ཤ་བོ་སྐྱབས་ཀྱིས་ཀྲུང་གོ་ཀོང་ཉིང་ཚོགས་པའི་ནུས་རྒྱུ་གསར་པའི་མ་རྐང་ཚོད་འཛིན་ཚད་ཡོད་སྤྱི་གཉེར་གྱི་སྤྱི་ཁྱབ་ཅིང་ལི་གཞོན་པ་ཏིང་ཡེ་ལེང་འཁོར་དང་བཅས་པར་བཞུགས་མོལ་བགྲོ་གླེང་བྱས།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཟླ10པའི་ཚེས18ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་ཀྱིས་ཀྲུང་གོ་ཀོང་ཉིང་ཚོགས་པའི་ནུས་རྒྱུ་གསར་པའི་མ་རྐང་ཚོད་འཛིན་ཚད་ཡོད་སྤྱི་གཉེར་གྱི་སྤྱི་ཁྱབ་ཅིང་ལི་གཞོན་པ་ཏིང་ཡེ་ལེང་འཁོར་དང་བཅས་པར་མཇལ་འཕྲད་གནང་ཞིང་། སླད་ཕྱིན་ནུས་རྒྱུ་གསར་པའི་མཉམ་ལས་གསར་སྤེལ་སོགས་ཀྱི་ལས་དོན་ཐད་བཞུགས་མོལ་བགྲོ་གླེང་བྱས།

ཤ་བོ་སྐྱབས་ཀྱིས་ཀྲུང་གོ་ཀོང་ཉིང་ཚོགས་པའི་སྤྱི་གཉེར་གྱིས་དུས་ཡུན་རིང་པོའི་ནང་མཚོ་བྱང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱས་པར་ཐུགས་རྗེ་ཆེ་ཞུས་ཤིང་། ཁོང་གིས་བསྟན་དོན། ཉེ་བའི་ལོ་ཤས་རིང་། མཚོ་བྱང་ཁུལ་གྱིས་ཞིང་ཆེན་ཡོངས་ཀྱི་སྟོང་ཝ་བྱེ་བ་རིམ་པའི་ནུས་རྒྱུ་གཙང་མའི་རྟེན་གཞི་གསུམ་པ་འཛུགས་རྒྱུའི་དམིགས་ཚད་ལ་དམིགས་ཏེ། ནུས་རྒྱུ་གསར་པའི་ཐོན་ལས་འཕེལ་རྒྱས་དེ་ཁུལ་ཡོངས་ཀྱི་ཐོན་ལས་བཀོད་སྒྲིག་ནང་བཅུག་སྟེ་ལས་ཕྱོད་ཆེ་ཞིང་དྭངས་གཙང་ཡིན་པ། ཐཱན་ཉུང་བ། འཁོར་རྒྱུག་ཐུབ་པ་བཅས་ཀྱི་ལྗང་མདོག་ཐོན་ལས་མ་ལག་བསྐྲུན་པའི་མྱུར་ཚད་ཇེ་མགྱོགས་སུ་བཏང་། 2019ལོར་ཀྲུང་གོ་ཀོང་ཉིང་ཚོགས་པའི་སྤྱི་གཉེར་གྱིས་མ་དངུལ་སྒོར་དུང་ཕྱུར9བཏང་སྟེ་མདའ་བཞི་རྫོང་མཐོན་པོ་སྒང་དུ་སྔ་རྗེས་སུ་སྟོང་ཝ་ཁྲི10ཟིན་པའི་གཅིག་སྡུད་རྣམ་པའི་རླུང་གློག་དང་སྟོང་ཝ་ཁྲི2ཟིན་པའི་ཁ་ཐོར་རྣམ་པའི་རླུང་གློག་རྣམ་གྲངས་བསྐྲུན་ཏེ་ཕྱོགས་གཉིས་པོའི་མཉམ་ལས་ལ་རྨང་གཞི་ཡག་པོ་བཏིང་ཡོད། མཚོ་བྱང་ཁུལ་གྱིས་ཀྲུང་གོ་ཀོང་ཉིང་ཚོགས་པའི་སྤྱི་གཉེར་གྱིས་རྐང་ཚ་རྫོང་དུ་སྟོང་ཝ་ཁྲི1500ཟིན་པའི་རླུང་གློག་རྟེན་གཞི་དང་འཇུ་ལག་རྫོང་གི་འོད་དྲོད་དྭངས་གཙང་གི་དྲོད་རླངས་མཁོ་འདོན་དཔེ་སྟོན་ལས་གྲྭ་བསྐྲུན་རྒྱུར་མུ་མཐུད་རྒྱབ་སྐྱོར་བྱས་ནས་མཉམ་ལས་ཀྱི་བར་མཐོངས་རྒྱུན་མཐུད་རྒྱ་ཆེར་གཏོང་རྒྱུ་ཡིན། ཀྲུང་གོ་ཀོང་ཉིང་ཚོགས་པའི་སྤྱི་གཉེར་གྱིས་ཀྲུང་དབྱང་ཁེ་ལས་ཀྱི་ལེགས་ཆ་མུ་མཐུད་དུ་འདོན་སྤེལ་བྱས་ཏེ། མཚོ་བྱང་དེ་ནུས་རྒྱུ་གསར་པ་གསར་སྤེལ་བྱེད་པའི་གཙོ་གནད་ས་ཁོངས་སུ་བརྩིས་ཏེ་ལས་དོན་སྦྲེལ་མཐུད་དང་རྣམ་གྲངས་ཀྱི་སྤྱིའི་འཆར་འགོད་ཡག་པོ་བྱས་ཏེ། བསམ་ཚུལ་ཡག་པོ་རྣམས་གང་མགྱོགས་སྒོས་རྣམ་གྲངས་སུ་བསྒྱུར་ནས། མཚོ་བྱང་གི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱ་རྒྱུའི་རེ་བ་ཡོད། མཚོ་བྱང་གིས་ཁེ་ལས་ཀྱི་དགོས་མཁོར་གཞིགས་ཏེ་སྔར་བཞིན་སྤུས་ལེགས་ནུས་ཆེའི་ཞབས་ཞུ་མཁོ་འདོན་བྱས་ཏེ། ཀྲུང་གོ་ཀོང་ཉིང་ཚོགས་པའི་སྤྱི་གཉེར་མཚོ་བྱང་དུ་འཕེལ་རྒྱས་སྔར་བས་ལེགས་པ་ཡོང་རྒྱུར་རྒྱབ་སྐྱོར་བྱ་ངེས་ཡིན་ཞེས་གསུངས།

ཏིང་ཡེ་ལེང་གིས་མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་དུས་ཡུན་རིང་པོའི་ནང་ཁེ་ལས་ཀྱི་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས། ཁོང་གིས་མཚོ་བྱང་ཁུལ་གྱི་ལེགས་ཆ་མངོན་གསལ་དོད་པ་དང་། ཐོན་ཁུངས་ལེགས། ཐོན་ལས་ལེ་ལག་ཚང་། ཚོང་གཉེར་ཁོར་ཡུག་ལེགས། དེ་བས་ཕྱོགས་གཉིས་པོས་མཉམ་ལས་ལ་སྔར་བས་ཤུགས་བསྣན་ཏེ་འཕེལ་རྒྱས་ཀྱི་གོ་སྐབས་དམ་འཛིན་བྱེད་པ། གཉིས་ཕན་གྱི་གནས་འཚོལ་བ། མཉམ་ལས་ཁྱབ་ཁོངས་རྒྱ་ཆེར་གཏོང་བ་བཅས་བྱས་ནས་ཕྱོགས་གཉིས་པོའི་ལེགས་ཆ་གསབ་རེས་དང་འཕེལ་རྒྱས་གཉིས་ཕན་ལ་སྐུལ་འདེད་གཏོང་རྒྱུའི་རེ་བ་ཡོད།  ཀྲུང་གོ་ཀོང་ཉིང་ཚོགས་པའི་སྤྱི་གཉེར་གྱིས་མ་འཇོག་བྱེད་ཤུགས་མུ་མཐུད་དུ་ཆེ་རུ་བཏང་ནས་རྣམ་གྲངས་དངོས་ལ་བརྟེན་ནས་མཚོ་བྱང་གི་ལྗང་མདོག་རྨང་གཞི་རྒྱུན་ཆད་མེད་པར་ཇེ་བརྟན་དུ་བཏང་སྟེ། མཚོ་བྱང་ཁུལ་གྱི་ནུས་རྒྱུ་གསར་པའི་ཐོན་ལས་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་སྟོབས་ཤུགས་དེ་བས་ཆེ་བ་འབུལ་རྒྱུ་ཡིན་ཞེས་ནན་བཤད་གནང་།

ཀྲུང་གོ་ཀོང་ཉིང་ཚོགས་པའི་སྤྱི་གཉེར་མཚོ་སྔོན་ཡན་ལག་སྤྱི་གཉེར་གྱི་ཏང་སྤྱི་ཁྱབ་ཀྲི་པུའི་ཧྲུའུ་ཅི་དང་སྤྱི་ཁྱབ་ཅིང་ལི་ཀའོ་ཡུང་། ཁུལ་ཨུའི་རྒྱུན་ཨུའམ་ཁུལ་དཔོན་གཞོན་པ་ཨ་ཁྱུང་། ཁུལ་དཔོན་གཞོན་པ་ཚོ་ཅི་ཆང་། ཁུལ་ཐད་གཏོགས་འབྲེལ་ཡོད་སྡེ་ཚན་གྱི་འགན་འཁུར་བློ་མཐུན་བཅས་ཞུགས་ཡོད།