2025ལོའི་རྐང་ཚའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་དང་རིག་གནས་གནས་སྐོར་དྲིལ་སྒྲོག་མཚམས་སྦྱོར་ཚོགས་འདུ་དང་མཚོ་སྔོན་པོ་རྩྭ་ཐང་གི་དགུན་ཤའི་འདུ་འཚོང་བྱེད་སྒོ་སྐབས་བཞི་པ་རྒྱལ་ཁའི་ངང་འཚོགས།

རྩོམ་སྒྲིག སངས་རྒྱས་སྐྱིད། ཡོང་ཁུངས། རྐང་ཚ་རྫོང་མི་རིགས་སྐད་ཡིག་ལས་དོན་ལྟེ་གནས། བཤེར་འབེབས། རིན་ཆེན་ཚེ་རིང་།

ཟླ11པའི་ཚེས8ཉིན། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་ཨུ་དང་རྫོང་མི་དམངས་སྲིད་གཞུང་གིས་གཙོ་གཉེར་བྱས་པའི་རྐང་ཚའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་དང་རིག་གནས་གནས་སྐོར་དྲིལ་སྒྲོག་མཚམས་སྦྱོར་ཚོགས་འདུ་དང་མཚོ་སྔོན་པོ་རྩྭ་ཐང་གི་དགུན་ཤའི་འདུ་འཚོང་བྱེད་སྒོ་སྐབས་བཞི་པ་ཟི་ལིང་གྲོང་ཁྱེར་མཁར་བྱང་ཁུལ་པེ་ཁྲོན་ཆིན་ཐང་ཚ་གཡོལ་གྲོང་རྡལ(པེ་ཁྲོན་ཝན་ཏ)དུ་རྒྱལ་ཁའི་ངང་འཚོགས། བྱེད་སྒོས“རྐང་ཚའི་ལེགས་འདེམ། ཟི་ལིང་ལྷན་འཛོམས”དཀྱིལ་སྙིང་དུ་བཟུང་སྟེ། མཚོ་སྔོན་པོ་རྩྭ་ཐང་དང་ཟི་ལིང་གི་ཁྲོམ་ར་བར་གྱི་མཉམ་ལས་བདེ་བླག་ངང་བསྐྲུན་ནས་ཞིང་ཕྱུགས་ཐོན་རྫས་ཁྱབ་སྤེལ་དང་རིག་གནས་གནས་སྐོར་ཟོང་རྟགས་ཁྱབ་སྤེལ་ཕྱོགས་གཉིས་ཚད་བརྒལ་མངོན་འགྱུར་བྱུང་ཡོད།

བྱེད་སྒོས“སྐྱེ་ཁམས་སྔོན་ལ་འཇོག་པ་དང་སྤུས་ཚད་གཙོར་འཛིན”གྱི་འདུ་ཤེས་རྒྱུན་མཐུད་བྱས་ཏེ། ཞིང་ཆེན་ལྟེ་བའི་གྲོང་ཁྱེར་གྱི་དགེ་མཚན་ལ་བརྟེན་ནས“དྲ་ཐོག་དང་དྲ་ཕྱི”དང་། “ཁོངས་ནང་དང་ཁོངས་ཕྱི”ཡི་ཁྱབ་སྤེལ་བྱེད་སྟངས་བརྒྱུད་དེ། རྐང་ཚའི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་དང་ཁྱད་ཆོས་ལྡན་པའི་གནས་སྐོར་ཐོན་ཁུངས་ལ་འགྲེམས་སྟོན་དང་སྤེལ་རེས་ལས་སྟེགས་བསྐྲུན་ནས་ཐོན་ལས་འཕེལ་རྒྱས་ཀྱི་ཕན་ཚུན་སྐུལ་སྤེལ་དང་ཕན་ཚུན་མཉམ་འདྲེས་ལ་སྐུལ་འདེད་བཏང་སྟེ་མཉམ་ལས་ཀྱི་བར་སྟོང་ཐུན་མོང་གིས་རྒྱ་ཆེར་བསྐྱེད་ཡོད།

མཚམས་སྦྱོར་ཚོགས་འདུའི་ཡུལ་དངོས་སུ་ཁྱད་ཆོས་ལྡན་པའི་རིག་རྩལ་འཁྲབ་སྟོན་དང་ཞིང་ལས་གནས་སྐོར་མཚམས་སྦྱོར། ཡུལ་དངོས་ཐད་གཏོང་སོགས་ཡོད་པ་དང་། དེ་དག་དང་ཟི་ལིང་དུ་ཡོད་པའི་རྐང་ཚ་རྫོང་གི་མཚོ་སྔོན་པོའི་སྐམས་ལུག་ཤ་ཐད་གཉེར་ཚོང་ཁང་གི་བྲིན་ཚོང་བྱེད་སྒོ་དུས་མཉམ་དུ་སྤེལ་བཞིན་ཡོད། བྱེད་སྒོ་སྤེལ་ཡུལ་དུ་ཐོན་རྫས་འགྲེམས་སྟོན་ཁུལ་དང་ཞིམ་ཟས་མྱོང་རོལ་ཁུལ། ཉམས་ལེན་ཁུལ། རྩྭ་ཐང་འབྲོག་པའི་རིག་གནས་ཉམས་ལེན་ཁུལ་བཅས་བཙུགས་ཡོད་ལ། ཁྱོན་སྡོམ་ཁེ་ཚོང་ལས་གཉེར་མཁན36གིས་ཞིང་ཕྱུགས་ཐོན་རྫས་དང་རིག་གནས་གསར་གཏོད་ཐོན་རྫས། གཟུགས་མེད་རིག་གནས་ཤུལ་བཞག་ཐོན་རྫས། ཁྱད་ཆོས་ལྡན་པའི་ཞིམ་ཟས་སོགས་ཐོན་རྫས་རིགས300ལྷག་ཙམ་གཅིག་སྡུད་འགྲེམས་སྟོན་དང་འགྲེམ་འཚོང་བྱས་པ་དང་། དེའི་ནང་རྒྱལ་ཁབ་ས་ཁུལ་མཚོན་རྟགས་ཐོབ་པའི“རྐང་ཚ་མཚོ་སྔོན་པོའི་བོད་ལུག”དང“རྐང་ཚ་མཚོ་སྔོན་པོའི་ནོར་གནག”དང་། ཞང་ཀང་གི་སྤུས་ལེགས“དངོས་དཔང”ཐོབ་པའི་སྐམས་ཤའི་ཐོན་རྫས། དེ་བཞིན་ནོར་གནག་གློ་སྙིང་མཆིན་པའི་འཚོ་བཅུད་ཐའེ་སོགས་ཚུད་ཡོད། བྱེད་སྒོ་སྤེལ་ཡུལ་དུ་མི་ཚོགས་ཀྱིས་ཁེངས་པ་དང་སྐྱེ་ལྡན་ནོར་ལུག་ཤའི་འགྲེམས་སྟོན་དང་ཡུལ་དངོས་ནས་ལག་འཐག་རྩམ་པ་འཐག་པ། བོད་ལུགས་ཤ་མོག་མྱོང་རོལ་སོགས་ཀྱི་བྱ་འགུལ་ཡོད་པས་གྲོང་མི་མང་པོ་ཞིག་གི་ཡིད་དབང་བཀུག་ཡོད། དེ་དང་ཆབས་ཅིག་བཤེར་རིས་བརྒྱུད“དྲ་ཐོག་ནས་མངག་ཉོ་དང་ཐོན་ཁུལ་ནས་ཐད་ཀར་མཁོ་སྤྲོད་བྱེད་པའི”ཞབས་ཞུས་རྩྭ་ཐང་གི་སྤུས་ལེགས་ཐོན་རྫས་ཅོག་ཙེའི་སྟེང་དུ་ཐད་ཀར་སླེབས་ཐུབ་པར་སྐུལ་འདེད་བཏང་། བྱེད་སྒོའི་ཉིན་དེར་འགྲེམས་ཚོང་ཁེ་ཚོང་ལས་ཀྱི་གཉེར་སྐྱོང་བྱེད་པོ36གི་ཕྱིར་འཚོང་སྡོམ་འབོར་སྒོར་ཁྲི667.28ཟིན་ཡོད།

ཐེངས་འདིའི་མཚམས་སྦྱོར་ཚོགས་འདུ་ནི་རྐང་ཚ་རྫོང་གི་ཁྱད་ཆོས་ལྡན་པའི་ཞིང་ཕྱུགས་ཐོན་རྫས“ཕྱི་རོལ་དུ་བསྐྱོད་པའི”བྱེད་ཐབས་གལ་ཆེན་ཞིག་ཡིན་པ་དང་། ས་གནས་གཉིས་ཀྱི་ཐོན་ལས་མཉམ་ལས་གཏིང་ཟབ་ཏུ་བཏང་བ་མ་ཟད། ཟི་ལིང་གྲོང་མིར་ལྗང་མདོག་བདེ་ཐང་ཟས་རིགས་འདོན་སྤྲོད་བྱས་ཏེ། ས་གནས་གཉིས་ཀྱིས་ལག་གདང་སྦྲེལ་ནས་ཐུན་མོང་འཕེལ་རྒྱས་གཏོང་བར་མགོ་ཡག་པོ་བཙུགས་ལ། དེ་དང་ཆབས་ཅིག་རྐང་ཚས“ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱེད་ཡུལ”བསྐྲུན་པ་དང་ཕྱོགས་ཡོངས་ནས་གྲོང་གསེབ་དར་སྤེལ་ལ་སྐུལ་འདེད་གཏོང་བར་སྒུལ་ཤུགས་གསར་པ་བསྣན་ཏེ། རྐང་ཚ་རྫོང་གི་ཞིང་ཕྱུགས་ལས་ཕན་འབྲས་དང་ཞིང་འབྲོག་པའི་ཡོང་འབབ་འཕར་སྣོན། ཞིང་འབྲོག་ཁུལ་གྱི་དཔལ་འབྱོར་དང་སྤྱི་ཚོགས་ཀྱི་སྤུས་ཚད་མཐོ་བའི་འཕེལ་རྒྱས་བཅས་ལ་སྔར་ལས་སྐུལ་འདེད་བཏང་ཡོད། 

མ་འོངས་པར་རྐང་ཚ་རྫོང་གིས་ཐེངས་འདིའི་མཚམས་སྦྱོར་ཚོགས་འདུ་གོ་སྐབས་སུ་བརྩིས་ཏེ། རྫོང་ཡོངས་ཀྱི་ཐོན་ཁུངས་དང་ཐོན་ལས་འཕེལ་རྒྱས་ཀྱི་དགེ་མཚན་ལ་བརྟེན་ནས། མཚོ་སྔོན་གྱི“གནས་མཆོག་མཚོ་སྔོན·མཐོ་སྒང་ལེགས་རྫས”དང་མཚོ་བྱང་གི“མདོ་ལ་རི་བོའི་འདབས་རོལ་གྱི་ཕྱུགས་ར་བཟང་པོའི”མངའ་ཁུལ་གྱི་སྤྱི་སྤྱོད་ཟོང་རྟགས་བེད་སྤྱོད་གང་ལེགས་བྱས་ཏེ། ཕྱོགས་ཡོངས་ནས་ཚོང་གཉེར་ཉམས་ལེན་དང་དྲིལ་སྒྲོག་མཚམས་སྦྱོར་སྤེལ་ཏེ།“རྐང་ཚ་མཚོ་སྔོན་པོའི་ནོར་གནག་དང་རྐང་ཚ་མཚོ་སྔོན་པོའི་བོད་ལུག”གི་ཟོང་རྟགས་ཀྱི་སྐད་གྲགས་ཆོད་ཚད་དང་ཁྲོམ་རའི་འགྲན་རྩོད་ནུས་པ་སྔར་ལས་ཇེ་ཆེར་གཏོང་བ་དང་། ལྗང་མདོག་དང་སྐྱེ་ལྡན། བདེ་འཇགས་ཀྱི་སྤུས་ལེགས་ཐོན་རྫས་མཁོ་སྤྲོད་བྱས་ཏེ། མུ་མཐུད་དུ་ཞིང་ཕྱུགས་ཐོན་ལས་ཀྱི་སྤུས་ཚད་ཇེ་བཟང་དང་ཕན་འབྲས་ཇེ་ཆེར་གཏོང་བར་སྐུལ་འདེད་བཏང་སྟེ། ལམ་ཁ་གསར་པ་རུ་རྐང་ཚའི་སྐྱེ་ཁམས་ཞིང་ཕྱུགས་ལས་ཀྱི་རྣམ་པ་བསྒྱུར་བའི་འཕེལ་རྒྱས་ཀྱི་ལེའུ་གསར་པ་ཧུར་ཐག་གིས་རྩོམ་རྒྱུ་ཡིན།