དཔེ་ཀློག་གི་ཐབས་ཚུལ་མཆོག་གྱུར་བཅུ་ལྡན་བཞུགས།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། དྭངས་རྩེ་དཔེ་ཤག་འཕྲིན་སྟེགས། བཤེར་འབེབས། རིན་ཆེན་ཚེ་རིང་།

༡  དམིགས་འབེན་གསལ་བོ་དགོས་པ།

དཔེ་ཆ་མ་བཀླག་པའི་སྔོན་དུ། ཁྱོད་ཀྱིས་དཔེ་ཆའི་ནང་ནས་ཅིས་ཀྱང་དགོས་ངེས་ཀྱི་ཤེས་བྱ་ཅི་ཞིག་འཐོབ་པར་རེ་བ་གསལ་ཐག་ཆོད་པ་ཐོན་དགོས། དཔེར་ན། དོན་དག་ག་གེ་མོ་ཞིག་གི་གཞི་རྩའི་གོ་དོན་དང་ལག་རྩལ་གསར་བ་ཞིག་ལ་སློབ་སྦྱོང་བྱེད་པ་སོགས་ཡིན། དེས་ཁྱོད་ལ་ནན་ཏན་དང་བློ་རྩེ་གཅིག་སྒྲིམ་བྱེད་དུ་འཇུག་པ་དང་ཁ་ཕྱོགས་མི་གསལ་བའི་དཔེ་ཀློག་ལ་རོགས་འདེགས་བྱེད་ཐུབ་པ་དང་། དེ་བཞིན་དཔེ་དེབ་བཀླག་པར་འཆར་ཇུས་རང་བཞིན་ལྡན་པར་བྱེད་ཐུབ་པ་ཡིན།

 ༢   དཔེ་ཆར་སྔོན་ལ་ཇི་ལྟར་བལྟ་བ།

དཔེ་ཀློག་དངོས་ལ་མ་འཇུག་སྔོན་དུ་ཆེས་ཐོག་མར་དཔེ་ཆའི་དཀར་ཆག་དང་། ས་བཅད། མཇུག་བསྡུ་བ། ལེའུ་སོ་སོ་བཅས་ལ་བལྟ་དགོས། དེ་ལྟར་བྱས་ན་ཁྱོད་ཀྱིས་དཔེ་ཆའི་ནང་དོན་གྱི་གནས་ལུགས་གྲུབ་ཚུལ་དང་ལྟ་བའི་གནད་རེ་རེར་རྒྱུས་ལོན་བྱེད་པར་རོགས་རམ་གང་འཚམ་རེ་བྱེད་ཐུབ་པར་འགྱུར་བ་དང་། དཔེ་ཆ་ཧྲིལ་བོའི་དོན་སྤྱི་སྒྲོམ་གཞི་གཅིག་ཏུ་ངེས་པ་དང་། དེར་མཐུད་ཞིབ་ཚགས་དང་ནན་ཏན་སྒོས་རིག་པའི་རྨང་གཞི་འདིང་དགོས་པ་ཡིན།

༣ .མྱུར་ཀློག་གི་ཐབས་རྩལ་བཀོལ་བ།

གཙོ་བོ་བརྗོད་དོན་གྱི་གཙོ་ཚིག་དང་། གནད་འགངས་ཆེ་བའི་ཚིག་དང་དཔེ་རིས་སོགས་ལ་དོ་སྣང་བྱས་ཏེ།ནང་དོན་དང་གནད་ཆེའི་ཤེས་བྱ་མགྱོགས་མྱུར་ངང་ཐོབ་པར་བྱེད་པ་དང་། གལ་ཆུང་དུ་སྙམ་པའི་ནང་དོན་ལ་རགས་བལྟ་དང་བམ་ཀློག་རེ་བྱས་པས་འཐུས་པ་ཡིན། 

རགས་ཀློག་ནི་གདམ་ག་ཡོད་པའི་སྒོ་ནས་དམིགས་བསལ་གྱི་ཤེས་བྱའི་ཆ་འཕྲིན་འཚོལཐབས་ལ་བྱ་སྟེ། དཔེར་ན། སློབ་ཁྲིད་ཀྱི་རྒྱུ་ཆ་འཚོལ་བ་དང་།  གཞན་དུ་ལྟ་བ་དང་དགོངས་དོན་ག་གེ་མོ་ཞིག་གི་ལངས་ཕྱོགས་བཙལ་ནས་སོ་སོའི་དམིགས་བསལ་གྱི་དགོས་མཁོ་སྐོང་ཐབས་ལ་འབད་དགོས།

༤.ཟིན་བྲིས་བྲི་བ་དང་རྟགས་འདེབས་པ།

དཔེ་ཀློག་བྱེད་སྐབས། དཔེ་ཆའི་ནང་དུ་གལ་ཆེའི་ཚན་པ་དང་ལྟ་བའི་གནད་འགངས་ཆེན་དག་ཏུ་རྟགས་འདེབས་པའམ་ཡང་ན་ཟིན་ཐོར་འགོད་པ་དང་། དེས་རང་ཉིད་ཀྱི་ཚོར་བ་དང་བསམ་གཞིགས་ཀྱི་རྒྱ་བསྐྱེད་པའི་བོགས་ཐོན་པར་བྱེད་པ་ཡིན།
ཚོན་མདོག་མི་འདྲ་བའི་སྨྱུ་གུ་རེ་སྤྱད་དེ་རིགས་དབྱེ་མི་མཐུན་པའི་གནད་རེ་རེར་རྟགས་འདེབས་དགོས་པ་སྟེ། དཔེར་ན། སྨྱུ་གུ་དམར་པོ་སྤྱད་ནས་དོན་སྤྱི་སྟོན་པའི་ནང་དོན་ལ་རྟགས་འདེབས་པ་དང་། སྨྱུ་གུ་སྔོན་པོ་སྤྱད་དེ་སྒུལ་ཤུགས་བླ་ལྷག་སྩོལ་བའི་ཚིག་གི་མཛེས་པའི་ཆ་དག་ཏུ་རྟགས་འདེབས་པ་སོགས་བྱས་ན་ཕྱིས་སུ་ཡང་བསྐྱར་བསྐྱར་སྦྱོང་ཡང་སྟབས་བདེ་བར་ངེས་པ་ཡིན།

༥.དྲི་བ་འདོན་པ་དང་ལན་འདེབས་པ།

དཔེ་ཀློག་བྱེད་པའི་བརྒྱུད་རིམ་ཁྲོད་དུས་རྟག་ནས་རྟག་ཏུ་དང་རྒྱུན་ཆད་པ་མེད་པར་གནད་དོན་འདོན་པ་སྟེ། དཔེར་ན་ལྟ་བ་འདིའི་གཞི་འཛིན་ས་ནི་ཅི་ཞིག་ཡིན་པ་དང་། བྱེད་ཐབས་འདི་ནི་དོན་དངོས་ཐོག་ཇི་ལྟར་བཀོལ་སྤྱོད་ལག་ལེན་ལ་གཞོལ་དགོས་པ་སོགས་ཀྱི་ཐད་ལ་ཚོད་ལྟ་བྱེད་དགོས་པར་མ་ཟད། དཔེ་ཆའི་ནང་ནས་དྲིས་ལན་ཡང་དག་པར་རྙེད་པར་ཡང་ཅི་ནུས་སྒོས་བརྩོན་དགོས། རང་འགུལ་སྒོས་བསམ་གཞིགས་བྱེད་པའི་ཐབས་ཚུལ་འདིས་གོ་བའི་གཏིང་ལོན་པའི་ནུས་པ་བླ་ལྷག་ཏུ་བསྐྱེད་པར་ཕན་པ་དང་། དཔེ་ཆའི་ནང་དོན་ཉིད་བརྗེད་ངེས་ཀྱིས་མི་འཁྱེར་བའི་བག་ཆགས་ཟབ་མོ་འཇོག་ཐུབ་པ་ཡིན།

༦.ས་བཅད་བགར་ནས་དཔེ་ཀློག་བྱེད་པ།

དཔེ་ཆའི་ནང་དོན་ཁག་ཆུང་ངུ་ནས་ཆུང་ངུར་བགར་ཏེ་ཀློག་པ་དང་། ཀློག་ཐེངས་རེ་རེར་བློ་རྩེ་གཅིག་སྒྲིམ་དང་ནན་ཏན་སྒོས་ནང་དོན་རེ་རེ་བཀླག་དགོས་པ་ཡིན། དེ་ལྟར་བྱས་ན་ཤེས་བྱའི་ཐེག་ཚད་ལས་གཡོལ་ཐུབ་པ་དང་། དེ་བཞིན་ཀླད་པར་ཡང་ཆ་ཤས་རེ་རེའི་ནང་དོན་ལ་གོ་བ་ལེན་ནུས་པའི་དུས་ཚོད་ཀྱི་བར་སྟོང་ཡོད་པ་དང་། དེ་ལྟར་རིམ་པ་དང་རིམ་པས་གོང་དུ་འཕེལ་བར་འགྱུར་བ་དང་། ད་གཟོད་དཔེ་ཆའི་ནང་དོན་ཆ་ཚང་ཁོང་དུ་ཆུད་པ་དང་ནི་བདེ་བླག་ཏུ་རྟོགས་པར་བྱེད་ཐུབ།

༧.བསྐྱར་བཤད་དང་ཕྱོགས་སྡོམ་བྱེད་པ། 

དཔེ་དེབ་བཀླགས་ཟིན་རྗེས། རང་ཉིད་ཀྱི་སྐད་ཆར་བརྟེན་ནས་བསྐྱར་བཤད་དམ་སྤྱི་སྡོམ་ལྟ་བུའི་ཚུལ་དུ་ནང་དོན་གྱི་ཞིབ་ཕྲ་རེ་རེའམ་ཡང་ན་ནང་དོན་རགས་པ་རེ་རེ་གསལ་འདོན་བྱེད་པར་ནུས་ན། དེས་ནི་དྲན་ཤེས་ཀྱི་གཏིང་མཐའ་ཇེ་ཟབ་ཏུ་གཏོང་ཐུབ་པར་མ་ཟད། ད་དུང་ཁྱོད་ཀྱི་ངོས་ཟིན་ཁྲོད་ཀྱི་གནད་དོན་གང་ཉིད་ལ་སྔར་ལས་ལྷག་པའི་སྒོ་ནས་གོ་བ་ཡང་དག་ཏུ་ལེན་ཐུབ་པར་རོགས་རམ་མི་དམན་པ་བྱེད་ཐུབ། གལ་ཏེ། ཆེས་ཁ་གསལ་གཏིང་དཔོག་གི་སྒོ་ནས་ནང་དོན་བཤད་ནུས་ཚེ། དེས་ནི་མི་བརྗེད་པའི་གཟུང་དང་མི་འཇིག་པའི་ཤེས་བྱའི་རྒྱ་མཚོ་ཞིག་བསྐྱིལ་ཐུབ་པར་གྱུར་པའང་ཡིན།

༨. རམ་འདེགས་ཡོ་བྱད་བེད་སྤྱོད་པ།

གློག་རྡུལ་དཔེ་ཆ་དང་སྒྲ་དང་བརྙན་ལྡན་དཔེ་ཆ། ཡང་ན་ལྟ་ཀློག་ཉེར་སྤྱོད་སོགས་གང་རུང་སྤྱོད་ཆོག་པ་ཡིན།ཡོ་བྱད་འདི་དག་གིས་རྒྱུན་པར་དུས་ངེས་མེད་དུ་རོགས་རམ་བྱེད་ནུས་པ་དང་། གཞན་དུ་ཟིན་བྲིས་འདེབས་པ་དང་དགོས་མཁོ་ཆེ་བའི་ནང་དོན་རིགས་འཚོལ་བཤེར་གྱི་ནུས་པ་འདོན་སྤྲོད་བྱས་ནས་ཁྱོད་ཀྱི་ལྟ་ཀློག་གི་ལས་ཆོད་ཇེ་མཐོར་གཏོང་ཐུབ་པ་ཡིན། དཔེར་ན། གློག་རྡུལ་དཔེ་ཆར་སྟབས་བདེའི་སྒོ་ནས་གནད་འགག་གི་ཐ་སྙད་ལ་བརྟེན་ནས་ནང་དོན་སོགས་དགོས་མཁོ་གང་ཞིག་མཆིས་པ་དེ་ཉིད་སྐོང་བའི་ནུས་པ་དམིགས་བསལ་བ་ལྡན་པ་ཡིན། 

༩.དུས་བཅད་ཕྱིར་ལྟ་བྱེད་པ།

དུས་བཅད་ལྟར་ཁྱོད་ཀྱིས་བསླབས་ཟིན་པའི་ནང་དོན་ལ་བསྐྱར་མཇལ་བྱས་ན། དེས་ཁྱེད་ཀྱི་དྲན་ཤེས་སྔར་ལས་ལྷག་པར་སྲ་བརྟན་དུ་གཏོང་བར་རོགས་རམ་བྱེད་ཐུབ། གཟའ་འཁོར་རེར་ནང་དོན་གང་ཉིད་ཕྱིར་དྲན་གྱི་དུས་ཚོད་ཅིག་ངེས་པར་གཏན་ཁེལ་བྱས་ཆོག་པ་དང་། བསྐྱར་དུ་ཟིན་བྲིས་འགོད་པའམ་ཡང་ན་ལེའུ་གལ་ཆེན་དག་ལོགས་སུ་བགར་ཏེ་ལྟ་ཀློག་བྱེད་དགོས་པ། ཤེས་བྱའི་མཐོང་རྒྱ་གསེད་བཀྲོལ་བྱེད་པ་བཅས་ཀྱིས་ནང་དོན་གཙོ་བོ་ཡང་དེ་བཞིན་ཤེས་རྟོགས་ཀྱི་འཕེལ་རིམ་རྒྱས་པར་འགྱུར་བ་ཡིན།

༡༠.ལྟ་ཀློག་ཁོར་ཡུག་ལེགས་པོ་འདེམ་པར་རྒྱུན་འཁྱོངས་བྱེད་དགོས།

ལྷིང་འཇགས་དང་སེམས་ཁམས་སྐྱིད་སྣང་དོད་པའི་ཁོར་ཡུག་ཅིག་བདམས་ནས་ཕྱི་རོལ་ཡུལ་གྱི་བར་ཆད་སོགས་མི་ཡོང་བར་བྱེད་པ་དང་། དེས་ཁྱོད་ཀྱིས་དཔེ་ཀློག་ལ་བཟུང་བའི་རྣམ་འགྱུར་དང་བློ་རྩེ་གཅིག་སྒྲིམ་གྱི་ནུས་པ་ཇེ་མཐོར་གཏོང་ཐུབ་པར་བྱེད་ཅིང་། དེ་དང་མཉམ་དུ། ཆེས་ལེགས་པའི་སྡོད་སྟངས་དང་ནི་ཡང་ན་ཆེས་འཚམ་པར་སྲིད་པའི་འོད་ངོགས་སོགས་གནས་ལེགས་པོ་འདེམ་པ་རྒྱུན་འཁྱོངས་བྱས་ཏེ། ངལ་དུབ་དང་རིང་དུ་གྱེས་པར་བྱེད་དགོས་པ་དང་། རང་ཉིད་ཀྱིས་ཆེས་སྐྱིད་སྣང་དོད་ཤོས་ལྡན་པའི་རྣམ་པར་དཔེ་ཀློག་ཐུབ་པར་བྱེད་པ་དང་། དེ་བཞིན་བགྱིས་ན་དཔེ་ཀློག་གི་སྤུས་ཚད་ཀྱང་ཇེ་བས་ཇེ་མཐོར་གཏོང་ཐུབ་པ་གདོན་མི་ཟ་བ་ཡིན།

  གཡོན་གཞིས་ནོར་སྟོབས་ཀྱིས་བསྒྱུར།