​ཤ་བོ་སྐྱབས་ཁུལ་ཡོངས་ཀྱི་ལས་རིགས་རྩལ་ནུས་འགྲན་སྡུར་ཆེན་མོར་ཞུགས་ཏེ་བཟོ་བོའི་སྙིང་སྟོབས་དར་སྤེལ་ཤུགས་ཆེན་བྱས་ནས་ལས་ཞུགས་ལས་གཏོད་ཀྱི་གཤིན་ས་གཏིང་ཟབ་ཏུ་བསྐྲུན་དགོས་པ་ནན་གྱིས་བསྟན།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། རིན་ཆེན་ཚེ་རིང་།

ཟླ8པའི་ཚེས14ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་ཁུལ་ཡོངས་ཀྱི་ལས་རིགས་རྩལ་ནུས་འགྲན་སྡུར་ཆེན་མོ་དང་ལག་ཤེས་བཟོ་རྩལ་པའི་བརྩམས་ཆོས་འགྲེམས་བསྡུར་བྱེད་སྒོར་ཞུགས་སྐབས་ངལ་རྩོལ་དཔེ་སྟོན་གྱི་སྙིང་སྟོབས་དང་ངལ་རྩོལ་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་ཤུགས་ཆེན་བཏང་ནས་ཡིད་ཆེས་བརྟན་གཏོང་དང་འདུ་ཤེས་བརྗེ་བསྒྱུར། དངོས་སྒྲུབ་སྔོན་བརྩོན་བཅས་བྱས་ཏེ་ནུས་ལྡན་འཇོན་མིའི་ལམ་བུའི་ནང་ཧུར་ཐག་སྒོས་ཞུགས་ནས་ལས་ཞུགས་དང་ལས་གཏོད་ཀྱི་གཤིན་ས་རྒྱུན་ཆད་མེད་པར་ཟབ་ཏུ་བཏང་ནས་རྒྱལ་སྤྱིའི་སྐྱེ་ཁམས་གནས་སྐོར་བྱ་ཡུལ་བསྐྲུན་རྒྱུར་རམ་འདེགས་བྱེད་དགོས་པ་ནན་གྱིས་བསྟན།

ཁུལ་སྤྱི་པའི་ལས་རིགས་རྩལ་ནུས་དངོས་སྦྱོང་རྟེན་གཞི་རུ་ཁུལ་ཡོངས་ཀྱི་ས་གནས་སོ་སོ་ནས་ཡོང་བའི་ཕུལ་བྱུང་རྩལ་ནུས་འཇོན་མིའི་འཇོན་ཐང་མངོན་པ་དང་རྩལ་ནུས་ངོམས། ཤ་བོ་སྐྱབས་འཚེམ་དྲུབ་བཟོ་རྩལ་དང་ཀོ་བཟོ་ལག་རྩལ། （ལུག་པགས་རི་མོ།） རྐོས་བཟོ་ལག་རྩལ། （རུས་རྐོས་དང་རྡོ་རྐོས།）སི་སྐུད་ཐང་ག  ཀྲུང་ལུགས་གཡོས་སྦྱོར། (ལུག་ཤ་བུབས་སྲེག)  བྱིས་སྙོར་བྱིས་གསོ།  བདེ་ཐང་སྨན་ཞབས། གངས་རིའི་སྣེ་ཁྲིད་པ། དེ་བཞིན་སྦྲ་ནག་དང་རྩག་པ་བཟོ་བ་སོགས་ཡུལ་དངོས་སུ་བསྐྱོད་དེ་འགྲན་སྡུར་གྱི་བདམས་ཐོན་པ་དང་དཔྱད་བསྡུར་པར་བརྗེ་རེས་གཏིང་ཟབ་བྱས་ཏེ་འགྲན་སྡུར་སྒྲིག་སྲོལ་དང་བརྩམས་ཆོས་བཟོ་རྩལ། གཟུགས་འདས་ཤུལ་བཞག་རིག་གནས་རྒྱུན་འཛིན་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་བྱས་པ་དང་། ཁྱབ་ཁོངས་མི་འདྲ་བའི་རྩེར་སོན་ལག་རྩལ་དང་གསར་གཏོད་གྲུབ་འབྲས་ལ་ལྟ་ཞིབ་བྱས་ཏེ་ཚང་མས་རྩལ་ནུས་མཁས་འགྱུར་ལག་ལེན་དང་རྩལ་ནུས་ཀྱིས་རྒྱལ་ཁབ་ལ་དྲིན་ལན་འཇལ་རྒྱུའི་བློ་བརྟན་འགྱུར་མེད་ཡིན་དགོས་པའི་སྐུལ་མ་གནང་། ཁོས་བསྟན་དོན། མཚོ་བྱང་གི་ལོ་རྒྱུས་དང་རིག་གནས་ཀྱི་རྨང་གཞི་ཟབ་མོ་ལྡན་པ་དང་། བཟོ་པོའི་སྙིང་སྟོབས་རྒྱུན་འཛིན་གྱི་ཡུན་རིང་བ། ཐོན་ལས་རྩལ་ནུས་རྨང་གཞི་བཟང་བ། རྩལ་ནུས་འཇོན་མི་དབྱར་མཚོ་རྒྱས་པ་ལྟར་ཐོན་ཡོད་པ། ལས་རིགས་རྩལ་ནུས་འགྲན་སྡུར་ཆེན་མོ་དང་ལག་ཤེས་བཟོ་རྩལ་པའི་བརྩམས་ཆོས་འགྲེམས་བསྡུར་བྱེད་སྒོ་གཉེར་བ་ནི་ཁུལ་ཡོངས་ཀྱི་རྩལ་ནུས་འཇོན་མིའི་དཔུང་ཁག་འཛུགས་སྐྱོང་ལ་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་ཡིན་པས། ཐེངས་འདིའི་འགྲན་སྡུར་ཆེན་མོ་གོ་སྐབས་སུ་བརྩིས་ནས“རྩལ་ནུས་ཀྲུང་གོའི་འགུལ་སྐྱོད”ལག་བསྟར་གཏིང་ཟབ་བྱས་ཏེ་བྱ་བའི་བྱ་ཐབས་རྒྱུན་ཆད་མེད་པར་གསར་གཏོད་དང་བྱ་བའི་ཕན་འབྲས་ཆེ་རུ་གཏོང་བ། བྱང་ཚད་མཐོ་བའི་རྩལ་ནུས་འཇོན་མི་དང་བཟོ་རྩལ་མཁས་ཅན་དེ་བས་མང་བ་གསོ་སྐྱོང་བྱས་ནས་སྤུས་ཚད་མཐོ་བའི་ལས་ཞུགས་སྐས་རིམ་གསར་པ་ཞིག་ཏུ་སླེབས་པར་སྐུལ་འདེད་གཏོང་རྒྱུར་འགན་ལེན་བརྟན་པོ་མཁོ་འདོན་བྱ་དགོས་ཟེར།

ཤ་བོ་སྐྱབས་ཀྱིས་བླང་བྱ་བཏོན་དོན། ས་གནས་དང་སྡེ་ཁག་སོ་སོས་སྲིད་ཇུས་དང་བྱེད་ཐབས་འཐུས་ཚང་དུ་གཏོང་དགོསོ་པ་དང་། མ་ལག་གི་ལམ་སྲོལ་འཐུས་ཚང་དུ་གཏོང་བ།  བྱེད་སྟངས་གསར་གཏོད་བྱེད་པ།  སྤུས་ཚད་མཐོར་གཏོང་སོགས་ཀྱི་ཐད་ནུས་པ་འདོན་པ་དང་བྱེད་ཐབས་དངོས་བཏོན་ནས་ཕན་འབྲས་བརྩོན་ལེན་བྱེད་དགོས་ལ། རྩལ་ནུས་འཇོན་མི་གསོ་སྐྱོང་དང་རྒྱབ་སྐྱོར་བྱེད་ཤུགས་སྔར་ལས་ཆེ་རུ་གཏོང་བ་དང་། རྩལ་ནུས་འཇོན་མིའི་དཔུང་ཁག་རྒྱུན་ཆད་མེད་པར་སྟོབས་ཆེར་གཏོང་བ། རྩལ་ནུས་འཇོན་མིའི་ཆུ་ཚད་རྒྱུན་མཐུད་སྒོས་མཐོ་རུ་གཏོང་བ། ཁུལ་ཡོངས་ཀྱི་ལས་ཞུགས་ལས་གཏོད་བྱ་བའི་མངོན་འགྱུར་ལ་མཆོང་སྐྱོད་གསར་བ་ཡོང་བར་སྐུལ་འདེད་བཏང་སྟེ“མཚོ་བྱང་ལྔ”འཛུགས་སྐྲུན་ལ་ཡུན་རིང་གི་སྒུལ་ཤུགས་འདོན་སྤྲོད་བྱེད་དགོས། ཁུལ་སློབ་གསོ་སྡེ་ཁག་གིས་ཐོན་སློབ་མཉམ་འདྲེས་དང་སློབ་ཁེ་མཉམ་ལས་གཏིང་ཟབ་ཏུ་བཏང་ནས་རྩལ་ནུས་འཇོན་མི་འཚར་ལོངས་ཡོང་བའི་བགྲོད་ལམ་རྒྱུན་ཆད་མེད་པར་རྒྱ་ཆེར་གཏོང་དགོས་པ་དང་། མཚོ་བྱང་བཟོ་བོའི་རིག་གནས་ཐོན་ལས་སྤྱི་གཉེར་ཁང་གི་རྒྱ་ཇེ་ཆེ་དང་སྟོབས་ཇེ་ཆར་བཏང་ནས་རིག་གནས་གསར་གཏོད་ཐོན་རྫས་གསར་སྤེལ་བྱེད་ཤུགས་ཆེ་རུ་བཏང་སྟེ་ལས་རིགས་སློབ་གྲྭའི་སློབ་མའི་ལས་ཞུགས་ཚད་རྒྱུན་ཆད་མེད་པར་མཐོ་རུ་གཏོང་དགོས། ཁུལ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་སྡེ་ཁག་གིས་སྤྱི་པའི་ལས་རིགས་རྩལ་ནུས་དངོས་སྦྱོང་རྟེན་གཞི་བེད་སྤྱོད་གང་ལེགས་བྱས་ཏེ་རྟེན་གཞིའི་དོ་དམ་གཉེར་སྐྱོང་བྱེད་ཤུགས་ཆེ་རུ་གཏོང་དགོས་ཤིང་། གཡོས་སྦྱོར་དང་འཚེམ་བཟོ། བརྐོ་བཟོ། རྡོ་བརྐོས། ཤིང་ལས་སོགས་ཀྱི་ལས་རིགས་དངོས་སྦྱོང་བྱེད་ཤུགས་ཆེ་རུ་བཏང་སྟེ་རོང་འབྲོག་མང་ཚོགས་དང་མཐོ་སློབ་མཐར་ཕྱིན་སློབ་མའི་ལས་ཞུགས་ལས་གཏོད་ནུས་པ་རྒྱུན་ཆད་མེད་པར་ཆེ་རུ་གཏོང་དགོས།   ཁུལ་རིག་གནས་ཡུལ་སྐོར་སྡེ་ཁག་གིས་གཟུགས་འདས་ཤུལ་བཞག་རིག་གནས་ཐོན་ལས་འཕེལ་རྒྱས་དང་སྟོབས་ཆེར་གཏོང་བར་འདེགས་སྐྱོར་བྱེད་དགོས་པ་དང་། ས་གནས་ཀྱི་འཇོན་མིར་རྒྱབ་སྐྱོར་དང་རོགས་སྐྱོར་བྱས་ཏེ་རྒྱུན་མཐུད་སྒོས་བཟོ་རྩལ་ཐོན་རྫས་ལས་སྣོན་གསོ་སྦྱོང་བྱེད་ཤུགས་ཆེ་རུ་གཏོང་བ་དང་རིག་གནས་གསར་གཏོད་ཐོན་རྫས་ཞིབ་འཇུག་གསར་སྤེལ་བྱེད་ཤུགས་ཆེ་རུ་བཏང་ནས་མང་ཚོགས་ཕྱུག་འགྱུར་ཡོང་འཕར་གྱི་ཐབས་ལམ་རྒྱུན་ཆད་མེད་པར་རྒྱ་སྐྱེད་གཏོང་དགོས། བཟོ་ཚོགས་སྡེ་ཁག་གིས་ལས་རིགས་སོ་སོའི་ལས་བཟོ་བར་ལས་རིགས་རྩལ་ནུས་གསོ་སྦྱོང་དང་རྩལ་ནུས་འགྲན་སྡུར་ཏན་ཏིག་ངང་སྤེལ་ནས་དམངས་འཚོའི་བདེ་སྐྱིད་རྒྱུན་ཆད་མེད་པར་ཆེ་རུ་གཏོང་བ་དང་རོང་འབྲོག་པའི་ལས་ཞུགས་བརྟན་པོ་ཡོང་བར་སྐུལ་འདེད་གཏོང་དགོས་ཟེར།

ཁུལ་གྱི་མགོ་ཁྲིད་ཚོ་ཅི་ཆང་ཞུགས།