ཀྲུང་གོ●མཚོ་སྔོན་རྒྱལ་སྤྱིའི་མི་རིགས་སྲོལ་རྒྱུན་གྱི་མདའ་རྩལ་རྩེ་གྲ་བའི་འགྲན་སྡུར་སྐབས་བརྒྱད་པ་རྐང་ཚ་རྫོང་དུ་འཚོགས།

སྒྲིག་སྒྱུར།  སངས་རྒྱས་སྐྱིད།    ཡོང་ཁུངས།   མཚོ་བྱང་སྨྱན་གསར།    བཤེར་འབེབས།  རིན་ཆེན་ཚེ་རིང་། 

ཟླ7པའི་ཚེས1ཉིན། ཀྲུང་གོ་མདའ་འཕེན་མཐུན་ཚོགས་ཀྱིས་མཛུབ་ཁྲིད་དང་། ཞིང་ཆེན་ལུས་རྩལ་ཅུ་དང་ཞིང་ཆེན་མི་རིགས་ལས་དོན་ཨུ་ལྷན།མཚོ་བྱང་ཁུལ་སྲིད་གཞུང་། ཞིང་ཆེན་ལུས་རྩལ་སྤྱི་ཁྱབ་ལྷན་ཚོགས་བཅས་ཀྱིས་གཙོ་སྒྲུབ་དང་། རྐང་ཚ་རྫོང་སྲིད་གཞུང་དང་ཞིང་ཆེན་ལུས་རྩལ་འགྲན་སྡུར་དོ་དམ་ལྟེ་གནས། ཞིང་ཆེན་མདའ་འཕེན་ལུས་རྩལ་མཉམ་འབྲེལ་ལྷན་ཚོགས་བཅས་ཀྱིས་འགན་སྒྲུབ་གནང་བའི“དྲིན་ཚོར་དང་མཐུན་སྒྲིལ།  ཡར་བརྩོན”བཅས་བརྗོད་དོན་ཡིན་པའི་ཀྲུང་གོ●མཚོ་སྔོན་རྒྱལ་སྤྱིའི་མི་རིགས་སྲོལ་རྒྱུན་གྱི་མདའ་རྩལ་རྩེ་གྲ་བའི་འགྲན་སྡུར་སྐབས་བརྒྱད་པ་རྐང་ཚ་རྫོང་དུ་འཚོགས་ལ། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་ཤིས་ཚིག་ཕུལ་བ་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན། ཞིང་ཆེན་ལུས་རྩལ་ཅུ་ཡི་ཅུ་ཀྲང་ཝང་ཞ། ཁུལ་གྱི་མགོ་ཁྲིད་གཡུ་སྒྲོན་མཚོ།ཝང་ཡུང་ཁྲང་། སུའུ་བདུན་ཅུ། ཞོ་རོས་ཞིན་བཅས་མཛད་སྒོར་ཕེབས།  

ཐེངས་འདིའི་འགྲན་སྡུར་ལ་ཨུ་རུ་སུ་དང་ཕ་ཁི་སི་ཐན། རྒྱ་གར།  ཀྲུང་གོའི་ཐའེ་པེ་སོགས་རྒྱལ་ཁབ་དང་ས་ཁུལ24ཡི་རུ་ཁག52དང་འགྲན་ཞུགས་པ900ལྷག་ཞུགས་ཡོད་ལ།  འགྲན་སྡུར་ལ་སྲོལ་རྒྱུན་གཞུ། ལྕགས་གཞུ་འཁོར་ལོ་མ། ལྕགས་གཞུ།(གཞུ་ལེབ)། རྭ་གཞུ་བཅས་མདའ་གཞུའི་རིགས་བཞི་དང་རྣམ་གྲངས་ལྔ་ཡོད་པ་རེད།   

ཤ་བོ་སྐྱབས་ཀྱིས་ཤིས་ཚིག་འབུལ་སྐབས་མདའ་འཕེན་ནི་ལོ་རྒྱུས་ཡུན་རིང་ལྡན་པའི་དམངས་ཁྲོད་ལུས་རྩལ་བྱེད་སྒོ་ཞིག་ཡིན་པའི་ཆ་ནས་མི་རིགས་སོ་སོ་ཕན་ཚུན་བརྗེ་རེས་དང་འགྲོ་འོང་། མཉམ་འདྲེས་བཅས་བྱེད་པའི་གཞི་རྟེན་གལ་ཆེན་ཞིག་ཏུ་གྱུར་ཡོད་པར་མ་ཟད། དུས་རབས་གསར་བའི་མཚོ་བྱང་གསར་བར་སྐྱེ་སྟོབས་ཀྱི་དཔལ་འབར་བ་དང་མང་ཚོགས་ཀྱི་རྨང་གཞི་ཟབ་མོ་ལྡན་ཡོད་པར་བཤད་ལ།  ཐེངས་འདིའི་འགྲན་སྡུར་བརྒྱུད་མི་རིགས་ཀྱི་སྲོལ་རྒྱུན་མདའ་འཕེན་གྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་གང་ལེགས་སྒོས་མངོན་པ་དང་། རྒྱལ་ཁབ་དང་ས་ཁུལ་མི་འདྲ་བའི་དབར་གྱི་མཛའ་བརྩེའི་འགྲོ་འོང་དང་རིག་གནས་གནས་སྐོར་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་གཏོང་བ་དང“རབ་མཛེས་མཚོ་སྔོན●དག་སྣང་མཚོ་བྱང”གི་ཤུགས་རྐྱེན་ཐེབས་ཤུགས་དང་མཚན་སྙན་སྔར་བས་ཆེ་རུ་གཏོང་བ་བཅས་བྱས་ནས་མཚོ་བྱང་གིས་རྒྱལ་སྤྱིའི་སྐྱེ་ཁམས་གནས་སྐོར་བྱ་ཡུལ་གཏོད་རྒྱུར་རོགས་རམ་བྱེད་པ་དང་།  འགྲན་ཞུགས་པ་ཚོས་ལུས་རྩལ་སྙིང་སྟོབས་དར་སྤེལ་བཏང་ནས་མཛའ་བརྩེ་ཨང་དང་པོ་དང་འགྲན་སྡུར་ཨང་གཉིས་པར་བརྩི་བ།  སྒྲིག་འཛུགས་ཨུ་ལྷན་དང་ལས་སྒྲུབ་མི་སྣས་རང་འགན་ནན་སྒྲུབ་དང་འབད་བརྩོན་ཆེན་པོས་བྱ་བ་སྒྲུབ་ནས་ཐེངས་འདིའི་འགྲན་སྡུར་དེ“རྒྱུན་འཛིན་དང་ཁྱད་ཆོས། གསར་གཏོད། འཕེལ་རྒྱས”བཅས་དང་དེ་བཞིན“མཚོ་བྱང་གི་ཁྱད་ཆོས་དང་མཚོ་བྱང་གི་ཉམས་འགྱུར”ལྡན་པའི་ལུས་རྩལ་འདུ་ཚོགས་གཟབ་རྒྱས་ཤིག་ཏུ་གཉེར་རྒྱུའི་རེ་བ་ཡོད་པར་བཤད།

རྒྱུས་ལོན་པ་ལྟར་ན། རྐང་ཚ་རྫོང་གི་མི་རིགས་ལུས་རྩལ་ལ་ལོ་རྒྱུས་ཡུན་རིང་ལྡན་ཞིང་། དེ་ལས་ཀྱང་མདའ་འཕེན་ལུས་རྩལ་ལ་མང་ཚོགས་ཀྱི་རྨང་གཞི་སྔར་བས་བརྟན་པོ་ཡོད་པས་ས་གནས་དེ་གའི་མང་ཚོགས་ལ་མེད་དུ་མི་རུང་བའི་ལུས་རྩལ་རོལ་རྩེད་རྣམ་གྲངས་ཤིག་ཏུ་གྱུར་ཡོད། ཉེ་བའི་ལོ་ཤས་རིང་། རྐང་ཚ་རྫོང་གིས་ལུས་རྩལ་སྟོབས་ལྡན་རྒྱལ་ཁབ་འཛུགས་སྐྲུན་ལ་མགྱོགས་མྱུར་སྒོས་སྐུལ་འདེད་གཏོང་བ་དང་། མངའ་ཁོངས་ཀྱི་མི་རིགས་རིག་གནས་ཐོན་ཁུངས་ཀྱི་ལེགས་ཆ་འདོན་སྤེལ་གང་ལེགས་བྱེད་པ། མི་རིགས་ཀྱི་སྲོལ་རྒྱུན་ལུས་རྩལ་རིག་གནས་དར་སྤེལ་དང་རྒྱུན་འཛིན་བྱེད་པ། མང་ཚོགས་ཀྱི་རིག་གནས་ལུས་རྩལ་འཚོ་བ་ཕུན་སུམ་ཇེ་ཚོགས་སུ་གཏོང་བ། རྫོང་ཡོངས་ཀྱི་ལུས་རྩལ་བྱ་གཞག་འཕེལ་རྒྱས་ཀྱི་ཆུ་ཚད་ཟམ་མི་ཆད་པར་མཐོ་རུ་བཏང་སྟེ། ལོ་ལྟར་མི་རིགས་ཀྱི་སྲོལ་རྒྱུན་མདའ་འཕེན་འགྲན་སྡུར་ཆེ་ཆུང་སྣ་ཚོགས་སྤེལ་བས་མདའ་འཕེན་ལུས་རྩལ་དེ་རིགས་སོ་སོའི་མང་ཚོགས་ཕན་ཚུན་འགྲོ་འོང་བརྗེ་རེས། མཉམ་འདྲེས་བྱེད་པའི་མི་རིགས་མཐུན་སྒྲིལ་གྱི་མེ་ཏོག་མཛེས་ཤོས་ཤིག་ཏུ་གྱུར་ཡོད།    

 ཞིང་ཆེན་དང་ཁུལ་གྱི་འབྲེལ་ཡོད་སྡེ་ཁག་གི་འགན་འཁུར་བློ་མཐུན་དང་། འཇུ་ལག་རྫོང་དང་མདོ་ལ་རྫོང་། མདའ་བཞི་རྫོང་སོགས་སྤུན་ཟླ་རྫོང་གི་ཏང་སྲིད་འཐུས་མི་མགོ་རྩོམ་མཛད་སྒོར་ཞུགས།