དུས་ཚིགས་དང་པོའི་རང་རྒྱལ་དམངས་སྤྱོད་མཁའ་འགྲུལ་གྱི་འགྲུལ་པ་དང་དངོས་ཟོག་སྐྱེལ་འདྲེན་གཉིས་ཀས་ལོ་རྒྱུས་ཀྱི་ཟིན་ཐོ་གསར་པ་བཏོད།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  བོད་ལྗོངས་རླུང་འཕྲིན་བརྙན་འཕྲིན།  བཤེར་འབེབས།  རིན་ཆེན་ཚེ་རིང་།

འདི་ག་ལས་ཁུངས་ནས་སྤེལ་བའི་གནས་ཚུལ། དམངས་སྤྱོད་མཁའ་འགྲུལ་ཅུས་སྤེལ་བའི་གྲངས་གཞི་ལས་མངོན་པར།  ད་ལོའི་དུས་ཚིགས་དང་པོར་དམངས་སྤྱོད་མཁའ་འགྲུལ་སྐྱེལ་འདྲེན་ཐོན་སྐྱེད་ཀྱིས་མགོ་ཡག་པོ་བཙུགས་ཤིང་།  འགྲུལ་པ་སྐྱེལ་འདྲེན་བྱེད་ཚད་དང་དངོས་ཟོག་དབོར་འདྲེན་བྱེད་ཚད་གཉིས་ཀས་ལོ་རྒྱུས་ཀྱི་དུས་མཚུངས་ཀྱི་ཟིན་ཐོ་གསར་པ་བཏོད་ཡོད།

དུས་ཚིགས་དང་པོར་ལས་རིགས་ཧྲིལ་པོས་ཁྱོན་སྐྱེལ་འདྲེན་གྱི་སྤྱིའི་འཁོར་རྒྱུག་ཚད་ཏུན་སྤྱི་ལེ་དུང་ཕྱུར349.3ལེགས་གྲུབ་བྱས་ཤིང་།  དུས་མཚུངས་ལས་བརྒྱ་ཆ45.6ལས་འཕར་ཡོད།  འགྲུལ་པ་སྐྱེལ་འདྲེན་བྱེད་པའི་ཐད་ལས་རིགས་ཧྲིལ་པོས་དུས་ཚིགས་དང་པོར་ཁྱོན་འགྲུལ་པ་སྐྱེལ་འདྲེན་བྱེད་ཚད་མི་ཐེངས་དུང་ཕྱུར1.8ལ་ཉེ་བ་ལེགས་འགྲུབ་བྱུང་བ་དང་།  དེ་ལོ་གོང་མའི་དུས་ཚིགས་དང་པོའི་འགྲུལ་པ་སྐྱེལ་འདྲེན་བྱེད་ཚད་ཀྱི་ཆེས་མཐོ་ཤོས་ཡིན་ལ།  དུས་མཚུངས་ལས་བརྒྱ་ཆ37.7འཕར་ཡོད།  དངོས་ཟོག་སྐྱེལ་འདྲེན་ཐད་ལས་རིགས་ཧྲིལ་པོས་དུས་ཚིགས་དང་པོར་ཁྱོན་དངོས་ཟོག་དབོར་འདྲེན་བྱེད་ཚད་ཀྲོན་ཁྲི200.7ལེགས་གྲུབ་བྱུང་ཞིང་དུས་མཚུངས་ལས་བརྒྱ་ཆ34.4འཕར་ཡོད།

ད་ལོ་ནས་བཟུང་དམངས་སྤྱོད་མཁའ་འགྲུལ་གྱིས་རྒྱལ་སྤྱིའི་མཁའ་འགྲུལ་ལམ་ཐིག་དྲ་རྒྱའི་བཀོད་པ་འཐུས་ཚང་དུ་གཏོང་རྒྱུ་ཇེ་མགྱོགས་སུ་བཏང་བ་དང་།  རྒྱལ་སྤྱིའི་མཁའ་འགྲུལ་ལམ་ཐིག་དྲ་བ་དང་དེ་བཞིན་དེ་བས་ནུས་མཐོའི་ཞབས་ཞུ་ཚགས་དམ་དུ་བཏང་བས།  རྒྱལ་ཁོངས་ལས་བརྒལ་བའི་མི་སྣའི་འགྲོ་འོང་ལ་སྔར་ལས་མང་བའི་སྟབས་བདེ་འདོན་སྤྲོད་བྱས་ཡོད།  ཀྲུང་གོའི་ནང་ལོག་ནས་སོ་ཏི་ཨ་རབ་བར་གྱི་དུས་གཏན་ཐད་འཕུར་མཁའ་འགྲུལ་ལམ་ཐིག་ཐོག་མ་དེ་ཁ་སང་དངོས་སུ་ཤར་གཏོང་བྱས་ཡོད།  ལྷོ་ཕྱོགས་མཁའ་འགྲུལ་ཧྭ་བྱང་ཚོང་གཉེར་ལྟེ་གནས་ཀྱི་སྤྱི་ཁྱབ་ཅིང་ལི་གཞོན་པ་ཁྲེན་ལིན་གྱིས།  པེ་ཅིན་ནས་ལི་ཡ་ཏེ་བར་གྱི་མཁའ་འགྲུལ་ལམ་ཐིག་ནི་གཟའ་འཁོར་རེའི་རེས་གཟའ་མིག་དམར་དང་རེས་གཟའ་ལྷག་པར་ཐད་འཕུར་བྱས་པའི་གནམ་གྲུ་གཉིས་ཡིན་ལ།  ཁྲོམ་ར་སླར་གསོ་བྱུང་བ་དང་ང་ཚོའི་ཐོན་རྫས་ཕུན་སུམ་ཇེ་ཚོགས་སུ་སོང་བ་དང་བསྟུན་ནས་ང་ཚོའི་གནམ་གྲུའང་དེ་བཞིན་རིམ་གྱིས་མང་དུ་གཏོང་རྒྱུ་ཡིན་ཞེས་བཤད།