ཨོ་སི་ཁྲུ་ལི་ཡས་ལོ16མན་གྱི་ན་སོ་དར་ལ་མ་བབས་པའི་མིས་འབྲེལ་ལམ་སྨྱན་སྦྱོར་སྤྱོད་མི་ཆོག་པའི་གཏན་འབེབས་བྱས།

  སྒྲིག་སྒྱུར། སངས་རྒྱས་སྐྱིད། ཡོང་ཁུངས། ཤིན་ཧྭ་གསར་འགྱུར་ཁང་། བཤེར་འབེབས། རིན་ཆེན་ཚེ་རིང་།

ཤིན་ཧྭ་གསར་འགྱུར་ཁང་ཁན་པེ་ར་ནས་ཟླ11པའི་ཚེས28ཉིན་གློག་འཕྲིན་འབྱོར་གསལ་ལྟར་ན། ཚེས28ཉིན་ཨོ་སི་ཁྲུ་ལི་ཡའི་རྒྱལ་ཕྲན་མཉམ་འབྲེལ་གྲོས་ཚོགས་ཀྱི་གྲོས་ཁང་གོང་མས《2024ལོའི་དྲ་རྒྱའི་བདེ་འཇགས（སྤྱི་ཚོགས་འབྲེལ་ལམ་སྨྱན་སྦྱོར་གྱི་ལོ་ན་དམའ་ཤོས）ཀྱི་བཟོ་བཅོས་འཆར་ཟིན》ལ་གྲོས་འཆམ་བྱས་ནས་ལོ16མན་གྱི་ན་སོ་དར་ལ་མ་བབས་པའི་མིས་སྤྱི་ཚོགས་འབྲེལ་ལམ་སྨྱན་སྦྱོར་གྱི་སྟེགས་བུ་མང་པོ་སྤྱོད་རྒྱུ་གཏན་འགོག་བྱས། འདིའི་སྔོན་གྱི་ཉིན་དེར། གྲོས་ཚོགས་ཁང་ཁྲིམས་དོན་གྲོས་གཞི་འདི་ལ་གྲོས་འཆམ་བྱུང་།     

འབྲེལ་ཡོད་གཏན་འབེབས་ཟླ་བ12ཀྱི་རྗེས་སུ་གོ་ཆོད་རྒྱུ་རེད།  ས་གནས་དེ་གའི་སྨྱན་སྦྱོར་གྱིས་སྔོན་དཔག་བྱས་པར་གཞིགས་ན། ངོ་དེབ་དང་། Xདང་། པར་ལྡེབས་སོགས་དྲ་རྒྱའི་སྤྱི་ཚོགས་འབྲེལ་ལམ་སྨྱན་སྦྱོར་སྟེགས་བུར་ཤུགས་རྐྱེན་ཐེབས་རྒྱུ་རེད།     

ཁྲིམས་གཞི་དེར་གཞིགས་ན།  དྲ་རྒྱའི་སྤྱི་ཚོགས་འབྲེལ་ལམ་སྨྱན་སྦྱོར་སྤྱི་གཉེར་གྱིས་ལུགས་མཐུན་གྱི་བྱེད་ཐབས་སྤྱད་དེ་ལོ16མན་གྱི་ན་སོ་དར་ལ་མ་བབས་པའི་མིས་སྟེགས་བུ་སྤྱོད་རྒྱུར་བཀག་འགོག་བྱེད་མ་ཐུབ་ཚེ་དངུལ་ཆད་མཐོ་ཤོས་ལ་ཨོ་སྒོར་ཁྲི5000（མི་དམངས་ཤོག་སྒོར་དུང་ཕྱུར2.35ཙམ་ཡིན་པ）གཅོད་རྒྱུ་དང་གཏན་འབེབས་ལས་འགལ་མཁན་ན་སོ་དར་ལ་མ་བབས་པའི་མིའམ་ཡང་ན་ཁོང་ཚོའི་ཕ་མར་ཆད་པ་ཕོག་མི་སྲིད། དེ་དང་ཆབས་ཅིག་སྤྱི་ཚོགས་འབྲེལ་ལམ་སྨྱན་སྦྱོར་སྤྱི་གཉེར་གྱིས་སྤྱོད་མཁན་ལ་ལོ་ཚད་ཤེས་ཆེད་དུ་སྲིད་གཞུང་གི་ཐོབ་ཐང་ལག་ཁྱེར་བཙན་ཤེད་ངང་མཁོ་འདོན་བྱེད་དུ་འཇུག་མི་ཆོག 

ཨོ་སི་ཁྲུ་ལི་ཡའི་ཙུང་ལི་ཨའར་པ་ཉི་སིས་དེ་སྔོན་ས་གནས་དེ་གའི་སྨྱན་སྦྱོར་ཐོག་དཔྱད་གཏམ་རྩོམ་ཡིག་སྤེལ་ནས་སྨྲས་པ། སྤྱི་ཚོགས་འབྲེལ་ལམ་སྨྱན་སྦྱོར་གྱིས་སྤྱི་ཚོགས་ལ་ཕན་ཐོགས་པའི་དུས་མཚུངས་སུ་སྤྱི་ཚོགས་ལ་གནོད་འཚེ་ཡང་བཟོ་བཞིན་ཡོད། སྤྱི་ཚོགས་འབྲེལ་ལམ་སྨྱན་སྦྱོར་དེ་བཙན་བརྙས་ཀྱི་བྱ་སྤྱོད་དང་སེམས་འཕྲེང་ནད་ཀྱི་འབྱུང་ཁུངས་སུ་འགྱུར་སྲིད་ལ། དྲ་རྒྱའི་ཉེས་གསོག་པའི་ལག་ཆར་ཡང་འགྱུར་སྲིད།“ན་གཞོན་ཚོ་དེར་དགའ་པོ་ཡོད་པས་འཕྲད་སྲིད་པའི་ཉེན་ཁ་ཡང་ཧ་ཅང་ཆེ”ཞེས་བཤད།