དྲེག་གྲུམ་འཕར་བ་སྔོན་འགོག་བྱེད་ཐབས།

རྩོམ་སྒྲིག  དོན་འགྲུབ་མཚོ།  ཡོང་ཁུངས།  འཛམ་གླིང་ཡང་རྩེའི་ཚན་སྤེལ་སྐད་འཕྲིན་སྤྱི་སྟེགས།  བཤེར་འབེབས།  རིན་ཆེན་ཚེ་རིང་།

མི་རྒན་པ་དང་དར་མ་རྣམས་ཀྱིས་བདེ་ཐང་གི་འཚོ་བ་རོལ་སྟངས་རྒྱུན་འཁྱོངས་བྱས་ཏེ།  སྨན་པའི་ངག་བཀོད་བཞིན་གཅིན་སྐྱུར་ལ་ཚོད་འཛིན་བྱ་དགོས་ཤིང་།  དེ་ནི་དྲེག་གྲུམ་སྔོན་འགོག་བྱེད་པའི་གནད་འགག་ཡིན།  བྱེ་བྲག་གི་བྱེད་ཐབས་ལ་གཤམ་གྱི་འདི་དག་ཡོད།

གཅིག  བཟའ་བཏུང་དོ་དམ།  བཟའ་བཏུང་གི་གྲུབ་ཆ་སྙོམ་སྒྲིག་བྱས་ན།  དྲེག་གྲུམ་ནད་པས་ནུས་ལྡན་ངང་ལུས་ནང་གི་གཅིན་སྐྱུར་ཚོད་འཛིན་བྱས་ཏེ།  དྲེག་གྲུམ་འཕར་བའི་ཉེན་ཁ་ཇེ་ཆུང་དུ་གཏོང་ཐུབ།  དྲེག་གྲུམ་ནད་པས་ངེས་པར་དུ་ཕུ་རོན་འདུས་ཚད་དམའ་བའི་བཟའ་བཅའ་བདམས་ཏེ།  གཅིན་སྐྱུར་བསྐྱེད་ཚད་ཇེ་ཉུང་དུ་གཏོང་དགོས། 

སྔོ་ཚལ།  སྔོ་ཚལ་མང་ཆེ་བའི་ཕུ་རོན་འདུས་ཚད་དམའ་བ་སྟེ།  དཔེར་ན་མེ་ཚལ་ལྗང་ཁུ་དང་ཚོད་སྣག  ལ་ཕུག  ཧོང་ཀྭ་སོགས་ལྟ་བུ།  འོན་ཀྱང་ཤ་མོ་དང་མེ་ཚལ་དཀར་པོའི་ཕུ་རོན་འདུས་ཚད་ཅུང་མཐོ་བས།  དྲེག་གྲུམ་ནད་པས་མང་པོ་མ་ཟོས་ན་བཟང་། 

སིལ་ཏོག  དྲེག་གྲུམ་ནད་པས་སིལ་ཏོག་མང་པོ་ཟོས་ཆོག  ཡིན་ནའང་སིལ་མངར་འདུས་ཚད་ཅུང་མཐོ་བའི་སིལ་ཏོག་ཉུང་ཟ་བྱ་དགོས།

འོ་མ་དང་འོ་བཟོས་བཟའ་བཅའ།  སྣུམ་འདུས་ཚད་དམའ་བའམ་སྣུམ་བཏོན་ཟིན་པའི་འོ་མའི་ཐོན་རྫས་ཏེ་དཔེར་ན་འོ་མ་དང་ཞོ།  མར་སོགས་ཀྱིས་དྲེག་གྲུམ་འཕར་བའི་ཉེན་ཁ་ཇེ་ཆུང་དུ་གཏོང་ཐུབ། 

འབྲུ་རིགས་རྐྱང་བ།  འབྲས་རྩིང་ལ་སོགས་པའི་འབྲུ་རིགས་རྐྱང་བའི་བཟའ་བཅའ་ཡི་ཕུ་རོན་འདུས་ཚད་ཅུང་དམའ་ཞིང་བཟའ་རུང་ཚི་སྣ་ཕུན་སུམ་ཚོགས་པས།  འབྲུ་རིགས་རྐྱང་བའི་བཟའ་བཅའ་མང་ཙམ་བཟའ་དགོས། 

སྤྲི་དཀར་རྒྱུ།  སྤྲི་དཀར་རྒྱུ་ནི་མིའི་ལུས་པོར་ངེས་པར་དུ་མཁོ་བའི་འཚོ་བཅུད་རྫས་ཤིག་ཡིན་ལ།  དྲེག་གྲུམ་ནད་པས་ཕུ་རོན་འདུས་ཚད་དམའ་བའི་བཟའ་བཅའ་ལས་སྤྲི་དཀར་རྒྱུ་ལེན་དགོས། 

གཉིས།  ཆང་ལ་ཚོད་འཛིན་པ།  ཆང་བཅུད་ཀྱིས་གཅིན་སྐྱུར་གྲུབ་པའི་ཉེན་ཁ་ཇེ་ཆེར་གཏོང་བས།  རྒན་པ་རྣམས་ཀྱིས་ཆང་ལ་ཚོད་འཛིན་དགོས་ཤིང་།  ལྷག་པར་དུ་ལྦུ་རག་ཉུང་འཐུང་བྱ་དགོས།

གསུམ།  དུས་བཅད་ལྟར་བརྟག་དཔྱད་བྱེད་པ།  རྒན་པ་རྣམས་ཀྱིས་དུས་བཅད་ལྟར་གཅིན་སྐྱུར་ལ་བརྟག་དཔྱད་བྱས་ཏེ།  ནད་གཞི་སྔ་མོ་ནས་ཤེས་རྟོགས་དང་གསོ་བཅོས་ཐུབ་པ་བྱ་དགོས། 

བཞི།  ཆུ་མང་ཙམ་འཐུང་བ།  ཉིན་རྒྱུན་གྱི་འཚོ་བའི་ཁྲོད་རྒན་པ་རྣམས་ཀྱིས་ཆུ་འདང་ངེས་ཁ་གསབ་བྱས་ཏེ།  ལུས་ནང་གི་གཅིན་སྐྱུར་ལུས་ཕྱིར་འཕུད་དགོས།