རྒྱལ་ཡོངས་ཀྱི་སློབ་གསོའི་གྲོན་དངུལ་སྒོར་དུང་ཕྱུར་ཁྲི6.4ལས་བརྒལ།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། ཀྲུང་གོ་བོད་ཀྱི་དྲ་བ། བཤེར་འབེབབས། རིན་ཆེན་ཚེ་རིང་།

ཉེ་སྔོན་སློབ་གསོ་པུ་ཡི2023ལོའི་རྒྱལ་ཡོངས་ཀྱི་སློབ་གསོའི་གྲོན་དངུལ་ལག་བསྟར་བྱས་ཚུལ་གྱི་བསྡོམས་རྩིས་མྱུར་འཕྲིན་ཁྱབ་བསྒྲགས་བྱས་པ་རེད། མྱུར་འཕྲིན་ལས་མངོན་པ་ལྟར་ན། 2023ལོར་རྒྱལ་ཡོངས་ཀྱི་སློབ་གསོའི་གྲོན་དངུལ་སྡོམ་འབོར་སྒོར་དུང་ཕྱུར64595བཏང་བ་དེ་ལོ་སྔོན་མ་ལས5.3%འཕར་ཡོད་པ་རེད། དེའི་ནང་རྒྱལ་ཁབ་ཀྱི་ནོར་སྲིད་རང་བཞིན་གྱི་སློབ་གསོའི་གྲོན་དངུལ་སྒོར་དུང་ཕྱུར50433ཟིན་པ་དེ་ལོ་སྔོན་མ་ལས4.0%འཕར་ཡོད།

སློབ་གསོའི་མ་དངུལ་གཏོང་བ་ནི་རྒྱལ་ཁབ་ཀྱི་རྒྱང་རིང་གི་འཕེལ་རྒྱས་ལ་འདེགས་སྐྱོར་བྱེད་པའི་རྨང་གཞིའི་རང་བཞིན་དང་འཐབ་ཇུས་རང་བཞིན་གྱི་མ་དངུལ་གཏོང་བ་དང་། སློབ་གསོའི་བྱ་གཞག་འཕེལ་རྒྱས་གཏོང་བའི་དངོས་པོའི་རྨང་གཞི་ཡིན། “རྒྱལ་ཁབ་སྡོམ་རྩིས་ཅུ་ཡི་གཞི་གྲངས་ལས་མངོན་པ་ལྟར་ན། 223ལོར་རྒྱལ་ནང་གི་ཐོན་སྐྱེད་སྤྱི་འབོར་སྒོར་དུང་ཕྱུར1260582ཡིན་པ་དང་། འདི་ལྟར་རྩིས་བརྒྱབ་ན། 2023ལོར་རྒྱལ་ཁབ་ནོར་སྲིད་རང་བཞིན་གྱི་སློབ་གསོའི་འགྲོ་གྲོན་གྱིས་རྒྱལ་ནང་ཐོན་སྐྱེད་སྤྱི་འབོར་གྱི་བསྡུར་ཚད་ནང4%ཟིན་ཡོད”ཅེས་ནན་ཅིང་སློབ་ཆེན་སློབ་གསོ་ཞིབ་འཇུག་ཁང་གི་དགེ་རྒན་ཆེན་མོ་ཙུང་ཞའོ་ཧྭ་ཡིས་བཤད་པ་དང་། “ཉེ་བའི་ལོ་ཤས་རིང་རྙོག་འཛིང་ཆེ་བའི་དཔལ་འབྱོར་དུས་བབ་ལ་བསམ་གཞིག་བཏང་ནས4%ཡི་གྲུབ་འབྲས་རྒྱུན་མཐུད་ངང་སྲ་བརྟན་དུ་བཏང་བ་དེ་ཐོག་ནས་སློབ་གསོ་སྔོན་ལ་འཕེལ་རྒྱས་གཏོང་བའི་འཐབ་ཇུས་ཀྱི་ངེས་གནས་གང་ལེགས་ཀྱིས་མཚོན་པ་དང་། ཏང་དང་རྒྱལ་ཁབ་ཀྱིས་སློབ་གསོའི་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པའི་ཆོད་སེམས་མངོན་ཡོད”ཟེར།

མྱུར་འཕྲིན་ལས་མངོན་པ་ལྟར་ན། 2023ལོར་རྒྱལ་ཡོངས་ཀྱི་སློབ་སྔོན་སློབ་གསོ་དང་། འོས་འགན་སློབ་གསོ། མཐོ་འབྲིང་དུས་མཚམས་ཀྱི་སློབ་གསོ། མཐོ་རིམ་སློབ་གསོ་བཅས་ཀྱི་འགྲོ་གྲོན་སྡོམ་འབོར་སོ་སོར་སྒོར་དུང་ཕྱུར5382དང་སྒོར་དུང་ཕྱུར28427། སྒོར་དུང་ཕྱུར10154། སྒོར་དུང་ཕྱུར17640བཅས་བཏང་བ་དེ་ལོ་སྔོན་མ་ལས་སོ་སོར4.7%དང6.0%། 6.2%།7.6%བཅས་འཕར་ཡོད། རིམ་པ་སོ་སོའི་སློབ་གསོའི་འགྲོ་གྲོན་གཏོང་ཚད་དང་བསྡུར་ན་མཐོ་རིམ་སློབ་གསོའི་འགྲོ་གྲོན་འཕར་ཚད་ནི་ཆེས་མཐོ་ཤོས་ཡིན་པ་རེད། “སློབ་གསོ་དང་ཚན་རྩལ། ཤེས་ལྡན་མི་སྣ་བཅས་ཀྱི་བྱ་གཞག་འཕེལ་རྒྱས་གཏོང་བར་མཐོ་རིམ་སློབ་གསོ་ནི་འཛིན་ལུང་གལ་ཆེན་ཞིག་ཡིན། 2023ལོར་རང་རྒྱལ་གྱི་རྣམ་པ་སྣ་ཚོགས་ཀྱི་སྒོ་ནས་མཐོ་རིམ་སློབ་གསོའི་སློབ་སྦྱོང་བྱེད་མཁན་ཁྱོན་མི་ཁྲི4763.19ཟིན་པ་དང་། མཐོ་རིམ་སློབ་གསོས་དཔལ་འབྱོར་སྤུས་ཚད་འཕེལ་རྒྱས་ལ་ཟད་མི་ཚར་བའི་འཇོན་མིའི་རོགས་འདེགས་འདོན་སྤྲོད་བྱས་ཡོད། འོན་ཀྱང་འཛམ་གླིང་སློབ་གསོའི་སྟོབས་ལྡན་རྒྱལ་ཁབ་ཀྱི་བསྡུར་བའི་ཁྲོད། རང་རྒྱལ་མཐོ་རིམ་སློབ་གསོའི་སློབ་གསོ་འགྲོ་གྲོན་གྱི་གཞི་ཁྱོན་སྔར་བཞིན་ཅུང་དམའ་བ་དང་། མ་འོངས་པར་སྔར་བཞིན་མཐོ་རིམ་སློབ་གསོའི་འགྲོ་གྲོན་གྱི་གཞི་ཁྱོན་ཐད་དངུལ་གཏོང་ཇེ་ཆེར་གཏོང་བ་དང་། མཐོ་རིམ་འཇོན་མིའི་གསོ་སྐྱོང་སྒྲིག་གཞི་ལེགས་སྒྲིག་དང་འགྲོ་གྲོན་བེད་སྤྱོད་ཕན་འབྲས་མཐོར་འདེགས་སུ་བཏང་སྟེ། སྔར་ལས་ལྷག་པར་མཐོ་རིམ་འཇོན་མིའི་རང་བདག་གསོ་སྐྱོང་གི་ནུས་པ་མཐོ་རུ་གཏོང་དགོས”ཞེས་ཀྲུང་གོ་སློབ་གསོ་ཚན་རིག་ཞིབ་འཇུག་ཁང་གི་ཞིབ་འཇུག་པ་ཁྲུའུ་ཁྲའོ་ཧུའེ་ཡིས་བཤད།

སློབ་མའི་ཆ་སྙོམས་ཀྱི་སློབ་གསོའི་འགྲོ་གྲོན་གནས་ཚུལ་ལ་གཞིགས་ན། 2023ལོར་རྒྱལ་ཡོངས་ཀྱི་བྱིས་གཉོར་ཁང་དང་། སློབ་ཆུང་དཀྱུས་མ། དམའ་རིམ་སློབ་འབྲིང་དཀྱུས་མ། མཐོ་རིམ་སློབ་འབྲིང་དཀྱུས་མ། འབྲིང་རིམ་ལས་རིགས་སློབ་གྲྭ མཐོ་རིམ་སློབ་གྲྭ་དཀྱུས་མ་བཅས་ཀྱི་སློབ་མའི་ཆ་སྙོམས་ཀྱི་སློབ་གསོའི་འགྲོ་གྲོན་སྡོམ་འབོར་ཚང་མ་ལོ་སྔོན་མ་ལས་ཅུང་འཕར་ནས་འཕར་ཚད་སོ་སོར8.8%དང4.3%། 2.7%། 3.8%། 0.7%། 3.9%བཅས་ཟིན་ཡོད་ལ། དེའི་ནང་བྱིས་གཉོར་ཁང་གི་སློབ་མའི་ཆ་སྙོམས་ཀྱི་སློབ་གསོའི་འགྲོ་གྲོན་འཕར་ཚད་ཆེས་མཐོ་བ་ཡིན། 

སློབ་གསོ་པུ་ཡི་འབྲེལ་ཡོད་འགན་འཁུར་བས་བསྟན་དོན། ནོར་སྲིད་ཀྱི་སློབ་གསོའི་དངུལ་གཏོང་ཇེ་མང་དུ་གཏོང་བའི་ལམ་སྲོལ་རྒྱུན་མཐུད་དང་བརྟན་རླིང་དུ་གཏོང་བ་འཐུས་ཚང་དུ་བཏང་ནས། སློབ་གསོའི་སྟོབས་ལྡན་རྒྱལ་ཁབ་འཛུགས་སྐྲུན་ཁྲོད་ཀྱི་སློབ་གསོའི་དངུལ་གཏོང་གིས་འཕེལ་རྒྱས་ལ་འགན་ལེན་དང་། སྒྱུར་བཅོས་ལ་སྐུལ་འདེད། དྲང་གཞག་ལ་སྐུལ་འདེད། སྤུས་ཚད་མཐོར་འདེགས་སུ་གཏོང་བ་བཅས་ཀྱི་སྲིད་ཇུས་ཀྱི་ཁྲིད་སྟོན་ནུས་པ་འདོན་སྤེལ་གང་ལེགས་བྱས་ཏེ། སློབ་གསོ་སྔོན་ལ་འཕེལ་རྒྱས་གཏོང་བའི་འཐབ་ཇུས་དོན་ཐོག་ཏུ་འཁྱོལ་བར་བྱེད་རྒྱུ་ཡིན། །