རྐང་ཚ་རྫོང་གིས་སྐྱེ་ཁམས་ཁོར་ཡུག་སྲུང་སྐྱོབ་འཛུགས་སྐྲུན་ལ་སྐུལ་འདེད་ནན་མོ་བཏང་།

རྩོམ་སྒྲིག སངས་རྒྱས་སྐྱིད། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། རིན་ཆེན་ཚེ་རིང་།

ཉེ་ཆར། མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གིས“སྔོ་ཞིང་དྭངས་པའི་རི་ཆུ་ནི་ནོར་བུ་ཡིན”ཞེས་པའི་འཕེལ་རྒྱས་འདུ་ཤེས་རྒྱུན་འཁྱོངས་བྱས་ཏེ། སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་ནན་མོ་དང་སྐྱེ་ཁམས་ཐོན་ཁུངས་སྲུང་སྐྱོབ་ལམ་སྲོལ་འཐུས་ཚང་དུ་བཏང་། སྐྱེ་ཁམས་སྲུང་སྐྱོབ་ལམ་སྲོལ་འཛུགས་སྐྲུན་དང་སྐྱེ་ཁམས་ཁོར་ཡུག་ཕྱོགས་བསྡུས་བཅོས་སྐྱོང་། སྐྱེ་ཁམས་ཐོན་ལས་འཕེལ་རྒྱས་བཅས་ཀྱི་ཐད་ཤུགས་ཆེ་རུ་བཏང་སྟེ། རྒྱལ་ཁབ་ཀྱི་སྐྱེ་ཁམས་འཐབ་ཇུས་དང་རྒྱལ་ཁབ་སྤྱི་གླིང་འཛུགས་སྐྲུན་དོན་ཐོག་ཏུ་འཁྱོལ་ནས། རྒྱལ་ཁབ་སྤྱི་གླིང་དཔེ་སྟོན་ཁུལ་བསྐྲུན་རྒྱུར་སྐུལ་འདེད་བཏང་།

སྐྱེ་ཁམས་ཀྱི“དགེ་མཚན་”སྲ་བརྟན་དུ་བཏང་། མུ་རིའི་གཏེར་ཁུལ་གྱི་སྤྱང་ཚང་གཏེར་ཁུལ་དང་པོ་དང་། དེ་བཞིན་མདོ་ལ་རིང་མོའི་ལྷོ་འདབས་ཀྱི་མཚོ་བྱང་ཡུག་ཁུལ་གྱི་རྐང་ཚའི་སྐྱེ་ཁམས་ཁོར་ཡུལ་ཕྱོགས་བསྡུས་བཅོས་སྐྱོང་གི་གྲུབ་འབྲས་མུ་མཐུད་དུ་བརྟན་པོར་བཏང་སྟེ། རྩྭ་ཐང་ཉམས་གསོ་དང་ལྗང་མདོག་ཁོར་ཡུག ནད་འབུའི་གནོད་འཚེ་འགོག་བཅོས། ལོ་རྒྱུས་ཀྱི་ཤུལ་ལྷག་གཏེར་རི་བཅོས་སྐྱོང་། ཆུ་བོའི་བཞུར་རྒྱུན་བཅོས་སྐྱོང་སོགས་ཀྱི་རྣམ་གྲངས་གོ་རིམ་ལྡན་པའི་ངང་སྐུལ་འདེད་བྱས་ཤིང་། ཆུ་བོ་དང་མཚེའུ་ཡི་“སྦགས་བཙོག་བཞི་གཙང་སེལ།”བྱེད་པ་བཅས་ཀྱི་བྱ་སྤྱོད་ལ་སྐུལ་འདེད་གཏིང་ཟབ་བྱས་ཏེ། ཞིང་འབྲོག་པས་བྱི་བའི་གནོད་འཚེ་འགོག་སྲུང་དང་མེ་སྐྱོན་སྔོན་འགོག་སོགས་ཀྱི་ལས་དོན་ཡག་པོ་སྒྲུབ་པར་དྲིལ་སྒྲོག་དང་ཁྲིད་སྟོན་བྱས། ཆུ་（མཚེའུ）དཔོན་ལམ་ལུགས་དང་ནགས（རྩྭའི）དཔོན་ལམ་ལུགས་གཏིང་ཇེ་ཟབ་ཏུ་བཏང་སྟེ། སྐྱེ་ཁམས་མ་ལག་གཙང་སྒྱུར་དང་སྲུང་སྐྱོབ་བྱ་རྒྱུར་ཤུགས་བསྣན་ཞིང་། སྐྱེ་དངོས་སྣ་མང་རང་བཞིན་ལ་སྲུང་སྐྱོབ་བྱེད་པར་སྐུལ་འདེད་བཏང་ནས། མི་དང་རང་བྱུང་ཁམས་འཆམ་མཐུན་མཉམ་གནས་ཡོང་བར་བྱས།

“སྦགས་བཙོག་འགོག་པ་”གཙོ་གནད་དུ་བཟུང་སྟེ་སྐུལ་སྤེལ་བཏང་། “སྦགས་བཙོག་ཆེན་པོ་གསུམ”འགོག་བཅོས་དང་འགག་སྒྲོལ་བྱེད་པ་ནས་མགོ་བརྩམས་ཏེ། ས་རྡུལ་འཚུབ་པ་དང་ཕྱི་ནས་དངོས་རྫས་བསྲེགས་པ། བཟའ་སྣུམ་གྱི་དུ་བ་སོགས་ཀྱི་དོ་དམ་ཚོད་འཛིན་བྱེད་ཤུགས་ཆེ་རུ་བཏང་སྟེ། ཡུལ་གྲོང་གི་གད་སྙིགས་རིགས་དབྱེ་དང་འགྱིག་བཟོ་བཀག་འགོག གསང་སྤྱོད་ཁང་སོགས་ཀྱི་ཆེད་དོན་བྱ་སྤྱོད་ལ་སྐུལ་འདེད་བཏང་། བཏུང་བྱའི་ཆུ་ཁུངས་ལ་སྲུང་སྐྱོབ་བྱ་རྒྱུར་ཤུགས་ཆེ་རུ་བཏང་བ་དང་། ལྟ་སྐུལ་དོ་དམ་བྱ་ཡུལ་གྱི་གཙོ་གནད་མཐའ་འཁོར་གྱི་གཤིན་སའི་ཁོར་ཡུག་སྤུས་ཚད་ལ་ལྟ་ཞིབ་ཚད་ལེན་བྱས་ཤིང་། བཙོག་ཆུ་དང་གནོད་ལྡན་གད་སྙིགས་ཀྱིས་གཤིན་སར་སྦགས་བཙོག་བཟོ་བ་སྔོན་འགོག་བྱས་པར་མ་ཟད། འབྲེལ་ཡོད་སྨན་བཅོས་སྙིགས་རྫས་དང་། རིམས་ནད་དང་འབྲེལ་བའི་གད་སྙིགས་ལ་གནོད་མེད་ཅན་གྱི་གཙང་སེལ་བྱས་ཏེ། སྐྱེ་ཁམས་ཁོར་ཡུག་གི་གཤིན་ས་འགན་ལེན་བྱས།

“སྐྱེ་ཁམས་”འཛུགས་སྐྲུན་ལམ་སྲོལ་འཐུས་ཚང་དུ་བཏང་། དྲ་མིག་ཅན་གྱི་ཁོར་ཡུག་ལྟ་སྐུལ་དོ་དམ་ལག་བསྟར་ཇུས་གཞི་ཞིབ་ཚགས་བཟོས་ཏེ། སྐྱེ་ཁམས་དཔལ་ཡོན་འཛུགས་སྐྱོང་གི་འགན་འཁྲིའི་ལམ་སྲོལ་དང་ཞིང་འབྲོག་ཁུལ་གྱི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཕན་ནུས་ལམ་སྲོལ་ཆ་ཚང་འཐུས་ཚང་དུ་བཏང་བ་དང་། སྐུལ་འདེད་གཏོང་བའི་བརྒྱུད་རིམ་ཁྲོད། རྫོང་དང་ཡུལ་ཚོ་རིམ་པ་གཉིས་ཀྱི་ཏང་སྲིད་ཀྱི་འགན་འཁུར་བ་གཙོ་བོས་སྐྱེ་ཁམས་ཁོར་ཡུག་སྲུང་སྐྱོང་གི་འགན་འཁུར་མཁན་དང་པོ་བྱེད་པ་དོན་འཁྱོལ་ནན་མོ་བྱས་ཏེ།“རྫོང་ལ་མགོ་ཁྲིད་ཚོ་ཆུང་ཡོད་པ་དང་ཡུལ་ཚོ་ལ་གཞུང་ལས་ཁང་ཡོད་པ། སྡེ་བ་ལ་ལས་དོན་རུ་ཁག་ཡོད་པ”བཅས་ཀྱི་སྐྱེ་ཁམས་སྲུང་སྐྱོབ་ལམ་སྲོལ་བཙུགས།