ཞི་ཅིན་ཕིང་ཧང་ག་རིའི་ཙུང་ལི་ཨོའར་པན་གྱིས་སྤེལ་བའི་ཞལ་སྐྱེལ་བྱེད་སྒོར་ཞུགས་པ།

སྒྲིག་སྒྱུར།  སངས་དོན།      ཡོང་ཁུངས།  ཞིན་ཧྭ་གསར་འགྱུར་ཁང་།    བཤེར་འབེབས།   རིན་ཆེན་ཚེ་རིང་།

ཤིན་ཧྭ་གསར་འགྱུར་ཁང་པུ་ཏ་ཕེ་སིར་ཟླ5པའི་ཚེས10ཉིན་གྱི་གློག་འཕྲིན་ལྟར་ན། ས་གནས་དེ་གའི་དུས་ཚོད་ཟླ5པའི་ཚེས10ཉིན་གྱི་ཉིན་གུང་། རྒྱལ་ཁབ་ཀྱི་ཀྲུའུ་ཞི་ཅིན་ཕིང་　དང་སྐུ་ཟླ་ཕིང་ལུས་ཡན་པུ་ཏ་ཕེ་སི་ནས་གདན་ཞུས་ལྟར་ཧང་ག་རིའི་ཙུང་ལི་ཨོའར་པན་དང་སྐུ་ཟླ་གཉིས་ཀྱིས་སྤེལ་བའི་ཞལ་སྐྱེལ་བྱེད་སྒོར་ཞུགས་པ་རེད། 

རྒྱལ་ཁབ་གཉིས་པོའི་མགོ་ཁྲིད་དང་བཟའ་ཟླ་གཉིས་ཀྱིས་མཉམ་དུ་པུ་ཏ་ཕེ་སིའི་གྲོང་ཁྱེར་གྱི་ཡུལ་ལྗོངས་ལ་རྒྱང་གཟིགས་བྱས་པ་དང་ཏུའོ་ནའོ་གཙང་པོའི་ངོགས་གཉིས་ཀྱི་མཛེས་སྡུག་ལྡན་པའི་ཡུལ་ལྗོངས་ལ་མཉམ་དུ་མྱོང་རོལ་བྱས། 

ཨོའར་པན་གྱིས་ཞི་ཅིན་ཕིང་ལ་པུ་ཏ་ཕེ་སིའི་གྲོང་ཁྱེར་གྱི་ལོ་རྒྱུས་དང་འཕེལ་རྒྱས། འགྱུར་ལྡོག འཆར་འགོད་མདུན་ལམ་བཅས་ངོ་སྤྲོད་གནང་བ་དང་། ཀྲུང་གོའི་ཁེ་ལས་ཀྱིས་ཧང་ག་རིའི་དཔལ་འབྱོར་འཕེལ་རྒྱས་དང་གྲོང་ཁྱེར་འཛུགས་སྐྲུན་ལ་ལེགས་སྐྱེས་གལ་ཆེན་ཕུལ་ཡོད་པས་ཀྲུང་གོ་ཕྱོགས་ཀྱིས་འཛུགས་སྐྲུན་བྱེད་འགན་འཁུར་བའི་རྣམ་གྲངས་མང་པོ་ཞིག་རྒྱལ་ཁབ་གཉིས་པོའི་མཉམ་ལས་ཀྱི་བཀོད་འདོམས་རྣམ་གྲངས་དང་མཛའ་གྲོགས་ཀྱི་མཚོན་རྟགས་སུ་གྱུར་ཡོད་ཅེས་བརྗོད་པ་རེད། ཀྲུང་གོའི་ལག་རྩལ་དེ་ཕྱོགས་མང་པོའི་ཐད་ནས་འཛམ་གླིང་གི་སྔོན་ཐོན་གནས་བབ་བཟུང་ཡོད་པས་ཧང་ག་རི་ཕྱོགས་ཀྱིས་ཀྲུང་གོ་ཕྱོགས་དང་མཉམ་ལས་དེ་བས་མང་བ་བྱས་ནས་ཀྲུང་གོའི་སྔོན་ཐོན་ལག་རྩལ་དེ་བས་མང་བ་ནང་འདྲེན་བྱས་ཏེ། ཧང་ག་རི་རྒྱལ་ཁབ་འཕེལ་རྒྱས་དང་དམངས་འཚོ་ལེགས་སུ་གཏོང་རྒྱུར་རོགས་རམ་བྱ་རྒྱུའི་རེ་སྒུག་བྱེད་ཀྱི་ཡོད་ཅེས་གསུངས་པ་རེད། 

ས་གནས་དེ་གའི་དུས་ཚོད་ཟླ5པའི་ཚེས10ཉིན་གྱི་ཉིན་གུང་། རྒྱལ་ཁབ་ཀྱི་ཀྲུའུ་ཞི་ཅིན་ཕིང་དང་སྐུ་ཟླ་ཕིང་ལིས་ཡན་པུ་ཏ་ཕེ་སིར་གདན་ཞུས་ལྟར་ཧང་ག་རིའི་ཙུང་ལི་ཨོའར་པན་དང་སྐུ་ཟླ་གཉིས་ཀྱིས་སྤེལ་བའི་ཞལ་སྐྱེལ་བྱེད་སྒོར་ཞུགས་པ་རེད། ཤིན་ཧྭ་གསར་འགྱུར་ཁང་གི་གསར་འགོད་པ་ཞེ་ཧོན་ཁྲི་ཡིས་པར་བླངས། 

 ཞི་ཅིན་ཕིང་གིས་ཨོའར་པན་གྱིས་སྤྲོ་སེམས་འཁོལ་བའི་གདན་ཞུ་དང་བཀོད་སྒྲིག་ཞིབ་ཚགས་གནང་བར་ཐུགས་རྗེ་ཆེ་ཞུས་པ་དང་། ངས་འདི་གར་པུ་ཏ་ཕེ་སིའི་ལོ་རྒྱུས་སྲོལ་རྒྱུན་ཚོར་ཐུབ་པ་མ་ཟད། གསོན་ཤུགས་གསར་པ་ཡང་མཐོང་བྱུང་བས་ཧང་ག་རིའི་ངོས་འཛིན་ཟབ་ཏུ་ཕྱིན་ནས་བག་ཆགས་ཟབ་མོ་བཞག་ཡོད་ཅིང་།  ལོ15སོང་རྗེས། ཧང་ག་རི་ལ་ཐོབ་པའི་འཕེལ་རྒྱས་ཀྱི་གྲུབ་འབྲས་ལ་བག་ཆགས་ཟབ་མོ་བཞག་ཡོད། ཀྲུང་གོ་དང་ཧང་ག་རིའི་སྤེལ་རེས་མཉམ་ལས་ཀྱིས་ཀྲུང་གོའི་བཅོས་སྒྱུར་སྒོ་འབྱེད་ལ་ལེགས་སྐྱེས་ཕུལ་མྱོང་ཡོད། མིག་སྔར། ཀྲུང་གོས་ཀྲུང་གོའི་རྣམ་པའི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ལ་ཁྱོན་ཡོངས་ནས་སྐུལ་འདེད་གཏོང་བཞིན་ཡོད་པས། ཀྲུང་གོའི་སྤུས་ཚད་མཐོ་བའི་འཕེལ་རྒྱས་དང་ཕྱི་ཕྱོགས་སྒོ་འབྱེད་ཀྱིས་ཧང་ག་རིར་གོ་སྐབས་དེ་བས་མང་བ་མཁོ་འདོན་ཐུབ་རྒྱུ་རེད། ཀྲུང་གོ་ཕྱོགས་ཀྱིས་ཧང་ག་རི་ཕྱོགས་དང་དཔལ་འབྱོར་ལག་རྩལ་གྱི་སྤེལ་རེས་མཉམ་ལས་ལ་ཤུགས་སྣོན་བརྒྱབ་སྟེ་རྒྱལ་ཁབ་གཉིས་པོར་འཕེལ་རྒྱས་ཀྱི་གྲུབ་འབྲས་དེ་བས་མང་བ་ཐོབ་རྒྱུར་སྐུལ་འདེད་བཏང་ནས་རྒྱལ་ཁབ་གཉིས་པོའི་མི་དམངས་ལ་དེ་བས་མཛེས་སྡུག་ལྡན་པའི་འཚོ་བ་གཏོད་འདོད་ཡོད་ཅེས་གསུངས་པ་རེད། 

རྒྱལ་ཁབ་གཉིས་པོའི་མགོ་ཁྲིད་པས་སྒེའུ་ཁུང་གི་འགྲམ་དུ་ཕྱི་རོལ་དུ་རྒྱང་གཟིགས་གནང་བཞིན་རང་སོ་སོའི་འཚར་ལོངས་ཀྱི་བརྒྱུད་རིམ་དང་རྒྱལ་སྐྱོང་སྲིད་སྐྱོང་གི་མྱོང་ཚོར་གླེང་མོལ་བྱས་ཏེ། ཐུན་མོང་ཐོག་དོ་ཁུར་བྱེད་པའི་གནད་དོན་གལ་ཆེན་ཐད་ལ་ལྟ་ཚུལ་བརྗེ་རེས་བྱས་ནས་ཐུན་མོང་གི་ངོས་འཛིན་མང་པོ་བྱུང་། 

 ཞི་ཅིན་ཕིང་གིས་ཀྲུང་གོ་གུང་ཁྲན་ཏང་གི་ལོ་བརྒྱའི་ལོ་རྒྱུས་དང་ཏང་དོ་དམ་དང་རྒྱལ་ཁབ་སྐྱོང་བའི་འདུ་ཤེས་གལ་ཆེན་ངོ་སྤྲོད་གནང་བ་དང་། ཀྲུང་གོ་གུང་ཁྲན་ཏང་ནི་ཏང་ཡོན་བཅུ་ཕྲག་ཁ་ཤས་ལས་མེད་པའི་ཏང་ཆུང་ཆུང་ཞིག་ནས་ཏང་ཡོན་ཁྲི9800ལྷག་ཙམ་ཡོད་པའི་ཏང་ཆེན་པོ་ཞིག་ཏུ་འཚར་ལོངས་བྱུང་ཚུལ་དང་། དཀའ་སྡུག་མང་པོར་བརྒྱུད་ཚུལ། མཐར་ཐུག་ཀྲུང་གོར་མགོ་ཁྲིད་བྱས་ཏེ་ད་ལྟའི་གྲུབ་འབྲས་ཐོབ་ཚུལ་སོགས་མཚམས་སྦྱོར་བྱས་ཤིང་། མདུན་སྐྱོད་ཀྱི་ལམ་ཁ་རུ་ཉེན་ཁ་དང་འགྲན་སློང་སྣ་ཚོགས་ཡོད་སྲིད་ཀྱང་། ང་ཚོར་དེ་དག་ལས་མུ་མཐུད་དུ་རྣམ་པར་རྒྱལ་ཐུབ་པའི་ཡིད་ཆེས་ཡོད་ཅིང་། ཀྲུང་གོའི་ཡུན་རིང་བརྟན་ལྷིང་དང་འཕེལ་རྒྱས་རྒྱུན་འཁྱོངས་བྱས་ཏེ། ཀྲུང་གོའི་མི་དམངས་ལ་འཚོ་བ་སྔར་ལས་ལེགས་པོ་སྐྱེལ་ཐུབ་པ་མ་ཟད། འཛམ་གླིང་ཞི་བདེ་དང་འཕེལ་རྒྱས་ལ་ལེགས་སྐྱེས་སྔར་ལས་ཆེ་བ་འབུལ་ཐུབ་པའི་ཡིད་ཆེས་ཀྱང་ཡོད་ཅེས་བསྟན། 

ཞི་ཅིན་ཕིང་གིས་ནན་གྱིས་བསྟན་དོན། ད་ཐེངས་ཀྱི་འཚམས་འདྲི་དུས་ཡུན་རིང་པོ་མེད་ཀྱང་ང་ཚོས་འབྲེལ་འདྲིས་གང་ལེགས་བྱས་པས་ཐུན་མོང་གི་ངོས་འཛིན་གལ་ཆེན་མང་པོ་བྱུང་ཡོད། ང་ཚོས་དུས་རབས་གསར་པའི་ནང་དུ་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བཙུགས་ནས་རྒྱལ་ཁབ་གཉིས་ཀྱི་འབྲེལ་བ་སྔར་བྱུང་མྱོང་མེད་པའི་མཐོ་ཚད་གསར་པར་སླེབས་པར་སྐུལ་འདེད་གཏོང་རྒྱུའི་ཐག་བཅད་པ་དང་། ཀྲུང་གོ་དང་ཧང་ག་རི་རྒྱལ་ཁབ་གཉིས་ཀྱི་འདུ་ཤེས་འདྲ་མཚུངས་ཡིན་པ་དང་ཚང་མས་རང་བཙན་རང་བདག་ལ་བརྩི་མཐོང་བྱེད་ཀྱི་ཡོད། ངས་ཙུང་ལི་ཨོའར་པན་དང་འབྲེལ་གཏུག་དམ་ཟབ་བྱས་ནས་རྒྱལ་ཁབ་གཉིས་པོའི་མཛའ་གྲོགས་རྒྱུན་འཛིན་བྱ་རྒྱུར་སྣེ་ཁྲིད་དང་། ཐུན་མོང་ཐོག་འབད་བརྩོན་བྱས་ནས་ང་ཚོར་བྱུང་བའི་ཐུན་མོང་གི་ངོས་འཛིན་དེ་ཅི་མ་ཅི་བཞིན་དུ་མཉམ་ལས་གྲུབ་འབྲས་སུ་བསྒྱུར་ཏེ། རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་བསྐྲུན་རྒྱུའི་རེ་སྒུག་བྱེད་ཀྱི་ཡོད་པ་དང་། ཀྲུང་གོ་དང་ཧང་ག་རིའི་འབྱུང་འགྱུར་ལ་ཡིད་ཆེས་ཆེན་པོ་ཡོད་ཅེས་བསྟན།