ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག【ཁག28པ།】

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་བོད་སྐད་རླུང་འཕྲིན། བཤེར་འབེབས། རིན་ཆེན་ཚེ་རིང་།

དོན་ཚན་བརྒྱ་དང་སོ་གསུམ་པ། གཞུང་དོན་སྒྲུབ་སྒོ་སྤེལ་ནས་ཁ་ཟས་སྤྱོད་པ་དང་སྡེ་ཚན་གྱི་ཟ་ཁང་གི་ཁ་ཟས་སྤྱོད་པའི་དོ་དམ་ལས་དོན་ཁྲོད་དྲིལ་སྒྲོག་སློབ་གསོ་དང་ལྟ་སྐུལ་དོ་དམ་གྱི་འགན་འཁྲི་མ་བསྒྲུབས་པའམ་ཡང་ན་ཡང་དག་པར་མ་བསྒྲུབས་པས། ཁ་ཟས་འཕྲོ་བརླག་བཏང་ནས་ཤུགས་རྐྱེན་ངན་པ་ཚབས་ཆེན་བཟོས་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

དོན་ཚན་བརྒྱ་དང་སོ་བཞི་པ། སྒྲིག་གཞིའི་སྒྲིག་ཁོངས་ཀྱི་ལས་དོན་ཁྲོད་གཤམ་གསལ་བྱ་སྤྱོད་གང་རུང་ཞིག་ཡོད་དེ། ཤུགས་རྐྱེན་ངན་པའམ་ཡང་ན་ངན་འབྲས་ཚབས་ཆེན་བཟོས་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ། ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་ཙམ་ཡིན་རིགས་ལ། ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ་སྟེ།

(གཅིག) “གཏན་འཁེལ་གསུམ་”གྱི་གཏན་འབེབས་ཁྱབ་ཁོངས་ལས་བརྒལ་ནས་རང་དགར་འགན་འཁྲི་ལེགས་སྒྲིག་དང་། སྒྲིག་གཞི་འཛུགས་པ། མགོ་ཁྲིད་ཀྱི་གནས་གྲངས་ཞིབ་བཤེར་གཏན་འཁེལ། མི་སྣ་བཀོད་སྒྲིག་བཅས་བྱས་པ།

(གཉིས) ས་གནས་ཀྱི་སྒྲིག་གཞི་འཛུགས་པར་ཁྲིམས་འགལ་གྱིས་ཐེ་གཏོགས་བྱས་པ།

(གསུམ) སྒྲིག་གཞིའི་སྒྲིག་ཁོངས་དོ་དམ་གྱི་གཏན་འབེབས་དང་འགལ་བའི་བྱ་སྤྱོད་གཞན་དག

དོན་ཚན་བརྒྱ་དང་སོ་ལྔ་པ། ཡིག་སྐུར་ངོ་བཅར་ལས་དོན་ཁྲོད་གཤམ་གསལ་བྱ་སྤྱོད་གང་རུང་ཞིག་ཡོད་དེ། ཤུགས་རྐྱེན་ངན་པའམ་ཡང་ན་ངན་འབྲས་ཚབས་ཆེན་བཟོས་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ། ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་ཙམ་ཡིན་རིགས་ལ། ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ་སྟེ།

(གཅིག) གཏན་འབེབས་ལྟར་ཡིག་སྐུར་ངོ་བཅར་གྱི་དོན་དག་བདག་སྤྲོད་དང་སྒྲུབ་གཉེར་མ་བྱས་པ།

(གཉིས) གཞི་ཁྱོན་རང་བཞིན་གྱི་མཉམ་སྡེབ་ངོ་བཅར་སོགས་ཐག་གཅོད་ནུས་ལྡན་མ་བྱུང་བས་གནས་ཚུལ་རྒྱ་ཆེར་སོང་བ།

(གསུམ) ཏང་ཨུ་དང་སྲིད་གཞུང་གི་ཡིག་སྐུར་ངོ་བཅར་སྡེ་ཁག་གིས་བཏོན་པའི་ལས་ཀ་ལེགས་བཅོས་དང་སྲིད་ཇུས་འཐུས་ཚང་དུ་གཏོང་རྒྱུ་སོགས་ཀྱི་གྲོས་འགོར་མཐོང་ཆེན་བྱ་རྒྱུ་མ་འདང་བ་དང་དོན་འཁྱོལ་ནུས་ལྡན་མ་བྱས་པས། གནད་དོན་ཡུན་རིང་ཐག་གཅོད་མི་ཐུབ་པར་གྱུར་པ།

(བཞི) ཡིག་སྐུར་ངོ་བཅར་ལས་ཀའི་འགན་འཁྲི་མ་བསྒྲུབས་པའམ་ཡང་དག་པར་མ་བསྒྲུབས་པའི་བྱ་སྤྱོད་གཞན་དག 

འགན་འཁྲི་མ་བསྒྲུབས་པའམ་ཡང་དག་པར་མ་བསྒྲུབས་པས། ཡིག་སྐུར་ངོ་བཅར་དོན་དག་བྱུང་བ་དང་། ཤུགས་རྐྱེན་ངན་པའམ་ཡང་ན་ངན་འབྲས་ཚབས་ཆེན་བཟོས་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ། གོང་གསལ་ནང་གསེས་དོན་ཚན་གྱི་གཏན་འབེབས་ལྟར་ཐག་གཅོད་བྱ་རྒྱུ།