མཚོ་བྱང་ཁུལ་མི་དམངས་སྲིད་གཞུང་དང་ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་འཐབ་ཇུས་མཉམ་ལས་ཀྱི་གྲོས་མཐུན་གན་རྒྱ་བཞག་པ་དང“ཕུགས་འདུན་དད་སེམས་སློབ་གསོ་རྟེན་གཞིའི”སྒོ་བྱང་འགེལ་བའི་མཛད་སྒོ་སྤེལ།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། གངས་ལྗོངས་འཕྲིན་གསར། བཤེར་འབེབས། རིན་ཆེན་ཚེ་རིང་། 

ཟླ5པའི་ཚེས23ཉིན། མཚོ་བྱང་ཁུལ་མི་དམངས་སྲིད་གཞུང་དང་ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་ནུབ་མཚོ་གྲོང་རྡལ་རྡུལ་ཕྲན་མཁར་དྲན་གསོ་ཁང་དུ་འཐབ་ཇུས་མཉམ་ལས་ཀྱི་གྲོས་མཐུན་གན་རྒྱ་བཞག་པ་དང་འབྲེལ་ཀྲུང་གོའི་དངུལ་ཁང་གི“ཕུགས་འདུན་དད་སེམས་སློབ་གསོའི་རྟེན་གཞིའི”སྒོ་བྱང་འགེལ་བའི་མཛད་སྒོ་སྤེལ། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་ཏང་ཨུའི་ཧྲུའུ་ཅིའམ་ཧང་ཀྲང་ཧུའུ་ཝེ་ཧྭ་ཡིས་ཤིས་ཚིག་ཕུལ། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་མཛད་སྒོར་སླེབས་ཤིང་། ཁུལ་ཨུའི་རྒྱུན་ཨུའམ་དྲུང་ཡིག་ཆེན་མོ་ཝང་ཡུང་ཁྲང་གིས་གཙོ་སྐྱོང་གནང་།

ཤ་བོ་སྐྱབས་ཀྱིས་ཁུལ་ཨུ་དང་ཁུལ་སྲིད་གཞུང་གི་ཚབ་བྱས་ནས་ཀྲུང་གོའི་དངུལ་ཁང་མཚོ་སྔོན་ཡན་ལག་དངུལ་ཁང་གིས་ཐོག་མཐའ་བར་གསུམ་དུ་མཚོ་བྱང་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། ཁོང་གིས་མཚོ་བྱང་ནི་མཚོ་སྔོན་པོ་དང་མདོ་ལ་རི་བོ་རྒྱལ་ཁབ་སྤྱི་གླིང་གཉིས་ཀྱི་སར་གནས་ཤིང་། རླབས་ཆེན་གྱི“མདེལ་གཉིས་སྐར་གཅིག”གི་སྙིང་སྟོབས་ཀྱི་འབྱུང་གནས་དང་། དམར་དམག་ནུབ་ལམ་དམག་དཔུང་གིས་ཁྲག་འདོན་དམར་འཛིང་བྱས་པའི་གནས་ཤིག་ཀྱང་ཡིན། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་མཚོ་བྱང་གིས་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གཏོད་པ་དང་། རྒྱལ་སྤྱིའི་སྐྱེ་ཁམས་ཡུལ་སྐོར་བྱ་ཡུལ་གཏོད་པ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བ་བཅས་ཕྱོགས་གསུམ་གྱི་ཐད་ཞིང་ཆེན་ཡོངས་ཀྱི་མདུན་གྲལ་དུ་སླེབས་པར་བྱ་དགོས་པའི་བླང་བྱ་བཏོན་པ་དེས་མཚོ་བྱང་གི་འཕེལ་རྒྱས་ལ་ཁ་ཕྱོགས་གསལ་སྟོན་བྱས་པར་མ་ཟད། དངུལ་རྩའི་སྒྲིག་གཞིར་ཡངས་ཤིང་རྒྱ་ཆེ་བའི་བར་མཐོངས་དང་གོ་སྐབས་བཟང་པོ་མཁོ་འདོན་བྱས་ཡོད། ཐེངས་འདིའི་འཐབ་ཇུས་མཉམ་ལས་གྲོས་མཐུན་གན་རྒྱ་བཞག་པ་ནི་ཕྱོགས་གཉིས་ཀྱིས་མ་འོངས་པར་ཁ་ཕྱོགས་པ་དང་འཕེལ་རྒྱས་དོན་གཉེར་བྱེད་པའི་འཐབ་ཇུས་ཀྱི་གདམ་ག་ཞིག་ཡིན་པས། ཀྲུང་གོའི་དངུལ་ཁང་གིས་མཚོ་བྱང་འཕེལ་རྒྱས་ཀྱི་དོན་དངོས་དང་བསྟུན་ནས་དངོས་གཞིའི་དཔལ་འབྱོར་ལ་ཞབས་འདེགས་ཞུ་རྒྱུར་དམིགས་ཏེ། དངུལ་རྩའི་ཐོན་ཁུངས་མཁོ་སྤྲོད་དང་ཐོན་རྫས་གསར་གཏོད་བྱེད་ཤུགས་ཆེ་རུ་གཏོང་བ། ཐོན་ལས་སྲོག་ཤིང་ཅན་དང་ལས་གཞི་གཙོ་གནད། ཁེ་ལས་ཆུང་འབྲིང་། རྨང་གཞིའི་སྒྲིག་བཀོད་འཛུགས་སྐྲུན་བཅས་ལ་ཡིད་རྟོན་དངུལ་བུན་གྱི་རྒྱབ་སྐྱོར་བྱེད་ཤུགས་ཟམ་མི་ཆད་པར་ཆེ་རུ་གཏོང་དགོས་པ་དང་། དངུལ་རྩས་ས་གནས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་དང་ཐོན་ལས་གྲུབ་ཚུལ་ལེགས་སྒྱུར་རིམ་སྤོར་ཇེ་མགྱོགས་སུ་གཏོང་བ་སོགས་ཀྱི་ཐད་འདེགས་སྐྱོར་དང་འགན་ལེན་གྱི་ནུས་པ་འདོན་སྤེལ་གང་ལེགས་བྱ་དགོས་པའི་རེ་བ་ཡོད་པར་བསྟན།

ཧུའུ་ཝེ་ཧྭ་ཡིས་ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་གཉེར་སྐྱོང་འཕེལ་རྒྱས་གནས་ཚུལ་ངོ་སྤྲོད་གནང་བ་དང་། མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་དུས་ཡུན་རིང་པོའི་ནང་ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་ལ་རྒྱབ་སྐྱོར་དང་རོགས་རམ་གནང་བར་སེམས་སྟེང་ནས་ཐུགས་རྗེ་ཆེ་ཞུས་ཤིང་། དངུལ་རྩའི་འཕེལ་རྒྱས་དེ་སྲིད་གཞུང་གི་རྒྱབ་སྐྱོར་དང་ཁ་འབྲལ་ཐབས་མེད་ལ། མཚོ་བྱང་དུ་ཀྲུང་གོའི་དངུལ་ཁང་འཕེལ་རྒྱས་ཀྱི་བར་མཐོངས་ཧ་ཅང་ཆེན་པོ་ཡོད་ཅིང་། ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་ཐེངས་འདིའི་མཉམ་ལས་གྲོས་མཐུན་གན་རྒྱ་འཇོག་པ་གོ་སྐབས་སུ་བཟུང་ནས་མཚོ་བྱང་ཁུལ་གྱི“243”གྱི་འཕེལ་རྒྱས་བཀོད་སྒྲིག་ལ་དམ་པོར་དམིགས་ཏེ“མཚོ་བྱང་ལྔའི”འཛུགས་སྐྲུན་དམིགས་ཚད་ལ་སྐུལ་འདེད་གཏོང་རྒྱུ་དང་། དངོས་ཚན་དཔལ་འབྱོར་ལ་ཞབས་འདེགས་ཞུ་བ་གཙོ་གནད་དུ་བཟུང་ནས་དངུལ་ཁང་དང་མཚོ་བྱང་གི་མཉམ་ལས་གཏིང་ཟབ་ཏུ་བཏང་སྟེ། བསམ་བློ་དང་འགུལ་སྐྱོད་མཚོ་བྱང་དང་གཅིག་གྱུར་ཡོང་བར་བྱ་རྒྱུ་དང་། སྟོབས་ཤུགས་གཞོགས་གཅིག་ལ་བཏོན་ནས་མཚོ་བྱང་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་དེ་ལས་ཆེ་བ་དབུལ་རྒྱུ་ཡིན་ཞེས་བཤད།

ཤ་བོ་སྐྱབས་དང་ཧུའུ་ཝེ་ཧྭ་ཡིས“ཕུགས་འདུན་དད་སེམས་སློབ་གསོའི་རྟེན་གཞིའི”སྒོ་བྱང་བཀལ་ལ། ཀྲང་ཧྲིང་ཡོན་དང་ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་ཧང་ཀྲང་གཞོན་པ་ལུའི་ཧུང་ཝེ་ཡིས་ཕྱོགས་གཉིས་ཀྱི་ཚབ་བྱས་ཏེ《འཐབ་ཇུས་མཉམ་ལས་གྲོས་མཐུན》གན་རྒྱར་མིང་རྟགས་བཀོད།   

ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རིན་གཞོན་པ་ཝང་ཞིང་ཧོས་དང་། ཁུལ་སྲིད་གྲོས་ཀྱི་ཀྲུའུ་ཞི་གཞོན་པ་པོ་ཀྲེང་ཆིང་། ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་སྒྲིག་ཨུའི་ཧྲུའུ་ཅི་ལེའང་ཁྲིག་ཧྲིན། ཁུལ་ཨུའི་སྡེ་ཁག་སོ་སོ་དང་། ཁུལ་ཐད་གཏོགས་ལས་ཁུངས་སོ་སོ། ཀྲུང་གོའི་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་སྡེ་ཁག་སོ་སོ། མཚོ་བྱང་ཁུལ་ཉིང་ལག་དངུལ་ཁང་གི་འགན་འཁུར་བློ་མཐུན་གཙོ་བོ་བཅས་ཞུགས།