གྲངས་ཉུང་མི་རིགས་སྐད་ཡིག་གི་ཆེད་མཁས་ཞིབ་འཇུག་པ་ཆེན་མོ་སུན་ཧུང་ཁའེ་སྐུ་གཤེགས་པར་མྱ་ངན་ཞུ།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། ཀྲུང་གོའི་སྐད་ཡིག་ཐོན་ཁུངས་སྲུང་སྐྱོབ་ཞིབ་འཇུག་ལྟེ་གནས། བཤེར་འབེབས། རིན་ཆེན་ཚེ་རིང་།

ཀྲུང་གོ་སྤྱི་ཚོགས་ཚན་རིག་ཁང་གི་གཟི་བརྗིད་ཞའོ་པུའི་ཨུ་ཡོན་དང་།    ཀྲུང་གོ་སྤྱི་ཚོགས་ཚན་རིག་ཁང་མི་རིགས་རིག་པ་དང་མིའི་རིགས་རིག་པ་ཞིབ་འཇུག་སུའོ་ཡི་ཞིབ་འཇུག་པ།  ཀྲུང་གོ་མི་རིགས་སྐད་ཡིག་སློབ་ཚོགས་ཀྱི་གཟི་བརྗིད་ཚོགས་གཙོ།    ཀྲུང་གོའི་སྐད་ཡིག་ཐོན་ཁུངས་སྲུང་སྐྱོང་ལས་གྲྭའི་ཆེད་མཁས་བློ་འདྲི་ཨུ་ལྷན་གྱི་ཨུ་ཡོན་བཅས་ཡིན་པའི་སྐུ་ཞབས་སུན་ཧུང་ཁའེ2024ལོའི་ཟླ8པའི་ཚེས15ཉིན་པེ་ཅིང་དུ་སྙུང་གཞི་ཡི་རྐྱེན་གྱིས་སྐུ་གཤེགས། དགུང་ལོ90ཡིན།

ཡོངས་བསྒྲགས་རྒྱུ་ཆ་ལས་མངོན་པ་ལྟར་ན། སུན་ཧུང་ཁའེ1934ལོར་ཅང་སུའུ་ཀྲང་ཅ་ཀང་དུ་སྐྱེས་པ་དང་།   1954ལོར་པེ་ཅིང་སློབ་ཆེན་གྱི་རྒྱ་ཡིག་ཚན་ཁག་ནས་མཐར་ཕྱིན། མཐར་ཕྱིན་རྗེས་ཀྲུང་གོ་ཚན་རིག་ཁང་སྐད་ཡིག་ཞིབ་འཇུག་སུའོ་(ད་ལྟའི་ཀྲུང་གོ་སྤྱི་ཚོགས་ཚན་རིག་ཁང་སྐད་ཡིག་ཞིབ་འཇུག་སུའོ་)དང་།    ཀྲུང་གོ་སྤྱི་ཚོགས་ཚན་རིག་ཁང་མི་རིགས་རིག་པ་དང་མིའི་རིགས་རིག་པའི་ཞིབ་འཇུག་སུའོ་རུ་ཕྱག་ལས་གནང་བ་དང་།   ཀྲུང་གོའི་སྐད་ཡིག་ཐོན་ཁུངས་སྲུང་སྐྱོང་ལས་གྲྭའི་ཆེད་མཁས་བློ་འདྲི་ཨུ་ལྷན་གྱི་ཨུ་ཡོན་དང་ཀྲུང་གོ་མི་རིགས་སྐད་ཡིག་སློབ་ཚོགས་ཀྱི་གཟི་བརྗིད་ཚོགས་གཙོ་སོགས་ཀྱི་འགན་གཅིག་ལྕོགས་སུ་བཞེས།

ཁོང་ནི་ཀྲུང་གོ་གསར་པའི་རྗེས་གསོ་སྐྱོང་བྱས་པའི་མི་རིགས་སྐད་བརྡ་རིག་པའི་ཞིབ་འཇུག་པ་རབས་དང་པོ་ཡིན་ཞིང་།    སྔ་རྗེས་སུ་སྐད་རིགས་གསར་པ15ཤེས་རྟོགས་བྱུང་བ་མ་ཟད།  རྒྱ་བོད་སྐད་ཁོངས་ཀྱི་སྐད་རིགས30ལྷག་ཙམ་ལ་བརྒྱུད་རིམ་ལྡན་པའི་བརྟག་དཔྱད་ཞིབ་འཇུག་གནང་ལ།   《བོད་འབར་སྐད་ཁྱིམ་གྱི་ཆའང་སྐད་ཡན་ལག་ཞིབ་འཇུག》དང་།《ཆའང་སྐད་ཀྱི་གནས་ཚུལ་མདོར་བསྡུས》དང་། 《ཏུའུ་ལུང་སྐད་ཀྱི་གནས་ཚུལ་མདོར་བསྡུས》སོགས་བརྩམས་ཡོད་པ་དང་། “ཀྲུང་གོའི་གསར་རྙེད་སྐད་ཡིག་ཞིབ་འཇུག” དཔེ་ཚོགས་དང་། “ཀྲུང་གོའི་གྲངས་ཉུང་མི་རིགས་སྐད་ཡིག་གི་གནས་ཚུལ་མདོར་བསྡུས”དཔེ་ཚོགས་དང་། “ཀྲུང་གོའི་གྲངས་ཉུང་མི་རིགས་སྐད་ཡིག་གི་ཡུལ་སྐད་ཞིབ་འཇུག”དཔེ་ཚོགས་སོགས་དཔེ་སྐྲུན་བྱས།

ཁོང་གིས་གྲངས་ཉུང་མི་རིགས་ཀྱི་སྐད་ཡིག་ལ་ཞིབ་འཇུག་བྱས་པའི་རྨང་གཞིའི་སྟེང་། སྔ་མོ་ནས་སྟོངས་ཉེན་ཡོད་པའི་སྐད་ཡིག་མྱུར་སྐྱོབ་བྱ་རྒྱུའི་རེ་འབོད་བྱས་པ་དང་འབྲེལ་ལས་དོན་དེའི་ནང་ཞུགས་མགོ་བརྩམས།    2006ལོར་སུན་ཧུང་ཁའེ་ཡིས་《ཀྲུང་གོའི་གྲངས་ཉུང་མི་རིགས་ཀྱི་སྐད་ཡིག་གི་གསོན་ཤུགས་རིམ་སྒྲིག་ཞིབ་འཇུག》ཅེས་པའི་རྩོམ་ཡིག་སྤེལ་བ་དང་། དེའི་ནང་ཀྲུང་གོའི་གྲངས་ཉུང་མི་རིགས་ཀྱི་སྐད་ཡིག་རིགས་དྲུག་ལ་དབྱེ་ཡོད་པ་སྟེ།    གཅིག གསོན་ཤུགས་ཀྱིས་ཁེངས་པའི་སྐད་དེ།    དཔེར་ན་སོག་སྐད་དང་བོད་སྐད་ལྟ་བུ།     གཉིས།    གསོན་ཤུགས་ལྡན་པའི་སྐད་དེ།   དཔེར་ན་མིའོ་སྐད་དང་ཧ་ནེའི་སྐད་ལྟ་བུ།     གསུམ།    གསོན་ཤུགས་ཆུང་དུ་ཕྱིན་ནས་སྟོངས་ཉེན་ཡོད་པའི་སྐད་དེ། དཔེར་ན་ཆའང་སྐད་དང་ནཱ་ཞིའི་སྐད་ལྟ་བུ། བཞི། གསོན་ཤུགས་མི་འདང་བ་དང་སྟོངས་ཉེན་ཡོད་པའི་སྐད་དེ། དཔེར་ན།   ཀེ་ལའོ་སྐད་དང་ཨེ་ལུན་ཁྲུན་སྐད་ལྟ་བུ།  ལྔ། གསོན་ཤུགས་ཧ་ཅང་ཞན་ལ་སྟོངས་ཉེན་ཡོད་པའི་སྐད་རིགས་ཏེ།    དཔེར་ན་ཧོ་ཀྲེའི་སྐད་དང་ཧྲེ་སྐད་ལྟ་བུ།   དྲུག གསོན་ཤུགས་མེད་པ་དང་འབྲེལ་འདྲིས་ཀྱི་ནུས་པ་མེད་པའི་སྐད་དེ། དཔེར་ན་མན་ཇུའི་སྐད་ལྟ་བུ།  མི་རིགས་སྐད་ཡིག་གི་གསོན་ཤུགས་རིམ་སྒྲིག་བྱས་པ་བརྒྱུད་སུན་ཧུང་ཁའེ་ཡིས་གལ་ཆེ་ཆུང་གི་གསལ་པོ་དབྱེ་ནས་སྟོངས་ཉེན་ཡོད་པའི་སྐད་ཡིག་སྔ་མོ་ནས་མྱུར་སྐྱོབ་བྱ་རྒྱུའི་རེ་འབོད་བྱས།

2015ལོར་ཀྲུང་གོའི་སྐད་ཡིག་ཐོན་ཁུངས་སྲུང་སྐྱོང་ལས་གྲྭ་དངོས་སུ་སྤེལ་མགོ་ཚུགས་པ་དང་སུན་ཧུང་ཁའེ་ལས་གྲྭ་ཧྲིལ་པོའི་འཆར་འགོད་དང་།    ཇུས་འགོད།    ལག་བསྟར།    སྐུལ་འདེད་བཅས་ཀྱི་ལས་དོན་ནང་ཞུགས་པ་རེད།