མདའ་བཞི་རྫོང་གིས་ལུས་རྩལ་དང་གནས་སྐོར་མཉམ་འདྲེས་ཀྱི་རྐང་ཐང་འགྲན་སྡུར་སྤེལ་བ།

རྩོམ་སྒྲིག  ཀླུ་མོ་མཚོ།   ཡོང་ཁུངས། མདའ་བཞི་རྫོང་མི་རིགས་སྐད་ཡིག་ལས་དོན་ལྟེ་གནས།   བཤེར་འབེབས། རིན་ཆེན་ཚེ་རིང་།

ཟླ11ཚེས18ཉིན་མཚོ་བྱང་བོད་རིགས་རང་སྐྱོང་ཁུལ་མདའ་བཞི་རྫོང་ཨུ་དང་རྫོང་སྲིད་གཞུང་གིས་གཙོ་སྒྲུབ་དང་། མཚོ་སྔོན་པོ་ཡུལ་ཚོ་མི་དམངས་སྲིད་གཞུང་དང་མདའ་བཞི་རྫོང་རིག་གནས་ལུས་རྩལ་རྒྱང་སྒྲོག་བརྙན་འཕྲིན་ཅུ་ཡིས་འགན་སྒྲུབ་བྱས་པའི“མདའ་བཞི་རྫོང་གི2024ལོའི་སྐྱེ་ཁམས་ཁོར་ཡུག་སྲུང་སྐྱོང་དང་དགུན་དུས་མཚོ་སྐོར་མཛེས་ལྗོངས་མྱོང་རོལ་གྱི་རྐང་ཐང་འགྲན་སྡུར”དེ་བྱེ་མ་ལ་བདུན་གྱི་མཚོ་གཟིགས་སྒར་འདེབས་རྟེན་གཞིར་བདེ་བླག་ངང་སྤེལ་བ་དང་། ཐེངས་འདིར་རྐང་ཐང་ལུས་རྩལ་ལ་དགའ་མོས་ཡོད་པའི་མི་སྣ200ལྷག་འགྲན་སྡུར་ལ་ཞུགས་ཡོད།

རྐང་ཐང་འགྲན་སྡུར་བྱེད་བཞིན་པ། མདའ་བཞི་རྫོང་ཨུའི་དྲིལ་སྒྲོག་པུས་མཁོ་འདོན་བྱས།

འགྲན་སྡུར་གྱི་ལམ་ཐིག་ནི་མཚོ་སྔོན་པོའི་སྐྱེ་ཁམས་གནས་སྐོར་ཁུལ་ལ་དམིགས་ནས་ཇུས་འགོད་བྱས་པ་དང་། ལུས་རྩལ་པ་དག་གིས་བྱེ་མ་ལ་བདུན་གྱི་མཚོ་གཟིགས་སྒར་འདེབས་རྟེན་གཞི་ནས་མགོ་བརྩམས་ཏེ་ལམ་བར་ནས་ལྷིང་འཇགས་དང་སྔོ་ལྗང་གི་མཚོ་སྔོན་པོར་བལྟས་བྱས་ཆོག་པ་དང་། རིམ་བཞིན་བརྗིད་ཆགས་ལྷུན་གྱིས་གྲུབ་པའི་སྨོན་ལམ་མཐོན་པོའི་འདབས་རོལ་བརྒྱུད་དེ། སྒར་གཞི་བཅུ་གཉིས་པའི་གནས་རྙིང་དུ་འགྲན་སྡུར་མཇུག་སྒྲིལ་བར་བྱས་ཡོད། ཐེངས་འདིའི་བྱ་འགུལ་ནི་རྐང་ཐང་ལུས་རྩལ་འགྲན་སྡུར་རྐྱང་རྐྱང་ཙམ་ཞིག་མ་ཡིན་པར། མདའ་བཞིའི་སྣ་མང་རིག་གནས་དང་སྐྱེ་ཁམས་གནས་སྐོར་ཐོན་ཁུངས་དྲིལ་སྒྲོག་བྱེད་པར་ཕན་ནུས་ཆེ་བའི་རིག་གནས་ཀྱི་འགྲེམ་སྟོན་ཞིག་ཀྱང་ཡིན།

མགོ་རྩོམ་མཛད་སྒོའི་ཐོག་སྐར་ལྔའི་དར་དམར་ཆེན་པོ་བསྒྲེངས་བ། མདའ་བཞི་རྫོང་ཨུའི་དྲིལ་སྒྲོག་པུས་མཁོ་འདོན་བྱས།

རྒྱུས་ལོན་པ་ལྟར་ན། ཉེ་བའི་ལོ་འགའི་རིང་མདའ་བཞི་རྫོང་གིས་བློ་བརྟན་འགྱུར་མེད་ངང་སྐྱེ་ཁམས་སྔོན་སྤེལ་དང་ལྗང་མདོག་འཕེལ་རྒྱས་ཀྱི་བགྲོད་ལམ་དུ་བསྐྱོད་དེ་ལུས་རྩལ་དང་གནས་སྐོར། སྐྱེ་ཁམས་བཅས་ཟུང་འབྲེལ་དམ་ཟབ་བྱ་རྒྱུར་སྐུལ་འདེད་བཏང་བ་བརྒྱུད་ནས། “ལུས་རྩལ་འགྲན་སྡུར+སྐྱེ་ཁམས་གནས་སྐོར”མཉམ་འདྲེས་ངང་འཕེལ་རྒྱས་གཏོང་སྟངས་ལ་སྐུལ་འདེད་བཏང་སྟེ། “མཛེས་ལྗོངས་ལ་བརྟེན་ནས་འགྲན་སྡུར་ལ་སྣེ་ཁྲིད་པ་དང་འགྲན་སྡུར་ལ་བརྟེན་ནས་གནས་སྐོར་ལ་སྐུལ་འདེད་གཏོང་བའི”གནས་སྐོར་འཕེལ་རྒྱས་ཀྱི་རྣམ་པ་གསར་པ་ཞིག་སྐྲུན་བཞིན་ཡོད་དེ། བྱེ་མ་ལ་བདུན་གྱི་མཚོ་གཟིགས་སྒར་འདེབས་རྟེན་གཞི་ནས་སྒར་གཞི་བཅུ་གཉིས་པའི་གནས་རྙིང་བར་གྱི་གཞུང་ལམ་དེ“ལུས་རྩལ་དང་གནས་སྐོར”གཉིས་ཉམས་སུ་མྱོང་བའི་ཐུན་མོང་མ་ཡིན་པའི་སྐྱེ་ཁམས་ལམ་ཐིག་ཅིག་ཏུ་བསྒྱུར་ནས། གནས་སྐོར་བ་སྔར་ལས་མང་པོ་གནས་འདི་རུ་སླེབས་ནས་མཚོ་སྔོན་པོའི་རི་ཆུའི་མཛེས་སྡུག་ལ་མྱོང་རོལ་དང་ནུབ་མཚོ་གནའ་མཁར་དུ་གནའ་བོའི་དངུལ་ལོར་ལམ་ལུགས་སྒྱུར་བཅོས་ཀྱི་ལོ་རྒྱུས་རྗེས་ཤུལ་འཚོལ་བ། “མདེལ་གཉིས་སྐར་གཅིག”གི་སྙིང་སྟོབས་ཀྱི་མཐོ་ས་ནས་གསར་བརྗེའི་སྔོན་གཤེགས་དཔའ་བོའི་རྒྱལ་གཅེས་བརྩེ་སེམས་ཉམས་སུ་མྱངས་ཆོག

འགྲན་ཞུགས་ལུས་རྩལ་པས་མདོང་མཆོང་བྱེད་བཞིན་པ། མདའ་བཞི་རྫོང་ཨུའི་དྲིལ་སྒྲོག་པུས་མཁོ་འདོན་བྱས།

བྱ་དགའ་ཐོབ་པའི་ལུས་རྩལ་པ། མདའ་བཞི་རྫོང་ཨུའི་དྲིལ་སྒྲོག་པུས་མཁོ་འདོན་བྱས།