ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས། བཤེར་འབེབས། རིན་ཆེན་ཚེ་རིང་། 

གསར་འགྱུར་གལ་ཆེན།

• ཟླ7ཚེས5ཉིན་གྱི་ཕྱི་དྲོ་ནས་ཚེས6ཉིན་གྱི་སྔ་དྲོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅང་སུའུ་ཞིང་ཆེན་སུའུ་ཀྲོའུ་གྲོང་ཁྱེར（苏州市）དུ་རྟོག་ཞིབ་གནང་།

  
  

• ཟླ7ཚེས6ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་ཤར་རྒྱུད་དམག་ཁུལ་ལས་ཁུངས་ལ་གཟིགས་ཞིབ་གནང་བ་དང་། ཏང་ཀྲུང་དབྱང་དང་ཀྲུང་དབྱང་དམག་ཨུའི་ཚབ་བྱས་ཏེ་ཤར་རྒྱུད་དམག་ཁུལ་གྱི་དཔོན་དམག་ཡོངས་ལ་ལྷག་བསམ་ཟོལ་མེད་ཀྱིས་འཚམས་འདྲི་གནང་།

• ཟླ7ཚེས4ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུའུ་ལི་ཡེ་སི·མཱ་ཏ·པི་ཨོ（朱利叶斯·马达·比奥）ལ་གློག་འཕྲིན་བཏང་སྟེ། ཁོང་གིས་སི་ར་ལི་ཨང（赛拉利昂）སྤྱི་མཐུན་རྒྱལ་ཁབ་ཀྱི་ཙུང་ཐུང་གི་འགན་མུ་འཁུར་བྱས་པར་རྟེན་འབྲེལ་ཞུས།

• ཟླ7ཚེས6ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་དབྱིན་ཚོང་དོན་གྱི“འབྲེལ་ལམ་ཕྱེས”ནས་ལོ70ལོན་པའི་བྱེད་སྒོར་རྟེན་འབྲེལ་འཕྲིན་ཡིག་སྤྲིངས།

• ཚོང་དོན་པུའི་གཞི་གྲངས་ལས་མངོན་པ་ལྟར་ན། ད་ལོའི་ཟླ་དང་པོ་ནས་ལྔ་པའི་བར་རང་རྒྱལ་གྱི་ཞབས་ཞུའི་ཚོང་དོན་རྒྱུན་མཐུད་ངང་འཕར་བ་དང་། དེའི་ཁྲོད་དུ་གནས་སྐོར་ཞབས་ཞུ་འཕར་ཚད་མགྱོགས་ཤོས་ཡིན་ལ། དུས་མཚུངས་ལས་འཕར་ཚད67%ཟིན་ཡོད།

• ཉེ་ཆར། ཀྲུང་དབྱང་རྩ་འཛུགས་པུས་ཀྲུང་དབྱང་གི་ཚབ་བྱས་ཏེ་དོ་དམ་བྱེད་པའི་ཏང་དངུལ་ཁྲོད་ནས་ཁྲུང་ཆིང་དང་སི་ཁྲོན་སོགས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས16ལ་ཆེད་སྤྱོད་མ་དངུལ་སྒོར་དུང་ཕྱུར1.28བཏང་བ་དང་། འབྲུབ་འགོག་གེགས་སེལ་ལས་དོན་ལ་རྒྱབ་སྐྱོར་བྱེད་པར་སྤྱད།

• ཚེས6ཉིན། སློབ་གསོ་པུས་ནུབ་དབུས་ཁུལ་དང་ལྷག་པར་དུ་མི་འབོར་མང་བའི་ཞིང་ཆེན་གྱི་མཐོ་རིམ་སློབ་གསོའི་ཐོན་ཁུངས་ཀྱི་གཞི་ཁྱོན་ཆེ་རུ་གཏོང་རྒྱུར་རྒྱབ་སྐྱོར་བྱ་རྒྱུ་ཡིན་ཞེས་བསྟན།

  
  

• ཚེས5ཉིན་། འཁྱོག་ཐིག་གཉིས་ཅན་གྱི་འཕུར་མདའ་བཤེར་བརྡར་གཉིས་པའི（双曲线二号验证火箭）སྒུལ་ཤུགས་མ་ལག་གི་ཚོད་ལྟ་ལེགས་འགྲུབ་བྱུང་། མེ་ཤུགས་འཕུར་མདའ་དེ་སྐྱེལ་འདྲེན་མེ་ཤུགས་འཕུར་མདའི་བསྐྱར་སྤྱོད་ཀྱི་བཤེར་བརྡར་ལ་སྤྱོད་རྒྱུ་རེད།

• རྒྱལ་ཁབ་ལྕགས་ལམ་ཚོགས་པས་གནས་ཚུལ་སྤེལ་བར་གཞིགས་ན། ད་ལོའི་ལོ་སྟོད་དུ། ཀྲུང་གོ་དང་ཡོ་རོབ་ཀྱིས་མེ་འཁོར་རེས་ཐེངས8641བཏང་བ་དང་། ཚད་ལྡན་དངོས་ཟོག་སྒམ་ཁྲི93.6སྐྱེལ་འདྲེན་བྱས། དེ་དུས་མཚུངས་ལས་སོ་སོར16%དང30%འཕར་ཡོད།

  
  

• ཚེས5ཉིན། ཨུ་རུ་སུའི་མཚོ་དམག་ལས་ཞི་བདེ་རྒྱ་མཚོ་ཆེ་མོའི་དམག་གྲུ་རུ་ཁག་གི“ཞང་ལིང”རྟགས་ཅན་དང“བན་མེང”རྟགས་ཅན་གྱི་སྲུང་སྐྱེལ་དམག་གྲུ་ལས་གྲུབ་པའི་དམག་གྲུའི་རུ་ཁག་ཧྲང་ཧེ་རུ་འཚམས་འདྲིར་ཕེབས་པ་དང་། དུས་ཡུན་ཉིན་བདུན་གྱི་མཛའ་མཐུན་འཚམས་འདྲི་བྱེད་མགོ་ཚུགས།

• འཛམ་གླིང་གནམ་གཤིས་རྩ་འཛུགས་ཀྱིས་ཨེར་ཉི་ནོ（厄尔尼诺）གྲུབ་པའི་ཆ་རྐྱེན་འཛོམས་འདུག་པ་ཁྱབ་བསྒྲགས་བྱས། དེ་བས་གོ་ལ་ཧྲིལ་པོའི་དྲོད་ཚད་མཐོ་རུ་འགྲོ་བ་དང་། གཏོར་སྐྱོན་རང་བཞིན་གྱི་གནམ་གཤིས་དང་ནམ་ཟླའི་རྣམ་པ་ཐོན་སྲིད།

སྤྱི་ཚོགས།

• ཀྲུང་དབྱང་གནམ་གཤིས་ལས་ཁུངས་ཀྱིས་མུ་མཐུད་དུ་དྲོད་ཚད་མཐོ་བའི་ལི་མདོག་གི་ཉེན་བརྡ་ཁྱབ་བསྒྲགས་བྱས། སྔོན་དཔག་བྱས་པ་ལྟར་ན། བྱང་ཕྱོགས་ཀྱི་གཞི་ཁྱོན་ཆེ་བའི་དྲོད་ཚད་མཐོ་བའི་གནམ་གཤིས་དེ་གཟའ་འཁོར་རྗེས་མའི་གཟའ་ཟླ་བའི་བར་དུ་རྒྱུན་མཐུད་བྱ་རྒྱུ་ཡིན་པ་དང་། ས་ཁུལ་ཁག་ཅིག་གི་དྲོད་ཚད་མཐོ་ཤོས40℃ལས་བརྒལ་སྲིད་རྒྱུ་རེད།

• ཚེས6ནས9ཉིན་བར། ཅང་ཧེ（江淮）དང་འབྲི་ཆུའི་ལྷོ་རྒྱུད་སོགས་སུ་རེས་སྐོར་གསར་པའི་དྲག་ཆར་འབབ་རྒྱུ་ཡིན་པ་དང་། ཆུ་བེད་པུས་ཅང་སུའུ་སོགས་ལྷོ་ཕྱོགས་ཀྱི་ཞིང་ཆེན་དང་རང་སྐྱོང་ལྗོངས་ལྔ་ལ་དམིགས་ནས་ཆུ་སྐྱོན་དང་ཐན་སྐྱོན་གྱི་གནོད་འཚེ་འགོག་སྲུང་གི་རིམ་པⅣཅན་གྱི་འཕྲལ་སྡོམ་མཁོ་སྒྲུབ་ལག་བསྟར་བྱེད་མགོ་བརྩམས།

• ཧོ་པེ（河北）ཞིང་ཆེན་དམངས་ཆེན་རྒྱུན་ལས་ཨུ་ལྷན་གྱི་དེ་སྔའི་ཏང་ཙུའུ་ཡི་ཁོངས་མིའམ་ཀྲུའུ་རིན་གཞོན་པ་ཝང་ཞེ་ཧྥེང་གིས་སྒྲིག་འགལ་ཁྲིམས་འགལ་ཚབས་ཆེན་བྱས་པས་ཏང་ཁོངས་ནས་ཕྱིར་ཕུད།

• རྒྱལ་ཁབ་རྡོ་ཐ་ཆེད་ཚོང་ཅུ་ཡི་དེ་སྔའི་ཏང་ཙུའུ་ཡི་ཁོངས་མིའམ་ཅུ་ཀྲང་གཞོན་པ་ཧོ་ཙེ་ཧྭ་ཡིས་སྒྲིག་འགལ་ཁྲིམས་འགལ་ཚབས་ཆེན་བྱས་པས་ཏང་ཁོངས་ནས་ཕྱིར་ཕུད།

• ཉེ་ཆར་ཆེས་མཐོའི་མི་དམངས་ཞིབ་དཔྱོད་ཁང་གིས་ཁྲིམས་ལྟར་ལྐོག་རྔན་བླངས་པའི་ཉེས་པའི་ཐོག་ནས་ཀོང་ཏུང་ཞིང་ཆེན་གྱི་དམངས་ཆེན་རྒྱུན་ལས་ཨུ་ལྷན་གྱི་དེ་སྔའི་ཏང་ཙུའུ་ཡི་ཧྲུའུ་ཅི་གཞོན་པའམ་ཀྲུའུ་རིན་གཞོན་པ་ལི་ཁྲུན་ཧྲེང་འཛིན་བཟུང་བྱ་རྒྱུའི་གཏན་འབེབས་བྱས།

• 2023ལོའི་གོ་ལ་ཧྲིལ་པོའི་གྲངས་འཛིན་དཔལ་འབྱོར་ཚོགས་ཆེན་ཐོག་གི་གནས་ཚུལ་ལྟར་ན། ཟླ་ལྔ་པའི་ཟླ་མཇུག་བར་རང་རྒྱལ་གྱི་སྤོ་འགུལ་དངོས་འབྲེལ་དྲ་བའི་མཐའ་སྣེའི་སྤྱོད་མཁན་དུང་ཕྱུར20ལས་བརྒལ།

• རྒྱལ་ཁབ་རང་བྱུང་ཚན་རིག་ཐེབས་རྩ་ཨུ་ལྷན་གྱིས2024ལོ་ནས་བཟུང་བུད་མེད་ཚན་ཞིབ་མི་སྣས“ཕུལ་བྱུང་གཞོན་ནུ”རེ་ཞུ་བྱེད་པའི་ལོ་ཚད་ཀྱི་ཚོད་འཛིན་ལོ48བར་དུ་བསྣུར་རྒྱུ་ཡིན་ཞེས་ཁ་གསལ་བཏོན། 

• ཁྲེང་ཏུའུ་སློབ་ཆེན་སློབ་མའི་ལུས་རྩལ་འགྲན་ཚོགས་ཀྱི་དུས་མཚམས་གཉིས་པའི་ལུས་རྩལ་འགྲན་སྡུར་གྱི་སྒོ་འཛིན་ཚེས6ཉིན་ནས་བཟུང་སྤྱི་དམངས་ལ་ཕྱིར་འཚོང་བྱེད་རྒྱུ་ཡིན་པ་དང་། དེའི་ནང་དུ་མཆོང་རྒྱུག་འཕེན་གསུམ་སོགས་རྣམ་གྲངས5དང་སྐོར་ཐེངས86ཚུད་ཡོད།

• ཉེ་ཆར། ནང་སོག་ཉེན་རྟོག་ཕྱོགས་ཀྱིས་དུག་རྫས་ལྐོག་ཚོང་གི་གྱོད་གཞི་ཚབས་ཆེན་ཞིག་རྩད་ཆོད་པ་དང་། དུག་རྫས་དང་འབྲེལ་བའི་ཁྲིམས་འགལ་ཉེས་གསོག་དོགས་ཅན140བཟུང་། དུག་རྫས་སྣ་ཚོགས་སྤྱི་རྒྱ5.47ཙམ་གཞུང་བཞེས་བཏང་།

སྲིད་ཇུས།

•  ཁྲིམས་འཛིན་པུས་ཉེས་གསོག་ཟིན་ཐོ་མེད་པ་སོགས་ཀྱི་གཞུང་དཔང་དོན་ཚན81ཚད་ལྡན་དུ་བཏང་སྟེ། སྲིད་དོན་ཆ་འཕྲིན་ཐོན་ཁུངས་མཉམ་སྤྱོད་བྱེད་པ་བརྒྱུད་གཞུང་དཔང་འདི་དག་ཐོབ་ཐུབ་པ་དང་། དོ་བདག་མི་སྒེར་ནས་མཁོ་འདོན་བྱེད་མི་དགོས་པ་ཁ་གསལ་བཟོས།

• རྒྱལ་ཁབ་དངུལ་རྩ་ལྟ་སྐུལ་དོ་དམ་སྤྱི་ཁྱབ་ཅུ་ཡིས་བརྡ་ཐོ་བཏང་སྟེ། ཟླ8ཚེས1ཉིན་ནས་བཟུང་། ཚོང་ལས་བདེ་ཐང་གུན་སྐྱོབ་ཀྱི་ཁྲལ་བསྡུའི་གཟིགས་སྐྱོང་ཁྱབ་ཁོངས་རྒྱ་ཆེར་གཏོང་རྒྱུ་ཡིན་ཞེས་བསྟན།

• ཀོང་ཏུང་ཞིང་ཆེན་སྤྱི་བདེ་ཐིང་གིས་བྱེད་ཐབས་གསར་པ་བཏོན་ཏེ། གྲོང་མིའི་ཐོབ་ཐང་ལག་ཁྱེར་བརྗེ་བ་དང་ཁ་གསབ་བྱེད་པའི་ལས་སྒོ་དང་། ཐེམ་ཐོའི་ལས་སྒོ་གསུམ་ཞིང་ཆེན་བརྒལ་ནས་གཅིག་གྱུར་གྱིས་སྒྲུབ་ཐུབ་ལ། ཞིང་ཆེན་ཡོངས་སུ་གཅིག་གྱུར་གྱིས་སྒྲུབ་ཐུབ་ཅེས་བསྟན།

འཚོ་བའི་དྲན་སྐུལ།

• ནང་སོག་གི་ཤར་ལྷོའི་རྒྱུད་དང་། ཅི་ལིན་གྱི་ལྷོ་ནུབ་རྒྱུད། ལེའོ་ཉིང་གི་ནུབ་དབུས་རྒྱུད། ཅང་སུའུ་ཡི་ལྷོ་དབུས་རྒྱུད། ཨན་ཧེའི་དབུས་རྒྱུད། ཧོ་ནན་གྱི་ཤར་ལྷོའི་རྒྱུད། ཧུའུ་པེའི་བྱང་ཤར་རྒྱུད་དང་ལྷོ་ནུབ་རྒྱུད། ཁྲུང་ཆིང་གི་ཤར་ལྷོའི་རྒྱུད། ཀུའེ་ཀྲོའུ་ཡི་བྱང་རྒྱུད། བོད་ལྗོངས་ཀྱི་ཤར་ལྷོའི་རྒྱུད་སོགས་ས་ཁུལ་ཁག་ཅིག་ཏུ་ཆར་ཆེན་ནས་དྲག་ཆར་འབབ་རྒྱུ་ཡིན་པ་དང་། དེ་དག་ལས་ཅང་སུའུ་ཡི་དབུས་རྒྱུད་སོགས་ས་ཁུལ་བྱེ་བྲག་ཏུ་དྲག་ཆར་ཆེན་པོ་འབབ་རྒྱུ་རེད།