ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག【ཁག29པ།】

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། མཚོ་སྔོན་བོད་སྐད་རླུང་འཕྲིན། བཤེར་འབེབས། རིན་ཆེན་ཚེ་རིང་།

དོན་ཚན་བརྒྱ་དང་སོ་དྲུག་པ། ཏང་རྩ་འཛུགས་ལ་གཤམ་གསལ་བྱ་སྤྱོད་གང་རུང་ཞིག་ཡོད་ན། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལས། ཉེས་ཚབས་ཆེ་ཙམ་ཡིན་རིགས་ལ། ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ་སྟེ།

(གཅིག) ཏང་ཡོན་ལ་གྱོད་དོན་ཐོ་འགོད་བྱས་ནས་ཞིབ་བཤེར་བྱེད་རིང་། རང་དགར་གཞུང་དོན་དུ་འགྲོ་བ་དང་། རྒྱལ་ཁབ་(མངའ་ཁོངས།)ཕྱི་རུ་འགྲོ་བ། ལས་ཁུར་རྩ་དགོངས་ཞུ་བ་བཅས་ཀྱི་ཆོག་མཆན་བཀོད་པའམ་ཡང་ན་དེར་སྤེལ་རེས་བྱེད་པ་དང་། གོ་གནས་སྤར་བ། འགན་རིམ་སྤར་བ། སྔར་ལས་ལྷག་པར་བེད་སྤྱོད་དང་བྱ་དགའ་སྤྲོད་པའམ། ཡང་ན་ལས་འཁྱུར་ངལ་གསོའི་འགྲོ་ལུགས་འགྲིམས་པ།

(གཉིས) ཏང་ཡོན་ལ་བཅའ་ཁྲིམས་ལྟར་ཉེས་འགན་བདའ་འདེད་བྱས་རྗེས། གཏན་འབེབས་གཞིར་བཟུང་དེར་ཏང་གི་སྒྲིག་ཁྲིམས་ཀྱི་ཆད་པ་མ་བཅད་པ་དང་། ཡང་ན་ཏང་ཡོན་གྱིས་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་ལས་འགལ་བའི་བྱ་སྤྱོད་སྤེལ་རིགས་ལ། ཏང་གི་སྒྲིག་ཁྲིམས་ཀྱི་ཆད་པ་གཅོད་དགོས་ཀྱང་ཆད་པ་མ་བཅད་པ།

(གསུམ) ཏང་གི་སྒྲིག་ཁྲིམས་ཀྱི་ཆད་པ་གཅོད་རྒྱུའི་ཐག་བཅད་པའམ་ཡང་ན་བསྐྱར་བཤེར་ཞུ་འབུལ་བྱ་རྒྱུའི་ཐག་གཅོད་བྱས་རྗེས། ཐག་བཅད་པའི་ནང་གི་ཆད་པ་ཕོག་མཁན་གྱི་ཏང་གི་སྐྱིད་སྡུག་དང་། གོ་གནས། འགན་རིམ། ཐོབ་ཐང་སོགས་སྐོར་གྱི་དོན་དག་གཏན་འབེབས་གཞིར་བཟུང་དོན་འཁྱོལ་མ་བྱས་པ།

(བཞི) ཏང་ཡོན་ལ་ཏང་གི་སྒྲིག་ཁྲིམས་ཀྱི་ཆད་པ་ཕོག་རྗེས། དེར་ལས་བྱེད་པའི་དོ་དམ་དབང་ཚད་དང་རྩ་འཛུགས་ཀྱི་འབྲེལ་བ་གཞིར་བཟུང་ཆད་པ་ཕོག་མཁན་ཏང་ཡོན་ལ་རྒྱུན་ལྡན་གྱི་སློབ་གསོ་དང་། དོ་དམ། ལྟ་སྐུལ་བཅས་ཀྱི་ལས་དོན་མ་སྤེལ་བ།

དོན་ཚན་བརྒྱ་དང་སོ་བདུན་པ། འགན་འཁྲི་བདའ་འདེད་གང་བྱུང་དུ་བྱེད་པའམ་ཡང་ན་འགན་འཁྲི་བདའ་འདེད་ལས་དོན་ཁྲོད་འགན་འཁྲི་ནན་པོ་ཚབས་ཆེར་མ་འཁུར་བས། ཤུགས་རྐྱེན་ངན་པ་བཟོས་རིགས་ལ། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

དོན་ཚན་བརྒྱ་དང་སོ་བརྒྱད་པ། ལས་ཀར་འགན་མ་འཁུར་བའི་རྐྱེན་གྱིས་དོ་དམ་བྱ་ཡུལ་གྱི་མི་སྣ་ངོ་ལོག་བྲོས་བྱོལ་དུ་སོང་བའི་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

ལས་ཀར་འགན་མ་འཁུར་བའི་རྐྱེན་གྱིས་དོ་དམ་བྱ་ཡུལ་གྱི་མི་སྣ་བྲོས་བྱོལ་སོང་བ་དང་ཕྱིར་ཐོན་པའི་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལས། ཉེས་ཚབས་ཆེ་ཙམ་ཡིན་རིགས་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བའི་ཆད་པ་གཅོད་རྒྱུ།

དོན་ཚན་བརྒྱ་དང་སོ་དགུ་པ། སྡོམ་རྩིས་རྫུན་མ་བཟོས་ན། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལས། ཉེས་ཚབས་ཆུང་ཙམ་ཡིན་རིགས་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་ཙམ་ཡིན་རིགས་ལ་ཏང་ནང་གི་གོ་གནས་མེད་པར་བཟོ་བའམ་ཡང་ན་ཏང་ནང་བཞག་ནས་ལྟ་ཞིབ་བྱེད་པའི་ཆད་པ་གཅོད་རྒྱུ། ཉེས་ཚབས་ཆེ་རིགས་ལ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

སྡོམ་རྩིས་རྫུན་བཟོར་ལྟ་ཞིབ་མ་བྱས་པས་ངན་འབྲས་ཚབས་ཆེན་བཟོས་རིགས། དེའི་ཐད་ཀའི་འགན་འཁྲི་ཡོད་མཁན་དང་མགོ་ཁྲིད་ཀྱི་འགན་འཁྲི་ཡོད་མཁན་ལ་ཐ་ཚིག་སྒྲོག་པའམ་ཡང་ན་ཐ་ཚིག་ནན་པོ་སྒྲོག་པའི་ཆད་པ་གཅོད་རྒྱུ་དང་། ཉེས་ཚབས་ཆེ་རིགས་ལ་ཏང་ནང་གི་གོ་གནས་མེད་པར་བཟོ་བ་དང་། ཏང་ནང་བཞག་ནས་ལྟ་ཞིབ་བྱེད་པའམ་ཡང་ན་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།