མཚོ་བྱང་གི་རྫོང་ཚང་མར་མྱུར་བགྲོད་གཞུང་ལམ་ཤར་གཏོང་ཐུབ་ཡོད།

སྒྲིག་སྒྱུར། སངས་རྒྱས་སྐྱིད།    ཡོང་ཁུངས། མཚོ་སྔོན་ཉིན་རེའི་ཚགས་པར།   བཤེར་འབེབས། རིན་ཆེན་ཚེ་རིང་།

མཚོ་སྔོན་ཉིན་རེའི་ཚགས་པར་ལས་ཤེས་གསལ་ལྟར་ན། ཟླ7ཚེས1ཉིན།  རྒྱལ་ཁབ་ཀྱི་མྱུར་བགྲོད་གཞུང་ལམG0611སྟེ་འབྲོང་ཡུལ་ནས་ཁྲི་ཚང་བར་གྱི་གཞུང་ལམ་ལས་མཚོ་སྔོན་ཞིང་ཆེན་མདོ་ལ་རྫོང་བར་མདོ་ལུང་བ་ནས་འཇུ་ལག་བར་གྱི་མྱུར་བགྲོད་གཞུང་ལམ་གྱི་མཁར་དམར་ནས་འཕན་པོ་བར་མཚམས་ཀྱི་གཞུང་ལམ་དངོས་སུ་ཤར་གཏོང་ཐུབ་ཡོད་པས།  མདོ་ལ་རྫོང་དུ་མྱུར་བགྲོད་གཞུང་ལམ་ཤར་གཏོང་ཐུབ་མེད་པའི་ལོ་རྒྱུས་མཇུག་གྲིལ་ནས་མཚོ་བྱང་བོད་རིགས་རང་སྐྱོང་ཁུལ་གྱི་ས་ཁོངས་ནང་གི་རྫོང་ཚང་མར་མྱུར་བགྲོད་གཞུང་ལམ་ཤར་གཏོང་ཐུབ་པའི་དམིགས་ཚད་མངོན་འགྱུར་བྱུང་བ་དང་། འཇུ་ལག་དང་མདོ་ལ་རྫོང་གཉིས་མཚོ་སྔོན་ཞིང་ཆེན་གྱི་ཟི་ལིང་གྲོང་ཁྱེར་ལྟེ་བར་བྱས་པའི་ཆུ་ཚོད་གཉིས་ཀྱི་དཔལ་འབྱོར་ཁུལ་ནང་བཅུག་པ་རེད།

བར་མདོ་ལུང་བ་ནས་འཇུ་ལག་བར་གྱི་མྱུར་བགྲོད་གཞུང་ལམ་གྱི་མཁར་དམར་ནས་འཕན་པོ་བར་གྱི་ལམ་ཐིག་ཧྲིལ་པོར་སྤྱི་ལེ་50.04ཡོད་པ་དང་། ཕྱོགས་གཉིས་ལ་འཁོར་ལམ་བཞི་ཇུས་འགོད་བྱས་ནས་འཛུགས་སྐྲུན་བྱས་ཡོད། ལམ་ངོས་ཀྱི་ཞེང་ཚད་ལ26mཡོད་པ་དང་། ཟམ་པའི་ཐེག་ཚད་དེ་རིམ་པ་དང་པོའི་གཞུང་ལམ་གྱི་ཚད་གཞི་ལྟར་ཇུས་འགོད་བྱས་ཡོད། བར་མཚམས་དེའི་ཇུས་འགོད་གཙོ་བོ་ལ་གཡག་ལ་སེར་པོའི་ཕུག་ལམ་གཅིག་དང་། འགག་ལུང་སོགས་ཟམ་ཆེན་གསུམ། ལམ་དངུལ་ས་ཚིགས་སོགས་འདུས་ཡོད།  རྣམ་གྲངས་དེ་འཛུགས་སྐྲུན་བྱས་པ་དེས“རྒྱུད་གཅིག་ལམ་གཅིག”གི་འཐབ་ཇུས་ལ་སྐུལ་འདེད་གཏོང་བ་དང་། རྒྱལ་ཁབ་ཀྱི་ནུབ་རྒྱུད་གསར་སྤེལ་ཆེན་མོའི་འཐབ་ཇུས་ལག་བསྟར་གཏིང་ཟབ་བྱེད་པ། རྒྱལ་ཁབ་དང་མཚོ་སྔོན་ཞིང་ཆེན་གྱི་མྱུར་བགྲོད་གཞུང་ལམ་དྲ་བ་འཐུས་སྒོ་ཚང་དུ་གཏོང་བ། ལམ་རྒྱུད་ཀྱི་ཐོན་ཁུངས་གསར་སྤེལ་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་བ། མི་རིགས་མཐུན་སྒྲིལ་ཡར་ཐོན་ལ་ཤུགས་སྣོན་རྒྱག་པ། ལམ་རྒྱུད་ས་ཁོངས་ཀྱི་གནས་སྐོར་འཕེལ་རྒྱས་ལ་སྐུལ་འདེད་གཏོང་བ་བཅས་ལ་དོན་སྙིང་ཧ་ཅང་གལ་ཆེན་ལྡན་ཡོད་པ་རེད།