ཞོགས་པའི་ཇ་ཡུན་གསར་འགྱུར།

སྒྲིག་སྒྱུར། མཁའ་འགྲོ་མཚོ།   ཡོང་ཁུངས། མི་དམངས་ཉིན་རེའི་ཚགས་པར་འཕྲིན་སྟེགས།   བཤེར་འབེབས། རིན་ཆེན་ཚེ་རིང་། 

གསར་འགྱུར་གལ་ཆེན།

• ས་གནས་དེ་གའི་དུས་ཚོད་ཟླ11ཚེས15ཉིན་གྱི་མཚན་མོ། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་ཨ་རིའི་ཅིའུ་ཅིན་ཧྲན་དུ་ཨ་རིའི་མཛའ་གྲོགས་ཚོགས་པས་མཉམ་འབྲེལ་ཐོག་སྤེལ་པའི་དགའ་བསུ་ཞུ་བའི་གསོལ་སྟོན་ལ་ཞུགས་པ་རེད།

• ཞི་ཅིན་ཕིང་གིས་ཧྲན་ཞི་ལུའི་ལེའང་གྲོང་ཁྱེར་ཡུང་ཅུས་སོལ་གཏེར་གྱི་གཞུང་ལས་ཐོག་ཁང་ཞིག་ལ་མེ་སྐྱོན་ལས་འཛོལ་བྱུང་བའི་ཐད་ལ་མཛུབ་སྟོན་གལ་ཆེན་གནང་སྟེ། རྨས་སྐྱོན་ཕོག་མཁན་ནུས་ཤུགས་ཡོད་རྒུས་སྐྱོབ་བཅོས་དང་གཙོ་གནད་ལས་རིགས་ཁྱབ་ཁོངས་ཀྱི་ཉེན་ཁའི་མངོན་མེད་རྐྱེན་ངན་གྲལ་བཤེར་གཏིང་ཟབ་བྱས་ཏེ་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས། སྤྱི་ཚོགས་ཀྱི་སྤྱི་ཡོངས་བརྟན་ལྷིང་སྲུང་སྐྱོང་ཏན་ཏིག་བྱེད་དགོས་པའི་བླང་བྱ་བཏོན་ཞིང་། ལི་ཆང་གིས་མཆན་བཀོད་མཛུབ་སྟོན་གནང་།

• ཚོང་དོན་པུའི་གྲངས་གཞི་ལས་མངོན་པར། ད་ལོའི་ཟླ་དང་པོ་ནས་བཅུ་པའི་བར་རང་རྒྱལ་གྱིས་ཕྱི་ཕྱོགས་ལ་དངུལ་རྩའི་རིགས་མིན་པའི་ཐད་ཀར་མ་འཇོག་བྱེད་ཚད་དུས་མཚུངས་ལས17.3%འཕར་ཡོད།

• རང་བྱུང་ཐོན་ཁུངས་པུས་གནས་ཚུལ་སྤེལ་བར་གཞིགས་ན། རྒྱལ་ཡོངས་ཀྱི་ས་འོག་ཆུའི་སྤུས་ཚད་སྤྱིའི་ཆ་ནས་བརྟན་པོ་ཡོད་པ་དང་ཧྭ་བྱང་བདེ་ཐང་གི་ས་འོག་ཆུ་གསོག་ཚད་སྨི་རྒྱ་དཔངས་གྲུ་བཞི་དུང་ཕྱུར28.62ཇེ་མང་དུ་ཕྱིན་ཡོད།

• རྒྱལ་ཁབ་འཕེལ་སྒྱུར་ཨུ་ལྷན་གྱིས་གནས་ཚུལ་སྤེལ་བར་གཞིགས་ན། མིག་སྔར་རྒྱལ་ཡོངས་ཀྱི་གཅིག་གྱུར་སྙོམས་སྒྲིག་གློག་གྲྭའི་རྡོ་སོལ་གསོག་ཉར་བྱེད་ཚད་ཏུན་དུང་ཕྱུར2ལས་བརྒལ་ཞིང་། ཉིན33སྤྱོད་ཆོག་པས་ལོ་རྒྱུས་ཀྱི་ཆུ་ཚད་མཐོ་ཤོས་སུ་སླེབས་ཡོད་པ་རེད།

• ཚེས16ཉིན་རང་རྒྱལ་གྱིས་ཅིའུ་ཆོན་སྲུང་སྐར་འཕེན་གཏོང་ལྟེ་གནས་སུ་རྒྱང་སྐྱོད་ཨང་གཉིས་པའི་སྐྱེལ་འདྲེན་མེ་ཤུགས་འཕུར་མདའ་ཁ་པ་སྤྱད་དེ་རབས་གསར་པའི་རྒྱ་མཚོའི་ཆུ་མདོག་ལྟ་ཞིབ་ཚད་ལེན་སྲུང་སྐར01བདེ་བླག་ངང་འཕེན་གཏོང་བྱས།

• ཉེ་ཆར་བྱང་སྐར་སྤུན་བདུན་མ་ལག་རྒྱལ་སྤྱིའི་དམངས་སྤྱོད་མཁའ་འགྲུལ་རྩ་འཛུགས་ཀྱི་ཚད་གཞིར་དངོས་སུ་ཞུགས་ནས་གོ་ལ་ཧྲིལ་པོའི་དམངས་སྤྱོད་མཁའ་འགྲུལ་གྱིས་ཐུན་མོང་དུ་སྤྱོད་པའི་སྲུང་སྐར་ཕྱོགས་སྟོན་མ་ལག་ཏུ་གྱུར་ཡོད།

• ཚེས15ཉིན་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་ཕ་ལེ་སི་ཐན་དང་དབྱི་སི་རལ་གྱི་གནས་བབ་ཐད་ཀྱི་གྲོས་ཆོད་ལ་གྲོས་འཆམ་བྱུང་སྟེ། ཅ་ཧྲ་ས་ཁུལ་ཧྲིལ་པོར་ཉིན་གྲངས་འདང་ངེས་ཀྱི་མི་ཆོས་རིང་ལུགས་ཀྱི་གནས་སྐབས་མཚམས་འཇོག་བྱས་ཤིང་། གཞི་རྩའི་དངོས་ཟོག་དང་ཞབས་ཞུ་མཁོ་འདོན་བྱས་ནས་རོགས་སྐྱོབ་དང་སླར་གསོའི་ལས་དོན་སྤེལ་རྒྱུར་སྟབས་བདེ་སྐྲུན་དགོས་པའི་རེ་འབོད་བྱས།

སྤྱི་ཚོགས།

• ཀྲུང་དབྱང་གནམ་གཤིས་ལས་ཁུངས་ཀྱིས་མུ་མཐུད་དུ་ཁ་བ་ཆེན་པོའི་ལི་མདོག་གི་ཉེན་བརྡ་ཁྱབ་བསྒྲགས་བྱས་ཏེ། དེ་རིང་ཧེ་ལུང་ཅང་གི་ཤར་རྒྱུད་དང་ཅི་ལིན་ཤར་རྒྱུད་སོགས་ས་ཁུལ་ཁ་ཤས་སུ་ཁ་བ་ཆེན་པོ་འབབ་རྒྱུ་ཡིན་པ་དང་། དེའི་ཁྲོད་ཧེ་ལུང་ཅང་གི་ཤར་རྒྱུད་ས་ཁུལ་ཁག་ཅིག་ཏུ་ཁ་བ་ཆེན་པོ་འབབ་རྒྱུ་ཡིན།

• ཚེས16ཉིན། 2026འཛམ་གླིང་གཟེངས་བུམ་གྲ་སྒྲིག་འགྲན་བསྡུར་གྱི་ཨེ་ཤེ་ཡའི་ཁུལ་གྱི་ཨང36ཕུལ་བྱུང་འགྲན་བསྡུརCཚོགས་ཆུང་གི་རེས་སྐོར་དང་པོའི་འགྲན་བསྡུར་ཁྲོད་ཀྲུང་གོའི་རུ་ཁག་གིས་བསྡུར་གྲངས2：1གི་སྟེང་ནས་ཐེ་ལན་རུ་ཁག་ལས་རྒྱལ་ཏེ་གྲུབ་འབྲས་ལེགས་པོ་ཐོབ་པ་རེད།

•  རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་སོགས་སྡེ་ཚན་ལྔ་ཡིས་བྱ་ཐབས་བཀྲམ་སྟེ། ཁྱིམ་ཚང་བཅོལ་གསོ་ས་གནས་སུ་ཕྲུ་གུའི་བཅོལ་བསྡུ་བྱེད་ཚད་མི5ལས་བརྒལ་མི་ཆོག་པ་གཏན་འབེབས་བྱས།

• རྒྱལ་སྲིད་སྤྱི་ཁྱབ་ཁང་གཞུང་ཁོངས་རྒྱུ་ནོར་ལྟ་སྐུལ་དོ་དམ་ཨུ་ལྷན་གྱི་དེ་སྔའི་པུའུ་ཀྲང་གཞོན་པ་ལུའོ་ཡུས་ལིན་གྱིས་སྒྲིག་འགལ་ཁྲིམས་འགལ་ཚབས་ཆེན་བྱས་པས་ཏང་ནས་ཕྱིར་ཕུད་པ་རེད།

• རྒྱལ་ཁབ་གསར་སྤེལ་དངུལ་ཁང་གི་དེ་སྔའི་ཏང་ཨུའི་ཨུ་ཡོན་ཧང་ཀྲང་གཞོན་པ་ཀྲོའུ་ཆིང་ཡུས་ཀྱིས་སྒྲིག་འགལ་ཁྲིམས་འགལ་ཚབས་ཆེན་བྱས་པས་ཏང་ནས་ཕྱིར་ཕུད་པ་རེད།

• རྒྱལ་ཁབ་ཀྱི་ཚན་རྩལ་རྨང་གཞིའི་སྒྲིག་བཀོད་གལ་ཆེན“ལ་སོ”དངོས་སུ་ཁྱབ་བསྒྲགས་བྱས་པ་དེས་ད་བར་ཆེས་གསལ་བའི་ཅ་མ་འཕྲོ་འོད་ཀྱི་དྲག་ནུས་འགྱེད་འཕྲོའི་ནུས་ཤལ་དངོས་སུ་ཁྱབ་བསྒྲགས་བྱས་ཤིང་། འཇིག་རྟེན་རྒྱབ་ལྗོངས་འོད་དེ་དམར་ཕྱིའི་རླབས་རིམ་དུ་དྲག་ཚད་སྔོན་དཔག་ལས་དམའ་བ་གསལ་སྟོན་བྱས་ཡོད།

• ཚེས16ཉིན་འབར་མའི་ཀུའོ་ཀན་གྱིས་གློག་འཕྲིན་གཡོ་ལེན་ཉེས་གསོག་ཚོགས་པའི་མགོ་གཙོ་གལ་ཆེན་མིང་གོ་ཕིང་དང་། མིང་ཅུས་ལན། མིང་ཀྲེན་ཀྲེན་བཅས་འཛིན་བཟུང་བྱས་ཏེ་ཁྲིམས་ལ་སྦྱར་བ་ཡིན། ཉེས་གསོག་ཚོགས་པའི་ཉེས་ཅན་དང་པོར་མིང་ཞུའེ་ཁྲང་ནག་ཉེས་ལ་སྐྲག་སྟེ་རང་སྲོག་ལྕེབས།

• ཚེས16ཉིན་རང་རྒྱལ་གྱི་གསར་དུ་བཟོས་པའི་ནུས་ཚད་ཆེ་བའི་གློག་ནུས་གསར་པའི་སྙོམས་སྒྲིག་མེ་འཁོར་ཐོག་མ་དེ་ཧུའུ་ནན་ཀྲུའུ་ཀྲོའུ་ཀྲུང་ཁྲེ་ཀྲུའུ་འཕྲུལ་འཁོར་སྤྱི་གཉེར་རུ་དངོས་སུ་སྤྱོད་མགོ་ཚུགས།

སྲིད་ཇུས།

• ཧྲན་ཞིས་བརྡ་ཐོ་བཏང་ནས 2024ལོ་ནས་བཟུང་གྲོང་མིའི་སྒོ་བསྟེན་སྨན་བཅོས་ཀྱི་གཅིག་གྱུར་འཆར་འགོད་ལོ་འཁོར་གྱི་གཏོང་སྤྲོད་བཅད་གྲངས་སྒོར་250ནས་སྒོར300བར་མཐོ་རུ་བཏང་སྟེ། ཉིན་རེར་སྒོར50ཡི་ཐེངས་གཅིག་བཅད་གྲངས་མེད་པ་བཟོས་པ་ཡིན།

• ཧོ་ནན་གྱིས་སྲིད་ཇུས་ཁྱབ་བསྒྲགས་བྱས་ནས་ཁེར་གཉེར་བཟོ་ཚོང་གི་ལོ་རེའི་འཇལ་དགོས་པའི་ཁྲལ་འབོར་སྒོར་ཁྲི200ལས་མི་བརྒལ་བའི་ཆ་ཤས་ལ་མི་སྒེར་གྱི་ཐོབ་ཁྲལ་ཕྱེད་ཀ་ཆག་ཡང་བཏང་ནས་བསྡུ་དགོས་པ་བཏོན་ཞིང་། སྲིད་ཇུས་ལག་བསྟར་དུས་ཚད་ནི2027ལོའི་ཟླ12ཚེས31ཉིན་བར་ཡིན།

• ཀོང་ཞི་ཡིས་ཇུས་གཞི་པར་འགྲེམས་བྱས་ནས་གཏན་འབེབས་དང་མཐུན་པའི་གྲངས་འཛིན་ལག་རྩལ་ཁྱབ་ཁོངས་ཀྱི་ལག་རྩལ་རྩལ་ནུས་ཤེས་ལྡན་པ་གསོ་སྦྱོང་རྣམ་གྲངས་ནང་ཞུགས་ཚེ་མི་རེར་གསོ་སྦྱོང་ཁ་གསབ་སྒོར800སྤྲོད་ཆོག་པ་གཏན་འབེབས་བྱས།

དེ་རིང་གི་གནམ་གཤིས།

• ནང་སོག་གི་ཤར་རྒྱུད་དང་བྱང་ཤར་ས་ཁུལ་གྱི་ས་ཁུལ་མང་ཆེ་བར་ཁ་བ་ཆུང་བ་ནས་འབྲིང་བའམ་ཡང་ན་ཁངས་ཆར་འདྲེས་མ་འབབ་རྒྱུ་ཡིན། དེའི་ཁྲོད་ཧེ་ལུང་ཅང་གི་ཤར་རྒྱུད་དང་ཅི་ལིན་གྱི་ཤར་རྒྱུད་སོགས་ས་ཁུལ་ཁ་ཤས་སུ་ཁ་བ་ཆེན་པོ་འབབ་རྒྱུ་ཡིན། ཡུན་ནན་དབུས་ནུབ་རྒྱུད་ཀྱི་ས་ཁུལ་ཁ་ཤས་སུ་ཆར་པ་ཆུང་བ་ནས་འབྲིང་བ་འབབ་རྒྱུ་ཡིན་པ་དང་ས་ཁུལ་ཁ་ཤས་སུ་ཆར་པ་ཆེན་པོ་འབབ་རྒྱུ་ཡིན།