ཞི་ཅིན་ཕིང་གིས་དབྱིན་ཇིའི་དབུ་བཞུགས་བློན་ཆེན་སི་ཐ་མོ་དང་མཇལ་འཛོམས་གནང་བ།

སྒྲིག་སྒྱུར།    སངས་དོན།      ཡོང་ཁུངས།      ཞིན་ཧྭ་དྲ་བ།    བཤེར་འབེབས།    རིན་ཆེན་ཚེ་རིང་།

ཟླ1པོའི་ཚེས29ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཀྲུང་གོར་དངོས་གཞིའི་འཚམས་འདྲི་གནང་བར་ཕེབས་པའི་དབྱིན་ཇིའི་དབུ་བཞུགས་བློན་ཆེན་སི་ཐ་མོ་དང་མཇལ་འཛོམས་གནང་། ཤིན་ཧྭ་གསར་འགྱུར་ཁང་གི་གསར་འགོད་པ་ལི་ཤང་གིས་པར་བླངས།

ཞིན་ཧྭ་གསར་འགྱུར་ཁང་པེ་ཅིང་ནས་ཟླ1པོའི་ཚེས29ཉིན་འབྱོར་བའི་གློག་འཕྲིན། ཟླ1པོའི་ཚེས29ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཀྲུང་གོར་དངོས་གཞིའི་འཚམས་འདྲི་གནང་བར་ཕེབས་པའི་དབྱིན་ཇིའི་དབུ་བཞུགས་བློན་ཆེན་སི་ཐ་མོ་དང་མཇལ་འཛོམས་གནང་། ཕྱོགས་གཉིས་པོས་ཀྲུང་དབྱིན་གྱིས་ཡུན་རིང་བརྟན་ལྷིང་གི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་འཕེལ་རྒྱས་གཏོང་བར་མོས་མཐུན་བྱུང་།

ཞི་ཅིན་ཕིང་གིས་མིག་སྔར་རྒྱལ་སྤྱིའི་དུས་བབ་ཟང་ཟིང་དུ་གྱུར་ནས་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་དང་འཛམ་གླིང་གི་དཔལ་འབྱོར་དངོས་ཚན་གཙོ་བོ་ཡིན་པའི་ཀྲུང་དབྱིན་གྱིས་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོང་བྱེད་པའམ་ཡང་ན་རྒྱལ་ཁབ་གཉིས་པོའི་དཔལ་འབྱོར་དང་དམངས་འཚོར་སྐུལ་འདེད་གཏོང་བ་གང་ཡིན་རུང་སྐད་ཆ་ཤོད་རེས་དང་མཉམ་ལས་ལ་ཤུགས་སྣོན་རྒྱག་དགོས། ཀྲུང་གོ་ཕྱོགས་ཀྱིས་དབྱིན་ཇི་ཕྱོགས་དང་མཉམ་དུ་ལོ་རྒྱུས་ཀྱི་ལྟ་བ་ཆེན་པོ་འཛིན་པ་དང་། མི་མཐུན་པའི་ཆ་ལས་བརྒལ་བ། ཕན་ཚུན་བརྩི་འཇོག་བཅས་བྱས་ཏེ་ཀྲུང་དབྱིན་མཉམ་ལས་ཀྱི“མདུན་ལམ་ཆེན་པོར་ལྡན་པའི”མི་མངོན་པའི་སྟོབས་ཤུགས་དེ“བྱས་རྗེས་ཆེན་པོ་འཇོག་པའི”དངོས་འབྲས་སུ་བསྒྱུར་ནས་ཀྲུང་དབྱིན་འབྲེལ་བ་དང་མཉམ་ལས་ལ་རྣམ་པ་གསར་པ་ཞིག་གཏོད་འདོད་ཡོད་ལ་རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་བསྐྲུན་རྒྱུ་མ་ཟད། འཛམ་གླིང་ལའང་ཕན་པ་བསྐྲུན་དགོས་པ་བསྟན། 

ཞི་ཅིན་ཕིང་གིས་ཕན་ཚུན་ཡིད་ཆེས་བྱ་རྒྱུ་ནི་རྒྱལ་ཁབ་དང་རྒྱལ་ཁབ་དབར་གྱི་འབྲེལ་བ་ཡུན་རིང་བརྟན་པོ་ཡོང་བའི་རྨང་གཞི་ཡིན། ཀྲུང་གོས་ཐོག་མཐའ་བར་གསུམ་དུ་ཞི་བདེ་དང་འཕེལ་རྒྱས་ཀྱི་ལམ་ཁར་བསྐྱོད་རྒྱུ་མཐའ་འཁྱོངས་བྱས་ནས་རང་འགུལ་ངང་དམག་འཁྲུག་ཅིག་སློང་མྱོང་མེད་པ་དང་། རྒྱལ་ཁབ་གཞན་གྱི་ས་ཆ་ཚུན་གང་ཡང་བཙན་བཟུང་བྱེད་མྱོང་མེད། ཀྲུང་གོ་འཕེལ་རྒྱས་དང་སྟོབས་ཆེར་ཇི་ལྟར་བཏང་རུང་རྒྱལ་ཁབ་གཞན་དག་ལ་འཇིགས་སྐུལ་བཟོ་མི་སྲིད། ཀྲུང་གོའི་རིག་གནས་ཀྱི་སྲོལ་རྒྱུན་ནི་འཆམ་མཐུན་རྩ་བར་འཛིན་པ་དང་། “བསྟུན་ཡང་གཅིག་མཚུངས་མི་བྱེད་པ”དེ་ཡིན། ཀྲུང་དབྱིན་དཔལ་འབྱོར་ཚོང་དོན་མཉམ་ལས་ཀྱི་ངོ་བོ་ནི་གཉིས་ཁེ་གཉིས་ཕན་ཡིན། ད་ལོ་ནི་ཀྲུང་གོའི“ལོ་ལྔའི་འཆར་གཞི་བཅོ་ལྔ་པ”མགོ་ཚུགས་པའི་ལོ་ཞིག་ཡིན་པས་ཕྱོགས་གཉིས་པོས་སློབ་གསོ་དང་སྨན་བཅོས། དངུལ་རྩ། ཞབས་ཞུའི་ལས་རིགས་བཅས་སུ་གཉིས་ཕན་མཉམ་ལས་བྱེད་རྒྱ་ཆེ་རུ་བཏང་ནས་མིས་བཟོས་རིག་ནུས་དང་སྐྱེ་དངོས་ཚན་རིག ནུས་རྒྱུ་གསར་པ། ཐཱན་ཉུང་ལག་རྩལ་སོགས་ཁྱབ་ཁོངས་ཀྱི་མཉམ་འབྲེལ་ཞིབ་འཇུག་དང་ཐོན་ལས་གཞན་སྒྱུར་བྱས་ཏེ། ཐུན་མོང་ཐོག་འཕེལ་རྒྱས་དང་དར་རྒྱས་ཡོང་བ་བྱེད་དགོས། དབྱིན་ཕྱོགས་ཀྱིས་ཀྲུང་གོའི་ཁེ་ལས་ལ་འདྲ་མཉམ་དྲང་བདེན་དང་མཐོང་ཆུང་མིན་པའི་ཚོང་གཉེར་ཁོར་ཡུག་འདོན་སྤྲོད་བྱེད་རོགས། ཀྲུང་དབྱིན་གཉིས་ཀ་རིག་གནས་ཀྱི་རྒྱལ་ཁབ་ཆེན་པོ་ཡིན་ཞིང་། ཚང་མས་མིའི་རིགས་འཕེལ་རྒྱས་དང་ཡར་ཐོན་ཡོང་བར་བྱས་རྗེས་གལ་ཆེན་བཞག་ཡོད། ཕྱོགས་གཉིས་པོས་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་སྤེལ་རེས་ཟབ་ཏུ་བཏང་ནས་མི་སྣ་འགྲོ་འོང་ལ་སྔར་བས་སྟབས་བདེ་བསྐྲུན་དགོས། དབྱིན་ཇིའི་སྲིད་གཞུང་དང་གྲོས་ཚོགས། ས་གནས་ལས་རིགས་ཁག་བཅས་ཀྲུང་གོར་འཚམས་འདྲི་མང་ཙམ་ཡོང་བར་དགའ་བསུ་ཞུ་རྒྱུ་དང་། ཀྲུང་གོར་ཕྱོགས་ཡོངས་དང་། དོན་དངོས་དང་མཐུན་པ། ཡང་དག་པ་བཅས་ཀྱི་ངོས་འཛིན་མང་དུ་གཏོང་དགོས། ཀྲུང་གོ་ཕྱོགས་ཀྱིས་དབྱིན་ཇིར་ཕྱོགས་རྐྱང་པའི་ཐོངས་མཆན་འགོད་མི་དགོས་པའི་ལས་དོན་ལ་ཧུར་ཐག་བྱེད་འདོད་ཡོད་ཅེས་གསུངས་པ་རེད། 

ཞི་ཅིན་ཕིང་གིས་དུས་སྐབས་ཤིག་རིང་ཕྱོགས་རྐྱང་རིང་ལུགས་དང་། སྲུང་སྐྱོང་རིང་ལུགས། བཙན་དབང་ཆབ་སྲིད་བཅས་གང་སར་ཁྱབ་ནས་རྒྱལ་སྤྱིའི་སྒྲིག་ལམ་ལ་ཕོག་ཐུག་ཚབས་ཆེན་ཕོག་ཡོད། རྒྱལ་སྤྱིའི་བཅའ་ཁྲིམས་དེ་རྒྱལ་ཁབ་ཁག་གིས་བརྩི་སྲུང་ཞུས་ན་གཞི་ནས་ཕན་འབྲས་ཐོན་པ་དང་རྒྱལ་ཁབ་ཆེན་པོས་དེ་བས་སྣེ་ཁྲིད་བྱེད་དགོས། དེ་ལྟར་མ་བྱས་ཚེ་བཙན་པོས་ཁུར་ཚུར་ཕྱར་ནས་གཉོམ་ཆུང་རྡོག་རྩིས་ཐེབས་པའི་འཇིག་རྟེན་དུ་ཕྱིར་ལོག་བྱེད་ངེས་རེད། ཀྲུང་དབྱིན་གཉིས་ཀས་ཕྱོགས་མང་རིང་ལུགས་དང་རང་མོས་ཚོང་དོན་ལ་རྒྱབ་སྐྱོར་བྱེད་ཀྱི་ཡོད་པས་ཕྱོགས་མང་རིང་ལུགས་ངོ་མ་ཐུན་མོང་ཐོག་དར་སྤེལ་དང་ལག་ལེན་བསྟར་ནས་སྒྲིག་གཞི་འཛུགས་རྒྱུར་སྐུལ་འདེད་གཏོང་དགོས་ཞེས་གསུངས་པ་རེད།

སྔར་ལས་དྲང་གཞག་ལུགས་མཐུན་གྱི་གོ་ལ་ཧྲིལ་པོའི་བཅོས་སྐྱོང་མ་ལག་བཙུགས་ནས་འདྲ་མཉམ་དང་གོ་རིམ་ལྡན་པའི་སྣེ་མང་ཅན་དང་ཀུན་ཕན་ཁོང་ཡངས་ཀྱི་གོ་ལ་ཧྲིལ་པོ་ཅན་མངོན་འགྱུར་བྱ་དགོས།

ཟླ1པོའི་ཚེས29ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེ་མོར་ཀྲུང་གོར་དངོས་གཞིའི་འཚམས་འདྲི་གནང་བར་ཕེབས་པའི་དབྱིན་ཇིའི་དབུ་བཞུགས་བློན་ཆེན་སི་ཐ་མོ་དང་མཇལ་འཛོམས་གནང་བ། ཤིན་ཧྭ་གསར་འགྱུར་ཁང་གི་གསར་འགོད་པ་ཧྲེན་ཧུང་གིས་པར་བླངས།

སི་ཐ་མའོ་ཡིས་རྒྱལ་པོ་ཁྲར་སི་སྐུ་ཕྲེང་གསུམ་པས་ཀྲུའུ་ཞི་ཞི་ཅིན་ཕིང་ལ་འཚམས་འདྲི་བྱེད་པ་བརྒྱུད་བསྒྲགས་གནང་། སི་ཐ་མའོ་ཡིས་ལོ8རིང་། ཀྲུང་གོར་འཚམས་འདྲི་གནང་མཁན་དབྱིན་ཇིའི་དབུ་བཞུགས་བློན་ཆེན་ཐོག་མ་དེར་གྱུར་པར་ཧ་ཅང་དགའ་པོ་བྱུང་། ད་ཐེངས་ངས་དབྱིན་ཇིའི་བཟོ་ཚོང་དང་རིག་གནས་ལས་རིགས་གལ་ཆེན་གྱི་འཐུས་མི60ལྷག་ཙམ་གྱི་སྣེ་ཁྲིད་དེ་ཀྲུང་གོར་འཚམས་འདྲི་བྱས་པ་དེས་དབྱིན་ཀྲུང་མཉམ་ལས་བྱེད་རྒྱ་ཇེ་ཆེར་དང་དབྱིན་ཇི་ཕྱོགས་ཀྱིས་ཀྲུང་གོ་དང་མཉམ་ལས་བྱེད་རྒྱ་ཆེ་རུ་གཏོང་རྒྱུར་གཞོལ་བའི་ཆོད་སེམས་མཚོན་ཐུབ་ཅེས་གསུངས་པ་དང་། དབྱིན་ཀྲུང་ནི་འཛམ་གླིང་གི་དཔལ་འབྱོར་དངོས་ཚན་གལ་ཆེན་དང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་ཅིག་ཡིན་པ་དང་། མིག་སྔའི་ཟང་ཟིང་ཉམས་ཞན་གྱི་རྒྱལ་སྤྱིའི་དུས་བབ་འོག་དབྱིན་ཇི་ཕྱོགས་ཀྱིས་ཕན་ཚུན་བརྩི་འཇོག་དང་ཕན་ཚུན་ཡིད་ཆེས་བྱེད་པའི་སྙིང་སྟོབས་ལ་བརྟེན་ནས་ཀྲུང་གོ་ཕྱོགས་དང་ཡུན་རིང་བརྟན་ལྷིང་གི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་འཛུགས་རྒྱུ་ནི་གལ་འགངས་ཤིན་ཏུ་ཆེ་བ་ཞིག་རེད། ཐའེ་ཝན་གྱི་གནད་དོན་ཐད་དབྱིན་ཇི་ཕྱོགས་ཀྱིས་ཡུན་རིང་ལག་ལེན་བསྟར་བའི་སྲིད་ཇུས་ལ་འགྱུར་བ་བྱུང་མེད་ལ་འགྱུར་ལྡོག་ཀྱང་གཏོང་མི་སྲིད། དབྱིན་ཇི་ཕྱོགས་ཀྱིས་ཀྲུང་གོ་ཕྱོགས་དང་མཐོ་རིམ་འགྲོ་འོང་རྒྱུན་འཁྱོངས་དང་སྐད་ཆ་ཤོད་རེས་དང་སྤེལ་རེས་དམ་ཟབ་བྱས་ཏེ། ཚོང་དོན་དང་མ་འཇོག དངུལ་རྩ། ཁོར་ཡུག་སྲུང་སྐྱོང་སོགས་ཁྱབ་ཁོངས་ཁག་གི་མཉམ་ལས་ལ་ཤུགས་སྣོན་བརྒྱབ་ནས་ཕན་ཚུན་གྱི་དཔལ་འབྱོར་འཕར་རྒྱུར་རོགས་རམ་དང་། རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་བསྐྲུན་འདོད་ཡོད་ཅེས་གསུངས་པ་རེད། མི་དམངས་དབར་གྱི་འགྲོ་འོང་ཇི་ཙམ་ཟབ་ཏུ་ཕྱིན་ན་དེ་ཙམ་གྱིས་ཤེས་རྟོགས་ཟབ་ཏུ་འགྲོ་རྒྱུར་ཕན་ཐོགས་ཡོད་པས་དབྱིན་ཇི་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་རྒྱལ་ཁབ་གཉིས་པོའི་ཁྲིམས་འཛུགས་སྒྲིག་གཞི་སོགས་ལས་རིགས་ཁག་གི་འགྲོ་འོང་ལ་ཤུགས་སྣོན་རྒྱག་རྒྱུར་སྐུལ་འདེད་གཏོང་འདོད་ཡོད་ཅེས་གསུངས། ཤང་ཀང་དར་རྒྱས་བརྟན་ལྷིང་ཡོང་བ་བྱ་རྒྱུ་དེ་རྒྱལ་ཁབ་གཉིས་པོའི་ཐུན་མོང་གི་ཁེ་ཕན་དང་མཐུན་ཡོད་པས་དབྱིན་ཇི་ཕྱོགས་ཀྱིས་ཤང་ཀང་ནི་དབྱིན་ཀྲུང་དབར་གྱི་ཐུན་མོང་མ་ཡིན་པའི་འབྲེལ་ཟམ་གལ་ཆེན་ཞིག་ཏུ་གྱུར་པ་མཐོང་འདོད་ཡོད་ཅེས་གསུངས་པ་རེད། རྒྱལ་སྤྱིའི་ལས་དོན་ཁྲོད་ཀྲུང་གོས་འགག་རྩའི་ནུས་པ་འདོན་བཞིན་ཡོད་པས་དབྱིན་ཇི་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་གནམ་གཤིས་འགྱུར་ལྡོག་སོགས་གོ་ལ་ཧྲིལ་པོའི་རང་བཞིན་གྱི་འགྲན་སློང་ལ་ཁ་གཏད་གཅོག་པའི་ཐད་མཉམ་ལས་ལ་ཤུགས་སྣོན་བརྒྱབ་ནས་ཐུན་མོང་ཐོག་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོང་བྱེད་འདོད་ཡོད་ཅེས་གསུངས་པ་རེད།

ཝང་དབྱི་མཇལ་འཕྲད་ལ་ཞུགས།