མངལ་སྲུང་བའི་ཐབས་ཇི་ལྟར་ཡིན།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  བོད་ཀྱི་སྨན་རྩིས་རྒྱུན་ཤེས།  བཤེར་འབེབས།  རིན་ཆེན་ཚེ་རིང་།

མངལ་སྦྲུམ་པའི་རྗེས་སུ་མངལ་གནས་ཀྱི་ལུས་བསྲུང་བའི་སླད་དུ་བུད་མེད་དེ་ཡིས་ཉལ་པོ་སྤྱད་པ་དང་རྩོལ་བ་དྲག་པོས་ལུས་ཀྱི་ལས་ཆེན་པོ་བྱེད་པ། མཚན་མོ་གཉིད་མི་ལོག་ཅིང་ཉིན་མོ་གཉིད་ལོག་པ། བཤང་གཅིའི་ཤུགས་བཀག་པའམ་ཧ་ཅང་བཙིར་ཆེ་བ། ནུས་པ་ཤིན་ཏུ་ཚ་ཞིང་རྣོ་ལ་ལྕི་བའི་ཟས་སྨན་རིགས་དང་། ལྷག་པར་བཤང་གཅི་འགག་པར་འགྱུར་བའི་ཁ་ཟས་རྣམས་དང་། ཡར་སྐྱུག་པར་བྱེད་པའི་སྐྱུག་སྨན་གཏོང་བ་དང་། མར་འཁྲུ་བར་བྱེད་པའི་བཤལ་སྨན་གཏོང་བ། ནི་རུ་ཧ་ཞེས་པ་བཤང་ལམ་ནས་ཡར་སྨན་གཏོང་བ། ཁྲག་གཏར་བར་བྱེད་པ་བཅས་ནི་མ་དང་མངལ་གནས་སེམས་ཅན་གཉིས་ལ་གནོད་པར་འགྱུར་བས་མ་བཙས་ཀྱི་བར་དུ་སྤང་དགོས། གལ་ཏེ་གོང་གི་སྤང་བྱ་འགའ་ཞིག་བྱ་དགོས་པ་བྱུང་ན་ཟླ་བ་བརྒྱད་རྫོགས་ནས་བྱེད་པ་ལས་དེའི་བར་དུ་ནི་སྤང་བར་བྱ་བ་ཁོ་ན་ཡིན། དེ་ལྟར་སྤང་དགོས་པའི་རྒྱུ་མཚན་ཅིའི་ཕྱིར་ཞེ་ན་ཟས་སྤྱོད་དེ་རྣམས་མའི་ལུས་ཟུངས་ལ་ལྷག་པར་གནོད་པ་དང་། མའི་ཟུངས་ཟད་ན་བུའི་ལུས་བསྐྱེད་པའི་རྒྱུ་མེད་པས་མངལ་འཇིག་པ་སྟེ་ཕྱིར་འབྱུང་བའམ་འཆི་བ། ཡང་ན་རླུང་གི་དབང་གིས་མངལ་གྱི་ནང་ཉིད་དུ་སྐམ་པར་འགྱུར་བས་ནའོ།