བོད་ཀྱི་བརྡ་སྤྲོད་པའི་བསྟན་བཅོས་ལས་དབྱངས་ཡིག་ངོས་འཛིན་སྐོར།

རྩོམ་སྒྲིག དམ་ཆོས་བསམ་འགྲུབ། ཡོང་ཁུངས། ཀྲུང་གོའི་བོད་རིག་པ། བཤེར་འབེབས། རིན་ཆེན་ཚེ་རིང་།

ནང་དོན་གནད་བསྡུས། བོད་ཀྱི་བརྡ་སྤྲོད་པའི་བསྟན་བཅོས་རྣམས་སུ་དབྱངས་ཡིག་ངོས་འཛིན་གྱི་ཕྱོགས་ལ་བཞེད་ཚུལ་མི་འདྲ་བ་དུ་མ་ཡོད་ཅིང་། མཁས་པ་ཕལ་མོ་ཆེས་སྒྲ་གདངས་དང་ཡིག་གཟུགས་ཀྱི་དབྱངས་གཉིས་སོ་སོར་མ་ཕྱེད་པའི་དབང་གིས་བློ་རྩེ་གཏད་མཚམས་ལ་ངེས་པ་ཡང་དག་པ་ཞིག་མ་རྙེད་པ་དང་འཁྲུལ་གཞི་ཡང་མང་དུ་བྱུང་བར་སྣང་ལ། དཔྱད་རྩོམ་འདིར་དེ་གཉིས་ནོར་སོ་མི་འབྱུང་ཞིང་དབྱངས་ཀྱི་ངོས་འཛིན་གསལ་བར་བྱ་བའི་ཆེད་དུ་ཨི་སོགས་བཞི་ནི་སྒྲ་གདངས་ཀྱི་དབྱངས་ཡིན་པ་དང་། གི་གུ་སོགས་བཞི་ནི་ཡིག་གཟུགས་ཀྱི་དབྱངས་ཡིན་ཞིང་། 《སུམ་ཅུ་བ་》ལས་ཨི་སོགས་བཤད་པ་ཐམས་ཅད་གི་གུ་སོགས་ལ་ཨི་སོགས་ཀྱི་བརྡ་ཆད་བཏགས་པ་ཙམ་ལས་ཨི་སོགས་བཞི་དངོས་གནས་པ་མིན་པ་དང་། སྒྲ་གདངས་ཀྱི་དབང་དུ་བྱས་ན་ཨི་སོགས་བཞིར་མ་ཟད་ཨ་ཡང་དབྱངས་ཡིན་པའི་ཕྱོགས་ལ་ལུང་རིགས་ཀྱི་རྒྱབ་རྟེན་མང་དུ་བཀོད་ནས་བསྒྲུབས་ཡོད།གནད་ཚིག སྒྲ་གདངས་ཀྱི་དབྱངས། ཡིག་གཟུགས་ཀྱི་དབྱངས། ཨི་སོགས་བཞི། གི་གུ་སོགས་བཞི།