ཆོས་དབྱངས་སྐྱིད་ཀྱིས་མཛངས་པའི་ལས་ལ་གསེར་གྱི་རྟགས་མ་གཉིས་བླངས་ཤིང་། ལྗིད་ཏིག་ཏིག་གི་འབྲས་བུ་བསྣམས་ཏེ་ཕྱིར་ཕ་ཡུལ་དུ་ལོག་པ།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཟླ10པའི་ཚེས6ཉིན་གྱི་དགོང་མོར། ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པའི་མཚོ་སྔོན་གྱི་འཐུས་མི་ཚོགས་པས་རྒྱལ་ཁའི་འབྲས་བུ་བསྣམས་ཏེ་ཕྱིར་ལོག མཚོ་བྱང་གི་ཕུལ་བྱུང་ལུས་རྩལ་པ་ཆོས་དབྱིངས་སྐྱིད་ལ་ཨོ་རྩལ་འགྲན་ཚོགས་ཀྱི་ཨང་དང་པོ་དང་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་ཨང་དང་པོའི་མཚན་སྙན་ཐོབ་ནས་ཕྱིར་ལོག ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲེང་ཡོན་དང་། ཁུལ་ཨུའི་རྒྱུན་ཨུའམ་དྲིལ་སྒྲོག་པུའི་པུ་ཀྲང་། ཁུལ་སྤྱི་ཁྱབ་བཟོ་ཚོགས་ཀྱི་ཀྲུའུ་ཞི་གཡུ་སྒྲོན་མཚོ། ཁུལ་དཔོན་གཞོན་པ་མཱ་རུའུ་ཞང་། མདའ་བཞི་རྫོང་དང་ཁུལ་རིག་ལུས་གནས་སྐོར་རྒྱང་བརྙན་ཅུའི་འབྲེལ་ཡོད་མགོ་ཁྲིད། ཆོས་དབྱིངས་སྐྱིད་ཀྱི་ནང་མི་སོགས་ཟི་ལིང་ཚོ་ཅ་པའོ་གནམ་ཐང་དུ་བསུ་མ་བྱེད་པའི་མཛད་སྒོར་ཞུགས་ཤིང་། ཕྱིར་ཕ་ཡུལ་དུ་ལོག་པར་དགའ་བསུ་ཞུས།

མཚོ་སྔོན་ཞིང་ཆེན་ལུས་རྩལ་ཅུ་དང་མཚོ་བྱང་ཁུལ་སྲིད་གཞུང་གི་འགན་འཁུར་བས་རྒྱལ་ཁའི་ངང་ཕྱིར་ལོག་པའི་ལུས་རྩལ་པ་ཚོར་སྤྲོ་སེམས་འཁོལ་བས་དགའ་བསུ་ཞུས་པ་དང་ལྷག་བསམ་ཟོལ་མེད་ཀྱིས་འཚམས་འདྲི་གནང་ཞིང་། ཁོང་ཚོར་འགྲན་བསྡུར་ཁྲོད་གཡུར་ཟའི་གྲུབ་འབྲས་ཐོབ་པར་རྟེན་འབྲེལ་ཞུས། དགའ་བསུ་ཞུ་བའི་མཛད་སྒོའི་ཐོག་ཆོས་དབྱིངས་སྐྱིད་ཀྱིས་ཡུན་ཐུང་ཞིག་ལ་ངལ་གསོ་བྱས་རྗེས་ཚང་མའི་དོ་ཁུར་ལ་བཀའ་དྲིན་ཞུས། ཀྲང་ཧྲེང་ཡོན་གྱིས“ཕ་ཡུལ་ཀྱི་མི་དམངས་ཀྱིས་ཁྱེད་རང་ཕྱིར་ལོག་པར་དགའ་བསུ་ཞུ། ཁྱེད་ནི་ཕ་ཡུལ་གྱི་མི་རྣམས་ཀྱི་གཟི་བརྗིད་ཡིན།  ལོ་མང་རིང་ཁྱེད་ཀྱིས་འབད་འཐབ་ཧུར་ཐག་བྱས་ནས་མཚོ་བྱང་གི་སྣང་བརྙན་དང་མཚོ་བྱང་གི་སྙིང་སྟོབས་མངོན་པ་དང་། ས་མཐོའི་བུ་ཕྲུག་གི་ཉམས་འགྱུར་གང་ལེགས་མངོན། ཁྱེད་ཀྱི་དཀའ་སྤྱད་སྙིང་རུས་ཀྱི་སྙིང་སྟོབས་ནི་ང་ཚོའི་མིག་དཔེ་ཡིན་པས་སླད་ཕྱིན་གྱི་སློབ་སྦྱོང་དང་ལས་ཀའི་ཁྲོད་མུ་མཐུད་འབད་བརྩོན་བྱས་ཏེ་རྒྱལ་ཁབ་ལ་གཟི་བརྗིད་བརྩོན་ལེན་དང་། ཕ་ཡུལ་ལ་གཟི་བརྗིད་གསར་པ་སྣོན་རྒྱུའི་རེ་བ་ཡོད”ཅེས་བཤད། ཆོས་དབྱིངས་སྐྱིད་ཀྱིས“མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་རྒྱབ་སྐྱོར་དང་དོ་ཁུར་གནང་བར་ཐུགས་རྗེ་ཆེ་ཞུས་ཤིང་། ཕ་ཡུལ་གྱི་ཡུལ་མི་རྣམས་ཀྱི་རེ་སྒུག་ལ་ཐུགས་རྗེ་ཆེ་ཞུས་པ་དང་རེ་བ་སྟོང་ཟད་དུ་མ་བཏང་བར་འབྲས་བུ་འདི་འདྲ་ཐོབ་པ་དང་། སླད་ཕྱིན་ཀྱང་གཞོན་ནུ་ལུས་རྩལ་པ་དེ་བས་མང་པོ་སྣེ་ཁྲིད་དེ་མུ་མཐུད་དུ་གྲུབ་འབྲས་དེ་བས་ལེགས་པ་གཏོད་ཐུབ་རྒྱུའི་རེ་བ་ཡོད”ཅེས་བཤད།

ཆོས་དབྱིངས་སྐྱིད་ནི“ཀྲུང་གོའི་མགོ་བོ་ཡར་དགྱེ་བའི་གནས་ཏེ། མཚོ་བྱང་ཁུལ་མདའ་བཞི་རྫོང་གསེར་དངུལ་ཐང”ནས་ཡིན་ཞིང་། རྩྭ་ཐང་ཆེན་པོ་ནས་འཛམ་གླིང་དང་ཨེ་ཤེ་ཡའི་འགྲན་རར་བསྐྱོད་ཅིང་། ཨོ་རྩལ་འགྲན་ཚོགས་ལ་ཐེངས་གསུམ་དང་། རྒྱལ་ཡོངས་ལུས་རྩལ་འགྲན་ཚོགས་ལ་ཐེངས་གསུམ་ཞུགས་ཏེ་ཀྲུང་གོའི་ལུས་རྩལ་ལོ་རྒྱུས་དང་། མཚོ་སྔོན་གྱི་ལུས་རྩལ་ལོ་རྒྱུས། མཚོ་བྱང་གི་ལུས་རྩལ་ལོ་རྒྱུས་བཅས་གསར་དུ་བཏོད་ཡོད། ཟླ10པའི་ཚེས4ཉིན་གྱི་སྔ་དྲོར། ཧང་ཀྲོའུ་ཡི་སྐབས་བཅུ་དགུ་པའི་ཨེ་ཤེ་ཡའི་ལུས་རྩལ་འགྲན་ཚོགས་ལ་ཐེངས་དང་པོར་ཞུགས་ཏེ་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་ཨང་དང་པོ་བླངས། ཉིན་དེའི་དགོང་མོར། མོ་ལ་ལོ་བཅུ་གཅིག་གི་སྔོན་ལ་ཐོབ་ན་འོས་པའི་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་སྟེ། ལོན་ཏོན་ཨོ་རྩལ་འགྲན་ཚོགས་ཀྱི་བུད་མེད་ཀྱི་སྤྱི་ལེ20ཅན་གྱི་འདུར་རྒྱུག་གི་གསེར་གྱི་རྟགས་མ་ཐོབ་སྟེ། མཚོ་སྔོན་ལ་ཨོ་རྩལ་འགྲན་ཚོགས་དང་ཨེ་ཤེ་ཡའི་ལུས་རྩལ་འགྲན་ཚོགས་ཀྱི་གསེར་གྱི་རྟགས་མ་མེད་པའི་སྟོང་ཆ་བསྐངས་པ་དང་། མཚོ་སྔོན་གྱི་ཨང་དང་པོ་ལེན་མཁན་ཐོག་མར་གྱུར་པ་མ་ཟད། ཉིན་གཅིག་ལ་གསེར་གྱི་རྟགས་མ་གཉིས་ཐོབ་པའི་ལོ་རྒྱུས་ཀྱང་བཀོད་ཡོད།

ད་ཆ་ཁོ་མོས་མཚོ་སྔོན་ཞིང་ཆེན་ལུས་རྩལ་བཟོ་པའི་རུ་ཁག་ཆེན་པོ་དང་པོའི་ལུས་རྩལ་པ་དང་རྩལ་ཁྲིད་པའི་འགན་གཅིག་ལྕོགས་སུ་བཞེས་ཡོད། སླད་ཕྱིན་གྱི་ལུས་རྩལ་གྱི་བྱ་བཞག་ཁྲོད་དུ། མཚོ་བྱང་ཁུལ་གྱིས་གཞོན་ནུ་ལུས་རྩལ་པའི་སྣེ་ཁྲིད་དེ། ཁོ་མོ་མིག་དཔེར་བཟུང་ཞིང་ཁོ་མོར་སློབ་སྦྱོང་བྱས་ཏེ་ཨའོ་རྩལ་འགྲན་ཚོགས་ཀྱི་སྙིང་སྟོབས་དང་ལུས་རྩལ་གྱི་སྙིང་སྟོབས་མཚོ་བྱང་རྩྭ་ཐང་སྟེང་ཁྱབ་པར་བྱེད་རྒྱུ་ཡིན།