ཆུ་ལོག་བྱུང་བའི་སྐབས་ཀྱི་རང་སྐྱོབ་བྱེད་ཐབས།

རྩོམ་སྒྲིག དོན་འགྲུབ་མཚོ།  ཡོང་ཁུངས། མཚོ་སྔོན་བོད་ཡིག་ཚན་རྩལ་ཚགས་པར།  བཤེར་འབེབས། རིན་ཆེན་ཚེ་རིང་།

ཆར་དུས་ཐོན་པ་ཡིས་དབྱར་ཁའི་ཚ་གདུང་འཇོམས་ནའང་། ཆར་བ་ཆེན་པོ་དང་དྲག་ཆར་བབས་ཚེ། ཆུ་ལོག་གི་གནོད་འཚེ་ཡང་སྐྱེད་སླ་བ་ཡིན། འོ་ན། ཆུ་ལོག་མ་བྱུང་སྔོན་ལ་གྲ་སྒྲིག་གང་དག་བྱ་དགོས་པ་དང་། ཆུ་ལོག་གི་ཉེན་ཁ་ལ་འཕྲད་ན་ཇི་ལྟར་རང་སྐྱོབ་བྱ་དགོས་སམ་ཞེ་ན། གཤམ་དུ་དེར་འབྲེལ་གྱི་རང་སྐྱོབ་ཐབས་ཤེས་འགའ་བཀོད་ཡོད།

གཅིག ཆུ་ལོག་མ་བྱུང་སྔོན་ལ་གྲ་སྒྲིག་གང་དག་བྱ་དགོས་སམ།

1.རང་ཉིད་སྡོད་སའི་ཆར་བ་དང་བཞུར་ཆུའི་སྔོན་བརྡ་ལ་མཉམ་འཇོག་བྱེད་པ།

2.རང་ཉིད་སྡོད་པའི་ས་ཁུལ་གྱི་ཞོད་འགོག་སྔོན་ཇུས་དང་མངོན་མེད་གནོད་འཚེ་སྣ་ཚོགས་དང་། གནས་སྤོ་ལམ་ཐིག འབྲེལ་གཏུག་བྱེད་སྟངས་ངེས་པར་བྱེད་པ།

3.ས་བབ་དམའ་ས་ན་ཡོད་པའི་ཁྱིམ་ཚང་གིས་སྟབས་བདེའི་སྲོག་སྐྱོབ་ཡོ་བྱད་གྲ་སྒྲིག་བྱེད་པ།

4.ཁ་པར་སོགས་ཀྱི་འཕྲིན་གཏོང་ལ་ཁག་ཐེག་བྱས་ཏེ་དུས་ཐོག་ཏུ་འབྲེལ་ཡོད་ཆ་འཕྲིན་གཏོང་ལེན་ཐུབ་པར་བྱེད་པ།

5.ཉེན་གཡོལ་ལ་གྲ་སྒྲིག་བྱེད་པ་དང་། གནས་སྤོ་ཉེན་གཡོལ་བྱེད་དུས། བཀོད་འདོམས་ལ་ཉན་པ་དང་། ཕན་ཚུན་ལ་རོགས་རམ་བྱེད་པ། ཉེན་ཁ་མེད་པའི་བརྡ་ཁྱབ་མ་བཏང་བའི་སྔོན་ལ་སྔར་གནས་སུ་མི་ལོག་པ།

གཉིས། ཆུ་ལོག་འབྱུང་སྐབས་ཀྱི་ཉེན་ཁའི་ས་ཆ་གང་དག་ཡིན།

1.གྲོང་ཁྱེར་དུ། རྡིབ་ཉེན་ཡོད་པའི་སྡོད་ཁང་དང་གྱང་མཐོན་པོའི་ཉེ་འཁོར། ཆུ་ལོག་གིས་བསྣུབས་པའི་ས་འོག་ཆུ་ལམ། གཞུང་ལམ་འགྲམ་གྱི་ཆུ་དོང་། ས་འོག་བགྲོད་ལམ། གློག་སྡོང་དང་མཐོ་གནོན་གློག་སྡོང་། རྫས་འགྱུར་བཟོ་གྲྭ། ཉེན་དངོས་གསོག་ཉར་ཁང་སོགས་ཀྱི་ཉེ་འཁོར་ནི་ཆུ་ལོག་འབྱུང་སྐབས་ཀྱི་ཉེན་ཁའི་ས་ཆ་ཡིན།

2.ཞིང་སྡེ་རུ། ཆུ་འགྲམ་དང་ཆུ་མཛོད། རྐ་ཁ། ཆུ་རྐ། རྡིབ་ཉེན་ཡོད་པའི་ཁང་བའི་ནང་དང་ཁང་ཐོག གྱང་རྩ། གློག་སྡོང་དང་མཐོ་གནོན་གློག་སྡོང་གི་ཉེ་འཁོར་སོགས་ནི་ཆུ་ལོག་འབྱུང་སྐབས་ཀྱི་ཉེན་ཁའི་ས་ཆ་ཡིན།

གསུམ། ཆུ་ལོག་གིས་བསྐོར་ན་རང་སྐྱོབ་ཇི་ལྟར་བྱེད་དམ།

1.ཆུ་ལོག་ཁང་བའི་ནང་དུ་བཞུར་བར་སྔོན་འགོག་བྱ་ཆེད། སྒོ་ཡི་བར་སྟོང་ཚང་མ་གཅོད་དགོས་ཏེ། སྒྱེ་མོ་སོགས་ཀྱི་ནང་ལ་ས་དང་བྱེ་མ་སོགས་བླུགས་ནས་ཆུ་ལོག་ཡོང་སའི་ཁ་གཅོད་དགོས་ཏེ། སྐྱེ་མོ་སོགས་ཀྱི་ནང་ལ་ས་དང་བྱེ་མ། རྡོ་ཟེགས་སོགས་བླུགས་ནས་ཆུ་ལོག་ཡོང་སའི་ཁ་གཅོད་དགོས།

2.ཆུ་ལོག་མུ་མཐུད་དུ་ཇེ་ཆེར་སོང་ན། ཁྱིམ་དུ་ཟས་རིགས་དང་འཐུང་ཆུ། ལྭ་བ། ཆུ་སྐོལ་བྱེད་སོགས་གྲ་སྒྲིག་བྱ་དགོས་ཤིང་། ཁྱེར་མི་ཐུབ་པའི་དངོས་པོ་རྩ་ཆེན་རྣམས་ཀྱི་ནང་དུ་ཆུ་མི་འགྲོ་བར་བྱས་རྗེས། གནས་མཐོ་ས་དང་ས་འོག་སོགས་སུ་སྦེད་དགོས། སྨན་དང་མེ་ཁ་འཛིན་བྱེད་ཀྱི་ཡོ་བྱད་དང་། བརྡ་གཏོང་སྒྲིག་ཆས་སྣ་ཚོགས་གྲ་སྒྲིག་བྱ་དགོས།

3.གནོད་འཚེ་ཐེབས་པ་ཚབས་ཆེ་སྟེ་གནས་སྤོ་བྱ་དགོས་བྱུང་ན། གནས་སྤོ་མ་བྱས་པའི་སྔོན་ལ། ཟས་ཟ་བ་དང་ཆུ་ཁོལ་འཐུང་བ་སོགས་བྱས་ཏེ་ལུས་སྟོབས་ལྡན་པར་ཁག་ཐེག་བྱ་དགོས།

4.སྟབས་མ་ལེགས་པར་ཆུ་ལོག་གིས་ཁུར་ཚེ། ཅི་ནུས་ཀྱིས་དངོས་པོ་བརྟན་པོའམ་ཡང་ན་ཆུ་ཁར་གཡེང་སླ་བའི་དངོས་པོ་གང་རུང་ལ་འཇུས་ཏེ་སྲོག་ཐར་ཐབས་བྱ་དགོས།

5.གལ་ཏེ་ཆུ་ལོག་གིས་བསྐོར་བའི་སྡོད་ཁང་ཐོག་ཏུ་ཡོད་ན། སྡོད་ཁང་རྡིབ་མིན་ལ་མཉམ་འཇོག་བྱ་དགོས། བརྡ་གཏོང་ཡོ་བྱད་ལ་བདག་སྐྱོང་ལེགས་པོ་བྱས་ཏེ་དུས་ཐོག་ཏུ་རོགས་སྐྱོབ་སྡེ་ཁག་ལ་འབྲེལ་བ་བྱས་ནས་རོགས་མི་ཐོན་པར་བྱེད་པ་དང་། འུར་རྒྱག་པའམ་ཡང་ན་དངོས་པོ་མདོག་གསལ་བོ་ཅན་སོགས་སྤྱད་ནས་སྲོག་སྐྱོབ་ཀྱི་བརྡ་གཏོང་ཐབས་བྱ་དགོས།