མཱོ་ནན་རིགས།

མཱོ་ནན་རིགས（毛南族）ནི་གཙོ་བོ་ཀོང་ཞི་ཧོན་ཅང་རྫོང་གི་ལྷོ་རྒྱུད་ཀྱི་རི་ཁུལ་དུ་འདུས་སྡོད་བྱས་ཡོད། མི་རིགས་རང་གིས་རང་ལ“ཨ་ནན”ཞེས་འབོད་པ་དང་། 1986ལོའི་ཟླ6པར་མཱོ་ནན་རིགས་ཞེས་བསྒྱུར། ཁྱོན་སྡོམ་མི་གྲངས101190ལྷག་ཡོད། ཁོ་ཚོར་རང་མི་རིགས་ཀྱི་ཡི་གེ་མེད་པས་རྒྱ་ཡིག་བཀོལ་སྤྱོད་བྱེད་བཞིན་ཡོད། ཕལ་ཆེ་བས་ཀྲོང་རིགས་ཀྱི་སྐད་དང་རྒྱ་སྐད་བཤད་ཤེས། 

མཱོ་ནན་རིགས་ཀྱི་སྐྱེས་པ་ཚོས་གཞུང་གཤགས་སྟོད་ལྭ་དང་རྐང་སྣམ་རིང་བོ་གོན་པ་དང་། སྐྱེས་མ་ཚོས་གཡས་གཤགས་སྟོད་ལྭ་དང་རྐང་སྣམ་རིང་བོ་གོན། ཕུར་ཁ་དང་རྐང་སྣམ་གྱི་འདབས་སུ་རས་མདོག་དམར་ལྗང་ནག་གསུམ་གྱིས་ཤན་ཡོད་ཅིང་། སྤྱིར་བཏང་དུ་སྨྱུག་མས་སླས་པའི་ཞྭ་གོན་པར་དགའ། 

མཱོ་ནན་རིགས་ཀྱི་ངག་ཐོག་རྩོམ་རིག་ལ་དམངས་གླུ་དང་ལྷ་སྒྲུང་། ངག་རྒྱུན། གཏམ་རྒྱུད་སོགས་ཡོད། དར་ཁྱབ་ཆེ་བའི་ལྷ་སྒྲུང《ཕན་ཀུའུ་ཡི་གཏམ་རྒྱུད》དང《སྨྱུག་ཞྭ་ཁྲ་ཁྲའི་གཏམ་རྒྱུད》སོགས་ཀྱིས་མཱོ་ནན་རིགས་ཀྱི་ངལ་རྩོལ་མི་དམངས་ཀྱི་འཚོ་བའི་བརྒྱུད་རིམ་མཚོན་ཡོད་པར་མ་ཟད། སྤྱི་ཚོགས་རིང་ལུགས་ཀྱི་འཚོ་བ་གསར་པ་ལའང་བསྟོད་བསྔགས་མཛད་ཡོད། དེ་མིན་གླུ་དབྱངས་ལེན་པ་ནི་མཱོ་ནན་རིགས་ཆེས་དགའ་བའི་རོལ་རྩེད་བྱ་འགུལ་ཞིག་ཡིན་ལ། མང་ཆེ་བ་གཉེན་སྟོན་དང་དགའ་སྟོན་གྱི་དུས་ཆེན་སྟེང་དུ་ཕོ་མོ་ཕན་ཚུན་བར་དུ་ལེན་རེས་བྱེད་པ་ཞིག་ཡིན། གཞན་ཡང་མཱོ་ནན་རིགས་ཀྱི་བརྐོས་རིས་དང་འཁེལ་འཐག་གི་ལག་ཤེས་ལ་རང་མི་རིགས་ཀྱི་ཐུན་མོང་མ་ཡིན་པའི་ཁྱད་ཆོས་ལྡན་པས། མང་ཚོགས་རྣམས་དེར་ཧ་ཅང་དགའ། 

མཱོ་ནན་རིགས་ལ་རོ་བཅུད་ཕུན་སུམ་ཚོགས་པའི་མི་རིགས་རང་ཉིད་ཀྱི་ཟ་མ་མང་བོ་ཡོད་ལ། ཁོ་ཚོས་ཕག་ཤ་དང་བྱ་ཤ་སོགས་ཟ་བ་ལས་གཞན་ད་དུང་ཁྱི་ཤ་ཟ་རྒྱུར་ཧ་ཅང་དགའ། 

ལོ་རེའི་ལུགས་རྙིང་གི་ཟླ་ལྔ་བའི་ནང་མཱོ་ནན་རིགས་ཀྱིས་རང་གི་སྲོལ་རྒྱུན་གྱི་དུས་ཆེན་ཏེ་ལྷ་མཆོད་དུས་ཆེན་ལ་རོལ་བཞིན་ཡོད། ཉིན་དེར་སྐྱེས་ཕོ་མོ་རྒན་གཞོན་ཚང་མས་གཟབ་འཆོར་སྤྲས་ཏེ་ཕན་ཚུན་གྱི་ཁྱིམ་དུ་འགྲོ་བ་དང་དགའ་སྟོན་གྱི་དུས་ཆེན་ཅི་དགར་རོལ། ལུས་རྩལ་བྱ་འགུལ་དུ་མིག་མང་རྩེ་སྲོལ་ཡོད་ཅིང་། རྩེ་ཚུལ་ལའང་རིགས་སྣ་ཚོགས་ཡོད།