ལོ་ཚོད་མི་འདྲ་བས་ཐ་མག་བཅད་ན་དཀའ་ངལ་གང་དག་ལ་འཕྲད།

རྩོམ་སྒྲིག དོན་འགྲུབ་མཚོ།  ཡོང་ཁུངས། མཚོ་སྔོན་བོད་ཡིག་ཚན་རྩལ་ཚགས་པར།  བཤེར་འབེབས། རིན་ཆེན་ཚེ་རིང་།

ཐ་མག་གཅོད་པ་ནི་ལུས་ཁམས་ལ་འཕྲད་པའི་འགྲན་སློང་ཞིག་ཡིན་པར་མ་ཟད། སེམས་ཁམས་དང་སྤྱི་ཚོགས་ཐད་ཀྱི་ཚོད་བགམ་ཞིག་ཀྱང་ཡིན། ཐ་མག་གཅོད་པའི་བརྒྱུད་རིམ་ཁྲོད་ལོ་ཚོད་མི་འདྲ་བའི་མི་ལ་འཕྲད་པའི་སེམས་ཁམས་ཀྱི་གནོན་ཤུགས་དང་སྤྱི་ཚོགས་ཀྱི་རྒྱབ་སྐྱོར་ལ་ཁྱད་པར་མངོན་གསལ་ཡོད།

ཞིབ་འཇུག་ལས་མངོན་པ་ལྟར་ན། ཐ་མག་གཅོད་ཐུབ་པ་ནི་མི་སྒེར་གྱི་སེམས་ཤུགས་དང་། ཁྱིམ་ཚང་གི་རྒྱབ་སྐྱོར། སྤྱི་ཚོགས་ཁོར་ཡུག་གི་ཤུགས་རྐྱེན་བཅས་དང་འབྲེལ་བ་དམ་ཟབ་ཡོད་ཅིང་། རྐྱེན་དེ་དག་ལོ་ཚོད་ཀྱི་འགྱུར་བ་དང་བསྟུན་ནས་ཁྱད་ཆོས་མི་འདྲ་བ་མངོན།

གཅིག ན་གཞོན་གྱིས་ཐ་མག་གཅོད་པ།

ན་གཞོན་ཚོས་ཐ་མག་གཅོད་འདོད་ཆེ་མོད། ལེགས་འགྲུབ་བྱུང་ཚད་ལྟོས་བཅས་ཀྱིས་ཅུང་དམའ། དེའི་རྒྱུ་རྐྱེན་གཙོ་བོ་ནི་སྤྱི་ཚོགས་འབྲེལ་འདྲིས་ཀྱི་གནོན་ཤུགས་དང་དབྱིངས་ཞུགས་པའི་གོམས་གཤིས་ལ་རག་ལས། ན་གཞོན་ཚོ་རྒྱུན་དུ་སྤྱི་ཚོགས་འབྲེལ་འདྲིས་བྱེད་གནས་དང་། ལྷག་པར་དུ་གྲོགས་པོ་འདུ་འཛོམས་དང་རོལ་རྩེད་བྱེད་གནས་སུ་ཐ་མག་འཐེན་པའི་བྱ་སྤྱོད་ལ་འཕྲད་པས། འདི་དག་གིས་ཐ་མག་བསྐྱར་དུ་འཐེན་པའི་ཉེན་ཁ་ཇེ་ཆེར་གཏོང་།

གཞན་ཡང་ཁོ་ཚོའི་སེམས་ཁམས་ལ་འཕར་ཆག་ཅུང་ཆེ་བས། གནོན་ཤུགས་སམ་ཡི་མུག་པའི་སྐབས་སུ་ཐ་མག་ལ་བརྟེན་ནས་དེ་སེལ་བར་འདོད། དེར་བརྟེན། ན་གཞོན་ཚོས་ཐ་མག་གཅོད་པར་རོགས་རམ་བྱེད་ཆེད། ཐ་མག་མེད་པའི་ཁོར་ཡུག་བསྐྲུན་རྒྱུ་དང་སེམས་ཁམས་ཀྱི་རྒྱབ་སྐྱོར་ལ་བརྟེན་ནས་ཐ་མག་བསྐྱར་འཐེན་གྱི་གོ་སྐབས་ཇེ་ཉུང་དུ་གཏོང་དགོས།

གཉིས། དར་མས་ཐ་མག་གཅོད་པ།

དར་མའི་ངོས་ནས་བཤད་ན། ཐ་མག་གཅོད་ཐུབ་པ་ནི་ཁྱིམ་ཚང་གི་རྒྱབ་སྐྱོར་དང་འབྲེལ་བ་དམ་ཟབ་ལྡན། ཞིབ་འཇུག་བྱས་པ་ལས་ཤེས་རྟོགས་བྱུང་བ་ལྟར་ན། གཉེན་སྒྲིག་བྱས་པའམ་ཁྱིམ་ཚང་གི་འགན་འཁྲི་ཡོད་པའི་དར་མ་རྣམས་ཀྱིས་ཐ་མག་གཅོད་སླ། དེའི་རྒྱུ་རྐྱེན་ཅི་ཡིན་ཞེ་ན། ཁོ་ཚོས་ཐ་མག་བཅད་ནས་ཁྱིམ་མིར་སྔར་ལས་བདེ་ཐང་གི་འཚོ་བའི་ཁོར་ཡུག་བསྐྲུན་འདོད་པས་རེད།

འོན་ཀྱང་དར་མ་རྣམས་ལ་ཡང་ལས་ཀ་དང་འཚོ་བའི་གནོན་ཤུགས་ཀྱི་འགྲན་སློང་ཉིས་བརྩེགས་འཕྲད་ཡོད་པས། རྒྱུན་དུ་བྲེལ་འཚུབ་ཆེ་བའི་ཉིན་རེའི་ལས་རིམ་ཁྲོད་དུ་ཐ་མག་གཅོད་པའི་འཆར་གཞི་སྣང་མེད་དུ་འཇོག་བཞིན་ཡོད། ཐ་མག་གཅོད་པ་ལེགས་འགྲུབ་བྱུང་ཚད་ཇེ་མཐོར་གཏོང་ཆེད། དར་མ་རྣམས་ལ་ཁྱིམ་མི་དང་གྲོགས་པོས་སྐུལ་ལྕག་བྱ་དགོས། དེ་མིན་ཆེད་ལས་ཀྱི་ཐ་མག་གཅོད་པའི་ཞབས་ཞུར་བརྟེན་ནས་གནོན་ཤུགས་དང་དབྱིངས་ཞུགས་པའི་གནད་དོན་ལ་ལྟ་སྐུལ་བྱས་ཆོག

གསུམ། རྒན་པས་ཐ་མག་གཅོད་པ།

རྒན་པ་མང་བོས་ཐ་མག་གཅོད་པ་ལ་དོན་སྙིང་མེད་པར་འདོད་པར་མ་ཟད། ཚད་བརྒལ་གྱི་དབྱིངས་ཞུགས་པའི་སེམས་ཁྲལ་དང་ལོ་མང་བོའི་རིང་ཐ་མག་འཐེན་པའི་གོམས་གཤིས་ཀྱིས་ཐ་མག་གཅོད་པའི་སེམས་ཐག་གཅོད་དཀའ་བར་གྱུར་ཡོད།

དེ་མིན། ཁོ་ཚོས་ལུས་པོ་སླར་གསོ་མི་ཐུབ་པར་འདོད་པས། ཐ་མག་གཅོད་པའི་སྒུལ་ཤུགས་མེད། དེར་བརྟེན། རྒན་པ་རྣམས་ལ་ཐ་མག་གཅོད་པར་རོགས་རམ་བྱེད་དུས། ཐ་མག་བཅད་ན་དུས་ཡུན་ཐུང་ངུའི་ནང་བདེ་ཐང་ལ་ཕན་པ་ཡོད་པ་ནན་བཤད་བྱ་དགོས་པར་མ་ཟད། ཁྱིམ་ཚང་དང་སྨན་བཅོས་ཀྱི་རྒྱབ་སྐྱོར་ལ་བརྟེན་ནས་རྒྱུན་དུ་སྐུལ་མ་བྱ་དགོས།

ཐ་མག་གཅོད་ཐུབ་པ་ནི་མི་སྒེར་གྱི་ཆོད་སེམས་ལ་རག་ལས་པར་མ་ཟད། ད་དུང་ཁྱིམ་ཚང་དང་། སྤྱི་ཚོགས་ཁོར་ཡུག སེམས་ཁམས་ཀྱི་རྒྱབ་སྐྱོར་བཅས་ལ་བརྟེན་དགོས། དུས་ནམ་ཞིག་ལ་ཐ་མག་གཅོད་ཀྱང་། རྒྱུན་མཐུད་ཀྱི་སྐུལ་མ་དང་རྒྱབ་སྐྱོར་བྱས་ཚེ། གཞི་ནས་ཐ་མག་གི་དབྱིངས་ཞུགས་པ་ལས་རྣམ་པར་རྒྱལ་ཏེ་སྔར་ལས་བདེ་ཐང་གི་འཚོ་བ་རོལ་ཐུབ།