་གླུ་མ་ལྕགས་མོ་རྒྱལ།

སྤང་ཁ་རུ་ཉུག་གི་འཁྱམ་པ་རེད།  །
ང་དེང་མ་ན་ལོ་ཆུང་དུས་ན།   །
ང་གྱོ་རྒྱ་གོམ་ལག་བདེ་དུས་ན།   །
བོའུ་ཁྲ་རིང་སོ་བ་གཟུ་དུས་ན།   །
ཤྭ་མ་བསད་བསམ་པ་མེད་དྲ་ར།  །
ལོ་དེང་སང་རྔོན་པ་རྒས་སོང་ཟིག  །
རྟ་གྱོ་རྒྱའི་གོམ་ལག་འཆོལ་སོང་ཟིག  །
བོའུ་ཁྲ་རིང་སོ་བ་རྙིང་སོང་ཟིག  །
རྫ་ཁ་རུ་ཉུལ་ནོ་ལན་ཆགས་རེད།  །
ཤྭ་ཨེ་སོད་བལྟས་ནོ་ཉེས་པ་རེད།   །
སྡུག་ལན་ཆགས་མི་འདག་འགྱོ་རྒྱུ་ཡིན།   །

སེམས་གཉོམ་ཆུང་ཕ་བཟང་ཞི་མོ་རེད།   །
ང་དེང་མ་ན་ལོ་ཆུང་དུས་ན།   །
སྐད་མིད་ཐག་ནང་ནས་ཁུག་དུས་ན།  །
ཚིག་ཁ་ལྕེའི་བར་ནས་བདེ་དུས་ན།  །
གླུ་མ་བླངས་བསམ་པ་མེད་དྲ་ར།  །
ལོ་དེང་སང་གླུ་མ་རྒས་སོང་ཟིག  །
སྐད་སྙན་ཆ་ཅན་གོ་ཤོར་སོང་ཟིག  །
ཚིག་དོན་རྩ་ཅན་གོ་འཆོལ་སོང་ཟིག  །
ས་སྡེ་རུ་ཉུལ་ནོ་ལན་ཆགས་རེད།   །
འགྲོགས་ཨེ་ཟིན་བལྟས་ནོ་ངོ་ཚ་རེད།  །
སྡུག་ལན་ཆགས་མི་འདག་འགྱོ་རྒྱུ་ཡིན།   །

གླུ་བ་སྒྲོལ་མ་ཚེ་རིང་། 

ཞེ་སྡུག་གི་ལོ་རབས་མི་བཤད།  །
ཞེ་སྡུག་གི་ལོ་རབས་བཤད་ན།   །
ས་སྟག་ལུང་སྟག་མོ་རྫོང་དྲུག་ན།   །
སྟག་དར་མ་ཉིས་འགྲོ་སུམ་འགྲོ་རེད།   །
གཟིག་ཐིག་ལེ་ཅན་གོ་ཁེར་འགྱོ་ཡིན།   །
གཟིག་ཁེར་འགྱོ་ཡིན་ན་ཁས་ཡོད་ཀི  །
རྒྱ་རྔོན་པའི་ལག་ན་བོའུ་ཡོད་ཀི  །
ཤིང་དྲ་མའི་གསེང་ན་རྙི་ཡོད་ཀི  །
སྲོག་སྐྱོབ་རྒྱུའི་ཟེར་ནི་གྲོགས་མེད་ཀི  །
སྡུག་འདི་སོ་ཕར་ན་ཅང་མེད་ཀི  །

ས་སྡེ་མང་སྡེ་རྐང་ཕྲ་མོ་ན།  །
རོགས་འདང་ཆེན་ཉིས་འགྱོ་སུམ་འགྱོ་རེད།  །
སེམས་གཉོམ་ཆུང་ཞི་ལི་ཁེར་འགྱོ་རེད།  །
རོགས་ཁེར་འགྱོ་ཡིན་ནོ་ཁས་ཡོད་ཀི  །
གླིང་མྱི་ཁ་བཙན་པོའི་བཀའ་ཡོད་ཀི  །
རོགས་འདང་ཆེན་ཐུག་རྒྱོ་ཐབས་མེད་ཀི  །
ཐབས་ཁོས་བཙལ་ཟེར་ནི་གྲོགས་མེད་ཀི  །
སྡུག་འདི་སོ་ཕན་ན་ཅང་མེད་ཀི  །

གླུ་མ་བྱམས་མཚོ།

རྫ་རི་ཁྲི་མ་འབུམ་གི་ཁ་ལམ་ནས།  །
རི་ཆུ་སྟོང་ར་བརྒྱད་གི་ནང་ཀློང་ནས།  །
ཤྭ་ཤོམ་ཆེན་དུང་གི་རུ་ཐུར་ཅན།  །
ཁྱོད་རྭ་ལྡེམ་མེར་རྫ་འདིར་ཐོན་དང་ན།  །
ཤྭ་ཡུ་མོ་རིག་ན་ཉམས་དགའ་གི  །
ཤེའུ་གྱོ་ཁྱ་རིག་ན་ཡིད་སྐྱོ་གི  །
ངའི་ཡིད་རང་ང་སྐྱོ་ནི་ཆེ་ཡིན་ར།  །
འུ་གཉིས་ཀ་ལས་སྔོན་གི་སྨོན་ལམ་བཅོལ་ནས།  །
རྫ་གཅིག་གི་ནང་ནས་མ་སྐྱེས་ནོ།  །
ངས་འདིའི་ཕྱོགས་ལ་འདང་ཟིག་བརྒྱབ་ན།  །
ངའི་ཞེ་སྡུག་ནོ་རྫ་མགོའི་སྨུག་པ་རེད།  །
སྨུག་འཐིབས་ནས་དེངས་དུས་ནམ་རེད་ཀོ  །

སྡེ་རུ་ཁྲི་མ་འབུམ་གི་ཁ་གྲལ་ནས།  །
རུ་སྡེ་སྟོང་ར་བརྒྱད་གི་ནང་ཀློང་ནས།  །
རོགས་རྩེད་དཔོན་དུང་གི་སོ་སྒོ་ཅན།  །
ཁྱོད་འཛུམ་དམུལ་ལེར་གྲོང་འདིར་ཐོན་དང་ན།  །
ནང་རྩེད་པ་རིག་ན་ཉམས་དགའ་གི  །
ང་རང་གེ་རིག་ན་ཡིད་སྐྱོ་གི  །
ངའི་ཡིད་རང་ང་སྐྱོ་ནི་ཆེ་ཡིན་ར།  །
འུ་གཉིས་ཀས་ལས་སྔོན་གི་སྨོན་ལམ་བཅོལ་ནས།  །
སྡེ་གཅིག་གི་ནང་ནས་མ་སྐྱེས་ནོ།  །
ངས་འདིའི་ཕྱོགས་ལ་འདང་ཟིག་བརྒྱབ་ན།  །
ང་ཞེ་སྡུག་ནོ་སྐྱི་བསེར་རླུང་བུ་རེད།  །
རླུང་གཡུག་ནས་དེངས་དུས་ནམ་རེད་ཀོ  །

གླུ་བ་སྨོན་ལམ་རྒྱ་མཚོ།

རྩེད་མགོ་མ་ལྷ་རིས་མགོ་གི་ལེན།  །
ལྷ་གཡས་སྐོར་རྒྱག་ག་དགེ་བའི་དོན།     །

རྩེད་བར་མ་མཚོ་ལུང་མཐའ་གི་ལེན།   །
མཚོ་ཁྲི་བཤེགས་བརྒྱུད་ལ་རྨ་བྱའི་དོན།   །

རྩེད་གཞུག་མ་ཚོ་དྲུག་དྲུང་ནས་ལེན།   །
ཁ་ལ་ལ་ལེན་པ་རོགས་ཀི་དོན།   །

གླུ་མ་ལྷ་ཐར་འཚོ། 

གཅིག་ཐུག་ཀ་རྫ་རིའི་ཀླད་ཀི་ཐུག  །
རྫ་གཡས་རུ་བརྒྱུད་དྲ་ཡུན་ཀི་ཐུག  །

གཉིས་ཐུག་ཀ་མཚོ་ལུང་མཐའ་ནས་ཐུག  །
མཚོ་ཁྲི་བཤེགས་རྒྱས་ན་ཡུན་ཀི་ཐུག  །

གསུམ་ཐུག་ཀ་སྡེ་ཆེན་གྲོང་ནས་ཐུག  །
སྡེ་མྱི་ཁ་མེད་ན་ཡུན་ཀི་ཐུག  །