ཤ་བོ་སྐྱབས་ཀྱིས་ཁུལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་ཚོགས་ཆེན་ཐོག་ཁུལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་སླར་ཡང་སྐས་རིམ་གསར་པར་སླེབས་རྒྱུར་སྐུར་སྐུལ་འདེད་གཏོང་དགོས་པ་ནན་གྱིས་བསྟན།

སྒྲིག་སྒྱུར། སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་ཚགས་པར། བཤེར་འབེབས། རིན་ཆེན་ཚེ་རིང་།

ཟླ10པའི་ཚེས23ཉིན། ཁུལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་ཚོགས་ཆེན་ནུབ་མཚོ་གྲོང་རྡལ་དུ་འཚོགས། ཁུལ་ཨུའི་ཧྲུའུ་ཅི་ཤ་བོ་སྐྱབས་ཚོགས་འདུར་ཞུགས་ཏེ་གསུང་བཤད་གནང་། ཁོང་གིས་ནན་གྱིས་བསྟན་དོན། ཏང་ལ་བཅངས་པའི་ལྷག་བསམ་རྣམ་དག་དང་། བྱ་གཞག་ལ་བཅངས་པའི་དད་སེམས་བརྟན་པོ། མི་དམངས་ལ་བཅངས་པའི་བརྩེ་སེམས་ཟབ་མོ་བཅས་ལ་བརྟེན་ནས་དྲང་སྲུང་གསར་གཏོད་དང་དངོས་སྒྲུབ་སྔོན་བརྩོན་བྱས་ཏེ། ཁུལ་ཡོངས་ཀྱི་བསམ་པའི་དཔལ་ཡོན་འཛུགས་སྐྱོང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་ཧུར་ཐག་བཏང་ནས་ཀྲུང་གོའི་རྣམ་པའི་དེང་རབས་ཅན་གྱི་མཚོ་བྱང་ལེའུ་གསར་པ་རྩོམ་ཆེད་སྔར་བས་ལྷག་པའི་ལེགས་སྐྱེས་གསར་པ་འབུལ་དགོས།

ཁུལ་ཨུའི་ཧྲུའུ་ཅི་གཞོན་པ་དང་རྩ་འཛུགས་པུའི་པུ་ཀྲང་སི་ཅི་ཧྲེང་གིས་གཙོ་སྐྱོང་གནང་། ཀྲང་ཐའོ་དང་། ལི་ཞུས་ཀྲེན། ཀང་ཧྥུ། མ་རུའུ་ཞང་། དབྱང་ཏེ་བཅས་ཚོགས་འདུར་ཞུགས།

ཤ་བོ་སྐྱབས་ཀྱིས་ཉེ་བའི་ལོ་ཤས་རིང་མཚོ་བྱང་ཁུལ་གྱི་བསམ་པའི་དཔལ་ཡོན་འཛུགས་སྐྱོང་ལ་ཐོབ་པའི་འཕེལ་རིམ་གསར་པ་དང་ཕན་འབྲས་གསར་པར་ཁས་ལེན་གང་ལེགས་གནང་། ཁོང་གིས་བསྟན་དོན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསམ་པའི་དཔལ་ཡོན་འཛུགས་སྐྱོང་ཐད་མཛུབ་སྟོན་དང་བཀོད་སྒྲིག་གལ་ཆེན་རབ་དང་རིམ་པ་གནང་ནས་ང་ཚོས་ལས་དོན་ཡག་པོ་སྒྲུབ་རྒྱུར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་གཞི་འཛིན་ས་མཁོ་འདོན་གནང་ཡོད། ཞིང་ཆེན་ཡོངས་ཀྱི་སྐྱེ་ཁམས་བདེ་འཇགས་ཀྱི་སྲུང་ཡོལ་གལ་ཆེན་དང་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་འཛུགས་སྐྲུན་གྱི་འགག་རྩའི་ས་ཁོངས་ཤིག་ཡིན་པའི་ཆ་ནས། མཚོ་བྱང་ཁུལ་གྱིས་ཐོག་མཐའ་བར་གསུམ་དུ་མངགས་བཅོལ་བློ་ལ་བརྟན་པོར་ངེས་ནས་བསམ་པའི་དཔལ་ཡོན་འཛུགས་སྐྱོང་ལས་དོན་དེ་བོད་འབྲེལ་ས་ཁུལ་གྱི་སྔོན་གྲལ་དུ་སླེབས་པའི་འཐབ་ཇུས་དམིགས་ཚད་ལ་དམིགས་ནས་བསམ་པའི་དཔལ་ཡོན་འཛུགས་སྐྱོང་དེ་སྐྱེ་ཁམས་སྲུང་སྐྱོང་དང་། མི་རིགས་མཐུན་སྒྲིལ། དཔལ་འབྱོར་འཕེལ་རྒྱས་བཅས་དང་མཉམ་འདྲེས་གཏིང་ཟབ་ཡོང་བ་བྱས་པས། རིགས་པའི་གཞུང་ལུགས་དང་དཔལ་ཡོན་འཛུགས་སྐྲུན། རིག་གནས་རྒྱུན་འཛིན་སོགས་ཀྱི་ཐད་དུ་དུས་རིམ་རང་བཞིན་གྱི་གྲུབ་འབྲས་ཐོབ་ཡོད།

ཤ་བོ་སྐྱབས་ཀྱིས་ནན་གྱིས་བསྟན་དོན། དུས་རབས་གསར་པའི་རྒྱང་སྐྱོད་ཀྱི་ལམ་བུ་གསར་པའི་སྟེང་། བསམ་པའི་དཔལ་ཡོན་འཛུགས་སྐྱོང་ལ་རྣམ་པ་གསར་པ་དང་གྲུབ་འབྲས་གསར་པ་ཡོད་དགོས། བསམ་པའི་དཔལ་ཡོན་འཛུགས་སྐྱོང་སྐོར་གྱི་ཞི་ཅིན་ཕིང་གི་རིག་གནས་དགོངས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བསམ་པའི་དཔལ་ཡོན་འཛུགས་སྐྲུན་སྐོར་གྱི་རྣམ་བཤད་གལ་ཆེན་རྩ་བའི་གཞི་འཛིན་སར་བྱས་ཏེ། ཕུགས་བསམ་དང་དད་སེམས་ཀྱི་སློབ་གསོ་རྒྱུན་རྣམ་ཅན་དང་ལམ་ལུགས་ཅན་དུ་འགྱུར་བར་སྐུལ་འདེད་གཏོང་བ་དང་། རིམ་པ་ཁག་གི་སྨྱན་སྦྱོར་ལས་སྟེགས་ལ་བརྟེན་ནས་མཚོ་བྱང་གི་གཏམ་རྒྱུད་ཡག་པོ་བཤད་པ། ཏང་གི་གསར་གཏོད་ཀྱི་རིགས་པའི་གཞུང་ལུགས་ལ་བརྟེན་ནས་སེམས་ཤུགས་སྒྲིལ་བ་བཅས་བྱེད་དགོས། རྩ་ཆེའི་གསར་བརྗེའི་ཐོན་ཁུངས་བེད་སྤྱོད་གང་ལེགས་བྱས་ཏེ། གསར་བརྗེའི་གཞི་རྒྱུ་ནས་འབད་འཐབ་ཀྱི་སྟོབས་ཤུགས་བསྡུ་ལེན་བྱས་ཏེ་ཁུལ་ཡོངས་ཀྱི་སྤྱི་ཚོགས་ཞི་མཐུན་བརྟན་ལྷིང་ཡོང་ཆེད་བསམ་པའི་འདེགས་སྐྱོར་བརྟན་པོ་འདོན་དགོས། བྱེད་ཐབས་སྣ་ཚོགས་ལ་བརྟེན་ནས་ལྟེ་བའི་རིན་ཐང་ལྟ་བ་དྲིལ་སྒྲོག་དང་། ཁྱབ་ཁོངས་དབྱེ་ནས་ཤེས་དཔལ་ལག་ལེན་བྱེད་སྒོ་སྤེལ་བ། དཔེ་མཚོན་གྱི་དཔེ་སྟོན་ནུས་པ་དམ་འཛིན་བྱས་ཏེ། རྫོང་གི་མེ་ཏོག་དང་རྫོང་གི་ལྗོན་ཤིང་སོགས་དྲིལ་སྒྲོག་དང་ཁྱབ་གདལ་ལམ་ལུགས་སྔར་བས་འཐུས་ཚང་དུ་གཏོང་བ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་རྒྱ་ཁྱབ་ཏུ་ལག་ལེན་བསྟར་དགོས། ཤེས་དཔལ་གསོ་སྐྱོང་དང་། ཤེས་དཔལ་ལག་ལེན། ཤེས་དཔལ་གསར་གཏོད་བཅས་ཀྱི་ལས་དོན་ལ་སྤྱི་འདོམས་སྐུལ་འདེད་བཏང་ནས་གསར་གཏོད་ཁྲོད་མང་ཚོགས་ལ་འགྱུར་ལྡོག་དངོས་ཚོར་ཐུབ་པ་བྱེད་དགོས། རིག་གནས་ཤུལ་བཞག་སྲུང་སྐྱོང་དང་རྒྱུན་འཛིན་ལ་དམ་འཛིན་བྱས་ནས་རིག་གནས་དམངས་ཕན་འདུ་འགོད་ལ་སྐུལ་འདེད་གཏོང་བ་དང་། རིག་གནས་ཐོན་ལས་ཀྱི་སྤུས་ཚད་དང་ཕན་འབྲས་ཆེ་རུ་གཏོང་བ། རིག་གནས་དར་རྒྱས་གོང་འཕེལ་ལ་སྐུལ་འདེད་ཤུགས་ཆེན་གཏོང་བ་བཅས་བྱེད་དགོས། འཆར་འགོད་ཀྱི་སྣེ་ཁྲིད་ལ་ཤུགས་སྣོན་རྒྱག་པ་དང་། གྲོང་ཁྱེར་གྱི་ཤེས་དཔལ་ཆུ་ཚད་མཐོ་རུ་གཏོང་བ། ཡ་རབས་ཡུལ་སྲོལ་སྐྱེད་སྲིང་བཅས་བྱས་ནས་གྲོང་ཁྱེར་དང་གྲོང་གསེབ་ཀྱི་བསམ་པའི་དཔལ་ཡོན་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས།

ཤ་བོ་སྐྱབས་ཀྱིས་རྩ་འཛུགས་ཀྱི་འགན་ལེན་ལ་ཤུགས་སྣོན་རྒྱག་པ་དང་། འགན་འཁྲིའི་འབྲེལ་ཐག་ནན་དུ་གཏོང་བ། ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བ། བྱེད་སྟངས་དང་བྱེད་ཐབས་གསར་གཏོད་བྱེད་པ། ཉམས་སད་ཐེག་ཐུབ་པའི་དཔུང་ཁག་བསྐྲུན་པ། སྤྱི་ཚོགས་ཞུགས་རྒྱུར་སྐུལ་སློང་བྱེད་པ་བཅས་ཀྱི་ཐོག་ནས་བསམ་པའི་དཔལ་ཡོན་འཛུགས་སྐྱོང་གི་མཉམ་ཤུགས་ཆེན་པོ་གཅིག་སྒྲིལ་བྱས་ཏེ་ལས་འགན་ཁག་དོན་འཁྱོལ་དང་ཕན་འབྲས་ཐོན་པའི་འགན་ལེན་བྱེད་དགོས་པའི་བླང་བྱ་བཏོན།

ཚོགས་འདུའི་ཐོག་ཀྲང་ཐའོ་ཡིས་ཁུལ་ཡོངས་ཀྱི་སྐབས་བདུན་པའི་རྒྱལ་ཡོངས་ཀྱི་ཤེས་དཔལ་གྲོང་རྡལ་དང་ཤེས་དཔལ་ཚན་པའི་ནང་བདམས་པའི་སྡེ་བ་དང་གྲོང་རྡལ། དཔལ་ཡོན་ལས་ཁུངས། སྐབས་གསུམ་པའི་རྒྱལ་ཡོངས་ཀྱི་ཤེས་དཔལ་ཁྱིམ་ཚང་དང་ཤེས་དཔལ་སློབ་གྲྭ། དེ་བཞིན་སྐབས་ལྔ་པའི་མཚོ་སྔོན་ཞིང་ཆེན་གྱི་ཀུན་སྤྱོད་དཔེ་བཟང་དང་མིང་འདོན་བྱ་དགའི་ནང་ཚུད་པའི་འབྲེལ་ཡོད་གནས་ཚུལ་བརྡ་ཁྱབ་བཏང་བ་དང་འབྲེལ་མཚོ་བྱང་ཁུལ་གྱི་བསམ་པའི་དཔལ་ཡོན་འཛུགས་སྐྱོང་གི་ཆེད་དོན་ལས་ཀའི་ལམ་སྲོལ་བཙུགས་ཚུལ་ལ་གསལ་བཤད་ཀྱང་བྱས། རྒྱལ་ཡོངས་ཤེས་དཔལ་གྲོང་ཚོ་དང་གྲོང་རྡལ་གྱི་འཐུས་མི་དང་། ཤེས་དཔལ་སློབ་གྲྭའི་འཐུས་མི། ཤེས་དཔལ་ཚན་པའི་འཐུས་མི། ཤེས་དཔལ་གྲོང་ཁྱེར་གྱི་མིང་འདོན་གྲོང་ཁྱེར་གྱི་འཐུས་མི་བཅས་དང་ཞིང་ཆེན་ཡོངས་ཀྱི་ཀུན་སྤྱོད་དཔེ་བཟང་གི་འཐུས་མི་སོ་སོས་གཏམ་བཤད་སྤེལ་རེས་གནང་།