བོད་རིག་པའི་ཇོ་མོ་གླང་མའི་གླེང་སྟེགས་སྐབས་བཞི་པ་སང་ཉིན་འཚོག་རྒྱུ་རེད།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། ཀྲུང་གོ་བོད་རིག་པ་ཞིབ་འཇུག་ལྟེ་གནས། བཤེར་འབེབས། རིན་ཆེན་ཚེ་རིང་།

བོད་རིག་པའི་ཇོ་མོ་གླང་མའི་གླེང་སྟེགས་སྐབས་བཞི་པ་ཟླ8པའི་ཚེས21ནས་ཚེས22ཉིན་བར་སི་ཁྲོན་ཁྲེང་ཏུའུ་རུ་འཚོག་རྒྱུ་རེད།

ད་ལོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ75འཁོར་བའི་ལོ་ཡིན་ལ་བོད་ལྗོངས་དམངས་གཙོའི་བཅོས་སྒྱུར་བྱས་ནས་ལོ65འཁོར་བའི་ལོའང་ཡིན། སྐབས་འདིའི་གླེང་སྟེགས་ཀྱིས་ཞི་ཅིན་ཕིང་གི་བོད་ལྗོངས་ལས་དོན་སྐོར་གྱི་རྒྱས་བཤད་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་ཐབས་ཇུས་དོན་འཁྱོལ་གཏིང་ཟབ་དང་། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་བྱས་ཏེ། ཚོགས་ཞུགས་རིགས་གཅིག་མཁས་ཅན་དང་ཞིབ་འཇུག་པ་རྣམས་ཀྱིས“ཀྲུང་གོ་རྣམ་པའི་དེང་རབས་ཅན་གྱི་བོད་ལྗོངས་ཀྱི་ལག་ལེན་དང་བོད་རིག་པའི་འཕེལ་རྒྱས”ཞེས་པ་བརྗོད་བྱར་བཟུང་སྟེ། དུས་རབས་གསར་པའི་བོད་ལྗོངས་ཀྱི་བྱ་གཞག་ཁག་ལ་ཐོབ་པའི་ཕྱོགས་ཡོངས་ཀྱི་ཡར་ཐོན་དང་ལོ་རྒྱུས་རང་བཞིན་གྱི་གྲུབ་འབྲས། དེ་བཞིན་ཀྲུང་གོའི་བོད་རིག་པའི་བྱ་གཞག་ལ་ཐོབ་པའི་འཕེལ་རྒྱས་གསར་པ་བཅས་ལ་གྲོས་བསྡུར་གཏིང་ཟབ་བྱ་རྒྱུ་རེད།

བོད་རིག་པའི་ཇོ་མོ་གླང་མའི་གླེང་སྟེགས་ནི་ཀྲུང་གོ་བོད་རིག་པ་ཞིབ་འཇུག་ལྟེ་གནས་དང་ཀྲུང་གོའི་བོད་ཀྱི་རིག་གནས་སྲུང་སྐྱོང་དང་འཕེལ་རྒྱས་མཐུན་ཚོགས་ཀྱིས་ཐུན་མོང་ཐོག་གཉེར་བའི་རྒྱལ་ཁབ་རིམ་པའི་བོད་རིག་པའི་རིག་གཞུང་བགྲོ་གླེང་ཚོགས་འདུ་ཞིག་ཡིན་ཏེ། 2010ལོར་ཐེངས་དང་པོ་གཉེར་བ་ནས་བཟུང་གླེང་སྟེགས་ནང་ཞུགས་ཚད་ལོ་རེ་བཞིན་ཇེ་མང་དང་། ཁས་ལེན་བྱེད་ཚད་རྒྱུན་ཆད་མེད་པར་མཐོ་རུ་ཕྱིན་པས་རིག་གཞུང་ཆུ་ཚད་མཐོ་བ་དང་བེད་སྤྱོད་རིན་ཐང་ཆེ་བའི་དཔྱད་འབྲས་གསར་པ་ཁག་ཅིག་ཐོན་ཡོད་ལ། སྤྱི་ཚོགས་ལ་ཤུགས་རྐྱེན་བཟང་པོ་ཐོན་ཡོད་པས་བོད་རིག་པའི་སྡེ་ཡིས་རིག་གཞུང་དཔྱད་གླེང་དང་གྲོས་མོལ་བགྲོ་གླེང་། ཐབས་ཇུས་འདོན་པ་བཅས་ཀྱི་སྟེགས་བུ་གལ་ཆེན་ཞིག་ཏུ་གྱུར་ཡོད།