དེ་རིང་ནི་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་རེད།

རྩོམ་སྒྲིག མཁའ་འགྲོ་མཚོ། ཡོང་ཁུངས། བོད་ལྗོངས་ཉིན་རེའི་ཚགས་པར་བོད་ཡིག་སྨྱན་སྦྱོར། བཤེར་འབེབས། རིན་ཆེན་ཚེ་རིང་།

2025ལོ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བཏོན་ནས་ལོ11འགོར་བའི་ལོ་ཡིན་པ་དང་། ཟླ4ཚེས15ཉིན་ནི་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་ཐེངས10པ་དེ་རེད། གཤམ་ལ་ང་ཚོ་དང་མཉམ་དུ་འབྲེལ་ཡོད་ཀྱི་ཤེས་བྱ་ཁག་གཅིག་སློབ་སྦྱོང་བྱེད་དང་།

གཅིག“དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ”བཙུགས་པའི་རྒྱབ་ལྗོངས། 

དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་ནི་དམངས་ཡོངས་ཀྱི་རྒྱལ་ཁབ་བདེ་འཇགས་ཀྱི་འདུ་ཤེས་ཟབ་ཏུ་གཏོང་བ་དང་རྒྱལ་ཁབ་ཀྱི་བདེ་འཇགས་ལ་སྲུང་སྐྱོང་བྱ་ཆེད་བཙུགས་པའི་ཉིན་མོ་ཞིག་རེད། 2015ལོའི་ཟླ7ཚེས1ཉིན། རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅོ་ལྔ་པའི་སྟེང《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་ཁབ་བདེ་འཇགས་བཅའ་ཁྲིམས》ལ་གྲོས་འཆམ་བྱུང་བ་དང་དེའི་ནང་ལོ་རེའི་ཟླ4ཚེས15ཉིན་ནི་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོར་གཏན་འཁེལ་བྱས་ཡོད་པ་རེད།

གཉིས། རྒྱལ་ཁབ་བདེ་འཇགས་ལ་ཁྱབ་ཁོངས་གང་དང་གང་ཚུད་ཡོད།

རྒྱལ་ཁབ་བདེ་འཇགས་དང་འབྲེལ་བ་ཡོད་པའི་གཙོ་གནད་ཁྱབ་ཁོངས16ཡོད་པའི་ནང་། ཆབ་སྲིད་ཀྱི་བདེ་འཇགས་དང་། དམག་དོན་གྱི་བདེ་འཇགས། རྒྱལ་ཁབ་ས་ཆའི་བདེ་འཇགས། དཔལ་འབྱོར་གྱི་བདེ་འཇགས། རིག་གནས་ཀྱི་བདེ་འཇགས། སྐྱེ་དངོས་ཀྱི་བདེ་འཇགས། དྲ་རྒྱའི་བདེ་འཇགས། སྤྱི་ཚོགས་ཀྱི་བདེ་འཇགས། ཚན་རྩལ་གྱི་བདེ་འཇགས། སྐྱེ་ཁམས་ཀྱི་བདེ་འཇགས། ཐོན་ཁུངས་ཀྱི་བདེ་འཇགས། ཉིང་རྡུལ་གྱི་བདེ་འཇགས། ཕྱི་ཁོངས་སུ་ཡོད་པའི་རང་རྒྱལ་གྱི་ཁེ་ཕན་བདེ་འཇགས། བར་སྣང་གི་བདེ་འཇགས། མཚོ་བྱིངས་ཀྱི་བདེ་འཇགས། གླིང་སྣེའི་བདེ་འཇགས་བཅས་ཚུད་ཡོད།

གསུམ། རྒྱལ་ཁབ་བདེ་འཇགས་ལ་སྲུང་སྐྱོང་ཇི་ལྟར་བྱེད་དགོས།

1.རྒྱལ་ཁབ་ཀྱི་གསང་བའི་ཁོངས་སུ་གཏོགས་པའི་ཡིག་ཆ་དང་། དཔྱད་གཞི། དངོས་པོ་གཞན་དག་བཅས་རྙེད་ཚེ་དུས་ཐོག་ཏུ་འབྲེལ་ཡོད་ལས་ཁུངས་དང་ཚན་པའམ་ཡང་ན་གསང་སྲུང་ལས་དོན་སྡེ་ཚན་ལ་སྐྱེལ་དགོས།

2.རྒྱལ་ཁབ་ཀྱི་གསང་བའི་ཁོངས་སུ་གཏོགས་པའི་ཡིག་ཆ་དང་། དཔྱད་གཞི། དངོས་པོ་གཞན་དག་བཅས་ཉོ་བའམ་འཚོང་བ་ཤེས་ཚེ། དུས་ཐོག་ཏུ་གསང་སྲུང་ལས་དོན་སྡེ་ཚན་ནམ་ཡང་ན་རྒྱལ་ཁབ་བདེ་འཇགས་ལས་ཁུངས་དང་སྤྱི་བདེ་ལས་ཁུངས་ལ་ཐག་གཅོད་བྱ་རྒྱུར་སྐྱེལ་དགོས།

3.རྒྱལ་ཁབ་ཀྱི་གསང་བའི་ཁོངས་སུ་གཏོགས་པའི་ཡིག་ཆ་དང་། དཔྱད་གཞི། དངོས་པོ་གཞན་དག་བཅས་རྐུ་བའམ་འཕྲོག་པ་ཤེས་ཚེ། བཀག་འགོག་བྱེད་དབང་ཡོད་པ་དང་འབྲེལ་འཕྲལ་དུ་སྙན་སེང་ཞུ་དགོས།

4.རྒྱལ་ཁབ་ཀྱི་གསང་བ་ཕྱིར་གྱར་བའམ་ཡང་ན་ཕྱིར་གྱར་རྩིས་ཡོད་པའི་ཁུངས་སྣེ་ཤེས་ཚེ། དུས་ཐོག་ཏུ་རྒྱལ་ཁབ་བདེ་འཇགས་ལས་ཁུངས་ལ་ཐེར་འདོན་བྱེད་དགོས།