རྐང་ཚ་རྫོང་གི་རྩལ་ནུས་ཅན་གྱི་ཤེས་ལྡན་མི་སྣའི་གསོ་སྦྱོང་འཛིན་གྲྭ་ཟི་ལིང་དུ་འཚོགས།

རྩོམ་སྒྲིག སངས་རྒྱས་སྐྱིད། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། རིན་ཆེན་ཚེ་རིང་།

རྐང་ཚ་རྫོང་གི་ལས་བྱེད་པའི་དཔུང་ཁག་གི་ཆེད་ལས་ནུས་པ་སྔར་ལས་མཐོར་འདེགས་སུ་གཏོང་ཆེད། ཟླ9ཚེས2ཉིན། རྒྱལ་ཁབ་ནུས་ཁུངས་ཚོགས་པས་གཞི་རིམ་ལས་བྱེད་པར་ཁ་གཏད་རོགས་སྐྱོར་བྱེད་པའི་རྐང་ཚ་རྫོང་གི་རྩལ་ནུས་ཅན་གྱི་ཤེས་ལྡན་མི་སྣའི་གསོ་སྦྱོང་འཛིན་གྲྭ་ཟི་ལིང་གྲོང་ཁྱེར་ལས་རིགས་ལག་རྩལ་སློབ་གླིང་དུ་བདེ་བླག་ངང་ཚོགས་མགོ་ཚུགས།  རྐང་ཚ་རྫོང་སྲིད་གཞུང་གི་རྫོང་དཔོན་གཞོན་པ་མཱ་ཅོན་འཛིན་གྲྭའི་མགོ་ཚུགས་མཛད་སྒོར་ཞུགས་པ་དང་འབྲེལ་གསུང་བཤད་གནང་བ་དང་། རྐང་ཚ་རྫོང་འཕེལ་རྒྱས་བཅོས་སྒྱུར་བཟོ་ལས་ཆ་འཕྲིན་ཅན་དང་ཚོང་དོན་ཅུ་ཡི་ཅུ་ཀྲང་གཞོན་པ་ཕེས་ཀྲི་ཆིང་གིས་འཛིན་གྲྭའི་མགོ་ཚུགས་མཛད་སྒོར་གཙོ་སྐྱོང་གནང་ཞིང་། ཡུལ་ཚོ་དང་གྲོང་རྡལ། སྡེ་ཁག་སོ་སོའི་མི་སྣ55གསོ་སྦྱོང་ནང་ཞུགས།   

རྩལ་ནུས་ཅན་གྱི་ཤེས་ལྡན་མི་སྣ་ནི་རྐང་ཚ་རྫོང་གི་ཤེས་ལྡན་མི་སྣའི་དཔུང་ཁག་གི་གྲུབ་ཆ་གལ་ཆེན་ཞིག་ཡིན་པའི་ངོས་ནས། རྫོང་ཁོངས་དཔལ་འབྱོར་སྤུས་ཚད་མཐོ་བའི་སྒོས་འཕེལ་རྒྱས་སུ་གཏོང་བར་སྐུལ་འདེད་གཏོང་བའི་ཁྲོད་མེད་དུ་མི་རུང་བའི་རྨང་གཞིའི་སྟོབས་ཤུགས་གལ་ཆེན་ཞིག་རེད།     ད་རེས་ཀྱི་གསོ་སྦྱོང་ལ“རིགས་པའི་གཞུང་ལུགས་སློབ་ཁྲིད+ཡུལ་དངོས་རྟོག་ཞིབ”བྱེད་པ་ཟུང་འབྲེལ་གྱི་རྣམ་པའི་ཐོག་ནས《ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་གསལ་འགྲེལ》དང《ཡུལ་བབ་དང་བསྟུན་ནས་སྤུས་ཚད་གསར་པའི་ཐོན་སྐྱེད་ནུས་ཤུགས་འཕེལ་རྒྱས་སུ་གཏོང་བ》དང་། 《འཛུགས་སྐྲུན་ཡུལ་དངོས་བདེ་འཇགས་ཚོད་འཛིན་གཙོ་གནད》སོགས་ཀྱི་ཆེད་ལས་སློབ་ཚན་ལ་དམིགས་ནས་བརྒྱུད་རིམ་རང་བཞིན་གྱི་སློབ་ཁྲིད་བྱས་པ་མ་ཟད།    གསོ་སྦྱོང་ནང་ཞུགས་མཁན་དག་སྒྲིག་འཛུགས་བྱས་ཏེ་མཚོ་ཤར་གྲོང་ཁྱེར་དང་དགོན་ལུང་རྫོང་དུ་ཕྱིན་ནས་ཡུལ་དངོས་སློབ་ཁྲིད་ཀྱི་བྱེད་སྒོ་སྤེལ།    

སློབ་མགོ་ཚུགས་པའི་མཛད་སྒོའི་ཐོག རྐང་ཚ་རྫོང་གི་རྫོང་དཔོན་གཞོན་པ་མཱ་ཅོན་གྱིས་ཐེངས་འདིའི་གསོ་སྦྱོང་ཐད་བསམ་འཆར་གསུམ་བཏོན་པ་སྟེ།    གཅིག་ནི་གོ་སྐབས་དམ་འཛིན་གྱིས་སློབ་སྦྱོང་ཡག་པོ་བྱེད་པ།     གསོ་སྦྱོང་ནང་ཞུགས་མཁན་གྱི་སློབ་མ་ཚོས་ཐེངས་འདིའི་སློབ་སྦྱོང་གི་གོ་སྐབས་ལེགས་པོ་དམ་འཛིན་བྱེད་པ་དང་།    སློབ་སྦྱོང་ཐད་ལ་རྣམ་འགྱུར་ཡག་པོ་འཛིན་པ།    འཆད་ཁྲིད་ལ་ནན་ཏན་གྱིས་ཉན་པ།    རང་འགུལ་གྱིས་ལག་ལེན་བཀོལ་སྤྱོད་ནང་ཞུགས་པ།  ཧུར་ཐག་གིས་སྦྱངས་ཟིན་པའི་ཤེས་བྱ་དང་རྩལ་ནུས་ཁོང་དུ་ཆུད་པར་བྱེད་པ་བཅས་བྱེད་དགོས།     གཉིས་ནི་སྒྲིག་ཁྲིམས་དང་དོ་དམ་ལ་བརྩི་སྲུང་བྱ་དགོས།  གསོ་སྦྱོང་ནང་ཞུགས་མཁན་གྱི་སློབ་མས་གསོ་སྦྱོང་བྱེད་པའི་རིང་གསོ་སྦྱོང་འཛིན་གྲྭའི་སྒྲིག་སྲོལ་ལམ་ལུགས་ཁག་ལ་བརྩི་སྲུང་ནན་པོ་བྱེད་པ་དང་།    གསོ་སྦྱོང་དགེ་རྒན་གྱི་དོ་དམ་དང་བཀོད་སྒྲིག་དང་ལེན་བྱེད་པ། དུས་ལྟར་གསོ་སྦྱོང་སློབ་ཁྲིད་ནང་ཞུགས་ནས།   རྗེས་སུ་མི་ལུས་པ་དང་སྔ་ལོག་དང་སློབ་བྱོལ་མི་བྱེད་པ་བཅས་བྱེད་དགོས།     གསུམ་ནི་སྦྱངས་ཟིན་པ་ལག་བསྟར་བཀོལ་སྤྱོད་དང་གསར་གཏོད་ཀྱི་བློ་སྤོབས་ལྡན་པ་བྱ་དགོས། སློབ་སྦྱོང་གི་དམིགས་ཡུལ་ནི་ཉེར་སྤྱོད་བྱ་རྒྱུ་དེ་ཡིན་པ་དང་སྦྱོང་བརྡར་ནང་ཞུགས་མཁན་གྱི་སློབ་མས་སྦྱངས་ཟིན་པའི་ཤེས་བྱ་དང་རྩལ་ནུས་དེ་དོན་དངོས་ཀྱི་ལས་ཀའི་ནང་བེད་སྤྱོད་བྱས་ནས་རང་ཉིད་ཀྱི་ལས་ཀའི་ནུས་པ་དང་ཆུ་ཚད་རྒྱུན་ཆད་མེད་པར་མཐོར་འདེགས་སུ་གཏོང་དགོས། དུས་མཚུངས་སུ། གསར་གཏོད་བྱེད་ཕོད་པ་དང་ཧུར་ཐག་གིས་ལག་རྩལ་དང་བྱེད་ཐབས་གསར་པ་འཚོལ་ཞིབ་བྱས་ཏེ་རྐང་ཚ་རྫོང་གི་དཔལ་འབྱོར་འཕེལ་རྒྱས་ལ་ནུས་པ་གལ་ཆེན་འདོན་དགོས།   

གསོ་སྦྱོང་ནང་ཞུགས་མཁན་གྱི་སློབ་མ་དག་གིས། མུ་མཐུད་དུ་སློབ་སྦྱོང་ལ་ཤུགས་སྣོན་བྱས་ཏེ་གསོ་སྦྱོང་རིང་སློབ་སྦྱོང་བྱས་པ་བརྒྱུད་རང་ངོས་ཀྱི་ལས་སྒོའི་ནུས་པ་དང་ཞབས་ཞུའི་ཆུ་ཚད་མཐོར་འདེགས་སུ་བཏང་ནས་རྫོང་ཁོངས་དཔལ་འབྱོར་གྱི་སྤུས་ཚད་ཇེ་ལེགས་སུ་གཏོང་བར་ནུས་ཤུགས་ཅི་ལྕོགས་འདོན་རྒྱུ་ཡིན་ཞེས་བསྟན།