ཁུལ་ཨུའི་རོང་འབྲོག་ཁུལ་བྱ་བའི་ཚོགས་འདུ་འཚོགས།

རྩོམ་སྒྲིག སངས་རྒྱས་སྐྱིད། ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། བཤེར་འབེབས། རིན་ཆེན་ཚེ་རིང་།

ཟླ2པའི་ཚེས28ཉིན་གྱི་ཕྱི་དྲོར། ཁུལ་ཨུའི་རོང་འབྲོག་ཁུལ་བྱ་བའི་ཚོགས་འདུ་ནུབ་མཚོ་གྲོང་རྡལ་དུ་འཚོགས། ཁུལ་ཨུའི་ཧྲུའུ་ཅི་ཀྲང་ཧྥེང་ཚོགས་འདུར་ཞུགས་ནས་གཏམ་བཤད་གནང་སྟེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད“ཞིང་གསུམ”བྱ་བའི་སྐོར་གྱི་རྒྱས་བཤད་གལ་ཆེན་དང་མཛུབ་སྟོན་གལ་ཆེན། མཚོ་སྔོན་ལ་གཟིགས་ཞིབ་སྐབས་གནང་པའི་གསུང་བཤད་གལ་ཆེན་གྱི་དགོངས་དོན་བཅས་ཁྱོན་ཡོངས་ནས་ལག་བསྟར་བྱེད་དགོས་པ་དང་། ཀྲུང་དབྱང་གྲོང་གསེབ་བྱ་བའི་གྲོས་ཚོགས་དང་ཞིང་ཆེན་ཏང་ཨུའི་རོང་འབྲོག་ཁུལ་བྱ་བའི་ཚོགས་འདུའི་བཀོད་སྒྲིག་དོན་འཁྱོལ་ནན་ཏན་བྱས་ཏེ། ཞིང་ལས་དང་གྲོང་གསེབ་དེང་རབས་ཅན་གྱི་སྤྱིའི་དམིགས་འབེན་གཏན་འཁེལ་བྱས་ནས་གྲོང་གསེབ་ཁྱོན་ཡོངས་དར་སྤེལ་གཏོང་བར་འཕེལ་རྒྱས་གསར་པ་ཡོང་བ་དང་དེང་རབས་ཅན་སླར་ཡང་སྐས་རིམ་གསར་པ་ཞིག་ཏུ་སླེབས་རྒྱུར་སྐུལ་འདེད་གཏོང་དགོས་པ་ནན་གྱིས་བསྟན། ཁུལ་ཨུའི་ཧྲུའུ་ཅི་གཞོན་པ་ཀྲང་ཨའེ་ཧུང་དང་སི་ཅི་ཧྲིན་སོགས་ཁུལ་གྱི་མགོ་ཁྲིད་ཚོགས་ར་གཙོ་བོའི་ཚོགས་རར་ཞུགས་པ་དང་། ཁུལ་ཨུའི་རྒྱུན་ཨུའམ་ཁུལ་དཔོན་གཞོན་པ་ཀྲའོ་ཧའེ་ཕིང་གིས་གཙོ་སྐྱོང་གནང་། ས་ཁུལ་སོ་སོ་དང་འབྲེལ་ཡོད་སྡེ་ཁག་གིས་བརྗེ་རེས་གཏམ་བཤད་གནང་།

ཀྲང་ཧྥེང་གིས་བསྟན་དོན།“ལོ་ལྔའི་འཆར་གཞི་བཅུ་བཞིའི”དུས་སྐབས་སུ། ང་ཚོས་དབུལ་ཐར་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་ཆེར་གཏོང་བ་དེ་གྲོང་གསེབ་དར་སྤེལ་དང་སྦྲེལ་མཐུད་ནུས་ལྡན་བྱེད་པར་དམིགས་ཏེ་ཞིང་ཕྱུགས་ལས་འཕེལ་རྒྱས་རྒྱུན་མཐུད་ངང་ཇེ་མགྱོགས་སུ་བཏང་བ་དང་རོང་འབྲོག་པའི་ཡོང་འབབ་བརྟན་པོར་འཕར་བ། རོང་འབྲོག་ཁུལ་བཅོས་སྐྱོང་ལ་སྐུལ་འདེད་ཏན་ཏིག་བཏང་ནས་ཁུལ་ཡོངས་ཀྱི“ཞིང་གསུམ”བྱ་བའི་ཁྱད་ཆོས་དང་ཕན་འབྲས་མངོན་གསལ་ཐོན་ཡོད། “ལོ་ལྔའི་འཆར་གཞི་བཅོ་ལྔའི”དུས་སྐབས་ནི“ཞིང་གསུམ”བྱ་བའི་ཞན་ཆ་ཁ་གསབ་དང་རྨང་གཞི་སྲ་བརྟན་དུ་གཏོང་བའི་འགག་སྒྲོལ་གྱི་དུས་ཡིན་ལ། ལེགས་ཆ་ཟབ་འཛུགས་དང་ཕྱོགས་ཡོངས་ནས་ནུས་ཤུགས་འདོན་པའི་འགག་རྩའི་དུས་སྐབས་ཤིག་ཀྱང་ཡིན་པས། ཏང་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་དང་དོན་འཁྱོལ་བྱས་ཏེ་ཞིང་ཕྱུགས་ལས་ཀྱི་ཕན་འབྲས་མཐོ་རུ་གཏོང་བ་དང་རོང་འབྲོག་ཁུལ་གྱི་གསོན་ཤུགས་ཆེ་རུ་གཏོང་བ། རོང་འབྲོག་པའི་ཡོང་འབབ་མང་དུ་གཏོང་བ་བཅས་ལ་རྒྱུན་ཆད་མེད་པར་སྐུལ་འདེད་བཏང་སྟེ་ཁུལ་ཡོངས་ཀྱི་གྲོང་གསེབ་ཁྱོན་ཡོངས་ནས་དར་སྤེལ་ཡོང་བའི་རྣམ་པ་གསར་བ་ཧུར་ཐག་གིས་གཏོད་དགོས་ཟེར།

ཀྲང་ཧྥེང་གིས་ནན་གྱིས་བསྟན་དོན། ད་ལོ་ནི“ལོ་ལྔའི་འཆར་གཞི་བཅོ་ལྔའི”འཆར་འགོད་མགོ་རྩོམ་པའི་ལོ་ཡིན་ལ། ལོ་ལྔའི་བར་བརྒལ་དུས་སྐབས་མཇུག་སྒྲིལ་རྗེས་རྒྱུན་རྣམ་ཅན་གྱི་ལྟ་ཞིབ་ཚད་ལེན་རོགས་སྐྱོར་བྱེད་པའི་འགག་རྩའི་ལོ་ཞིག་ཀྱང་ཡིན་པས་ད་ལོའི“ཞིང་གསུམ”བྱ་བ་ལེགས་པར་བསྒྲུབ་པར་དོན་སྙིང་གལ་ཆེན་ལྡན་ཡོད། བསམ་བློའི་ངོས་འཛིན་གཏིང་ཟབ་ཏུ་བཏང་སྟེ་བསམ་བློ་དང་འགུལ་སྐྱོད་དེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ཐོག་གཅིག་གྱུར་ཡོང་བར་བྱེད་པ་དང་། ཏང་ཀྲུང་དབྱང་དང་ཞིང་ཆེན་ཏང་ཨུ། ཁུལ་ཨུའི་ཐབས་ཇུས་བཀོད་སྒྲིག་ཐོག་གཅིག་གྱུར་ཡོང་བར་བྱས་ཏེ་བསམ་ཕྱོགས་སྔར་བས་ཁ་གསལ་དང་གཙོ་གནད་ཁོང་དུ་ཆུད་ནས་ད་ལོའི“ཞིང་གསུམ”བྱ་བ་སོ་སོ་དམ་འཛིན་ཏན་ཏིག་བྱེད་དགོས། འབྲུ་རིགས་བདེ་འཇགས་ཀྱི་རྨང་གཞི་བརྟན་པོར་འཛུགས་པ་དང“ཞིང་བརྟེན་འབྲུ་གསོག་དང་རྩལ་བརྟེན་འབྲུ་གསོག”གི་འཐབ་ཇུས་ཕྱོགས་ཡོངས་ནས་དོན་འཁྱོལ་བྱས་ཏེ་རྨོ་ཞིང་སྲུང་སྐྱོབ་ཀྱི་མཚམས་ཐིག་སྲུང་འཛིན་ནན་མོ་བྱས་ནས་འབྲུ་རིགས་ཐོན་འབབ་བརྟན་པོ་དང་མང་བའི་འགན་ལེན་བྱས་ཏེ་འབྲུ་རིགས་བདེ་འཇགས་ཀྱི་མ་མཐའི་མཚམས་ཐིག་ཏན་ཏིག་སྒོས་སྲུང་དགོས། རྒྱུན་རྣམ་ཅན་གྱི་གནད་འཁེལ་རོགས་སྐྱོར་དམ་འཛིན་ཡག་པོ་བྱས་ཏེ་ཐོན་ལས་རོགས་སྐྱོར་དང་ལས་ཞུགས་རོགས་སྐྱོར་བྱེད་ཤུགས་རྒྱུན་མཐུད་ངང་ཆེ་རུ་གཏོང་བ་དང་། ལྟ་ཞིབ་ཚད་ལེན་དང་དབྱེ་འབྱེད་གནད་ལ་འཁེལ་བ། གཞི་ཁྱོན་རང་བཞིན་གྱི་དབུལ་བོར་བསྐྱར་ལོག་དང་དབུལ་འགྱུར་གྱི་མ་མཐའི་མཚམས་ཐིག་མཐའ་གཅིག་ཏུ་བརྟན་སྲུང་བྱེད་དགོས། གྲོང་གསེབ་དམངས་ཕྱུག་ཐོན་ལས་མ་ལག་ཧུར་ཐག་སྒོས་འཛུགས་པ་དང་། མཚོ་བྱང་ཐོན་ཁུངས་ཀྱི་ཕན་ནུས་དང་ཐོན་ཁུངས་ཀྱི་ལེགས་ཆར་གཞི་ཚུགས་ནས་ལྗང་མདོག་དང་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་བྱེད་པར་དམིགས་ཏེ་ཕྱུགས་ར་དང་ཁྲོམ་ར། ཞིང་ལས་དང་ཕྱུགས་ལས། ཐོན་སྐྱེད་དང་སྐྱེ་ཁམས་བཅས་ཀྱི“འབྲེལ་བ་ཆ་གསུམ”ཐག་གཅོད་ཡང་དག་བྱས་ཏེ་གྲོང་གསེབ་ཐོན་ལས་ཧུར་ཐག་སྒོས་འཕེལ་རྒྱས་གཏོང་དགོས། གྲོང་གསེབ་བཅོས་བསྒྱུར་གསར་གཏོད་བརྟན་པོར་སྐུལ་འདེད་གཏོང་བ་དང་ཞིང་པའི་གསར་གཏོད་ཀྱི་སྙིང་སྟོབས་ལ་བརྩི་འཇོག་བྱས་ཏེ་ཞིང་ལས་དང་གྲོང་གསེབ་འཕེལ་རྒྱས་ཀྱི་སྒུལ་ཤུགས་ཚད་ཆེས་ཆེ་བའི་སྒོ་ནས་འདོན་སྤེལ་བྱེད་དགོས། གྲོང་གསེབ་འཛུགས་སྐྲུན་གཅིག་གྱུར་སྐུལ་འདེད་གཏོང་བ་དང་འཆར་འགོད་སྣེ་ཁྲིད་བྱེད་རྒྱུར་རྒྱུན་འཁྱོངས་བྱས་ཏེ་རྨང་གཞིའི་སྒྲིག་བཀོད་ཀྱི་ཞན་ཆ་སྲ་བརྟན་དུ་གཏོང་བ་དང་རོང་འབྲོག་ཁུལ་གྱི་སྐྱེ་ཁམས་ཁོར་ཡུག་མུ་མཐུད་ཇེ་ལེགས་སུ་བཏང་ནས་བཅོས་སྐྱོང་གི་ཕན་ནུས་རྒྱུན་མཐུད་ངང་ཆེ་རུ་གཏོང་དགོས། ཏང་གིས“ཞིང་གསུམ”བྱ་བར་ཁྱོན་ཡོངས་ནས་མགོ་ཁྲིད་བྱེད་ཤུགས་ཆེ་རུ་གཏོང་བ་དང་རིམ་བཞིའི་ཧྲུའུ་ཅིས་གྲོང་གསེབ་དར་སྤེལ་དམ་འཛིན་བྱེད་རྒྱུ་རྒྱུན་འཁྱོངས་བྱས་ཏེ། བྱ་བའི་ལམ་སྲོལ་སྔར་ལས་འཐུས་ཚང་དུ་བཏང་ནས “ཞིང་ཕྱུགས་ལས་ཤེས་པ་དང་རོང་འབྲོག་ཁུལ་ལ་དགའ་བ། རོང་འབྲོག་པར་དགའ་བའི”ལས་བྱེད་པའི་དཔུང་ཁག་བསྐྲུན་ནས“ཞིང་གསུམ”བྱ་བ་དམ་འཛིན་བྱེད་པའི་ནུས་པ་དང་སྲིད་ཇུས་ཀྱི་ཆུ་ཚད་མུ་མཐུད་དུ་མཐོ་རུ་གཏོང་དགོས་ཟེར།

ཚོགས་འདུ་དེ་བརྙན་ལམ་གྱི་རྣམ་པའི་ཐོག་ནས་འཚོགས་པ་དང་རྫོང་སོ་སོར་ཡན་ལག་ཚོགས་ར་བཙུགས་ཡོད།