ཞོགས་པའི་“ཇ་ཡུན”གསར་འགྱུར།

སྒྲིག་སྒྱུར།  སངས་དོན།   བཤེར་འབེབས།  རིན་ཆེན་ཚེ་རིང་།

གསར་འགྱུར་གལ་ཆེན།

• རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གི་གདན་ཞུས་ལྟར་དབྱི་རན་གྱི་ཙུང་ཐུང་ལའེ་ཤིས་ཟླ2ཚེས14ནས་ཚེས16ཉིན་བར་ཀྲུང་གོར་རྒྱལ་དོན་འཚམས་འདྲི་གནང་རྒྱུ་རེད།

• རིག་གནས་གནས་སྐོར་པུ་སོགས་སྡེ་ཚན་གསུམ་གྱིས་ཚེས12ཉིན་“འཛིན་མའི་སྤྲོ་གླུ”ཞེས་པའི་རྒྱལ་ཡོངས་ཀྱི་གྲོང་གསེབ་རིག་གནས་བྱེད་སྒོའི་ལོ་སྤེལ་མགོ་ཚུགས་ནས“དུས་བཞིའི་གྲོང་ཚོའི་མཚན་ཚོགས”དང་རྒྱལ་ཡོངས་འདུ་ར་ཞབས་བྲོ་འཁྲབ་སྟོན་སོགས་ཀྱི་བྱེད་སྒོ་སྤེལ་ནས་གྲོང་གསེབ་ཀྱི་སྤྱི་པའི་རིག་གནས་ཞབས་ཞུ་ཕུན་སུམ་ཚོགས་སུ་གཏོང་རྒྱུ་རེད།

• རྒྱལ་ཁབ་སྡོམ་རྩིས་ཅུ་ཡི་གྲངས་གཞི་ལས་མངོན་པ་ལྟར་ན། ད་ལོའི་ཟླ1དང་པོར་བཟོ་སྐྲུན་ལས་རིགས་དང་བཟོ་སྐྲུན་ལས་རིགས་མིན་པའི་ལས་ཞུགས་མི་སྣའི་སྟོན་གྲངས་ཟླ་བ་གོང་མ་ལས་བརྒྱ་ཆའི་གྲངས2.9དང3.8སོ་སོར་མཐོ་རུ་ཕྱིན་པ་དང་། ཁེ་ལས་སྣ་ཚོགས་ཀྱི་ལས་མི་སྤྱོད་ཚད་ཚང་མ་མཐོ་རུ་ཕྱིན་ཡོད་པ་རེད།

• ཀྲུང་དབྱང་དྲ་འཕྲིན་གཞུང་དོན་ཁང་གིས་དྲ་ཐོག་ཏུ“ཧུའུ་ག་གེ་མོའི་དོན་རྐྱེན”ལ་བརྟེན་ནས་དཀྲོག་གཏམ་བཟོ་བ་དང་། ངན་སེམས་བཅངས་ནས་ཚོང་གཉེར་འུད་སྒྲོག་བྱེད་པའི་བྱ་སྤྱོད་ལ་རྡུང་རྡེག་མཐའ་གཅིག་ཏུ་བཏང་བ་དང་། རིམ་རྩིས་བྱས་ན་ཁྲིམས་འགལ་སྒྲིག་འགལ་གྱི་རྩིས་ཐོའི་ཨང་གྲངས་1894ཐག་གཅོད་བྱས།

  
  

  
  

• ས་གནས་དེ་གའི་དུས་ཚོད་ཚེས11ཉིན། ཀྲུང་ཁྲེ་ཐང་ཧྲན་ཀུང་སིས་ཕོར་ཐིའུ་ཀལ་གྱི་པོ་འར་ཐུའུ་ལ་ས་འོག་ལྕགས་ལམ་མེ་འཁོར་ཐོག་མ་དེ་སྤྲད། དེ་ནི་རང་རྒྱལ་གྱི་གྲོང་ཁྱེར་ལྕགས་ལམ་འཁོར་རིགས་ཡོ་རོབ་མནའ་འབྲེལ་གྱི་རྒྱལ་ཁབ་ལ་ཕྱིར་གཏོང་བྱེད་ཐེངས་དང་པོ་རེད།

• ཀྲུང་གོ་ལུས་རྩལ་འདུམ་གཅོད་ཨུ་ཡོན་ལྷན་ཁང་ཚེས11ཉིན་པེ་ཅིང་དུ་བཙུགས་པ་རེད། འདི་ནི་རྒྱལ་ཡོངས་ཀྱི་ལུས་རྩལ་ཁྱབ་ཁོངས་ཀྱི་རྩོད་གཞི་ཆེད་དུ་ཐག་གཅོད་བྱེད་པའི་འདུམ་གཅོད་ལས་ཁུངས་གཅིག་པུ་ཡིན།

• ས་གནས་དེ་གའི་དུས་ཚོད་ཚེས12ཉིན་གྱི་ཕྱི་དྲོ། ས་ཡོམ་བྱུང་རྗེས་ཆུ་ཚོད150བརྒལ་བ་དང་། ཀྲུང་གོའི་རོགས་སྐྱོབ་རུ་ཁག་གིས་ཐུར་ཁེའི་ལྷོ་རྒྱུད་གྲོང་ཁྱེར་ཨན་ཐ་ཅི་ཡ་ནས་སླར་ཡང་སྲོག་ཉེན་ལས་ཐར་བའི་མི་སྣ་ཞིག་བསྐྱབས།

• ཚེས12ཉིན། ཀྲུང་གོ་སྲིད་གཞུང་གིས་ཐུར་ཁེར་རོགས་སྐྱོར་བྱས་པའི་ཡོམ་འགོག་རོགས་སྐྱོབ་དངོས་ཟོག་ཁག་གསར་པ་ཧྲང་ཧའེ་ནས་སྐྱེལ་མགོ་བརྩམས།

• ཐུར་ཁེ་དང་སི་རི་ཡ་སྲིད་གཞུང་། དེ་བཞིན་རོགས་སྐྱོབ་སྡེ་ཁག་གིས་ཡོངས་བསྒྲགས་བྱས་པའི་གྲངས་གཞིར་གཞིགས་ན། ཐུར་ཁེའི་ལྷོ་རྒྱུད་ཀྱི་ས་ཡོམ་དྲག་པོ་དེས་ཐུར་ཁེ་དང་སི་རི་ཡར་མི་ཁྲི2.8ལྷག་ཙམ་རྐྱེན་ལམ་དུ་ཤོར་ཡོད་པ་རེད།

སྤྱི་ཚོགས།

• མཁའ་རླུང་གྲང་མོས་དབུས་ཤར་རྒྱུད་ས་ཁུལ་ལ་མུ་མཐུད་དུ་ཤུགས་རྐྱེན་ཐེབས་ཀྱི་ཡོད་པ་དང་། དེ་རིང་དང་སང་ཉིན་གཉིས་ཀྱི་རིང་ལ། དབུས་ཤར་རྒྱུད་ཀྱི་ས་ཁུལ་མང་ཆེ་བར་དྲོད་ཚད4~8℃ཇེ་དམའ་རུ་འགྲོ་བཞིན་ཡོད་པ་དང་། འབྲི་ཆུའི་ལྷོ་རྒྱུད་དང་ཧྭ་ནན་བྱང་རྒྱུད་སོགས་ས་ཁུལ་ཁག་ཏུ་དྲོད་ཚད་10℃ཡན་ཇེ་དམའ་རུ་འགྲོ་བཞིན་ཡོད།

  
  

  
  

• ས་གནས་དེ་གའི་དུས་ཚོད་ཀྱི་ཚེས12ཉིན། 2022--2023དུས་ཚིགས་ཀྱི་གངས་ཤུད་རི་འཛེག་གཞོན་ནུའི་འཛམ་གླིང་བུམ་པའི་རྐང་རྩེད་སྤོ་ལོའི་འགྲན་བསྡུར་མཇུག་འགྲིལ་ནས་ཀྲུང་གོའི་རུ་ཁག་ལ་གསེར་གྱི་རྟགས་མ་ལྔ་དང་། དངུལ་གྱི་རྟགས་མ་གཅིག   ཟངས་ཀྱི་རྟགས་མ་གསུམ་བཅས་ཀྱི་གྲུབ་འབྲས་བཟང་པོ་ཐོབ་ཡོད།

• ཚེས12ཉིན།  གློག་བརྙན《སའི་གོ་ལའི་འཁྱམ་པོ2》ཞེས་པའི་སྤ་སེ་བཙོང་ཚད་དུང་ཕྱུར36.51ཟིན་ནས། 《མཚོ་དམར་བྱ་སྤྱོད》ལས་བརྒལ་ནས་ནང་ལོག་གློག་བརྙན་ལོ་རྒྱུས་ཀྱི་སྤ་སེ་བཙོང་ཚད་ཀྱི་མདུན་གྲལ་བཅུ་པར་སླེབས་ཡོད།

• ཚེས12ཉིན་གྱི་དུས་ཚོད16:42སྟེང་། པེ་ཅིང་ཧྥང་ཧྲན་ཁུལ་དུ་ས་ཡོམ་རིམ་པ2.8བྱུང་པ་རེད། ཡོམ་ལྟེའི་ཉེ་འགྲམ་གྱི་ས་ཁུལ་ཁ་ཤས་ལ་ཡོམ་ཚོར་བྱུང་ཡོད། འཛུགས་སྐྲུན་ལ་གཏོར་བཤིག་དང་མི་སྣ་ཤི་རྨས་བྱུང་མེད།

• ཡུང་ཏིང་ཆུ་བོའི2023ལོའི་དཔྱིད་དུས་ཀྱི་སྐྱེ་ཁམས་གསབ་ཆུ་ཉིན་ཤས་གོང་ཕྱོགས་ཡོངས་ནས་སྤེལ་འགོ་ཚུགས་ཤིང་། པེ་ཅིང་དང་། ཐེན་ཅིན། ཧོ་པེ་བཅས་ས་ཁུལ་གྱི་ཆུ་ཁུངས་གསོ་འཁྱོངས་ཁུལ་གལ་ཆེན་ཞིག་ཡིན་པའི་ཡུང་ཏིང་ཆུ་བོ་འདི་ལོ་ཧྲིལ་པོར་ཆུ་ལམ་ཧྲིལ་པོར་ཆུ་ཡོད་པ་རེད།

• ལྟ་ཞིབ་ཚད་ལེན་བྱས་པའི་ཟིན་ཐོ་ལས་མངོན་པ་ལྟར་ན། མཚོ་སྔོན་པོའི་སྐྱེ་ཁམས་ཁོར་ཡུག་རིམ་བཞིན་ལེགས་སུ་ཕྱིན་པ་དང་། བཟའ་བཅའ་ཕུན་སུམ་ཚོགས་སུ་ཕྱིན་པ་དང་བསྟུན་ནས་ངང་སེར་ཁྲི1ལྷག་ཙམ་དུས་བྱ་ནས་རིམ་བཞིན་ས་གནས་དེ་གའི་བྱ་རུ་གྱུར་ཡོད་པ་རེད།

  
  

• ཏ་ལེན་མཚོ་དོན་ཅུ་ཡིས་མཚོ་འགྲུལ་གྱི་ཐ་ཚིག་བསྒྲགས་ནས་ཚེས13ཉིན་གྱི་ཆུ་ཚོད8པ་ནས་ཚེས17ཉིན་གྱི་ཆུ་ཚོད16བར། ཧོང་ཧེ་བྱང་རྒྱུད་ཀྱི་མཚོ་ཁོངས་ཁག་གཅིག་ལ་དངོས་སུ་མེ་མདའ་བརྒྱབ་ནས་སྦྱོང་བརྡར་བྱེད་རྒྱུ་ཡིན་པས་། མཚོ་འགྲུལ་བསྐྱོད་མི་ཆོག་པ་རེད།
  

• ཚན་རིག་རྟོག་ཞིབ་རུ་མིས་བོད་ལྗོངས་རྣམ་གླིང་རྫོང་གུང་ཐང་གནའ་ཤུལ་དུ།  ལོ3000གོང་གི་དཀར་ཆུའི་རིགས་ཀྱི་ལྷག་རོ་ཞིབ་དཔྱད་ཚད་ལེན་བྱས་པ་དེ་ནི་མཚོ་བོད་ས་མཐོའི་སྔ་དུས་ཀྱི་དཀར་ཆུའི་ཐོན་རྫས་འཛད་སྤྱོད་བྱེད་པའི་དཔང་རྟགས་ཤིག་རེད།

  
  

  
  

• ཧོ་ཧྥེ་སྤྱི་བདེས2022ལོའི་ས་གནས་དེ་གའི་ཕྲུ་གུའི་རྒྱུགས་ཆེ་བའི་མིང་ཁྱབ་བསྒྲགས་བྱས་པ་ལྟར་ན། “མུའུ་ཁྲིན”དང“མུའུ་ཡོ”སོགས་ཀྱི་ཚ་རླབས་ཆེས་ཆེ་བ་ཡིན།

སྲིད་ཇུས།

• པེ་ཅིང་གིས་གཏན་འབེབས་གསར་པ་བཏོན་ནས་རས་གུར་སྒར་སྡོད་བྱ་ཡུལ་དེ་ནགས་ཚལ་མེ་ཟོན་ཁུལ་དང་ཆུ་ལོག་སྔོན་འགོག་ཁུལ་དང་བར་ཐག་རིང་དུ་གཏོང་བ་དང་།  ད་ཡོད་ཀྱི་རྨོ་ཞིང་དང་རང་བྱུང་སྲུང་སྐྱོང་ཁུལ་གྱི་ལྟེ་བའི་སྲུང་སྐྱོང་ཁུལ་སོགས་བཟུང་སྤྱོད་བྱེད་མི་རུང་བའི་བླང་བྱ་བཏོན་པ་རེད།

• ཅང་སུའུ་ཡིས་ཤེས་ལྡན་མི་སྣའི་སྲིད་ཇུས་གསར་པ་ཁྱབ་བསྒྲགས་བྱས་ཏེ། ལས་གྲྭའི་མ་ལག་གི་གོ་མིང་ནང་གྲངས་འཛིན་དཔལ་འབྱོར་ལས་གྲྭའི་ཆེད་ལས་ཁ་སྣོན་བྱས། དེར་ས་ཁུལ་ཁག་སྦྲེལ་དང་མིས་བཟོས་རིག་ནུས། གྲངས་གཞི་ཆེན་པོ་སོགས་ཡན་ལག་ཆེད་ལས10ཚུད་ཡོད།

• ཀོང་ཤིས་ཀྱིས་བྱེད་ཐབས12བཏོན་ནས་ལས་ཞུགས་གང་ལེགས་བྱ་རྒྱུར་སྐུལ་འདེད་བཏང་བ་དང་།  མཚན་མོའི་དཔལ་འབྱོར་དང་ཚོང་ཁང་ཆུང་གྲས་སོགས་ཁྱད་ལྡན་གཉེར་སྐྱོང་འཕེལ་རྒྱས་གཏོང་རྒྱུར་སྐུལ་ལྕག་ཁ་གསལ་བྱས་ཡོད།

འཚོ་བའི་དྲན་སྐུལ།

• དེ་རིང་གི་གནམ་གཤིས།   ཤིན་ཅང་གི་བྱང་ཅང་བྱང་རྒྱུད་དང་། བོད་ལྗོངས་ཤར་རྒྱུད། ནུབ་བྱང་ས་ཁུལ་གྱི་དབུས་ཤར་རྒྱུད། ཧྭ་པེ་ལྷོ་རྒྱུད། ཧོང་ཧོའེ་ཤར་རྒྱུད་སོགས་ས་ཁུལ་ཁག་གཅིག་ཏུ་ཁངས་ཆུང་བ་ནས་འབྲིང་བའམ་ཡང་ན་ཆར་པ་འབབ་པ་དང་། བོད་ལྗོངས་ཀྱི་ཤར་ལྷོའི་རྒྱུད་དང་། ཧོང་ཧོའེ་ནུབ་རྒྱུད། ཅང་ཧོའེ་ཡི་ས་ཆ་མང་ཆེ་བ། ཅང་ཧན། འབྲི་ཆུའི་ལྷོ་རྒྱུད།ལྷོ ་ནུབ་ས་ཁུལ་གྱི་ཤར་རྒྱུད། ཧྭ་ནན་གྱི་ས་ཆ་མང་ཆེ་བར་ཆར་པ་ཆུང་བ་ནས་འབྲིང་བ་འབབ་རྒྱུ་རེད།