རྨ་ལྷོ་ཁུལ་གྱི་སྐོར་བྲོ་འགྲན་སྡུར་དང་སྟོང་འདུས་སྐོར་བྲོ་འཁྲབ་སྟོན་བྱས།

རྩོམ་སྒྲིག    སངས་དོན།      ཡོང་ཁུངས།  རྨ་ལྷོ་བོད་ཡིག་ཚགས་པར།    བཤེར་འབེབས།    རིན་ཆེན་ཚེ་རིང་།

 ཟླ3པའི་ཚེས3ཉིན། “དྭངས་གཙང་རྨ་ཆུ”ཡུལ་སྐོར་རྒྱུད་ཀྱི་རྨ་ལྷོ་ཁུལ་གྱི་སྐོར་བྲོ་འགྲན་སྡུར་སྐབས་དང་པོ་དང་སྟོང་འདུས་སྐོར་བྲོ་འཁྲབ་སྟོན་ཁུལ་ལུས་རྩལ་ར་བ་རུ་མགོ་བརྩམས། ནག་ཆུ་དང་ཡུལ་ཤུལ། སྐུ་འབུམ་སོགས་ནས་འོངས་པའི་འཐུས་ཚབ་རུ་ཁག་མང་པོ་ལྷན་གཅིག་ཏུ་འཛོམས་ནས་ལུས་ལ་ལྟ་ན་སྡུག་པའི་མི་རིགས་ཀྱི་རྒྱན་གོས་སྤྲས་ཤིང་། བདེ་ལྕག་འཁྱུག་པའི་བྲོ་ཡི་སྟངས་སྟབས་བསྒྱུར་ནས་གཟུགས་མེད་རིག་གནས་ཤུལ་བཞག་རྒྱུན་འཛིན་དང་མི་རིགས་མཐུན་སྒྲིལ་ཡར་ཐོན་གྱི་གསོལ་སྟོན་གྱ་ནོམ་པ་ཞིག་བཤམས།

རྨ་ལྷོ་ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་བཀྲ་ཤིས་ཚེ་རིང་། ཁུལ་དམངས་ཆེན་རྒྱུན་ཨུ་ཁང་གི་ཀྲུའུ་རེན་ཅང་ཧྲུའུ་ཁྲེང་། ཁུལ་སྲིད་གྲོས་ཀྱི་ཀྲུའུ་ཞི་གཡུ་སྒྲོན་མཚོ། དེ་བཞིན་ཁྱིམ་དུ་སྡོད་པའི་ཐིང་རིམ་གཞོན་པ་ཡན་གྱི་མགོ་ཁྲིད་བྱ་འགུལ་ལ་ཞུགས་ཏེ་འཁྲབ་སྟོན་ལ་བལྟས། རྒྱལ་ཡོངས་དང་ཞིང་ཆེན། ཁུལ་བཅས་ཀྱི་མི་རིགས་མཐུན་སྒྲིལ་ཡར་ཐོན་མི་སྒེར་དང་། ཀུན་སྤྱོད་དཔེ་བཟང་། ངལ་རྩོལ་དཔེ་བཟང་། ཏང་གི་འཐུས་མི། ཆོས་ལུགས་ལས་རིགས་ཀྱི་མི་སྣ། གྲོང་ཁྱེར་གཅིག་དང་རྫོང་གསུམ་གྱི་འགན་འཁུར་བློ་མཐུན་གཙོ་བོ། ཁུལ་ཐད་གཏོགས་དང་ཁུལ་དུ་སྡོད་པའི་ཞིང་ཆེན་གྱི་ལས་ཁུངས་ཁག་དང་མི་དམངས་ཚོགས་པ། མང་ཚོགས་ཚོགས་པ་སོ་སོའི་ལས་བྱེད་ལས་བཟོ་པའི་འཐུས་ཚབ། རྒྱ་ཆེའི་རོང་འབྲོག་མང་ཚོགས་ཀྱི་འཐུས་ཚབ་བཅས་ལྷན་གཅིག་ཏུ་བྱ་འགུལ་ལ་ཞུགས། ཁུལ་ཨུའི་རྒྱུན་ཨུའམ་དྲིལ་སྒྲོག་པུའུ་ཡི་པུའུ་ཀྲང་ཚེ་ཁོ་སྐྱིད་ཀྱིས་མགོ་རྩོམ་མཛད་སྒོ་གཙོ་སྐྱོང་བྱས།

ཁུལ་ཨུའི་རྒྱུན་ཨུའམ་རྒྱུན་ལས་ཁུལ་དཔོན་གཞོན་པ་ཀྲོའུ་ཐའོ་ཡིས་ཁུལ་ཨུ་དང་ཁུལ་སྲིད་གཞུང་གི་ཚབ་བྱས་ནས་ཤིས་ཚིག་ཕུལ། ཁོས་བཤད་རྒྱུར། སྐོར་བྲོ་འགྲན་སྡུར་དང་སྟོང་འདུས་སྐོར་བྲོ་འཁྲབ་སྟོན་གྱི་བྱ་འགུལ་འདི་ནི་རྨ་ལྷོའི་ཁྱད་ཆོས་ཆེས་ཆེར་གསལ་ཞིང་། མང་ཚོགས་ཀྱི་རྨང་གཞི་ཆེས་ཆེར་ལྡན་ལ། རིག་གནས་ཀྱི་རྒྱུན་འཛིན་ཆེས་ཆེར་གསལ་བའི་རིག་གནས་ཡུལ་སྐོར་གྱི་གསོལ་སྟོན་གཟབ་རྒྱས་ཤིག་ཡིན། གླུ་དང་བྲོ་ཡིས་ལྒང་ཞུའི་དུས་ཆེན་བརྒྱན་ཅིང་སྤྲོ་སེམས་འཁོལ་བཞིན་དུས་རབས་གསར་པར་བསྟོད་བསྔགས་བྱེད་པ་འདི་ནི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དར་སྤེལ་བྱེད་པ་ཡིན་ལ། རྨ་ལྷོའི་རིག་གནས་ཡུལ་སྐོར་མཉམ་བསྲེས་འཕེལ་རྒྱས་ཀྱི་གྲུབ་འབྲས་གཅིག་སྡུད་ཀྱིས་འགྲེམ་སྟོན་བྱས་པའང་ཡིན། “དྭངས་གཙང་རྨ་ཆུ”ཡུལ་སྐོར་རྒྱུད་ཀྱི་དཔྱིད་གསར་རིག་གནས་ཡུལ་སྐོར་བྱ་འགུལ་གྱི་མཇུག་མཐའི་ཚེགས་ལྕིའི་ལྟད་མོ་ཡིན་པའི་ཆ་ནས། རེབ་འདིའི་བྱ་འགུལ་གྱིས་ཁུལ་ཕྱི་ནང་མཉམ་འགུལ་དང་། སྲོལ་རྒྱུན་དང་གསར་གཏོད་མཉམ་བསྲེས། རྩལ་འགྲན་དང་འཁྲབ་སྟོན་སྙོམས་གཟིགས་བྱས་པར་བརྟེན། སྐོར་བྲོའི་རིག་གནས་ཀྱི་ཐུན་མོང་མ་ཡིན་པའི་འགུག་ཤུགས་དང་རྨ་ལྷོའི་སྐྱེ་ཁམས་མི་ཆོས་ཀྱི་མཛེས་པ་ཕྱོགས་ཡོངས་ནས་ངོམས་ཡོད་ཅིང་། “དྭངས་གཙང་རྨ་ཆུ”ཡུལ་སྐོར་ཟོང་རྟགས་ཀྱི་མིང་གྲགས་སྔར་ལས་རྒྱས་པར་བྱས་ལ། མི་མང་པོ་རྨ་ལྷོ་རུ་བཀུག་ཅིང་རྨ་ལྷོར་རྒྱུས་མངའ་ཡོད་པ་དང་རྨ་ལྷོར་དུངས་པ་ལྡན་པར་བྱས་ཡོད་ཟེར།

རྒྱུས་ལོན་པ་ལྟར་ན། ཟླ3པའི་ཚེས2ཉིན། རྨ་ལྷོ་ཁུལ་གྱི་གྲོང་ཁྱེར་གཅིག་དང་རྫོང་གསུམ་གྱི་སྐོར་བྲོ་རུ་ཁག10ཡིས་ཐོག་མའི་བསལ་འགྲན་བྱས་མཐར་རུ་ཁག3ཚེས་གསུམ་ཉིན་གྱི་རྟིང་རྩོད་ཁྲོད་ཚུད་པ་རེད། 

མགོ་རྩོམ་མཛད་སྒོའི་སྟེང་། ངོ་མཚར་བའི་རིག་རྩལ་འཁྲབ་སྟོན་བྱས་པར་མ་ཟད། ཡུལ་དངོས་སུ་དབུལ་ཕོངས་རྒན་རྒོན་དང་བྱིས་པའི་འཐུས་ཚབ་ལ་འཚམས་འདྲི་བྱས་ཏེ་ཁུལ་ཨུ་དང་ཁུལ་སྲིད་གཞུང་གི་ཐུགས་ཁུར་དང་དྲོད་འཁོལ་བསྐྱལ། སྐུ་འབུམ་ར་ཁོ་ཙོང་ཁ་ན་ཆུང་སྐོར་བྲོ་ཚོགས་པ་དང་། ཡུལ་ཤུལ་མཆོད་རྟེན་དཀར་པོ་སྐོར་བྲོ་ཚོགས་པ། བོད་ལྗོངས་ནག་ཆུ་སྐོར་བྲོ་ཚོགས་པ། འཕྲུལ་མིའི་སྐོར་བྲོ་ཚོགས་པ་བཅས་ཀྱི་འཁྲབ་སྟོན་དང་། དམངས་ཁྲོད་ཀྱི་གླུ་བ་གླུ་མ་རྣམས་ཀྱི་དམངས་གླུ་དང་རྡུང་ལེན་གྱིས་ཡུལ་དངོས་ལྷག་ཏུ་འཁྲུག་ཆ་དོད་པར་བྱས་ལ། རྔམ་བརྗིད་ལྡན་པའི་སྟོང་འདུས་སྐོར་བྲོ་འཁྲབ་སྟོན་ཁྲོད་བྱ་འགུལ་མཇུག་བསྒྲིལ་བ་རེད། 

ཨང་དང་པོ་འཐོབ་མཁན་ཐུན་རིན་སེ་འབྲུ་སྐོར་བྲོ་རུ་ཁག

ཨང་གཉིས་པ་འཐོབ་མཁན་གཅན་ཚ་ལང་ཚོའི་རྦབ་ཆུ་སྐོར་བྲོ་རུ་ཁག

ཨང་གསུམ་པ་འཐོབ་མཁན་ཐུན་རིན་ཆུ་ཁོག་སྐོར་བྲོ་རུ་ཁག

ཕུལ་བྱུང་རྩ་འཛུགས་ཀྱི་བྱ་དགའ་འཐོབ་མཁན།

རེབ་འདིའི་བྱ་འགུལ་གྱིས་སྐོར་བྲོ་འགྲན་སྡུར་དང་འཁྲབ་སྟོན་ལ་བརྟེན་ནས་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དར་སྤེལ་བྱས་པར་མ་ཟད། མང་ཚོགས་ཀྱི་བསམ་པའི་རིག་གནས་འཚོ་བ་གྲ་རྒྱས་ཕུན་ཚོགས་སུ་བཏང་ལ། དམངས་ཡོངས་ལུས་སྦྱོང་དང་མི་རིགས་རིག་གནས་ཀྱི་གཏིང་ཟབ་མཉམ་འདྲེས་ལ་ཡར་སྐུལ་བྱས་ཏེ། “ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། བློ་སེམས་གཅིག་གིས་ཀྲུང་གོའི་ཕུགས་འདུན་བསྐྲུན”པའི་རྨ་ལྷོའི་ལེའུ་གསར་པ་གསོན་ཉམས་དོད་པོས་བྲིས་ཡོད།