ཞིང་ཆེན་དམངས་ཆེན་སྐབས14པའི་གྲོས་ཚོགས་ཐེངས་བཞི་པ་འཚོགས་མགོ་བརྩམས་པ།

སྒྲིག་སྒྱུར། ཀླུ་མོ་མཚོ།  ཡོང་ཁུངས། མཚོ་སྔོན་བོད་ཡིག་ཚགས་པར།  བཤེར་འབེབས། རིན་ཆེན་ཚེ་རིང་།

 ཟླ1པའི་ཚེས27ཉིན་གྱི་སྔ་དྲོར། མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་མཚོ་སྔོན་གྲོས་ཚོགས་ལྟེ་གནས་ནས་གཟབ་རྒྱས་ངང་འཚོགས་མགོ་བརྩམས། 

ཞིང་ཆེན་ཏང་ཨུའི་ཧྲུའུ་ཅིའམ་ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞིའམ་ཚོགས་ཆེན་ཐེངས་དང་པོའི་ལག་བསྟར་ཀྲུའུ་ཞི་ཝུའུ་ཞའོ་ཅུན་གྱིས་གྲོས་ཚོགས་ལ་མགོ་འཛིན་བྱས། 

ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞིའམ་ཚོགས་ཆེན་ཐེངས་དང་པོའི་ལག་བསྟར་ཀྲུའུ་ཞི་ལིའུ་ཆི་ཧྥན་དང་།ཝང་ལི་མིང་།དབྱང་ཧྥེང་ཁྲུན།ཉི་མ་སྒྲོལ་མ།ལིའུ་ཐུང་ཏེ།ཀྲང་ཧོང་ཡོན།ལུའི་ཀང་།ཝང་ཅིན་ཀྲའེ། ཁྲེན་ཏུང་ཁྲང་བཅས་ཀྲུའུ་ཞི་སྟེགས་བུའི་མདུན་གྲལ་དུ་བསྡད་ཡོད། 

གྲོས་ཚོགས་ལ་ཞུགས་དགོས་པའི་འཐུས་མི382ཡོད་པ་དང་། འཐུས་མི356དངོས་སུ་ཞུགས་ཡོད་པས། ཁྲིམས་བཀོད་མི་གྲངས་དང་མཐུན། 

སྔ་དྲོའི་ཆུ་ཚོད8ཀྱི་སྟེང་། ཝུའུ་ཞའོ་ཅུན་གྱིས་མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་བཞི་པ་འཚོགས་མགོ་བརྩམས་པ་ཁྱབ་བསྒྲགས་བྱས་པ་དང་། ཚོགས་རའི་མི་ཡོངས་ཡར་ལངས་ནས་རྒྱལ་གླུ་བླངས། 

སྤྲོ་སེམས་འཁོལ་བའི་ཐལ་མོ་རྡེབ་སྒྲའི་ཁྲོད་དུ། ཧྲེང་ཀྲང་ལུའོ་ཏུང་ཁྲོན་གྱིས་ཞིང་ཆེན་མི་དམངས་སྲིད་གཞུང་གི་ཚབ་བྱས་ཏེ་སྲིད་གཞུང་བྱ་བའི་སྙན་ཞུ་ཕུལ། སྙན་ཞུ་དེ་ཁག་གསུམ་དུ་བགོས་ཡོད་དེ། གཅིག་ནི2025ལོ་དང“ལྔ་བཅུ་བཞིའི”སྐབས་ཀྱི་བྱ་བའི་ཕྱིར་དྲན། གཉིས་ནི“ལྔ་བཅོ་ལྔའི”དམིགས་འབེན་ལས་འགན་གཙོ་བོ། གསུམ་ནི2026ལོའི་བྱ་བའི་ལས་འགན་གཙོ་བོ་བཅས་རེད།  

ཟླ1པའི་ཚེས27ཉིན་གྱི་སྔ་དྲོར། མཚོ་སྔོན་ཞིང་ཆེན་མི་དམངས་འཐུས་མི་ཚོགས་ཆེན་གྱི་གྲོས་ཚོགས་ཐེངས་ལྔ་བ་ཟི་ལིང་གྲོས་ཚོགས་ལྟེ་གནས་སུ་གཟབ་རྒྱས་ངང་འཚོག་མགོ་བརྩམས། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། 2025ལོ་ནི“ལྔ་བཅུ་བཞི”མཇུག་བསྒྲིལ་བའི་ལོ་ཡིན་ལ། མཚོ་སྔོན་འཕེལ་རྒྱས་བརྒྱུད་རིམ་ཁྲོད་ཀྱི་སྤྱིར་བཏང་མིན་པའི་ལོ་ཞིག་ཡིན། ཛ་དྲག་དང་རྙོག་འཛིང་ཆེ་བའི་གནས་བབ་དང་དཀའ་ངལ་དང་འགྲན་སློང་མང་པོའི་མདུན་དུ། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོའི་འོག ང་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་རྒྱུན་འཁྱོངས་བྱས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཇུས་ཆོད་བཀོད་སྒྲིག་ཕྱོགས་ཡོངས་ནས་ལག་བསྟར་དང་དོན་འཁྱོལ་བྱས་པ་དང་། ཞིང་ཆེན་ཏང་ཨུའི་བྱ་བའི་བླང་བྱ་ནན་ཏན་གྱིས་དངོས་འབེབས་བྱས་ནས། ཡིད་ཆེས་བརྟན་པོ་དང་དངོས་སྒྲུབ་སྔོན་བརྩོན། དཀའ་སྤྱད་མདུན་སྐྱོད། ཧུར་ཐག་འབད་བརྩོན་བཅས་བྱས་པས། སྐྱེ་ཁམས་ཀྱི་རང་མདངས་སྔར་ལས་མཛེས་སྡུག་ལྡན་པ་དང་། དཔལ་འབྱོར་འཁོར་སྐྱོད་རྒྱུན་མཐུད་སྒོས་ཇེ་ལེགས་སུ་ཕྱིན་ལ། ཁྱད་ལྡན་ཐོན་ལས་གསར་པ་དང་ལེགས་ཕྱོགས་སུ་འཕེལ་བ་དང་། འཕེལ་རྒྱས་ཀྱི་སྒུལ་ཤུགས་ཉིན་རེ་བཞིན་ཇེ་ཆེར་སོང་ཡོད།  གྲོང་གསེབ་དང་གྲོང་ཁྱེར་གྱི་ས་ཁོངས་མཐུན་སྦྱོར་མཉམ་འདྲེས་བྱས་པ་དང་། དམངས་འཚོ་ལ་མིག་མཐོང་ལག་ཟིན་གྱི་ལེགས་བཅོས་བྱུང་ཞིང་། བདེ་འཇགས་ཀྱི་རྨང་གཞི་རྒྱུན་ཆད་མེད་པར་སྲ་བརྟན་དུ་བཏང་ནས། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་ཐད་རྣམ་པ་གསར་པ་མངོན་ཡོད། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། 2025ལོའི་དམིགས་འབེན་དང་ལས་འགན་གཙོ་བོ་ཕུན་སུམ་ཚོགས་པའི་སྒོ་ནས་ཡོངས་འགྲུབ་བྱས་པ་དེས། “ལྔ་བཅུ་བཞི”རྒྱལ་ཁའི་ངང་མཇུག་བསྒྲིལ་བ་མཚོན་ཐུབ། འབད་འཐབ་ཀྱི་བརྒྱུད་རིམ་ལ་ཕྱིར་དྲན་ཞིག་བྱས་ན།ང་ཚོས་སེམས་ལ་བརྟན་པོར་ངེས་དགོས་པ་དང་སྐུལ་མ་ཆེན་པོ་ཐེབས་པ་ཞིག་ནི། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐོག་མཐའ་བར་གསུམ་དུ་མཚོ་སྔོན་གྱི་ས་གཞི་ཆེན་པོ་དང་མཚོ་སྔོན་མི་དམངས་ལ་བརྩེ་སེམས་ཟབ་མོ་བཅངས་ནས། ཏང་གི་ཚོགས་ཆེན་ཐེངས་བཅོ་བརྒྱད་པའི་ཚུན་དུ། མཚོ་སྔོན་ལ་དངོས་སུ་གཟིགས་ཞིབ་ཐེངས་གསུམ་གནང་བ་དང་། རྒྱལ་ཡོངས་དམངས་ཆེན་གྱི་མཚོ་སྔོན་འཐུས་ཚབ་ཚོགས་པའི་གྲོས་ཞིབ་ལ་ཐེངས་གཉིས་ཞུགས་ནས། མཚོ་སྔོན་འཕེལ་རྒྱས་གཏོང་བར་ཁ་ཕྱོགས་གཏན་འཁེལ་གནང་བ་དང་འཆར་འགོད་ཆེན་པོ་བཟོས་པར་བརྟེན། ང་ཚོར་ཚན་རིག་དང་མཐུན་པའི་ཁ་ཕྱོགས་བསྟན་པ་དང་སྙིང་རུས་ཆེ་རུ་བསྐྱེད་ཅིང་། ལས་འགན་སྒྲུབ་པའི་ཐད་ནས་སྐུལ་མ་ཆེན་པོ་ཐེབས་ཡོད། ལོ་ལྔའི་རིང་ལ། ང་ཚོས་མངགས་བཅོལ་བློ་ལ་དམ་པོར་བཅངས་ཤིང་། དྲིན་གཟོ་ཡར་བརྩོན་བྱས་ཏེ། དུས་རབས་ཀྱི་རིམས་ནད་ཚབས་ཆེན་དང་ལོ་རྒྱུས་ཐོག་མཐོང་དཀོན་པའི་ཐལ་དྲགས་པའི་གནམ་གཤིས་ཀྱི་ཤུགས་རྐྱེན་ཐེག་ཐུབ་ཡོད་ཅིང་། ཉེན་ཁ་དང་འགྲན་རྩོད་གལ་ཆེན་རབ་དང་རིམ་པར་ཁ་གཏད་ནུས་ལྡན་གཞལ་ནས། མཚོ་སྔོན་འདི་ཉིད་འཕེལ་རྒྱས་ཀྱི་དུས་རིམ་ཡག་ཤོས་དང་འགྱུར་ལྡོག་ཆེ་ཤོས། མང་ཚོགས་ལ་ཕན་པ་ཐོབ་ཚད་ཆེས་མང་ཤོས་བཅས་ཀྱི་ལོ་རྒྱུས་དུས་སྐབས་སུ་སླེབས་པར་བྱས་ཡོད། འདི་ནི་སྐྱེ་ཁམས་དཔལ་ཡོན་འཛུགས་སྐྲུན་ལ་གྲུབ་འབྲས་མངོན་གསལ་བླངས་པའི་ལོ་ལྔ་ཡིན་ཞིང་། ཕྱོགས་བསྡུས་དཔལ་འབྱོར་གྱི་སྟོབས་ཤུགས་མངོན་གསལ་སྒོས་ཇེ་ཆེར་སོང་བའི་ལོ་ལྔ་ཡིན་ལ། བཅོས་བསྒྱུར་སྒོ་འབྱེད་ཀྱི་གོམ་སྟབས་མངོན་གསལ་སྒོས་ཇེ་མགྱོགས་སུ་ཕྱིན་པའི་ལོ་ལྔ་ཡིན་པ་དང་། གྲོང་ཁྱེར་དང་གྲོང་གསེབ་ཀྱི་རྣམ་པར་འགྱུར་ལྡོག་མངོན་གསལ་བྱུང་བའི་ལོ་ལྔ་ཡིན་ཞིང་། མི་དམངས་ཀྱི་འཚོ་བའི་སྤུས་ཚད་མངོན་གསལ་སྒོས་ཇེ་ལེགས་སུ་སོང་བའི་ལོ་ལྔ་ཡིན་ལ། བདེ་འཇགས་འཕེལ་རྒྱས་ཀྱི་ཆུ་ཚད་མངོན་གསལ་སྒོས་ཇེ་མཐོར་ཕྱིན་པའི་ལོ་ལྔ་ཡིན།  

ཧྲེང་ཀྲང་ལུའོ་ཏུང་ཁྲོན་གྱིས་མཚོ་སྔོན་ཞིང་ཆེན་མི་དམངས་སྲིད་གཞུང་གི་ཚབ་བྱས་ནས་ཚོགས་ཆེན་ལ་སྲིད་གཞུང་བྱ་བའི་སྙན་ཞུ་འབུལ་བཞིན་པ། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། “ལྔ་བཅུ་བཞི”ལ་ཕྱིར་དྲན་བྱས་ཚེ། གྲུབ་འབྲས་དེ་དག་ཐོབ་པ་ནི་ལས་སླ་མོ་ཞིག་གཏན་ནས་མིན། གྲུབ་འབྲས་དེ་དག་ཐོབ་པའི་ཆེས་རྩ་བ་ནི་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གིས་ཁྲིད་སྟོན་གང་ལེགས་བྱས་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་ཁྲིད་སྟོན་ལ་རག་ལས་ཤིང་། ཞིང་ཆེན་ཏང་ཨུས་ཞིང་ཆེན་ཡོངས་ཀྱི་རིགས་སོ་སོའི་ལས་བྱེད་མང་ཚོགས་ལ་མཐུན་སྒྲིལ་སྣེ་ཁྲིད་བྱས་ནས་དཀའ་ངལ་ཁྱད་བསལ་དང་ཡར་རྒྱས་བརྩོན་ལེན་བྱས་པའི་འབྲས་བུ་ཡིན་ལ། ཞིང་ཆེན་དམངས་ཆེན་དང་ཞིང་ཆེན་སྲིད་གྲོས། སྤྱི་ཚོགས་ལས་རིགས་ཁག་བཅས་ཀྱིས་ལྟ་སྐུལ་ནུས་ལྡན་དང་རྒྱབ་སྐྱོར་ཆེན་པོ་བྱས་པའི་འབྲས་བུའང་ཡིན། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། འཕེལ་རྒྱས་འགྲོ་བའི་ཁྲོད་གནད་དོན་རྙིང་པ་དང་འགྲན་སློང་གསར་པ་མཉམ་དུ་གནས་པས། ངེས་པར་དུ་གནད་དོན་ལ་ཐད་ཀར་གདོང་གཏོད་རྒྱུ་དང་འགྲན་སློང་ལ་ཁ་གཏད་འཇལ་ནས་ཐག་གཅོད་ནན་མོ་བྱེད་དགོས། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། “ལྔ་བཅོ་ལྔའི”དུས་སྐབས་ནི་རང་རྒྱལ་གྱིས་གཞི་རྩའི་ཆ་ནས་སྤྱི་ཚོགས་རིང་ལུགས་དེང་རབས་ཅན་མངོན་འགྱུར་བྱེད་པར་རྨང་གཞི་བརྟན་པོ་འདིང་བ་དང་ཕྱོགས་ཡོངས་ནས་ཤུགས་འདོན་པའི་འགག་རྩའི་དུས་སྐབས་ཡིན་ལ། མཚོ་སྔོན་གྱི་འཐབ་ཇུས་གོ་གནས་སྤྱིའི་ཆ་ནས་མཆོང་བརྒལ་བྱེད་པའི་དུས་སྐབས་དང་། སྐྱེ་ཁམས་དགེ་མཚན་སྤོ་སྒྱུར་བྱེད་པའི་གནད་འགག་གི་དུས་སྐབས། དེང་རབས་ཅན་གྱི་ཐོན་ལས་མ་ལག་གསོ་སྐྱོང་དང་མཐོར་འདེགས་གཏོང་བའི་དུས་སྐབས་བཅས་སུ་སླེབས་ཡོད་པས། འཕེལ་རྒྱས་ཀྱི་མདུན་ལྗོངས་སྔར་ལས་ཡངས། ལོ་རྒྱུས་ཀྱི་ཕྱོགས་གནས་ཡང་དག་པར་ཁོང་དུ་ཆུད་པར་བྱས་ཏེ། བློ་བརྟན་འགྱུར་མེད་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསལ་སྟོན་གནང་བའི་ཁ་ཕྱོགས་སུ་དཔའ་སྐྱེད་མདུན་སྐྱོད་བྱེད་དགོས་ལ། དགེ་མཚན་སྲ་བརྟན་དང་རྒྱ་བསྐྱེད་པ་དང་འགག་སྒོའི་ཚོད་འཛིན་སེལ་ཐབས་བྱེད་པ། ཞན་ཆ་དང་མི་འདང་ས་ཁ་གསབ་དང་ཇེ་དྲག་ཏུ་གཏོང་བ། ནུས་ཤུགས་ཡོད་རྒུས་མི་དང་རང་བྱུང་ཁམས་འཆམ་མཐུན་མཉམ་གནས་ལ་སྐུལ་འདེད་གཏོང་བ་དང་། ལྗང་མདོན་ཐཱན་ཉུང་འཁོར་སྐྱོད་ཀྱི་དེང་རབས་ཅན་གྱི་ཐོན་ལས་མ་ལག་བསྐྲུན་པ་བཅས་ཀྱིས། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པའི་ཐད་ནས་མདུན་གྲལ་དུ་བསྐྱོད་དགོས། ཚད་གཞི་སྔར་ལས་མཐོན་པོས་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་། ཤུགས་ཚད་སྔར་ལས་ཆེན་པོས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། རིམ་པ་སྔར་ལས་ཟབ་མོས་ཕྱོགས་ཡོངས་ནས་བཅོས་བསྒྱུར་སྒོ་འབྱེད་ཟབ་སྤེལ་བྱེད་པ། ཆུ་ཚད་སྔར་ལས་མཐོན་པོས་མཐུན་སྦྱོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། བྱེད་ཐབས་སྔར་ལས་ལེགས་པོས་མི་དམངས་ཀྱི་འཚོ་བའི་སྤུས་ཚད་ཇེ་མཐོར་གཏོང་བ། མཉེན་གཤིས་སྔར་ལས་ཆེན་པོས་འཕེལ་རྒྱས་བདེ་འཇགས་ཀྱི་སྲུང་ཡོལ་བརྟན་པོར་བསྐྲུན་པ་བཅས་བྱས་ཏེ། རྒྱལ་ཡོངས་དང་དུས་མཉམ་དུ་སྤྱི་ཚོགས་རིང་ལུགས་དེང་རབས་ཅན་གཞི་རྩའི་ཐོག་ནས་མངོན་འགྱུར་བྱེད་པར་ཐག་གཅོད་རང་བཞིན་གྱི་ཡར་རྒྱས་འབྱུང་བར་ཁག་ཐེག་བྱེད་དགོས། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། ད་ལོའི་སྲིད་གཞུང་བྱ་བའི་སྤྱིའི་བླང་བྱ་ནི། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་རིམ་བྱུང་གི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པ་དང་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་ནན་མོ་བྱེད་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བར་གནང་བའི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ། ཞིང་ཆེན་ཏང་ཨུ་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་བཅུ་པ་དང་ཞིང་ཆེན་ཏང་ཨུའི་དཔལ་འབྱོར་བྱ་བའི་གྲོས་ཚོགས་ཀྱི་བཀོད་སྒྲིག་ལྟར། ཕྱོགས་ཡོངས་ནས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་ཞིང་ཡང་དག་ལ་ཕྱོགས་ཡོངས་ནས་ལག་བསྟར་བྱེད་པ་དང་། འཕེལ་རྒྱས་ཀྱི་རྣམ་པ་གསར་པའི་ཁྲོད་གཏིང་ཟབ་ངང་འདྲེས་པ་དང་དེར་ཞབས་འདེགས་ཞུ་བ། ནུས་ཤུགས་ཡོད་རྒུས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། བརྟན་ཐོག་ཡར་འཕེལ་གྱི་བྱ་བའི་སྤྱིའི་བྱེད་ཕྱོགས་རྒྱུན་འཁྱོངས་བྱེད་པ། འཕེལ་རྒྱས་དང་བདེ་འཇགས་ལ་སྔར་ལས་གཅིག་འདོམས་ལེགས་པོ་བྱེད་པ། སྟོབས་ཤུགས་གཅིག་སྒྲིལ་གྱིས་སྐྱེ་ཁམས་དཔལ་ཡོན་གྱི་མཐོ་ས་བསྐྲུན་པ་དང་ཐོན་ལས་ཀྱི“གནས་བཞི”འཛུགས་སྐྲུན་བྱེད་པ། སྲིད་ཇུས་ཀྱི་མཐུན་སྦྱོར་ལ་ཤུགས་སྣོན་དང་རྩ་འཛུགས་ཀྱི་ནུས་པ་ཆེ་རུ་གཏོང་བ། བསྟུད་མར་ནང་མཁོ་རྒྱ་བསྐྱེད་དང་འདོན་སྤྲོད་ལེགས་བསྒྱུར་བྱེད་པ། འཕར་ཚད་ཇེ་ལེགས་དང་གསོག་ཚད་ཇེ་མང་དུ་གཏོང་བ། ཐོན་ཚད་གསར་པ་བསྐྱེད་པ། ཡུལ་བབ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བ་དང་། གནད་འགག་ཁྱབ་ཁོངས་ཀྱི་བཅོས་བསྒྱུར་བསྟུད་མར་ཟབ་སྤེལ་བྱེད་པ། ཚོང་གཉེར་ཁོར་ཡུག་བསྟུད་མར་ལེགས་བསྒྱུར་བྱེད་པ། གཙོ་གནད་ཁྱབ་ཁོངས་ཀྱི་ཉེན་ཁ་འགོག་སེལ་བྱེད་པ། ནུས་ཤུགས་ཡོད་རྒུས་ལས་ཞུགས་བརྟན་པོ་དང་ཁེ་ལས་བརྟན་པོ། ཁྲོམ་ར་བརྟན་པོ། སྔོན་དཔག་བརྟན་པོ་བཅས་ཡོང་བར་བྱེད་པ་དང་། དཔལ་འབྱོར་གྱི་སྤུས་ཚད་ནུས་ལྡན་གྱིས་མཐོར་འདེགས་དང་གྲངས་ཚད་ལུགས་མཐུན་གྱིས་འཕར་བ་མངོན་དུ་འགྱུར་བར་སྐུལ་འདེད་བཏང་ཞིང་། སྤྱི་ཚོགས་འཆམ་མཐུན་བརྟན་བརླིང་སྲུང་འཛིན་བཅས་བྱས་ཏེ་ནུས་ཤུགས་ཡོད་རྒུས་“ལྔ་བཅོ་ལྔའི”མགོ་ལེགས་པོར་རྩོམ་རྒྱུ་དེ་ཡིན། ད་ལོའི་འཕེལ་རྒྱས་ཀྱི་སྔོན་དཔག་དམིགས་འབེན་ནི། ཞིང་ཆེན་ཡོངས་ཀྱི་ས་ཁུལ་སོ་སོའི་སྤྱིའི་ཐོན་རིན་འཕར་ཚད4.5%ཙམ་ཡིན་ལ། ནུས་ཤུགས་ཡོད་རྒུས་དེ་བས་བཟང་བའི་གྲུབ་འབྲས་ལ་འབད་དགོས། མཁར་གྲོང་གི་ལས་ཞུགས་མི་གྲངས་ཁྲི6ཡན་གསར་དུ་འཕར་བ་དང་། རོང་འབྲོག་ས་ཁུལ་གྱི་ངལ་རྩོལ་ནུས་པའི་ཚུལ་སྒྱུར་ལས་ཞུགས་མི་གྲངས་ཁྲི106ལྷག་གི་ཡན་ཡིན་དགོས་ལ། མཁར་གྲོང་ཞིབ་བཤེར་གྱི་ལས་ཤོར་ཚད5.5%ཡིན། སྡོད་དམངས་ཀྱི་འཛད་སྤྱོད་རིན་གོང་འཕར་ཚད2%ཙམ་ཡིན་དགོས། སྡོད་དམངས་ཡོངས་ཀྱི་ཆ་སྙོམས་མི་རེའི་བཀོད་ཆོག་པའི་ཡོང་འབབ་འཕར་ཚད་དང་དཔལ་འབྱོར་འཕར་ཚད་དུས་མཉམ་ཡིན་དགོས། འབྲུ་རིགས་ཀྱི་སྤྱིའི་ཐོན་ཚད་ཏུན་ཁྲི110ཡན་ཡིན་དགོས། འབྲི་ཆུ་དང་རྨ་ཆུ། རྫ་ཆུ་བཅས་ཞིང་ཆེན་ནང་ཁུལ་གྱི་འབབ་རྒྱུད་ཧྲིལ་བོའི་ཆུའི་སྤུས་ཚད་རིམ་པⅡཡན་དུ་སྲུང་འཛིན་བྱེད་དགོས་པ་དང་། ཞིང་ཆེན་ཡོངས་ཀྱི་ཁོར་ཡུག་གི་མཁའ་དབུགས་སྤུས་ཚད་རྒྱལ་ཡོངས་ཀྱི་མདུན་གྲལ་དུ་སླེབས་པ་སྲུང་འཛིན་བྱེད་དགོས་ལ། རྒྱལ་ཁབ་ཀྱིས་གཤམ་སྤྲོད་བྱས་པའི་ཐཱན་ཕྱིར་གཏོང་གི་ཚོད་འཛིན་གཉིས་དང་འབག་བཙོག་དངོས་པོའི་ཕྱིར་གཏོང་ཇེ་ཉུང་དུ་གཏོང་བའི་དམིགས་འབེན་ལེགས་འགྲུབ་བྱེད་དགོས་པ་དེ་ཡིན། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན། གོང་གི་དམིགས་འབེན་ལས་འགན་ལེགས་འགྲུབ་བྱས་ཏེ། ཐོག་མཐའ་བར་གསུམ་དུ་བརྟན་ཐོག་ཡར་འཕེལ་དང་སྤུས་འདེགས་ནུས་མཐོ་རྒྱུན་འཁྱོངས་བྱེད་དགོས། ངེས་པར་དུ་དཔལ་འབྱོར་སྦས་ཤུགས་སྔོག་འདོན་གང་ལེགས་བྱེད་དགོས་ལ། སྲིད་ཇུས་ཀྱི་རྒྱབ་སྐྱོར་དང་བཅོས་བསྒྱུར་གསར་གཏོད་གཉིས་མཉམ་དུ་འཛིན་པ་རྒྱུན་འཁྱོངས་བྱེད་དགོས། “གློད་གཏོང་གང་ལེགས་བྱེད་པ”དང“དོ་དོམ་ལེགས་པོ་བྱེད་པ”གཉིས་ལེགས་པོར་བསྒྲུབ་དགོས། དངོས་པོ་ལ་མ་དངུལ་གཏོང་བ་དང་མི་ལ་མ་དངུལ་གཏོང་བ་གཉིས་ཟུང་འབྲེལ་དམ་པོ་བྱེད་དགོས། རང་ངོས་ཀྱི་ནུས་པ་མཐོར་འདེགས་བཏང་སྟེ་ཕྱིའི་འགྲན་སློང་ལ་གདོང་གཏད་ནས། བྱ་བ་སོ་སོའི་གནད་འགག་དམ་འཛིན་བྱེད་དགོས། “ཐཱན་གཉིས”ཀྱི་ཁྲིད་སྟོན་ལ་དམིགས་ནས། སྐྱེ་ཁམས་མ་ལག་གི་སྲུང་སྐྱོང་དང་སླར་གསོ་ལ་ཤུགས་སྣོན་པ་དང་། གནམ་སྔོ་ཆུ་དྭངས་ས་གཙང་གི་སྲུང་སྐྱོང་དམག་འཐབ་གཏིང་ཟབ་ཏུ་རྒྱག་པ། ཐཱན་རྩེར་སོན་གྱི་ཆེད་དམིགས་འགུལ་སྐྱོད་ལ་སྐུལ་འདེད་གཏིང་ཟབ་གཏོང་བ། སྐྱེ་ཁམས་ཁོར་ཡུག་་བཅོས་སྐྱོང་གི་དེང་རབས་ཅན་གྱི་ཆུ་ཚད་མཐོར་འདེགས་སུ་གཏོང་བ་བཅས་ཀྱིས། ཁྱོན་ཡོངས་ནས་ལྗང་མདོག་ཚུལ་སྒྱུར་ལ་སྐུལ་འདེད་གཏོང་དགོས། ནང་མཁོ་རྒྱ་བསྐྱེད་ལ་དམིགས་ཏེ། འཛད་སྤྱོད་བསྐྱེད་པའི་ཆེད་དམིགས་འགུལ་སྐྱོད་ལ་སྐུལ་འདེད་གཏིང་ཟབ་གཏོང་བ་དང་། ཕན་ནུས་དང་ལྡན་པའི་དངུལ་གཏོང་རྒྱ་བསྐྱེད་ནས། རྒྱལ་ཡོངས་ཀྱི་གཅིག་གྱུར་ཁྲོམ་ར་ཆེན་མོར་ཧུར་བརྩོན་གྱིས་ཞབས་འདེགས་དང་དེར་ཞུགས་དགོས། སྒུལ་ཤུགས་གསར་གཏོད་ལ་དམིགས་ནས། ཚན་རྩལ་གསར་སྐྲུན་གྱིས་ཐོན་ལས་གསར་སྐྲུན་ལ་སྣེ་འདྲེན་པ་དང་། ཚྭ་མཚོའི་ཐོན་ཁོངས་ཕྱོགས་བསྡུས་གསར་སྤེལ་བེད་སྤྱོད་ལ་ཤུགས་སྣོན་པ། དྭངས་གཙང་ནུས་ཁུངས་ཀྱི་འདུས་གྲུབ་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བ། སྐྱེ་ཁམས་ཡུལ་སྐོར་སྤུས་ལེགས་ཅན་དང་ཟོང་རྟགས་ཅན་དུ་འཕེལ་བར་སྐུལ་འདེད་གཏོང་བ། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་རིན་ཐང་ཡར་རྒྱས་འབྱུང་བར་སྐུལ་འདེད་གཏོང་བ། ཚད་གཞི་མཐོན་པོས་རྒྱལ་ཁབ་ཀྱི་ལྗང་མདོག་རྩིས་གློག་མཐུན་སྦྱོར་འཕེལ་རྒྱས་ཀྱི་དཔེ་སྟོན་ཁུལ་འཛུགས་སྐྲུན་བྱེད་པ། ཞབས་ཞུ་ལས་རིགས་སྤུས་ལེགས་ནུས་མཐོའི་ངང་འཕེལ་རྒྱས་འགྲོ་བར་ཡར་སྐུལ་བྱེད་པ་བཅས་ཀྱིས། མགྱོགས་མྱུར་སྒོས་སྒུལ་ནུས་གསར་པ་གསོ་སྐྱོང་དང་དར་རྒྱས་གཏོང་དགོས། བཅོས་བསྒྱུར་འགག་སྒྲོལ་ལ་དམིགས་ནས། ཚོང་གཉེར་གཙོ་གཞིའི་གསོན་ཤུགས་སློང་བ་དང་། དཔལ་འབྱོར་བཅོས་སྐྱོང་གི་ཕན་ནུས་མཐོར་འདེགས་གཏོང་བ། ཕྱི་ནང་གི་སྒོ་འབྱེད་ལ་མཐུན་སྦྱོར་ངང་སྐུལ་འདེད་གཏོང་བ་བཅས་ཀྱིས། སྤུས་ཚད་མཐོ་བའི་འཕེལ་རྒྱས་ཀྱི་སྒུལ་ཤུགས་དང་གསོན་ཤུགས་ཇེ་དྲག་ཏུ་གཏོང་དགོས། མཐུན་སྦྱོར་འཕེལ་རྒྱས་ལ་དམིགས་ནས། ས་ཁོངས་བརྒལ་བའི་མཉམ་ལས་དང་རྣམ་པ་གསར་པའི་མཁར་གྲོང་ཅན་ལ་སྐུལ་འདེད་གཏོང་བ། སྐྱེ་ཁམས་ཞིང་ཕྱུགས་ལས་འཕེལ་རྒྱས་ཀྱི་སྤུས་ཀ་དང་ཕན་འབྲས་མཐོར་འདེགས་སུ་གཏོང་བ། མཐོ་སྒང་གི་བདེ་སྡོད་ལས་འཚམ་དང་འཆམ་མཛེས་གྲོང་གསེབ་འཛུགས་སྐྲུན་ཇེ་མགྱོགས་སུ་གཏོང་བ་བཅས་ཀྱིས། གྲོང་ཁྱེར་དང་གྲོང་གསེབ་མཉམ་འདྲེས་དང་ས་ཁོངས་མཉམ་འགུལ་ལ་སྐུལ་འདེད་གཏོང་དགོས། དམངས་ཀྱིས་གང་བསམ་པ་དེར་དམིགས་ཏེ། སྤུས་ཚད་མཐོ་བའི་ལས་ཞུགས་ལེགས་པོར་སྐུལ་འདེད་གཏོང་བ་དང་། སློབ་གསོའི་སྤྱི་པའི་ཞབས་ཞུའི་སྤུས་ཀ་དང་ཆུ་ཚད་མཐོར་འདེགས་གཏོང་བ། བདེ་ཐང་མཚོ་སྔོན་གཏིང་ཟབ་ཏུ་འཛུགས་སྐྲུན་བྱེད་པ། སྤྱི་ཚོགས་ཀྱི་འགན་སྲུང་ཆུ་ཚད་མཐོར་འདེགས་གཏོང་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་འཛུགས་སྐྲུན་ལ་སྐུལ་འདེད་གཏོང་བ། སྤྱི་ཚོགས་ཀྱི་བདེ་འཇགས་དང་བརྟན་བརླིང་ལ་སྲུང་སྐྱོང་བྱེད་པ་བཅས་ཀྱིས། དམངས་འཚོར་འགན་སྲུང་དང་ལེགས་བཅོས་བྱེད་པའི་ཤུགས་ཚད་ཇེ་ཆེར་གཏོང་དགོས། 

ལུའོ་ཏུང་ཁྲོན་གྱིས་སྙན་ཞུའི་ནང་བསྟན་དོན།“ལྔ་བཅོ་ལྔའི”མགོ་ཡག་པོ་རྩོམ་པར་འགན་ལེན་བྱ་རྒྱུ་ནི་སྲིད་གཞུང་གི་འགན་འཁྲི་སྒྲུབ་པའི་ནུས་པར་མཚོན་ན་ཚོད་བགམ་གལ་ཆེན་ཞིག་ཡིན། ང་ཚོས་རྒྱུན་འཁྱོངས་ལྷོད་མེད་ངང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་བློ་བསྒྲིལ་སེམས་སྐྱེད་དང་། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ།“འདུ་ཤེས་བཞི”ཆེ་རུ་གཏོང་བ་དང“ཡིད་ཆེས་བཞི”ཇེ་བརྟན་དུ་གཏོང་བ།“སྲུང་སྐྱོང་གཉིས”བསྒྲུབ་ཐུབ་པར་བྱེད་པ། ཡིད་ཆེས་བརྟན་པོ་དང་དངོས་སྒྲུབ། ཁག་ཁུར་དང་རང་གཅུན་བཅས་ཀྱི་བླང་བྱ་གལ་ཆེན་དོན་འཁྱོལ་ནན་ཏན་བྱེད་པ། ཐོག་མཐའ་བར་གསུམ་དུ་དྲིན་ཚོར་བ་དང་བརྩེ་བ་ཡོད་པ། དངོས་སྒྲུབ་ལ་མཐོང་ཆེན་བཅས་བྱེད་པ། ཚད་གཞི་སྔར་ལས་མཐོ་བའི་སྒོ་ནས་ཏང་ཀྲུང་དབྱང་གི་ཇུས་ཆོད་བཀོད་སྒྲིག་གི་ལག་བསྟར་པ་དང་འགུལ་སྐྱོད་པ། དངོས་སྒྲུབ་པ་བཅས་ཡག་པོ་བྱེད་པ། ཁྲིམས་ལྟར་སྲིད་འཛིན་ནན་མོ་བྱེད་པ། སྲིད་འབྲས་ལྟ་བ་ཡང་དག་བརྟན་པོར་ཆགས་པ་དང་ལག་ཏུ་བསྟར་བ། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་ལག་བསྟར་གཏིང་ཟབ་བྱེད་པའི་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ།  སྤྱོད་བཟང་སྲིད་གཙང་བརྟན་པོར་སྲུང་བ་བཅས་ཀྱིས། དུས་རབས་དང་མི་དམངས་ཀྱི་རེ་བ་སྟོང་ཟད་དུ་མི་གཏོང་བའི་བྱས་འབྲས་གསར་པ་འབད་པས་བསྐྲུན་དགོས། 

ལུའོ་ཏུང་ཁྲོན་གྱིས་སྙན་ཞུའི་མཇུག་ཏུ་བསྟན་དོན། ང་ཚོས་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་སྔར་ལས་དམ་པོ་བྱས་ཏེ།  ཞིང་ཆེན་ཏང་ཨུའི་མགོ་ཁྲིད་བརྟན་པོའི་འོག དམངས་སེམས་གཅིག་མཐུན་དང་དཀའ་སྤྱད་མདུན་སྐྱོད་བྱས་ཏེ། ད་ལོའི་དཔལ་འབྱོར་སྤྱི་ཚོགས་འཕེལ་རྒྱས་ཀྱི་དམིགས་འབེན་ལས་འགན་འབད་པས་མངོན་འགྱུར་བྱེད་པ་དང་། “ལྔ་བཅོ་ལྔའི”མགོ་ཡག་པོ་རྩོམ་པར་ཁག་ཐེག་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་འབྲི་བར་འབད་བརྩོན་ལྷོད་མེད་བྱེད་དགོས། 

ཞིང་ཆེན་ཏང་ཨུའི་རྒྱུན་ལས་ཨུ་ཡོན་དང་། ཞིང་ཆེན་སྲིད་གྲོས་ཀྱི་ཀྲུའུ་ཞི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ། ཞིང་ཆེན་སྲིད་གཞུང་གི་ཧྲེང་ཀྲང་གཞོན་པ། ཞིང་ཆེན་སྲིད་གྲོས་ཀྱི་ཀྲུའུ་ཞི་གཞོན་པ། མཚོ་སྔོན་དུ་སྡོད་པའི་འབྲེལ་ཡོད་ཅུན་རིམ་པའི་དམག་དཔུང་དང་། ཞིང་ཆེན་མཐོ་རིམ་མི་དམངས་ཁྲིམས་ཁང་། ཞིང་ཆེན་མི་དམངས་ཞིབ་དཔྱོད་ཁང་། དྲག་ཆས་ཉེན་རྟོག་མཚོ་སྔོན་སྤྱི་ཁྱབ་རུ་ཁག་བཅས་ཀྱི་འགན་འཁུར་བློ་མཐུན་གཙོ་བོ་དང་། ཚོགས་ཆེན་གྱི་ཀྲུའུ་ཞི་ཚོགས་པའི་ཁོངས་མི་རྣམས་ཚོགས་ཆེན་ལ་ཞུགས་པའམ་ཟུར་ཞུགས་བྱས་པར་མ་ཟད་ཀྲུའུ་ཞི་སྟེགས་བུའི་སྟེང་བཞུགས། སྐབས་བཅུ་བཞི་པའི་རྒྱལ་ཡོངས་སྲིད་གྲོས་ཀྱི་རྒྱུན་ལས་ཨུ་ཡོན་ནམ་མི་རིགས་དང་ཆོས་ལུགས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་རྡོ་རྗེ་རབ་བརྟན་དང་། ཞིང་ཆེན་དམངས་ཆེན་སྐབས་བཅུ་གསུམ་པའི་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་གདན་དྲངས་པ་ལྟར་ཚོགས་ཆེན་ལ་ཞུགས་པར་མ་ཟད་ཀྲུའུ་ཞི་སྟེགས་བུའི་སྟེང་བཞུགས། 

ཞིང་ཆེན་སྲིད་གྲོས་སྐབས་བཅུ་གསུམ་པའི་གྲོས་ཚོགས་ཐེངས་བཞི་པར་ཞུགས་པའི་ཨུ་ཡོན་དང་། ཞིང་ཆེན་ཏང་ཨུའི་འབྲེལ་ཡོད་སྡེ་ཁག་གི་འགན་འཁུར་བློ་མཐུན། ཚོགས་ཆེན་གྱི་དྲུང་ཡིག་ཆེན་མོ་གཞོན་པ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་ལས་ཁུངས་དང་ལས་སྒྲུབ་ལས་ཁུངས་སོ་སོའི་འགན་འཁུར་བློ་མཐུན། ཞིང་ཆེན་སྒྲིག་ཁྲིམས་ཞིབ་བཤེར་ལྟ་ཞིབ་ཨུ་ཡོན་ལྷན་ཁང་གི་ཞིང་ཆེན་དམངས་ཆེན་ལས་ཁུངས་སུ་སྡོད་པའི་སྒྲིག་ཁྲིམས་ཞིབ་བཤེར་ལྟ་ཞིབ་ཚན་ཆུང་གི་ཚན་གཙོ། ཞིང་ཆེན་སྲིད་གཞུང་གི་བཙུགས་གྲུབ་སྡེ་ཁག་དང་ཐད་གཏོགས་ལས་ཁུངས། མངགས་གཏོང་ལས་ཁུངས་བཅས་ཀྱི་འགན་འཁུར་བློ་མཐུན་གཙོ་བོ། ཞིང་ཆེན་ལྟ་ཞིབ་ཨུ་ཡོན་ལྷན་ཁང་དང་། ཞིང་ཆེན་མཐོ་རིམ་མི་དམངས་ཁྲིམས་ཁང་། ཞིང་ཆེན་མི་དམངས་ཞིབ་དཔྱོད་ཁང་བཅས་ཀྱི་འབྲེལ་ཡོད་འགན་འཁུར་བློ་མཐུན། འབྲེལ་ཡོད་ལས་ཁུངས་ཀྱི་འགན་ཁུར་པ། ཞིང་ཆེན་དམངས་ཆེན་གྱི་འཐུས་མི་མ་ཡིན་པའི་མཚོ་སྔོན་དུ་ཡོད་པའི་སྐབས་བཅུ་བཞི་པའི་རྒྱལ་ཡོངས་དམངས་ཆེན་གྱི་འཐུས་མི་དང་། རྫོང་རིམ་པའི་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་འགན་འཁུར་བློ་མཐུན་གཙོ་བོ་སོགས་ཚོགས་ཆེན་ལ་ཟུར་ཞུགས་བྱས། །