བོད་རིགས་ན་གཞོན་ཨོ་རྒྱན། ཉིང་རྡུལ་རིམ་པའི་ཚ་ལ་རྒྱག་མཁན།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། ཀྲུང་དབྱང་བརྙན་འཕྲིན་གསར་འགྱུར། བཤེར་འབེབས། རིན་ཆེན་ཚེ་རིང་།

ཁོ་ནི་ལོ་ན24ཅན་གྱི་ཉིང་རྡུལ་རིམ་པའི་ཚ་ལ་རྒྱག་མཁན་ཞིག་ཡིན་ཏེ། ཉིང་རྡུལ་ས་ཚིགས་ཀྱི“འཕར་རྩ་ཆེན་མོ”རྒྱུད་མཐུད་བྱེད་པ་ནི་ཁོའི་འགན་འཁྲི་ཡིན། ཁོའི་མཚན་བྱང་ཨང་རྟགས་དེ་རྒྱལ་ཁབ་ཀྱི་གཙོ་གནད་ལས་གྲྭ་སྟེ“ཧྭ་ལུང་དང་པོའི”ལྕགས་མདོང་སྟེང་དཔར་ཡོད། ཀྲུང་དབྱང་རྒྱང་སྒྲོག་བརྙན་འཕྲིན་གྱི་ལེ་ཚན་ཞིག་ཏུ་ཉེ་ལམ་《ཏང་གི་བློ་སེམས་བདེ་མོ་བྱོས། སྟོབས་ལྡན་རྒྱལ་ཁབ་བསྐྲུན་པར་ང་རང་ཡོད》ཅེས་པའི་དངོས་ཟིན་གློག་བརྙན་ཐུང་གྲས་ཤིག་ཏུ་བོད་རིགས་ན་གཞོན་ཨོ་རྒྱན་གྱི་གཏམ་རྒྱུད་བརྗོད་ཡོད།

ཉིང་རྡུལ་རིམ་པའི་ཚ་ལ་རྒྱག་མཁན་ཞེས་པ་ནི་རྒྱལ་ཁབ་ཉིང་རྡུལ་བདེ་འཇགས་ཅུ་ཡིས་ཆེད་དོན་ཞིབ་དཔྱད་བྱས་པའི་ཆེད་ལས་མི་སྣ་ཡིན། ཨོ་རྒྱན་ནི་ཀྲུང་གོ་ཉིང་རྡུལ་ཚོགས་པའི་ཉིང་རྡུལ་རིམ་པའི་ཚ་ལ་རྒྱག་མཁན་ཞིག་ཡིན་ལ། “རྒྱལ་ཡོངས་ཀྱི་ལག་རྩལ་མཁས་ཅན”གྱི་མཚན་སྙན་ཐོབ་ཡོད། ཁོ་རང1999ལོར་སི་ཁྲོན་རྔ་པ་བོད་རིགས་ཆའང་རིགས་རང་སྐྱོང་ཁུལ་ཁྲོ་ཆུ་རྫོང་དུ་སྐྱེས་པ་དང་། ཁོ་རང་སྐྱེས་སའི་ས་ཆ་དེ་ནི་སྔོན་ཆད་རྒྱལ་ཁབ་རིམ་པའི་དབུལ་ཕོངས་རྫོང་ཞིག་ཡིན།  ཕ་མ་ཡུན་རིང་ཕྱི་ལ་ལས་ཀ་བྱེད་དུ་སོང་བའི་དབང་གིས། ལོ་ན་ཆུང་བའི་སྐབས་སུ། ཨོ་རྒྱན་གྱིས་རྒྱུན་དུ་སློབ་གྲྭ་གྲོལ་རྗེས་སྤོ་བོ་དང་རྨོ་བོར་ནོར་འཚོ་རོགས་བྱས། “སྐབས་དེ་དུས་གྲོང་ཚོའི་ཡུལ་མི་རྣམས་ཀྱིས་གླ་ཆ་མཐོན་པོ་སྤྲད་དེ་ས་ཆ་གཞན་གྱི་བཟོ་པ་ཕྱུགས་རར་ཚ་ལ་རྒྱག་པར་གདན་འདྲེན་བྱེད་བཞིན་ཡོད། ངས་རྟག་ཏུ་རྒྱང་རིང་ལ་བལྟས་ནས ‘གལ་སྲིད་ངས་ཚ་ལ་རྒྱག་ཤེས་ན་ཅི་མ་རུང་།’ དེ་ལྟར་བྱས་ན་རང་ཉིད་ཀྱིས་ཕྱུགས་ར་བསྐྲུན་ཐུབ་ཀྱི་རེད”ཅེས་བསམ། དེ་ནས་བཟུང་ཚ་ལ་རྒྱག་མཁན་ཞིག་བྱེད་པ་ནི་ཁོའི་ཆུང་དུས་ཀྱི་ཕུགས་བསམ་དུ་གྱུར།

 དམའ་འབྲིང་མཐར་ཕྱིན་རྗེས་ཁྱིམ་ཚང་གི་ཁུར་པོ་ཡང་དུ་གཏོང་ཆེད་ཨོ་རྒྱན་སློབ་གྲྭ་འགྲོ་ན་མ་འདོད། སྐབས་ལེགས་པ་ཞིག་ལ་ས་གནས་དེ་གའི་སྲིད་གཞུང་གིས་བོད་རིགས་ས་ཁུལ་གྱི་མཐོ་འབྲིང་མ་བཏོན་པའི་དམའ་འབྲིང་མཐར་ཕྱིན་སློབ་མར་ལོ་གསུམ་སློབ་ཡོན་མི་དགོས་པར་འབྲིང་རིམ་ལས་རིགས་སློབ་གསོ་མྱོང་བའི་སྲིད་ཇུས་བཏོན་པ་དང་། ཁོས་ཁྲེན་ཏུའུ་གྲོང་ཁྱེར་ལག་རྩལ་སློབ་གླིང་གི་ཚ་ལའི་ཆེད་ལས་ལ་བདེ་བླག་ངང་རྒྱུགས་འཕྲོད།

“ཚ་ལ་རྒྱག་པའི་ཆེད་ལས་སྦྱངས་རྗེས། ང་ལ་འགྱུར་ལྡོག་ཧ་ཅང་ཆེན་པོ་བྱུང་། སྔོན་ཆད་འཚུབ་ཆ་ཆེ་བའི་མི་ཞིག་ཡིན། རྗེས་སུ་རིམ་བཞིན་བརྟན་བརླིང་གི་གཤིས་ཀ་ཞིག་ཆགས”ཞེས་བཤད། སློབ་གྲྭར་སྡོད་རིང་། ཨོ་རྒྱན་གྱིས་ཉིན་རེར་ཆུ་ཚོད15ཡས་མས་ལ་སྦྱོར་བརྡར་བྱེད་བཞིན་ཡོད། གཟའ་འཁོར་གཅིག་གི་སྦྱོང་བརྡར་ཉིན་དྲུག་དང་ཕྱེད་ཀ་ལས་མི་ཉུང་། 2018ལོར་ལོ19ལ་སླེབས་པའི་ཨོ་རྒྱན་ལ་སི་ཁྲོན་ཞིང་ཆེན་གྱི“ལག་ཤེས་པའི”འགྲན་བསྡུར་ཁྲོད་བྱ་དགའ་ཨང་གསུམ་པ་ཐོབ། ཚ་ལ་ལ་བཅངས་པའི་དགའ་ཞེན་གྱིས་ལོ་གསུམ་གྱི་སློབ་ཡོན་མི་དགོས་པའི་སློབ་གསོ་མཇུག་སྒྲིལ་རྗེས། ཨོ་རྒྱན་གྱིས་རང་གིས་འགྲོ་སོང་བཏང་ནས་ཆེད་ཚན་སློབ་ཆེན་ལ་རྒྱུགས་བླངས་པ་དང་། མུ་མཐུད་དུ་ཚ་ལའི་སྐོར་ལ་སློབ་སྦྱོང་བྱས།

2021ལོར་ཨོ་རྒྱན་སློབ་གྲྭ་ནས་མཐར་ཕྱིན་རྗེས། ཀྲུང་གོ་ཉིང་རྡུལ་ཚོགས་པར་ལས་ཀ་བྱེད་པར་ཞུགས། ཉིང་རྡུལ་གློག་ནི་དྭངས་གཙང་གི་ནུས་ཁུངས་གསར་པ་ཞིག་ཡིན། ཡིན་ནའང་། ཉིང་རྡུལ་ས་ཚིགས་ཀྱི་དངོས་པོ་ནམ་ཞིག་ཕྱིར་ཤོར་ཚེ། དེའི་མཇུག་འབྲས་ནི་བློ་ཡུལ་ལ་ཤོང་མི་ཐུབ་པ་ཞིག་ཡིན། ཉིང་རྡུལ་གློག་ཁང་དུ་རིང་ཚད་སྤྱི་ལེ200ལྷག་ཡོད་པའི་སྦུབས་ལམ་ཞིག་ཡོད་དེ། དེ་ནི་ཉིང་རྡུལ་འགྱུར་འབྱུང་གི“སྙིང་”ལྟ་བུའི་འགྱེད་འཕྲོ་མཐོན་པོ་དང་། བཞུར་ཚད་མཐོན་པོ། དྲོད་ཚད་མཐོན་པོ། རླུང་གནོན་མཐོན་པོ་བཅས་དང་འབྲེལ་བ་དམ་པོ་ཡོད། དེ་ལས་ཀྱང་སྦུབས་ལམ་དེ་ལ་ཚ་ལ་རྒྱག་པ་ནི་ཅི་འདྲའི་དཀའ་ཁག་ཆེ་བའི་ལས་ཞིག་ཡིན་པ་ཤེས་ཐུབ།

ཉིང་རྡུལ་རིམ་པའི་ཚ་ལ་རྒྱག་མཁན་ནི་ཉིང་རྡུལ་གློག་ཁང་གི་“འཕར་རྩ་ཆེན་པོ་”མཐུད་པའི་མི་ཡིན་པའི་ཆ་ནས། ལས་གནས་སུ་ཞུགས་པའི་ཐོག་མའི་དུས་སུ་དགེ་རྒན་ཞིག་གིས་ཁོ་ལ་ “ཉིང་རྡུལ་གློག་ཁང་དུ་ལས་ཀ་བྱེད་པར་སྐྱོན་ཏོག་ཙམ་བྱེད་མི་རུང་། འདི་ནི་ལས་ཀ་ཙམ་ཞིག་མ་ཡིན་པར། བུ་རབས་ཚ་རྒྱུད་ཀྱི་བདེ་འཇགས་དང་འབྲེལ་བ་ཡོད།”ཅེས་བཤད།

ལག་རྩལ་དེ་ལས་མང་བ་ཁོང་དུ་ཆུད་ཐུབ་ཆེད། ཨོ་རྒྱན་གྱིས་དུས་རྒྱུན་དུ་དཀའ་ཚད་ཆེ་བའི་ཚ་ལ་རྒྱག་སྟངས་ལ་སློབ་སྦྱོང་བྱེད།  “སྦུ་གུ་ཕྲ་མོ་གཉིས་ལ་ཚ་ལ་རྒྱག་པར་དཀའ་ཁག་ཆེན་པོ་འདུག གལ་ཏེ་གློག་རྒྱུན་ཆེ་དྲགས་ན་དཀྱིལ་གྱི་ཁུང་བུ་ཆུང་ཆུང་གི་ཁ་རུབ་འགྲོ། གློག་རྒྱུན་ཆུང་དྲགས་ན་ཚ་ལ་རྒྱག་མི་ཐུབ། ངས་རྒྱུན་དུ་ཚངས་ཐིག་ཧའོ་སྨི3ཅན་གྱི་སྦུ་གུ་ཆུང་བ་སྤྱད་དེ་ཚ་ལ་རྒྱག་པའི་སྦྱོང་བརྡར་བྱས་པ་ཡིན། སྦུ་གུའི་ཁུང་བུའི་ཚངས་ཐིག་ལ་ཧའོ་སྨི0.8ལས་མེད།”

ཁོས་ད་དུང་“ལག་པ་གཡས་གཡོན་གཉིས་ཀྱིས་ཚ་ལ”བྱེད་ཐུབ། དེ་ནི་ཁྱད་དུ་འཕགས་པའི་ལག་རྩལ་ཞིག་ཡིན། སྤུས་དག་པའི་ཉ་ཁྲབ་ཀྱི་ཚ་ལ་འདིའི་གྲལ་འགྲིག་པའི་ཚ་ལའི་རྗེས་ཤུལ་ལས་ཚ་ལ་རྒྱག་པའི་བརྒྱུད་རིམ་ཁྲོད་ཀྱི་ཚ་ལའི་ཆ་སྙོམས་དང་འགྲོས་ཚད་ཀྱི་མཐུན་སྦྱོར་མཚོན།

ཚ་ལ་རྒྱག་མཁན་ཞིག་ཡིན་པའི་ངོས་ནས་རྟག་ཏུ་ཧ་ཅང་དོག་པའི་སྦུབས་ལམ་དུ་འཛུལ་དགོས་ལ། མེ་སྟག་གིས་འཚིག་རྨས་ཐེབས་པའང་བཟོད་བསྲན་བྱེད་དགོས། “ང་ཚོས་རྒྱུན་དུ་ཚ་ལ་རྒྱག་པའི་དྲོད་ཚད་སྤྱིར་བཏང་དུ་ཧྲེ་ཧྲི་ཏུའུ150ནས་ཧྲེ་ཧྲི་ཏུའུ250ཡིན། དབྱར་ཁར་ཁང་པའི་ནང་གི་དྲོད་ཚད་ཧྲེ་ཧྲི་ཏུའུ50འམ60ལ་སླེབས་སྲིད།”

ཉིན་རེ་བཞིན་སྦྱོང་བརྡར་བྱས་པ་བརྒྱུད། ཨོ་རྒྱན་གྱིས་ཟླ་བ་གསུམ་གྱི་དུས་ཚོད་སྤྱད་ནས་མི་གཞན་གྱིས་ཉུང་མཐར་ཡང་ལོ་གཅིག་དང་ཕྱེད་ཀའི་ནང་གཞི་ནས་ལེན་ཐུབ་པའི་རྒྱལ་ཁབ་ཉིང་རྡུལ་བདེ་འཇགས་ཅུའི་ཚ་ལ་རྒྱག་མཁན་གྱི་འོས་ཐོབ་བླངས།

 ད་ཆ། ཁོས་འཐབ་ཕྱོགས་དང་པོ་ནས་ལས་ཀ་ལས་ཏེ་ལོ་གཉིས་ཙམ་སོང་ལ། “རྒྱལ་ཁབ་ཀྱི་མིང་བྱང་”ཧྭ་ལུང་དང་པོའི་འཛུགས་སྐྲུན་ནང་ཞུགས། ཨར་ལས་བྱ་ཡུལ་དུ་ཉིང་རྡུལ་རིམ་པའི་ལྕགས་མདོང་གི་ཚ་ལ་རྒྱག་མཁན་གྱི་འགན་འཁུར། ཁོས་ཚ་ལ་བརྒྱབ་པའི་སྦུབས་ལམ་གཙོ་བོའི་ཚ་ལའི་བཟོ་རྩལ་གྱི་བླང་བྱ་ཧ་ཅང་མཐོ། མ་འོངས་པའི་ལོ་ངོ60ཡི་རིང་། དྲོད་ཚད་མཐོ་བ་དང་། རླུང་གནོན་མཐོ་བ། དྲག་འགུལ་ཆེ་བ་སོགས་ཀྱི་ཞིབ་བཤེར་དང་ལེན་བྱེད་དགོས།

ཨོ་རྒྱན་ལ་དཀའ་ངལ་ལ་མི་སྐྲག་པའི་སེམས་ཤིག་ཡོད་དེ། “ཧྭ་ལུང་དང་པོ”ཡི་རྣམ་གྲངས་ལེགས་གྲུབ་བྱུང་རྗེས་ཁོས་ཐེན་དབན་ཉིང་རྡུལ་གློག་ཁང་གི་འཛུགས་སྐྲུན་སྒྲིག་སྦྱོར་ལས་གྲྭའི་ནང་ཞུགས་རྒྱུའི་མིང་ཐོ་བཀོད། ཐེན་དབན་ཉིང་རྡུལ་གློག་ཁང་གི་ལྕགས་མདོང་གཙོ་བོའི་ལྕགས་མདོང་གི་མཐུག་ཚད་ལ་ཧའོ་སྨི70ཡོད། དེ་ནི་རྒྱལ་ནང་དུ་སྐྲུན་བཞིན་པའི་ཉིང་རྡུལ་གློག་འཕྲུལ་ཚན་ཁྲོད་ཀྱི་ཚ་ལ་རྒྱག་པའི་བཟོ་རྩལ་རྙོག་འཛིང་ཆེ་ཤོས་དང་ལག་རྩལ་དཀའ་ཚད་ཆེ་ཤོས་ཡིན་ལ། ཚ་ལ་རྒྱག་མཁན་རྩེ་གྲ་འདེམས་དགོས་ཀྱི་ཡོད། ཨོ་རྒྱན་གྱིས་བཤད་རྒྱུར། ཁོས་དབུལ་སྐྱོར་སྲིད་ཇུས་འོག་སློབ་སྦྱོང་ལེགས་གྲུབ་བྱུང་། ད་ལྟ་ཚ་ལ་རྒྱག་པའི་ལག་རྩལ་གྱིས་མེས་རྒྱལ་གྱི་ཉིང་རྡུལ་བཟོ་ལས་བྱ་གཞག་ལ་ལེགས་སྐྱེས་འབུལ་རྒྱུ་ཡིན་ཞེས་བཤད།